Read Western Krahn Iblu 9 Bible Online

Iblu 9 - Western Krahn bible

Iblu 9

¹Ku̍o̍ jɛ nɛ-a sàǐtòò-ɛ, ɛ̍ blě ka nyɔ̍ iě-a Nyɔsoa wɛɛ sà sɔɛn nu̍-ɛ, iě ɛ̍ blě wɛɛ sà gbò ɛ̀ nyi̍ɔ̍ po̍-a nɔ̌ bloɔ̍-ɛ ke.

²U̍h po̍ wɛ̀ɛ̀ sɔ̍n wlù gba̍a̍ iě jliɛ̍ jii dǒ ɛ̍ wèa̍. Dǒ jliɛ̍ jǔ bo chlǎn nape̍-a kɛ̍n tè dɛ̍ ke teble̍ nɛ. Dǒ teble̍ kɛ̍n bo blèe̍ u̍h sà-ɛa Nyɔsoa kwlǎ-a nɛ. Deě laa̍ bo u̍h-a dǎɛ Nɛi̍ Wɛ̀ Tà. Nɛ̀ dǒ jliɛ̍ de̍e̍ laa̍, dě u̍h-a dǎɛ Nɛi̍ Wɛ̀ Tà Klaa.

⁴Dě-e bo kòo̍-a gblǒ nɛ. Dǒ ɛ̍ kɛ̍n u̍h-a fɔ̍n-ɛ nɔ̌-dɛ̍ᵻ. Dě Ku̍o̍-a Gblòùn nɛ ke, ɛ̍ ku̍ nu̍ kòo̍-a sǔh. Dě ɛ̍ di̍i̍ bo kòo̍ sòlɛ̀ nɛ ɛ̀ di̍-dɛ̍ᵻ u̍h-a dǎɛ-a mana-a nɛ-a dě di̍i̍-ɛ. Dě Ewlɔn-a kɔu̍ ɛ̀ wlǔh-a wlɔ̍nᵻɛ́ nɛ, ɛ̍ ke sɔɔ̌ᵻ paɔᵻ sɔɔ̌n ìh kɔn kɛ̍n Nyɔsoa-a chlǐh-a telě-ɛ ke.

⁵Dǒ Gblòùn laa̍ dlǔwèàì bo u̍h mɛ̍-ɛ Nyɔsoa-a tìh-a i̍ bɛ̌-ɛ ǐnchɔ̀ sɔɔ̌n. U̍h-a dǎɛ i̍h sɛwlobɛn. Wɛ̀ i̍h slo̍ gbawaᵻ dǒ ɛ̍ chùn dlǔwèàì tà gblɛ̍n sɔ̀ɛ̀n-a tìh-a tǎli-a i̍-ɛ. Jɛ ti̍ se̍-o nɛ kaka wɛ̀ à iě i̍h-a tìh we̍ i̍ sèàɛ̍.

⁶Kǎ ìh la i̍h nu̍ gba̍a̍ po̍-eɛ. Nɛ̀ ka sɔ̀n-a sɛ̀n-aɛ, kǎ slaǎ sà nyɔ̍-a nu̍ u̍h-a dbo̍ dǒ jliɛ̍ jǔ.

⁷Jɛ dě jliɛ̍ de̍e̍ ka laa̍, slaǎ sà nyɔ̍-a dlǔtu nɛ due bo ɔ̀ pa̍-e. Ɔ̍ nu̍ deě pa̍-a due dǒ sɔ̀n di̍i̍. Jɛ ɔ̍-ɔ ja-e mu̍ wɛ̀ ɔ̍-ɔ se̍ nmi̍ɛ̍-a nymɔ̍ gba̍. Nymɔ̍ laa̍ bo ɔ̍ to dǒ ɔ̍ chɛ̀ ke Eslɔɛ nyɔ̍-a gblɛ̍n sɔ̀ɛ̀n u̍h nu̍-a ìh kɔn dɛ u̍h se̍-a i̍ juo-ɛ we̍.

⁸Slaǎ sà nyɔ̍-a dlǔtu nɛ due bo ɔ̀ pa̍ dě jliɛ̍ laa̍ de̍e̍. Ɛ̍ bo Nyɔsoa-a Sùù flɔn-ɛ we̍i̍ ka ti̍ wɛ̀ɛ̀ sɔ̍n wlù ɛ̀ poe-aɛ, ɛ̍ nyna-a i̍-ɛ, nɛ̀ wìè jɛ pa̍-ɛa dě Nɛi̍ Wɛ̀ Tà Klaa-ɛ, ɛ̍ se̍-a pɔ̀ni-ɛ.

⁹Ɛ̍ bo ɛ̀ nu̍ juola dǒ ti̍laa kmɔ̌ we̍ ka nyǐ-dɛ̍ᵻ ke slaǎ sà dɛ̍ᵻ ìh Nyɔsoa-a wɛɛ sà nyɔ̍-a ja-aɛ, i̍h se̍ u̍h-a wlùh kɛ̍-ɛ sà-a bɛ̌ɛ.

¹⁰Dɛ̍nu̍ɛ, i̍h nɔ̀ɔ̍, i̍h tba̍ dǒ di̍-dɛ̍ ke, nǎ-dɛ̍ ke, i̍ dle-ɛ bei pùn i̍. Ìh la nu̍-dɛ̍ᵻ naɛ telě bo. I̍h nɛ-ɛ te̍e̍ wɛ̀ Nyɔsoa po̍ dɛ̍ᵻ kli̍hgbɛ̍ delee i̍.

¹¹Jɛ dɛ̍ᵻ chɛ̀ jih à juo-a ka i̍-ɛ, Klai bo ɔ̀ nu̍ slaǎ sà nyɔ̍-a dlǔtu dǒ i̍h we̍ ɔ̀ ji̍. Nyɔsoa-a wɛ̀ɛ̀ sɔ̍n wlù ɛ̀ ku̍-a wɔ̍n iě ɛ̀ wɛ̀-a kwlǎ ɛ̀ sìì-a sàǐtòò naɛ-ɛ, dě ɛ̍ di̍i̍ bo ɔ̍ dbee Nyɔsoa jǔ. Nyi̍ɔ̍-a sɔ̍n se̍ ɛ̍ nu̍, iě ɛ̍ se̍ da̍a kmɔ̌ la we̍ kɔn.

¹²Ɔ̍ pa̍ dě Nɛi̍ Wɛ̀ Tà Klaa laa̍ sǔh kleǐn. Ɔ̍ se̍ gbàdɔ̍ ke bli plɔ̀-a nymɔ̍ slaǎ sà la̍ gba̍. Ɔ̍ chɛ̀-a nymɔ̍ bo ɔ̍ sà-ɛ slaǎ-a. Ɔ̍ nu̍ ɛ̍ iě à pǔh nɔ̌ kmɔ̌-a kmɔ̌.

¹³Tɛin-ɛ, nɛ̀ gbàdɔ̍-a nymɔ̍ ke, bli gblɔ̀-a nymɔ̍ ke, ɛ̍ ke bli nynɔ̌ plɔ̀ u̍h fɔ̍n-aɛ, ɛ̍ bii ke nymɔ̍ bo slaǎ sà nyɔ̍-a fùn i̍ nyɔ̍ ɔ̀ nyni-a dě Nyɔsoa jlǐh i̍-ɛ ja̍i̍. Wɛ̀ ɛ̍ tè-e ɔ̍ pɔ̌ ɔ̍ iě dě Nyɔsoa jlǐh i̍ nmɔ.

¹⁴Pò nmi̍ɛ̍-ɛ nymɔ̍ ja nyɔ̍ dě Nyɔsoa jlǐh i̍ nmɔ-ɛ, nɛ̀ Klai jɔ jii-a dě kmɔ̌ sie Nyɔsoa-a Sùù di̍i̍ wɛ̀ ɔ̀ sà-a ɔ̍ chɛ̀ kwlǎ iě ɔ̍ se̍-a nɛi̍ nɛ fu̍u̍-ɛ, nɛ̀ à ji̍ ɔ̍ naɛ nymɔ̍ jě. Nɛ̀ ɛ̍ bɛ̌ɛ ɛ̍ iě à wlùh-a wlaǎwla nu̍, wɛ̀ à iě pɔ̀ɔ̍pìe̍ dɛ̍ᵻ à nu̍-a i̍ tǎli, à iě kmɔ̌ nɛ Nyɔsoa jǔ dbee.

¹⁵Ɛ̍ tìh-ɛ, Klai bo ɔ̀ nu̍ tùna̍-i̍-tu̍ dǒ ku̍o̍ delee la we̍, wɛ̀ nyɔ̍ ùh Nyɔsoa dǎ-aɛ, u̍h iě kmɔ̌ sie pɔ̀ìě la ɛ̀ kɔn wlu̍ ɔ̍ po̍-a tɔ̀ma̍a̍-ɛ jě. Kaka la̍, ɔ̍ mɛ̌-ɛ, wɛ̀ ɔ̍ iě nyɔ̍ ùh nu̍-a gblɛ̍n sɔ̀ɛ̀n dě sàǐtòò ku̍o̍-a ti̍ di̍i̍-ɛ sèìe.

¹⁶Pò nyɔ̍ chlǐh chlǐh-dɛ̍ ka ɔ̍ kɔn-dɛ̍ᵻ iě-a gblè-ɛ nu̍ pò ɔ̍ mɛ̌-ɛ, nɛ̀ pò nyɔ̍ iě ɔ̍ kɔn-dɛ̍ᵻ gblè-ɛ, u̍h kɔn u̍h iě ɛ̍ to sasǎ ka ɔ̍ mɛ̌-aɛ.

¹⁷Dɛ̍nu̍ɛ, pò ɔ̍ tè kmɔ̌ i̍-ɛ, nɛ̀ ɔ̍ kɔn-dɛ̍ᵻ se̍ gblè-ɛ mu̍. Ɔ̍ kɔn ɔ̍ iě mɛ̌ sasǎ wɛ̀ ɔ̍ kɔn-dɛ̍ᵻ iě gblè-ɛ dǔ.

¹⁸Ka ɛ̍ nɛ ke, ku̍o̍ jɛ nɛ-a sàǐtòò-ɛ, pò ɛ̍ ke dɛ̍-a nymɔ̍ se̍ na-ɛ, nɛ̀ ɛ̍ se̍ gbɔ̀ tè-ɛ ke̍.

¹⁹Ti̍ Mose wɔ̀-a telě kli̍hgbɛ̍-a tìh we̍i̍ bla̍-a dě Eslɔɛ nyɔ̍ kli̍hgbɛ̍ we̍-ɛ, iě ɔ̍ dǔ bliᵻ plɔ̀ᵻ ke gbàdɔ̍ᵻá nymɔ̍-ɔ, iě ɔ̍ sìàɛ̍n i̍h ke nǐ-i. Nɛ̀ tu̍ juwɛ u̍h-a dǎɛ-a esa-ɛ, ɔ̍ sa̍n-ɛ blawɛ̌ sàɛ̀n-a mǐ ɛ̍ wlì. Ɛ̍ bo ɔ̍ nu̍ iě ɔ̍ fùn i̍ nymɔ̍ telě chlǐh-dɛ̍-a chɛ̀ ke nyɔ̍ kli̍hgbɛ̍ laa̍ ja̍i̍.

²⁰Iě ɔ̍ la̍a̍, “Nymɔ̍ la bo ɛ̀ to ɛ̍ ka Nyɔsoa po̍-a ku̍o̍ dǒ mɔ̀ we̍ mɔ̀ iě-a ɛ̍ dɛ̍ɛ̍ jě-ɛ.”

²¹Kǎ ɔ̍ nu̍ ɛ̍ wɛ̀ɛ̀ sɔ̍n wlù ja̍i̍ fùn i̍-ɛ, ɛ̍ ke wɛɛ sà blewi̍h kli̍hgbɛ̍ nɛ-a dě ɛ̍ di̍i̍-ɛ ke.

²²Mose-a telě la̍ dɛ̍ᵻ kli̍hgbɛ̍ bo slaǎ sà nmi̍ɛ̍-a nymɔ̍-a nɛ kmɔ̌ wɛ̀ i̍h-a nɛ wlaǎwla. Nɛ̀ nymɔ̍-ɔ se̍ i̍ wlǎ wɛ̀ Nyɔsoa-a tǎli gblɛ̍n sɔ̀ɛ̀n-a tìh i̍.

²³Slaǎ sà-a kaɛn laa̍ bo ìh kɔn ìh iě ɛ̍ nu̍ wɛ̀ wɛɛ sà dɛ̍ᵻ kaɛn laa̍ ìh wɔ̀-a jih nɛ-a dě ja̍i̍wlɔ̀-ɛ i̍h iě dě Nyɔsoa jlǐh i̍ nmɔ. Jɛ wɛɛ sà dɛ̍ᵻ jih nɛ-a dě ja̍i̍wlɔ̀-ɛ nɔ̀ɔ̍, i̍h kɔn i̍h iě slaǎ sà-ɛ chɛ̀ blě i̍h iě jih la sìì.

²⁴Wɛɛ sà gbò jɛ nyi̍ɔ̍-a sɔ̍n po̍-a ɛ̀ wɔ̀-a jɛ nu̍-a gblangbai̍ naɛ ɛ̀ nɛ-a dě ja̍i̍wlɔ̀-ɛ, Klai se̍ dě ɛ̍ di̍i̍ pa̍. Jɛ dě ja̍i̍wlɔ̀-a chɛ̀-ɛ gbǎ bo ɔ̍ mu̍, iě ɔ̍ nɛ ka dǒ Nyɔsoa jǔ dǒ à tàà.

²⁵Klai se̍ dě ja̍i̍wlɔ̀ mu̍ ɔ̍ iě ɔ̍ chɛ̀ to-ɛ kɛ̍n i̍ gba̍. Ɛ̀ ka sɔ̀n sǐ i̍-ɛ, nɛ̀ slaǎ sà nyɔ̍-a dlǔtu-a gba̍-a nmi̍ɛ̍-a nymɔ̍ dě Nɛi̍ Wɛ̀ Tà Klaa-ɛ, ɔ̍ naɛ se̍ la̍a̍n nɛ.

²⁶Pò ɛ̍ nɛ laan de-ɛ, nɛ̀ sɔ dǒ ti̍ kmɔ̌ iě-a nui-ɛ we̍ bo ɔ̍ kɔn ɔ̍ iě jua̍i̍ sàɛ̀-ɛ kɛ̍n i̍ gba̍-a sà de. Jɛ ɔ̍ ji̍ wɛ̀ kleǐnklein dǒ ti̍ la ɛ̍ dlǔ i̍ chlà la̍. Wɛ̀ ɔ̍ sà-ɛ ɔ̍ chɛ̀ slaǎ-a ɛ̍ iě gblɛ̍n sɔ̀ɛ̀n dǒ wìè-i sà.

²⁷Nyi̍ɔ̍-a mɛ̌ɛ nɛ due gbài̍ sǔh kleǐn, nɛ̀ sàwi̍h sì-ɛ tba̍ ɔ̍ wɔ̍n.

²⁸Ka ɛ̍ nɛ ke, Klai nu̍ ɔ̍ chɛ̀ slaǎ sà-ɛa due, wɛ̀ ɔ̍ iě nyɔ̍ dɔu-a gblɛ̍n sɔ̀ɛ̀n-a tìh dǒ ɔ̍ chɛ̀ dlǔ i̍ tè. Jɛ ɔ̍ mu̍-a ka ji̍ dode̍-ɛ, ɔ̍ se̍ gblɛ̍n sɔ̀ɛ̀n-a tìh we̍ ji̍. Jɛ ɔ̍ ji̍-i ɔ̍ iě nyɔ̍ ùh gbàɛ̀-a ɔ̍ tìh-ɛ pǔh-i.