Read Western Krahn 1 Pitɛ 1 Bible Online

1 Pitɛ 1 - Western Krahn bible

1 Pitɛ 1

¹Mɔ̍ Pitɛ ɔ̀ nu̍-a Jusu Klai-a gba̍tòà-ɛ, mɔ̀ɔ̍ Nyɔsoa nyɔ̍ ùh nu̍-a kwlǎ-gbǎ-kèi̍ᵻ ùh sɛ̍-a blǔh we̍ dě Pɔntɔ ke, Kelesea ke, Kapadosia ke, Esea ke Betenia fɔɔ-ɛ, ǎn chlǐh mɔ̀ we̍.

²Baa Nyɔsoa tba̍ mɔ̀ chèɛ̀, dɛ̍nu̍ɛ, ɛ̍ bo ɔ̍ po̍ gbɔ̀ se̍e̍ ɔ̍ iě nu̍. Ɔ̍ Sùù tè mɔ̀ pɔ̌ wɛ̀ dǒ ɔ̍ chɛ̀ we̍, wɛ̀ mɔ̀ iě Jusu Klai-a wlu̍ nu̍, ɔ̍ nymɔ̍ iě ɛ̍ nu̍ mɔ̀ iě wlaǎwla nɛ. Nyɔsoa-a blɛ ke wlùh-a i̍ tè-ɛ bo ɛ̀ iě kɛ̍n i̍ gboǎɛ dǒ mɔ̀ we̍.

³Nyɔsoa ɔ̀ nu̍-a à Joi Jusu Klai Baa-ɛ, mɔ̀ à sàɛ̀ ɔ̍ nǐ wɔ̍n. Tà ɔ̍ sà-ɛa Jusu Klai bloɔ̍-ɛ, dǒ ɔ̍ nyǐ i̍ à feɛ delee, dɛ̍nu̍ɛ, ɔ̍ wɔɛ ku̍ wɔ̍n. Ɛ̍ kɔn à blě wlì tè dɛ̍ ɛ̀ se̍-a mǎ la̍ kɔn-ɛ.

⁴Wɛ̀ à gbɛ̀n dě wìè-i à iě dɛ̍ᵻ Nyɔsoa tè-a i̍ dǒ ɔ̍ nyɔ̍ we̍-ɛ jě. I̍h se̍-e gbɔ̀lɔ la̍ kɔn, i̍h se̍ jii̍ nyni la̍ kɔn, iě i̍h se̍ wɔ̍n wɛ̀ la̍ kɔn ke. Ɔ̍ tè i̍h i̍ dě ja̍i̍wlɔ̀ dǒ mɔ̀ we̍.

⁵Mɔ̀ɔ̍ bo Nyɔsoa-a gbǐh kaɛn kɛ̍n wɛ̀ ɔ̍ nyɔ̍ sèìe-ɛ ɛ̀ mu̍-a ji̍-ɛ, mɔ̀ iě ɛ̍ jě dǒ ti̍-a dlǔ i̍ chlà la̍. Dɛ̍nu̍ɛ, mɔ̀ blě wlùh gbaɛ-ɛ.

⁶Ɛ̍ tìh-ɛ, mɔ̀ nu̍ mɔna̍. Nyɔ̍-se̍-juo kaka la̍ jua̍i̍ sàɛ̀-ɛ kaɛn kaɛn-a mu̍ mɔ̀ we̍ ji̍ dǒ ti̍ gbɔ̍ di̍i̍.

⁷Ìh la i̍h-a nɛ-ɛ wɛ̀ ɛ̍ iě ɛ̍ to ka mɔ̀ blě-a wlùh gbaɛ chɛ̀ɛ̌chɛ̀-ɛ. Kòo̍ jih-a gbɔ̀lɔ-aɛ, i̍h bo u̍h-a tɛ̀n dǒ nɛ̍ we̍. Jɛ mɔ̀-a wlùh gbaɛ-ɛ jɛ gbǎ-a dɛ̍kɛ̍n ɛ̀ sìì-a kòo̍-ɛ, ɛ̍ bo ɛ̀ se̍-e tɛ̀n-ɛ mu̍ ae? Ɛ̍ mu̍-u tɛ̀n-ɛ wɛ̀ ɛ̍ iě i̍ ku̍, nɛ̀ ti̍ Jusu Klai-a mu̍-a nyɔ̍ kli̍hgbɛ̍ kɛ̍n wlǔh-iɛ, wɛ̀ mɔ̀ iě tìhwe̍ po̍-ɛ ke, tìh-a i̍ bɛ̌-ɛ ke ja̍ tè-ɛ jě.

⁸Mɔ̀-ɔ se̍a ɔ̍ jě gbɛɛ, jɛ mɔ̀ jbɛɛ ɔ̍. Kaka la̍, mɔ̀-ɔ tba̍ ɔ̍ jlǐhɛ̍ gbɛɛ, jɛ mɔ̀ gbaɛ ɔ̍ wlùh. Ɛ̍ tìh-ɛ, mɔ̀-a nu̍ mɔna̍ ɛ̍ sìì-o dɛ̍ i̍.

⁹Dɛ̍nu̍ɛ, mɔ̀-a wlùh gbaɛ-ɛ bo ɛ̀ nɛ kmɔ̌ wɛ̀ mɔ̀-a sùù-a sèìe-ɛ ka.

¹⁰Nyɔsoa-a nyɔ̍ sèìe blɛ la ɔ̍ mu̍-a mɔ̀ pùn nu̍-ɛ, ɔ̍ tu̍owli po̍ nyɔ̍ nu̍ ɛ̍ nɛnɛ̌, wɛ̀ u̍h chlɛ̌ ɛ̍ we̍ i̍ chɛ̀gbɛɛ, iě u̍h dǔ ɛ̍ gbànwli poe-ɛ.

¹¹Ka Klai-a mu̍-a jua̍i̍ sàɛ̀, wɛ̀ tìh-a i̍ bɛ̌-ɛ iě-a dǒ ɛ̍ de̍e̍ i̍ tba̍-aa, ti̍ i̍h-a mu̍-a nɛ-ɛ ke ka i̍h-a mu̍-a nɛ-ɛ nu̍-ɛ, ɛ̍ bo u̍h-a pɔ̀n juo-ɛ i̍. Iě Klai-a Sùù nɛ-a dě u̍h ja̍a̍-ɛ, wɛ̀ ɛ̍ sèàɛ̍ ɛ̍ we̍ i̍ dě u̍h we̍.

¹²Nyɔsoa flɔn-ɛ ɛ̍ we̍i̍ dě ɔ̍ tu̍owli po̍ nyɔ̍ laa̍ we̍, ka dbo̍ u̍h-a nu̍-aɛ, ɛ̍ se̍-a dǒ u̍h-a chɛ̀ we̍ kɔn-ɛ, jɛ ɛ̍ kɔn-a dǒ mɔ̀ we̍-ɛ. Ti̍ u̍h bla̍-a ìh la wɛ̀ mɔ̀ iě-a ka i̍h wɔ̌n dě pɔ̀n chɛ̀ we̍i̍ bla̍ nyɔ̍ wɔ̍ɔ̍n-ɛ, Nyɔsoa-a Sùù sɔ-a dě ja̍i̍wlɔ̀-ɛ bo ɛ̀ gbǎ u̍h we̍ iě u̍h bla̍ i̍h. Ìh la bo Nyɔsoa-a ǐnchɔ̀-a chɛ̀-a pɔ̀n we̍ i̍ ju̍o̍e-ɛ i̍ ke.

¹³Ɛ̍ tìh-ɛ, mɔ̀ po̍ mɔ̀-a wlùh gba̍a̍ dǒ dɛ̍ᵻ mɔ̀-a mu̍-a nu̍-ɛ we̍. Mɔ̀ nu̍ mɔ̀-a chɛ̀-a nɛnɛ̌ wɛ̀ blɛ mɔ̀-a mu̍-a jě dǒ Jusu Klai-a nyɔ̍ kli̍hgbɛ̍ kɛ̍n wlǔh-i la̍-ɛ, mɔ̀ iě ɛ̍ wlì tè kleǐnklein.

¹⁴Mɔ̀ nu̍ Nyɔsoa-a wlu̍, nɛ̀ mɔ̀-a chɛ̀-a wlùh dɛ̍ᵻ mɔ̀-a nu̍-a tɛin ti̍ mɔ̀ se̍-a Klai juo-ɛ, mɔ̀ bɔ̌ wɔ̌n-ɛ i̍h bɔ̌ dě mɔ̀-a kmɔ̌ di̍i̍ nɛ-ɛ dɛ.

¹⁵Jɛ ka Nyɔsoa ɔ̀ dǎ-a mɔ̀-ɛ ɔ̍ nu̍-a nɛi̍ wɛ̀-ɛɛ, kǎ mɔ̀ iě nɛi̍ wɛ̀-ɛ nu̍ dǒ mɔ̀-a nu̍-dɛ̍ᵻ kli̍hgbɛ̍ we̍.

¹⁶Ɛ̍ kɔn Nyɔsoa-a wlu̍ la̍a̍, “Mɔ̀ wɛ̀ nɛi̍, dɛ̍nu̍ɛ, ǐn wɛ̀ nɛi̍.”

¹⁷Nyɔsoa-a sà wìè fɔ̌ due dǒ sàwi̍h sì la̍, ɔ̀ mɔ̀-a dǎɛ-a Baa-ɛ. Ɛ̍ tìh-ɛ, ti̍ mɔ̀-a mu̍-a da̍a kmɔ̌ la we̍ nɛ-ɛɛ, ɔ̍-ɔ bo mɔ̀ iě gbiǐh jě.

¹⁸Mɔ̀ juo ka Nyɔsoa nu̍-a mɔ̀ kɛ̍ɛ̍n pùhbɔ-ɛ dě mɔ̀ baaᵻá pɔ̀ɔ̍pìe̍ kmɔ̌ di̍i̍-ɛ. Ɔ̍ se̍ sebla̍ ke kòo̍ ìh-a gbɔ̀lɔ-aɛ nu̍ dǒ mɔ̀ kɛ̍ɛ̍n pùhbɔ la̍.

¹⁹Klai ɔ̀ wɔ̀-a slaǎ sà blawɛ̌ ɛ̀ se̍-a nɛi̍ nɛ fu̍u̍-ɛ, ɔ̍ nymɔ̍ ɛ̀ gbǎ-a dɛ̍kɛ̍n-ɛ, ɛ̍ bo ɔ̍ pùhbɔ mɔ̀ kɛ̍ɛ̍n.

²⁰Nyɔsoa tba̍ ɔ̍ chèɛ̀ sasǎ iě ɔ̍ dǔ kmɔ̌ la nu̍-ɛ, iě Klai tù mɔ̀-a tìh iě ɔ̍ ji̍ dǒ bɔ̌ɛ-o wǐh la di̍i̍.

²¹Dě ɔ̍ ja̍a̍ bo mɔ̀ jii wɛ̀ mɔ̀ gbaɛ Nyɔsoa wlùh, ɔ̀ sà-e Klai wɛ̀ ɔ̀ nyǐ ɔ̍ tìh-a i̍ bɛ̌-ɛ. Ɛ̍ kɔn mɔ̀ gbaɛ ɔ̍ wlùh iě mɔ̀ tè ɔ̍ wlì.

²²Ka mɔ̀ jě-a tìh-a taǐn dɛ̍ɛ̍-ɛ, ɛ̍ bo ɛ̀ nu̍ ɛ̍ iě mɔ̀ nɛ wlaǎwla, iě mɔ̀-a jbɛɛ-ɛ se̍ nɛi̍ nɛ dǒ mɔ̀ ba̍ᵻ Nyɔsoa nyɔ̍ we̍. Ɛ̍ tìh-ɛ, mɔ̀ jbɛɛ dǒ mɔ̀-a pɔluh kli̍hgbɛ̍ we̍.

²³Ɛ̍ se̍ baa jɔ-a mu̍-a mɛ̌-ɛ ja̍a̍ mɔ̀ se̍ wlǔh-i, jɛ dě jɔ se̍-a mɛ̌ mu̍-ɛ ja̍a̍ bo mɔ̀ wlǔh-i. Dɛ̍nu̍ɛ, Nyɔsoa-a wlu̍ ɛ̀ nɛ-a kmɔ̌, ɛ̀ se̍-a i̍ wɛ̀ la̍ kɔn-ɛ, dě ɛ̍ di̍i̍ bo mɔ̀ wlǔh-i wɛ̀ dode̍.

²⁴Ɛ̍ kɔn Nyɔsoa-a wlu̍ la̍a̍, “Nyɔ̍ kli̍hgbɛ̍ wɔ̀ pei, wɛ̀ u̍h-a jii̍ nmɔ-ɛ ke fɔ̀ài̍n wɔ̀ɛ. Pei dɛ̌blɛ-ɛ, nɛ̀ fɔ̀ài̍n kà i̍.

²⁵Jɛ Joi-a wlu̍ se̍ i̍ sì la̍ kɔn nɔ̌ kmɔ̌-a kmɔ̌.” Wlu̍ laa̍ bo ɛ̀ nu̍-a pɔ̀n chɛ̀ u̍h bla̍-a dě mɔ̀ we̍.