Read Western Krahn Iblu 10 Bible Online

Iblu 10 - Western Krahn bible

Iblu 10

¹Mose-a telě nɔ̀ɔ̍, ɛ̍ wɔ̀ dɛ̍ᵻ chɛ̀ ìh-a mu̍-a ji̍-ɛ. Telě la ke dɛ̍ᵻ chɛ̀ nɛ-a dě ja̍i̍wlɔ̀-ɛ se̍ due nɛ. Sɔ nɛ̀ ɛ̍ se̍ nyɔ̍ ùh-a sà-a Nyɔsoa wɛɛ-ɛ nɛi̍ wɔ̀-ɛ bɛ̌ɛ dǒ slaǎ due la u̍h-a sà-a ma̍u̍ ka sɔ̀n-a sǐ-a i̍-ɛ we̍.

²Nyɔ̍ ùh-a sà-a Nyɔsoa wɛɛ-ɛ, pò telě nmɔ-ɛ u̍h dě ɔ̍ jlǐh i̍ de-ɛ, nɛ̀ ɛ̍ se̍ u̍h-a wlùh kǎ mu̍. Nɛ̀ u̍h-a mu̍ slaǎ sà tìh bɔ̌ de.

³Jɛ slaǎ sà-a la ɛ̍-ɛ bo ka sɔ̀n-a sǐ-a i̍-ɛ, ɛ̍ sǐ-i u̍h-a gblɛ̍n sɔ̀ɛ̀n-a tìh dǒ u̍h wlì i̍.

⁴Dɛ̍nu̍ɛ, bliᵻ gblɔ̀ᵻ ke gbàdɔ̍ᵻá nymɔ̍ se̍ gblɛ̍n sɔ̀ɛ̀n-a tìh i̍ wɔ̀-ɛ bɛ̌ɛ.

⁵Ɛ̍ tìh-ɛ, ti̍ Klai-a mu̍-a la̍ nɔ̌ kmɔ̌ la we̍ ji̍-ɛ, iě ɔ̍ la̍a̍ dě Nyɔsoa we̍, “Ìn se̍ slaǎ sà-a ke nyǐ-dɛ̍ᵻ pɔ̀n. Jɛ ìn po̍ ǎn ku̍ gba̍a̍ wɛ̀ ɛ̍ iě slaǎ sà-ɛ.

⁶Àn wlùh se̍ i̍ tè dǒ nyǐ-dɛ̍ᵻ nyɔ̍-a fɔ̍n-aɛ ke gblɛ̍n sɔ̀ɛ̀n-a tìh-a slaǎ-a sà-a we̍.

⁷Wɛ̀ na̍a̍, ‘Mɔ̍ la o Nyɔsoa, ka ɛ̍ nu̍-a chlǐh-ɛ dǒ ǐn dɛ we̍ dě àn wlu̍ di̍i̍-ɛ, ǐn ji̍ wɛ̀ iě àn wlùh nu̍.’ ”

⁸Sàǐtòò-ɛ, ɔ̍ la̍a̍, “Ìh nu̍-a slaǎ sà-a ke, nyǐ-dɛ̍ᵻ nyɔ̍-a fɔ̍n-aɛ ke jih nyɔ̍-ɔ fɔ̍n-aɛ ke, gblɛ̍n sɔ̀ɛ̀n-a tìh-a slaǎ-a sà-a, i̍h se̍ àn wlùh i̍ tè-e, ìn se̍ i̍h pɔ̀n.” Jɛ i̍h bo telě la̍ nyɔ̍ iě nu̍.

⁹Wɛ̀ ɔ̍ la̍a̍, “Mɔ̍ la o Nyɔsoa, ǐn ji̍ wɛ̀ iě àn wlùh nu̍.” Ɛ̍ kɔn Nyɔsoa sà slaǎ sà-a soa naɛ dǒ wìè-i, iě ɔ̍ po̍ Klai dǒ ɛ̍ wɔ̀ɔ̀.

¹⁰Jusu Klai nu̍ Nyɔsoa-a wlùh. Ɔ̍ sà-ɛ ɔ̍ chɛ̀-a ku̍ slaǎ kleǐnklein à gblɛ̍n sɔ̀ɛ̀n-a tìh, ɛ̍-ɛ bo ɛ̀ wɔ̀ à nɛi̍.

¹¹Slaǎ sà nyɔ̍ kli̍hgbɛ̍ ka sɔ̀n-a sɛ̀n-aɛ, u̍h-a gba̍ u̍h-a slaǎ sà dbo̍ due laa̍ kɛ̍n i̍. Jɛ ɛ̍ se̍ gblɛ̍n sɔ̀ɛ̀n-a tìh i̍ wɔ̀-ɛ bɛ̌ɛ.

¹²Jɛ Klai nɔ̀ɔ̍, slaǎ due ɔ̍ sà-a ka-ɛ, ɔ̍ sà-ɛ ɔ̍ chɛ̀ slaǎ wɛ̀ sǔh kleǐn dǒ gblɛ̍n sɔ̀ɛ̀n-a tìh-a i̍ tǎli-ɛ we̍. Wɛ̀ ɔ̍ tè ka i̍ dǒ Nyɔsoa-a di̍na̍ we̍.

¹³Dǒ ɔ̍ nɛ ɔ̍ fuo ti̍ Nyɔsoa iě ɛ̍ nu̍ ɔ̍ iě ɔ̍ nyɛ̌-nyɔ̍ kɛ̍n i̍ na.

¹⁴Ɔ̍ chɛ̀ slaǎ sà-ɛ due ɔ̍ nu̍-aɛ, nyɔ̍ ùh tè-ea pɔ̌ dǒ Nyɔsoa we̍-ɛ, ɛ̍ wɔ̀ u̍h gblɛ̍ja̍i̍ nɔ̌ kmɔ̌-a kmɔ̌.

¹⁵Nyɔsoa-a Sùù-a chɛ̀ nu̍ ɛ̍ sàànsi̍i̍h ke dě àɔ̀ we̍. Sàǐtòò dɛ̍-ɛ, ɛ̍ la̍a̍,

¹⁶“Mɔ̍ Joi bo ɔ̀ wlu-a. Ku̍o̍ la ǎn mu̍-a po̍ dě nya̍ dǒ u̍h ke ǐn ke à nynɛ̌-ɛ, ɛ̍-ɛ la. Ǎn mu̍ ǎn telě dǒ u̍h pɔluh kɛ̍n po̍, wɛ̀ iě i̍h chlǐh dǒ u̍h wlùh kɛ̍n.”

¹⁷Iě Sùù la̍a̍ dɛ-ɛ, “U̍h-a gblɛ̍n sɔ̀ɛ̀n ke u̍h-a kà kɔn tìh se̍ dǒ ǐn wlì i̍ sǐ mu̍ dɛ kleǐn.”

¹⁸Nɛ̀ pò i̍h-a tìh tǎli-ɛ i̍ wɛ̀-ɛ, slaǎ sà-a nɔ̀ɔ̍, nɛ̀ ɛ̍ se̍ kɔn ɛ̍ iě nɛ dɛ dǒ gblɛ̍n sɔ̀ɛ̀n-a tìh i̍ tǎli-ɛ we̍.

¹⁹Ǐn de̍di̍i̍ᵻ, Jusu-a nymɔ̍ ɛ̀ wlǎ-a i̍-ɛ, ɛ̍ nu̍ ɛ̍ iě à ku̍ di̍i̍ i̍ à iě dě Nɛi̍ Wɛ̀ Tà Klaa pa̍.

²⁰Ɔ̍ pɔ̀ni kmɔ̌ delee ke wìè delee wɛ̀ dǒ à we̍ dǒ ti̍ ɔ̍ jii-a dǒ gbò wɔ̍i̍n jliɛ̍ ɛ̀ nu̍-a ɔ̍ ku̍-ɛ di̍i̍-ɛ.

²¹À blě slaǎ sà nyɔ̍ ɔ̀ ku̍-a wɔ̍n-ɛ wɛ̀, ɔ̀ nu̍-a ka Nyɔsoa-a gbò-a Dlǔtu-ɛ.

²²Nɛ̀ mɔ̀ à ji̍ Nyɔsoa i̍ kɔǎɛn la̍ sǔh dǒ wlùh chɛ̀ ke wlùh gbaɛ chɛ̀ɛ̌chɛ̀ we̍. Nɛ̀ mɔ̀ à blě wlùh ɛ̀ se̍-a kɛ̍ i̍ nɛ ɛ̀ nɛ-a wlaǎwla-ɛ, ɛ̍ ke ku̍ jɛ dle-ea nǐ wlihwlǐh-ɛ ke.

²³Nɛ̀ wlì tè dɛ̍ kɔn tìh à bla̍-aɛ, mɔ̀ à gbɛ̍n ɛ̍ i̍ klìmàtàìn. Dɛ̍nu̍ɛ, Nyɔsoa ɔ̀ po̍-a wlu̍ tɔ̀ma̍a̍-ɛ, ɔ̍-ɔ gblìh wlu̍ kɛ̍n.

²⁴Mɔ̀ à fùka-ɛ wlùh we̍ dǒ jbɛɛ ke nu̍-dɛ̍ᵻ chɛ̀ we̍.

²⁵Nɛ̀ mɔ̀ à bɔ̌ tàdùè gbèɛ̀ɛn-ɛ se̍a̍-a, ɛ̀ nyɔ̍ duuh-a nu̍-a. Jɛ mɔ̀ à gbèɛ̀ɛn à iě wlùh we̍ fùka-ɛ. Mɔ̀ à nu̍ ɛ̍ ɛ̍ iě sàì naɛ sìì, ka mɔ̀ juo-a weɛ̍ Joi-a mu̍-a ji̍ ɛ̍ se̍-a we̍ tɛn dɛ-ɛ.

²⁶Ka à juo-a Nyɔsoa-a tìh-a taǐn wɛ̀-ɛ, wɛ̀ à iě tìh jii̍ tba̍ gblɛ̍n sɔ̀ɛ̀n nu̍ dode̍-ɛ, nɛ̀ slaǎ sà-a dɛɛ se̍ nɛ ɛ̍ iě à gblɛ̍n sɔ̀ɛ̀n-a tìh i̍ tǎli.

²⁷Jɛ nɛ̀ dɛ̍ sie-ao wɛ̀ sǔh-ɛ, ɛ̍ nu̍ faɔn ple̍-ɛ dǒ sàwi̍h sì-ɛ ke nɛ̍ jojǒ ɛ̀ mu̍-a nyɔ̍ ùh faɛn-a Nyɔsoa-a fɔ̍n-ɛ we̍.

²⁸Nyɔ̍-o-nyɔ̍ ɔ̀ tba̍-a Mose-a telě chla wɛ̀ ɔ̀ wa̍-a ɛ̍-ɛ, pò ɛ̍ blě sàànsi̍i̍h sɔɔ̌n àe̍e̍ ta̍a̍n-ɛ, nɛ̀ ɔ̍ se̍ wɔɛ jě la̍ kɔn dǒ ɔ̍ dbǎ la̍-a.

²⁹Pò nyɔ̍ jaɛ Nyɔsoa-a Jǔ-a tìh jlǐh, wɛ̀ ɔ̍ se̍ nymɔ̍ ɛ̀ to-a ɛ̍ ka Nyɔsoa po̍-a ku̍o̍ iě nymɔ̍-a chɛ̀ dle ɔ̍ i̍ dǒ Nyɔsoa we̍-ɛ, pò ɔ̍ se̍ ɛ̍ dɛ̍ dǎɛ wɛ̀ ɔ̍ iě blɛ nɛ Sùù chlèe-ɛ, nɛ̀ ka ɔ̍ naɛ kàn gbɛ̍n-ɛa mu̍-a wɔ̍n ku̍ ɛ̍ iě-a telě wa̍ nyɔ̍ sìì-ɛ, mɔ̀ se̍ i̍h juo ae?

³⁰Dɛ̍nu̍ɛ, à juo ɛ̍ Nyɔsoa bo ɔ̀ la̍a̍, “Nyɔ̍ gba̍a̍ sàɛ̀-ɛ kɔn dǒ ǐn we̍. Ǎn mu̍ gba̍ sà.” Dode̍-ɛ, ɔ̍ la̍a̍, “Mɔ̍ Joi bo ɔ̀ mu̍ ǎn nyɔ̍-a taɔ pa̍.”

³¹Ɛ̍ nu̍ faɔn dɛ̍ wɛ̀ kmɔ̌ nɛ Nyɔsoa iě nyɔ̍ kwa̍ kɛ̍n tè.

³²Ti̍ Nyɔsoa nyǐ-a mɔ̀ sɔ̀npli-ɛ bo mɔ̀ iě wlùh we̍ nu̍. Dǒ ti̍ laa̍ di̍i̍ bo mɔ̀ sàɛ̀ jua̍i̍ iě mɔ̀ po̍ gbɔ̍igbɔ̍ te̍e̍ mɔ̀ se̍ ple̍.

³³Nyɔ̍ɔ chlèe mɔ̀ dǒ wlɔ̀gbàɛ̀, iě mɔ̀ jě tìh. Dode̍-ɛ, mɔ̀ gbǎ dě nyɔ̍ u̍h-a nu̍-a tìh i̍-ɛ nynɛ̌.

³⁴Mɔ̀ jě nyɔ̍ ùh poe-a kasoo-ɛ wɔɛ. Mɔ̀-a kɔn-dɛ̍ᵻ ìh sà-ɛa mɔ̀ kwa̍a̍-ɛ i̍h-a tìh se̍ mɔ̀ kà di̍i̍ po̍. Dɛ̍nu̍ɛ, mɔ̀-a chɛ̀ juo ɛ̍-ɛ, mɔ̀ blě kɔn-dɛ̍ᵻ chɛ̀ jih se̍-a mǎ la̍ kɔn-ɛ.

³⁵Ɛ̍ tìh-ɛ, mɔ̀ ku̍ di̍i̍ i̍, dɛ̍nu̍ɛ, dě ɛ̍ di̍i̍ bo jě-dɛ̍ klaa nɛ.

³⁶Mɔ̀ kɔn mɔ̀ iě-e klì i̍ ku̍ wɛ̀ mɔ̀ iě Nyɔsoa-a wlùh nu̍, nɛ̀ mɔ̀-a mu̍ ɔ̍ tɔ̀ma̍a̍ wlu̍ jě.

³⁷Ɛ̍ kɔn Nyɔsoa-a wlu̍ la̍a̍, “Ɛ̍ se̍ ti̍ tɔ̀ɔ̀n gba̍ mu̍, nɛ̀ nyɔ̍ ɔ̀ mu̍-a ji̍-ɛ, ɔ̍ mu̍ ji̍. Ɔ̍ se̍ de̍ wlè mu̍.

³⁸Wlùh gbaɛ-ɛa mu̍ ǎn nyɔ̍ ùh slɛ̌-a i̍-ɛ kmɔ̌ nɛ-ɛ. Jɛ pò u̍h-a nyɔ̍ tǎli ǎn tìh i̍-ɛ, nɛ̀ ǎn pɔluh se̍ i̍ pɛ̌n mu̍ dǒ ɔ̍ we̍.”

³⁹À se̍ nyɔ̍ juh chlì-a de̍ wɛ̀ u̍h gbɔ̀lɔ-aɛ, jɛ àɔ̀ wlùh gbaɛ blě nyɔ̍ ùh pǔh-aɛ.