Read Western Krahn Iblu 13 Bible Online

Iblu 13 - Western Krahn bible

Iblu 13

¹Ka Klai nu̍-a mɔ̀ de̍di̍i̍ᵻ we̍i̍-ɛ, nɛ̀ we̍ jbɛɛ bo mɔ̀ iě dluwe̍ i̍ gba̍.

²Mɔ̀ kɔn mɔ̀ iě dihwi̍h gbò we̍ gba̍. Dɛ̍nu̍ɛ, kǎ nyɔ̍ duuh nu̍ wɛ̀ u̍h gba̍ Nyɔsoa-a ǐnchɔ̀ gbò we̍, iě u̍h-a chɛ̀ se̍ i̍h juo.

³Nyɔ̍ ùh nɛ-a dě kasoo-ɛ, mɔ̀ naɛ u̍h-a tìh wlùh i̍ ka nyɔ̍ la̍ mɔ̀-a chɛ̀ bo ùh nɛ dě kasoo-ɛ. Nyɔ̍ ùh-a jě-a tìh-ɛ kǎ mɔ̀ iě u̍h-a tìh wlùh i̍ naɛ nu̍ ke, ka nyɔ̍ la̍ mɔ̀-a chɛ̀ bo ùh-a jě tìh-ɛ.

⁴Nɛ̀ nyɔ̍ kli̍hgbɛ̍ gbɛ̍n-ɛ jla̍ tǐn dɛ sɔ̍nᵻ sɔɔ̌n i̍, u̍h iě ɛ̍ ja̍ tè. Nɛ̀ nynɔ̌ ke kɔan-a nyɔ̍ due bɔ̌ jla̍-a chɛ̀ cha̍n we̍ po̍-ɛ. Dɛ̍nu̍ɛ, Nyɔsoa-a mu̍ gbǎn nu̍ nyɔ̍ ke nynɛ̌à nu̍ nyɔ̍ kàn gbɛ̍n.

⁵Kmɔ̌ mɔ̀ nɛ-aɛ, mɔ̀ sà ɛ̍ dě wlǐ-i jbɛɛ dɛ di̍i̍. Mɔ̀ nu̍ ɛ̍ mɔ̀-a pɔluh iě i̍ pɛ̌n dǒ dɛ̍ mɔ̀ blě-aɛ we̍. Dɛ̍nu̍ɛ, Nyɔsoa la̍a̍, “Ǐn se̍ gba̍ ìn pɔ̀-ɛ nɔ̌ kmɔ̌, ǐn se̍ gba̍ ìn jlǐhɛ̍ we̍ sà.”

⁶Ɛ̍ tìh-ɛ, mɔ̀ à ku̍ di̍i̍ i̍ à iě ka dǎ, “Joi bo ɔ̀ nu̍ ǎn we̍ gbǎ nyɔ̍, nɛ̀ ǐn se̍ faɔn ple̍ mu̍. Dɛ̍ nyi̍ɔ̍-a mu̍ ǐn nui i̍ ɛ?”

⁷Mɔ̀-a nyɔ̍ klaaᵻ ùh po̍-a Nyɔsoa-a tu̍owli dě mɔ̀ we̍-ɛ, mɔ̀ nu̍ u̍h-a kmɔ̌ wlùh we̍. Ka u̍h nu̍-a mɛ̌-ɛɛ, mɔ̀ nu̍ ɛ̍ wlùh we̍, wɛ̀ mɔ̀ iě-e u̍h-a wlùh gbaɛ-a wɔ̀ɔ̀ i̍ sà.

⁸Jusu Klai-a gblɛ̍n-ɛ sàɛ̀. Ɔ̍ due nɛ-a sɔ̀nwa̍n ke sèàn-ɛ, ɔ̍-ɔ bo ke̍ nɔ̌ kmɔ̌-a kmɔ̌.

⁹Mɔ̀ bɔ̌ wɔ̌n-ɛ nǎ po̍ wlu̍ kaɛn kaɛn bɔ̌ mɔ̀ dǒ wìè slɛ̌ i̍ kɛ̍n sà-a. Ɛ̍ nmɔ jii̍ Nyɔsoa-a blɛ iě à pɔluh i̍ kui ɛ̍ sìì di̍-dɛ̍ᵻá gbànᵻ tù-ɛ. Dɛ̍nu̍ɛ, nyɔ̍ ùh tù-a di̍-dɛ̍ᵻá gbànᵻɛ́, ɛ̍-ɛ po̍-o dɛ̍ dǒ u̍h we̍.

¹⁰Slaǎ sà nyɔ̍ ùh-a nu̍-a dbo̍ dě wɛ̀ɛ̀ sɔ̍n wlù di̍i̍-ɛ, u̍h se̍ i̍ blaɛ u̍h iě slaǎ sà-ɛ dɛ̍ ɛ̀ nɛ-a dǒ à gblǒ kɛ̍n-ɛ di̍.

¹¹Nmi̍i̍ u̍h-a sà-ɛa slaǎ-ɛ, i̍h-a nymɔ̍ bo slaǎ sà nyɔ̍-a dlǔtu-a gba̍ dě Nɛi̍ Wɛ̀ Tà Klaa iě ɔ̍ sà slaǎ dǒ gblɛ̍n sɔ̀ɛ̀n-a tìh i̍ tǎli-ɛ we̍. Jɛ nɛ̀ nmi̍i̍-a chɛ̀ nɔ̀ɔ̍, u̍h-a fɔ̍n i̍h dě wìè-i.

¹²Ɛ̍ kɔn Jusu mɛ̌-ɛ dǒ wlɔ̀ sɔ̀n dě wìè-i, wɛ̀ ɔ̍ chɛ̀-a nymɔ̍ iě nyɔ̍ɔ nɛi̍ wɛ̀.

¹³Ɛ̍ tìh-ɛ, mɔ̀ à mu̍ dě Jusu we̍ wìè-i à iě ɔ̍ tìh jě-ɛ kwa̍a̍ i̍ gblè-e.

¹⁴Dɛ̍nu̍ɛ, nɔ̌ bloɔ̍ la à se̍ tùgbàwlɔ̀ ɛ̀ se̍-a wa̍ la̍ kɔn-ɛ blě, jɛ tùgbàwlɔ̀ jɛ mu̍-a ji̍-ɛ, ɛ̍ bo à pɔ̀n à iě kɔn.

¹⁵Ɛ̍ tìh-ɛ, mɔ̀ à jii dě Jusu ja̍a̍ à iě Nyɔsoa tìhwe̍ po̍ ɛ̍ iě à naɛ slaǎ sà-a nu̍ ti̍ kli̍hgbɛ̍ we̍. À wɔ̍n bo ɛ̀ nu̍ à naɛ nyǐ-dɛ̍, ɛ̍ iě ɔ̍ nynɛ̌ i̍ dǎ.

¹⁶Mɔ̀ kɔn mɔ̀ iě dɛ̍ᵻ chɛ̀ nu̍. Dɛ̍ᵻ mɔ̀ blě-aɛ, mɔ̀ nmɔ-ɛ i̍h wlùh, dɛ̍nu̍ɛ, dɛ̍ᵻ kaɛn laa̍ bo ìh wɔ̀ slaǎ sà-a ìh-a tè-ea Nyɔsoa-a wlùh i̍-ɛ.

¹⁷Mɔ̀ nu̍ mɔ̀-a nyɔ̍ klaaᵻá wlu̍ mɔ̀ iě mɔ̀-a chɛ̀ wlù ja dǒ u̍h we̍. U̍h-u bo ùh-a tù mɔ̀-a tìh jlǐhɛ̍, dɛ̍nu̍ɛ, u̍h kɔn u̍h iě u̍h-a dbo̍-a tìh we̍ i̍ sèàɛ̍ dě Nyɔsoa we̍. Mɔ̀ jě u̍h dɛ̍ɛ̍ wɛ̀ u̍h iě nmɔ dǒ u̍h-a nyɔ̍ klaaᵻ nu̍ dɛ we̍, u̍h-a wlùh-u je̍e dě de̍ i̍ gbǎ. Jɛ pò ɛ̍ se̍ la̍a̍n nɛ-ɛ, nɛ̀ ɛ̍ se̍-o mɔ̀ dɛ̍ po̍ mu̍.

¹⁸Mɔ̀ ba̍le dǒ à tàà. À juo ɛ̍-ɛ gblagblǎ kɛ̍ dɛ̍ se̍ dě à wlùh we̍ nɛ, iě à pɔ̀n dɛ̍-o-dɛ̍ à mu̍-a nu̍-ɛ ɛ̍ iě i̍ slɛ̌.

¹⁹Nɛ̀ ǐn gbɛ̍n mɔ̀-a bu̍hᵻ i̍ mɔ̀ iě dǒ ǎn tàà ba̍le, wɛ̀ Nyɔsoa iě ǐn dě mɔ̀ we̍ dbo̍ dɛ suei̍ suei̍.

²⁰Ǎn sà nǐ wɔ̍n kmɔ̌ i̍ gbe̍ɛ̍ɛn Nyɔsoa iě mɔ̀ dɛ̍ᵻ chɛ̀ kli̍hgbɛ̍ nyǐ, wɛ̀ mɔ̀ iě ɔ̍ wlùh nu̍. Ɔ̍ sà-e à Joi Jusu ɔ̀ nu̍-a Blawɛ̌ᵻ We̍ I̍ Gbɛ̀n Nyɔ̍-a wɔ̍n ku̍ naɛ ɔ̀ kɔn nymɔ̍ to-a ɛ̍ ka Nyɔsoa po̍-a ku̍o̍ kleǐnklein-ɛ. Ǎn sà nǐ wɔ̍n ke Nyɔsoa iě ɛ̍ nu̍ à iě ɔ̍ wlùh i̍ tè-e dě Jusu Klai ja̍a̍. Nɛ̀ dǒ Klai we̍ bo tìh-a i̍ bɛ̌-ɛ kɔn nɔ̌ kmɔ̌-a kmɔ̌. Kǎ ɛ̍-ɛ nɛ.

²²Ǐn de̍di̍i̍ᵻ, ǐn gbɛ̍n mɔ̀-a bu̍hᵻ i̍ ǎn slɛ̌n tù wlu̍ la mɔ̀ iě ɛ̍ dounᵻ we̍ po̍. Ɛ̍ kɔn chlǐh-dɛ̍ la ǐn chlǐh-a mɔ̀ we̍-ɛ, ɛ̍ se̍ dlǔ tɛn.

²³Ǎn pɔ̀n mɔ̀ iě ɛ̍ juo ka à de̍di̍i̍ Timote sɔ-a dě kasoo wɛ̀-ɛ. Pò ɔ̍ nyni̍ nɔ̌ ǐn we̍ suei̍-ɛ, nɛ̀ ɔ̍ ke ǐn ke à mu̍ dě mɔ̀ we̍ ji̍ à iě jiěe.

²⁴À sà Nyɔsoa nyɔ̍ kli̍hgbɛ̍ ke mɔ̀-a nyɔ̍ klaaᵻ kli̍hgbɛ̍ nyinɔ̍ i̍. À de̍di̍i̍ᵻ sɔ-a dě Etele bloa̍ kɛ̍n-ɛ, u̍h la̍ u̍h sà mɔ̀ nyinɔ̍ i̍.

²⁵Ǎn sà nǐ wɔ̍n Nyɔsoa-a blɛ iě dǒ mɔ̀ kli̍hgbɛ̍ we̍ nɛ.