Read Western Krahn Iblu 12 Bible Online

Iblu 12 - Western Krahn bible

Iblu 12

¹Nɛ̀ɛ̍, ka à blě-a wlùh gbaɛ blě nyɔ̍ tlùgbei̍ la à de̍e̍ i̍-ɛ, dɛ̍ᵻ kli̍hgbɛ̍ ìh-a chlì-a à ja̍-ɛ ke gblɛ̍n sɔ̀ɛ̀n jih gbɛ̍n-ɛ à i̍ gba̍i̍ngba̍i̍n-ɛ, mɔ̀ à poe i̍h fɔ̌ i̍ à iě-e gbǐh po̍ à iě dɛ̍ ɛ̀ pɛ̌n-a dǒ à jǔ i̍-ɛ we̍ ple̍.

²Jusu jɔ à wlùh gbaɛ tba̍-a gbɔ̀ i̍ iě ɛ̍ wɛ̀-a kwlǎ-ɛ, dě ɔ̍ we̍ bo à iě i̍ bǐi. Ɔ̍ tù i̍ nmɔ-ɛ nɛ-a dě nya̍-ɛ tìh wɛ̀ ɔ̍ ku̍-e klì i̍ dǒ gbaɛ kɛ̍n i̍ tu̍ wlì. Iě ɔ̍ se̍ tɛ̀n-ɛ i̍ gbǎ-a jǔ ple̍, wɛ̀ ɔ̍ tè ka i̍ dǒ Nyɔsoa-a nynɛ̌ gbalǎ-a di̍na̍ we̍.

³Ka gblɛ̍n sɔ̀ɛ̀n nyɔ̍ nu̍-a ɔ̍ faɛn-ɛ iě ɔ̍ ku̍-ae klì i̍ dǒ dɛ̍ᵻ u̍h nu̍-a ɔ̍ pùn i̍-ɛ we̍-ɛ, i̍h bo mɔ̀ iě wlùh we̍ nu̍ wɛ̀ mɔ̀-a gbǐh-i je̍e mɛ̌, mɔ̀-a wlùh je̍e dě de̍i̍ gbǎ.

⁴Gblɛ̍n sɔ̀ɛ̀n we̍ fɔ̀n-ɛa gbɔ̍igbɔ̍ mɔ̀-a po̍-a ka-ɛ, mɔ̀-a nyɔ̍-ɔ se̍a dǒ ɛ̍ we̍ fɔ̀n la̍ nɛ wɛ̀ ɔ̍ nymɔ̍ se̍a i̍ wlǎ.

⁵Mɔ̀-a Nyɔsoa-a nynuu̍ nu̍ tìh nyɔ̍-a wlùh fùka wlu̍ ɛ̀ bla̍-ɛa dě mɔ̀ we̍-ɛ, mɔ̀ mǎle wɛ̀ ae? Nyɔsoa-a wlu̍ la̍a̍, “Ǎn jǔ, pò Joi ja ìn gblɛ̍n kwa̍ i̍ sà-ɛ, nɛ̀ ìn bɔ̌ ɛ̍ plǔh ka jě-ɛ, nɛ̀ pò ɔ̍ wǐi ìn dlǔ i̍-ɛ, àn wlùh bɔ̌ dě de̍i̍ gbǎ-a.

⁶Dɛ̍nu̍ɛ, jǔ kɔn tìh Joi kma-ɛ, ɔ̍-ɔ bo ɔ̍ sà gblɛ̍n kwa̍ i̍, nɛ̀ ɔ̀ kɔn tìh ɔ̍ wɔ̌ɛn-aɛ, ɔ̍-ɔ bo ɔ̍ gbɛ̍n kàn.”

⁷Dǒ mɔ̀ gblɛ̍n kwa̍ i̍ sà la̍ bo mɔ̀ iě-e klì i̍ ku̍ i̍. Nyɔsoa-a gbɛ̍n mɔ̀ ka nyɔ̍-a gbɛ̍n-a ɔ̍ nynuu̍-ɛ. Jǔ we̍ bo ɔ̀ nɛ nɔ̌ kmɔ̌ ɔ̍ baa se̍ gblɛ̍n kwa̍ i̍ sà ɛ?

⁸Ka ɔ̍ nu̍-a ɔ̍ nynuu̍ kli̍hgbɛ̍ gblɛ̍n kwa̍ i̍ sà-ɛ, pò mɔ̀ɔ̍ nɔ̀ɔ̍ ɔ̍ se̍ la̍a̍n mɔ̀ gblɛ̍n kwa̍ i̍ sà-a nu̍-ɛ, nɛ̀ mɔ̀ wɔ̀ nynuu̍ ùh se̍-a baaᵻ kɔn-ɛ. Nɛ̀ mɔ̀ se̍ ɔ̍ tè kɛ̍n.

⁹Ɛ̍ se̍-o siee, à kli̍hgbɛ̍ à blě à kmɔ̌ we̍ baaᵻ. U̍h-a sà à gblɛ̍n kwa̍ i̍ iě à jě u̍h dɛ̍ɛ̍. Jɛ nɛ̀ jɔ nu̍-a à Baa Nyɔsoa dě ja̍i̍wlɔ̀-ɛ, dǒ ɔ̍ we̍ à se̍ à chɛ̀ wlù ja-ɛ mu̍ wɛ̀ à iě kmɔ̌ nɛ ae?

¹⁰À baaᵻ nɔ̀ɔ̍, u̍h-a sà à gblɛ̍n kwa̍ i̍ dǒ ti̍ gbɔ̍ di̍i̍, pò u̍h gbɛ̀n ɛ̍ ja̍ ɛ̍ nmɔ jii̍-ɛ. Jɛ à iě chɛ̀ka nɛ tìh bo Nyɔsoa nɔ̀ɔ̍ ɔ̍ nu̍ ɛ̍. Ɔ̍ pɔ̀n à iě nɛi̍ wɛ̀ ka ɔ̍ nɛ-aɛ.

¹¹Pò à ja gblɛ̍n kwa̍ i̍ sà-ɛɛ, nɛ̀ ɛ̍ kma-ɛɛ à ku̍ wɔ̍n, ɛ̍ se̍ wɔ̍n nmɔ dǒ ti̍ laa̍ di̍i̍. Jɛ dě nya̍ wɛ̀-ɛ, iě nyɔ̍ ùh sà-ɛa gblɛ̍n kwa̍ i̍-ɛ, wɛ̀ u̍h-a jě wlùh-a i̍ tè-ɛ ɛ̀ sɔ-a dě i̍ slɛ̌-ɛ di̍i̍-ɛ.

¹²Nɛ̀ɛ̍, mɔ̀ ku̍-e tu̍ i̍ mɔ̀ iě gbǐh ku̍u̍ po̍-eɛ.

¹³Nɛ̀ mɔ̀ sà wìè ɛ̀ slɛ̌-a i̍-ɛ ɛ̍ iě puepuě nɛ, wɛ̀ pò i̍ kɔ̌-bu̍h ja ɛ̍ we̍ na-ɛ, ɛ̍-ɛ je̍e kɛ̍n gblìh, jɛ wɛ̀ ɛ̍ iě bɔ̌.

¹⁴Mɔ̀ fɔ̀n dɛ̍ we̍ mɔ̀ ke nyɔ̍ kli̍hgbɛ̍ iě kɛ̍n i̍ gbe̍ɛ̍ɛn. Nɛ̀ mɔ̀ fɔ̀n dɛ̍ we̍ mɔ̀ iě nɛi̍ wɛ̀ ke dɛ̍nu̍ɛ, nyɔ̍-ɔ se̍ la̍a̍n nɛ wɛ̀ nɛ̀ tba̍ Joi jlǐhɛ̍.

¹⁵Nɛ̀ mɔ̀ jě ɛ̍ we̍ wɛ̀ mɔ̀-a nyɔ̍-ɔ je̍e dǒ Nyɔsoa-a blɛ nɛ-ɛ de̍e̍ blu̍. Mɔ̀ jě ɛ̍ we̍ ke mɔ̀-a nyɔ̍-ɔ je̍e ku̍ dě mɔ̀ nynɛ̌ ka wɔ̍n nyni tu̍-ɛ. Nɛ̀ ɔ̍ mu̍ wě wlɔ̀ ja ɛ̍ iě nyɔ̍ dɔu jii̍ nyni-i.

¹⁶Mɔ̀ jě ɛ̍ we̍ ke mɔ̀-a nyɔ̍-ɔ je̍e gbǎn nu̍ nyɔ̍ nu̍, àe̍e̍ mɔ̀-a nyɔ̍-ɔ se̍-e Nyɔsoa dɛ-ɛ nɛ ka Isɔ-ɛ, ɔ̀ tù-a di̍-dɛ̍ tìh wɛ̀ ɔ̍ ple̍-a ɔ̍ nyɔ̍ klaa dɛ-a pɔ̀ìě-ɛ.

¹⁷Mɔ̀-a chɛ̀ juo ɛ̍-ɛ, jɛ ɛ̍ wɔ̀-a sì-ɛ wɛ̀-ɛ, wɛ̀ ɔ̍ pɔ̀n pɔ̀ìě la jě-ɛ i̍ de, jɛ nɛ̀ ɔ̍ tba̍-ɛ chla wɛ̀. Ɔ̍ fìn-i ɔ̍ iě ɛ̍ jě dɛ de, jɛ nɛ̀ ɛ̍-ɛ i̍ bǐi ti̍ sì wɛ̀.

¹⁸Tà mɔ̀ ji̍-a ka-ɛ, nɔ̌ se̍ tlu̍h kɔn gbɔ̀ì Eslɔɛ nyɔ̍ ji̍-a ɛ̀ nyɔ̍-a jě-a iě nyɔ̍-a tǔh-a i̍-ɛ wɔ̀. Nɛ̍-a wa̍n-e jlìjlì, dě gbe-e i̍, dě nɛ jlu̍jlu̍, iě tìlèè poɔ-a ji̍-e tìtì.

¹⁹Dě-e bo dɔ̍gbɛ̍ ke wlu̍ wlu-i. Sɔ Eslɔɛ nyɔ̍ ùh wɔ̌n-a wlu̍-a chɛ̀-ɛ, u̍h-a ba̍le la̍-ɛ sǔh wlu̍ laa̍ ɛ̍-ɛ je̍e dě u̍h we̍ wlu dɛ.

²⁰Dɛ̍nu̍ɛ, telě ɛ̀ ji̍-a u̍h we̍-ɛ, u̍h se̍ ɛ̍ nu̍-ɛ bɛ̌ɛ. Ɛ̍ la̍a̍, “Pò nyɔ̍-o-nyɔ̍ àe̍e̍ nmi̍ɛ̍-a chɛ̀ tǔh tlu̍h la i̍-ɛ, nɛ̀ ɛ̍ mu̍ sɔɔ̌ᵻ i̍ tbaɛ ɛ̍ iě mɛ̌.”

²¹Dɛ̍ u̍h tba̍-a jlǐhɛ̍-ɛ, ɛ̍ nɛ dlǐ. Iě Mose la̍a̍, “Ǎn ku̍-a tlɛ̍-ɛ dǒ faɔn we̍.”

²²Jɛ mɔ̀ɔ̍ nɔ̀ɔ̍, mɔ̀ ji̍ nɔ̌ Saiɛn Tlu̍h kɛ̍n wɛ̀, ɛ̍ ke dǒ Juluslɛn jɛ nɛ-a dě ja̍i̍wlɔ̀-ɛ di̍i̍ ke, ɛ̀ nu̍-a kmɔ̌ nɛ Nyɔsoa-a tùgbàwlɔ̀-ɛ. Dě ɛ̍ di̍i̍ bo ɔ̍ ǐnchɔ̀ ìh-a nmɔ-aɛ, i̍h-a wlǔ-a wlǔ nɛ.

²³Mɔ̀ ji̍ nɔ̌ Nyɔsoa-a nynuu̍ kli̍hgbɛ̍ ùh kɔn nynɛ̌ chlǐh-ia dě ja̍i̍wlɔ̀-ɛ we̍ wɛ̀. Nyɔsoa ɔ̀ nu̍-a kmɔ̌ nyɔ̍ kli̍hgbɛ̍-a taɔ-ɛ, nɔ̌ ɔ̍ we̍ mɔ̀ ji̍ wɛ̀, ɛ̍ ke nɔ̌ i̍ slɛ̌-nyɔ̍-a sùù we̍ ke, ùh wɛ̀-a nɛi̍-ɛ.

²⁴Jusu ɔ̀ nu̍-a tùna̍-i̍-tu̍ iě ku̍o̍ delee poe-aɛ, mɔ̀ ji̍ nɔ̌ ɔ̍ we̍ wɛ̀, ɛ̍ ke nɔ̌ ɔ̍ nymɔ̍ ɛ̀ wlǎ-a i̍-ɛ we̍ ke. Ɔ̍ nymɔ̍ bo ɛ̀ ja wlu̍ chɛ̀ ɛ̍ sìì Ebɛ naɛ nymɔ̍.

²⁵Mɔ̀ nu̍ ɛ̍ Nyɔsoa ɔ̀ wlu-a dě mɔ̀ we̍-ɛ, wɛ̀ mɔ̀ɔ̍ je̍e ɔ̍ dounᵻ i̍ sà. Dɛ̍nu̍ɛ, Eslɔɛ nyɔ̍ ùh sà-a ɔ̍ slɛ̌n tù wlu̍ dounᵻ i̍ nɔ̌ bloɔ̍-ɛ, u̍h se̍-o tàn. Nɛ̀ ɔ̍ slɛ̌n tù wlu̍ sɔ-a dě ja̍i̍wlɔ̀-ɛ, pò à sà ɛ̍ dounᵻ i̍-ɛ, nɛ̀ ka à mu̍-o tàn-a nu̍ ɛ?

²⁶Dǒ ɔ̍ wlu̍ sèke-e blǔh i̍ dǒ ti̍ laa̍ di̍i̍. Jɛ nɛ̀ ɔ̍ wɔ̀ wlu̍ tɔ̀ma̍a̍ po̍-ɛ wɛ̀, ɔ̍ la̍a̍, “Jɛ ǎn mu̍-a ka blǔh i̍ sèke dode̍-ɛ, ǎn mu̍ ɛ̍ ke ja̍u̍n i̍ sèke.”

²⁷Wlu̍ la ɛ̀ nu̍-a “Dode̍-ɛ,” ɛ̍ flɔn-ɛ ɛ̍ we̍i̍ ka dɛ̍ᵻ ìh nui-aɛ, i̍h-a mu̍ i̍ sèke-ɛ, wɛ̀ i̍h iě tèla̍ wlǔh. Nɛ̀ dɛ̍ jɛ se̍-a i̍ sèke-ɛ mu̍-ɛ, wɛ̀ ɛ̍ iě-o sie.

²⁸Ɛ̍ tìh-ɛ, ka à jě-a Nyɔsoa-a kmɔ̌ wlu̍ i̍ kɔn-ɛ ɛ̀ se̍a dǒ wìè-i sà-ɛ mu̍-ɛ, nɛ̀ mɔ̀ à po̍ Nyɔsoa tlɔ̌ à iě ɔ̍ jǔ dbee dǒ ɔ̍ we̍ fòè-ɛ ke ɔ̍ faɔn ple̍-ɛ we̍ ɛ̀ tè-ea ɔ̍ wlùh i̍-ɛ.

²⁹Dɛ̍nu̍ɛ, à Nyɔsoa la ɔ̍ wɔ̀ nɛ̍ ɛ̀ gbɔ̀lɔ-a dɛ̍ᵻɛ́.