Read Western Krahn 1 Pitɛ 2 Bible Online

1 Pitɛ 2 - Western Krahn bible

1 Pitɛ 2

¹Ɛ̍ tìh-ɛ, mɔ̀ tǎli gblɛ̍n sɔ̀ɛ̀n kli̍hgbɛ̍ i̍, si̍h tmɔ̌-ɛ o, wlɛ̀n kɔn-ɛ o, nyɔ̍ wlu̍ sɔ̀nᵻ pùn i̍ po̍-ɛ o, mɛɔ sɔɔ̌n wɔ̍ɔ̍n nɛ-ɛ o, mɔ̀ tǎli i̍h i̍.

²Ka nynuu̍pli-a nu̍-a nyɛnɛ nǐ i̍ pɔ̀n-ɛ, kǎ mɔ̀ iě sùù-a di̍-dɛ̍ chɛ̀ i̍ pɔ̀n-ɛ nu̍ ke. Pò mɔ̀ di̍ ɛ̍-ɛ, nɛ̀ mɔ̀-a mu̍ ku̍, wɛ̀ mɔ̀ iě pǔh.

³Kǎ Nyɔsoa-a wlu̍ dǎ ka. Ɛ̍ la̍a̍, “Ka Joi nmɔ-a wɔ̍n-ɛ, mɔ̀ tɛ̀n ɛ̍ wɔ̍n wɛ̀.”

⁴Mɔ̀ ji̍ Joi we̍, ɔ̍ bo ɔ̀ nu̍ kmɔ̌ nɛ sɔɔ̌, kmɔ̌ nyɔ̍ tba̍ chla. Jɛ Nyɔsoa tba̍ ɔ̍ chèɛ̀ ɔ̍ iě kèàǎn nyɔ̍ nu̍.

⁵Mɔ̀ wɔ̀ kmɔ̌ nɛ sɔɔ̌ ke. Mɔ̀ɔ̍ bo Nyɔsoa dǔ-u, iě ɔ̍ poe mɔ̀ ɔ̍ Sùù-a gbò, wɛ̀ mɔ̀ iě nɛi̍ wɛ̀ slaǎ sà nyɔ̍ nu̍. Nɛ̀ mɔ̀ sà slaǎ Sùù ka, ɛ̀ Nyɔsoa-a mu̍-a i̍ gbɛ̍n dě Jusu Klai ja̍a̍-ɛ.

⁶Ɛ̍ kɔn Nyɔsoa-a wlu̍ la̍a̍, “Ǐn tba̍ kèàǎn sɔɔ̌ chèɛ̀, ɔ̍ nu̍ sìtù ǎn po̍ wlù dǒ Juluslɛn wlɔ̀ di̍i̍. Nyɔ̍-o-nyɔ̍ ɔ̀ mu̍-a ɔ̍ wlùh gbaɛ-ɛ, nɛ̀ ɔ̍ se̍ si̍h wɔ̍n poe-ɛ mu̍.”

⁷Ɛ̍ tìh-ɛ, mɔ̀ɔ̍ ùh gbaɛ-a ɔ̍ wlùh-ɛ, ɔ̍ gbǎ dɛ̍kɛ̍n dǒ mɔ̀ we̍. Jɛ nyɔ̍ ùh se̍-a ɔ̍ wlùh gbaɛ-ɛ, Nyɔsoa-a wlu̍ la̍a̍, “Sɔɔ̌ ɛ̀ gbò po̍ nyɔ̍ tba̍-a chla-a de-ɛ, ɛ̍ bɔ̌ɛ dɛ̍kɛ̍n gbǎ sɔɔ̌ nu̍-ɛ.”

⁸Nyɔsoa-a wlu̍ dɛɛ la̍a̍, “Sɔɔ̌ la bo nyɔ̍-a mu̍ gbèle wɛ̀ u̍h iě i̍ kèàɛ.” U̍h gbèle ɛ̍-ɛ, dɛ̍nu̍ɛ, u̍h se̍ wlu̍ la tìh chɛ̀ po̍. Ɛ̍-ɛ bo ɔ̍ po̍ gbɔ̀ se̍e̍ ɛ̀ iě u̍h pùn nɛ.

⁹Jɛ mɔ̀ɔ̍ Nyɔsoa-a chèɛ̀ tba̍ nyɔ̍, Blǔh Baa-a slaǎ sà nyɔ̍, mɔ̀ɔ̍ nɛi̍ wɛ̀ bloa̍. Mɔ̀ɔ̍ Nyɔsoa-a chɛ̀-a nyɔ̍, ɔ̍ dǎ mɔ̀ mɔ̀ iě dě kwile-e sɔ mɔ̀ iě ɔ̍ nyɔ̍ wɔ̍n flɔn sɔ̀npli we̍ ji̍. Ɔ̍ tba̍ mɔ̀ chèɛ̀ mɔ̀ iě nyɔ̍ wɔ̍n flɔn-ɛ dɛ̍ᵻ ɔ̍ nu̍-aɛ bla̍.

¹⁰Sàǐtòò-ɛ, nɛ̀ mɔ̀ se̍ Nyɔsoa-a nyɔ̍, jɛ kaka la̍, mɔ̀ɔ̍ ɔ̍ nyɔ̍ wɛ̀. Sàǐtòò-ɛ, nɛ̀ mɔ̀ɔ̍ jě Nyɔsoa-a wɔɛ kɔn-ɛ de, jɛ kaka la̍ mɔ̀-a jě ɛ̍ la̍-ɛ.

¹¹Ǎn tìh kma nyɔ̍, ǎn ba̍le mɔ̀ɔ̍-ɛ, ka mɔ̀ nu̍-a dihwi̍hᵻ ke kwlǎ-gbǎ-kèi̍ᵻ nɔ̌ kmɔ̌ la we̍-ɛ, mɔ̀ sà mɔ̀-a sɔ̍n dě gblɛ̍n sɔ̀ɛ̀n nu̍ dɛ di̍i̍, dɛ̍nu̍ɛ, i̍h-a pa̍-ɛ mɔ̀-a wlùh tu̍h we̍.

¹²Mɔ̀ tù mɔ̀-a chɛ̀-a nu̍-dɛ̍ᵻ jlǐhɛ̍ dě nyɔ̍ ùh se̍-a Nyɔsoa juo-ɛ nynɛ̌. Wɛ̀ pò u̍h la̍ mɔ̀ɔ̍ dɛ̍ᵻ sɔ̀nᵻ nu̍ nyɔ̍-ɛ, iě u̍h iě mɔ̀-a nu̍-dɛ̍ᵻ chɛ̀ jě, wɛ̀ u̍h iě Nyɔsoa tìhwe̍ po̍ dǒ ɔ̍ ji̍ la̍.

¹³Mɔ̀ tù Joi-a tìh mɔ̀ iě tùn blě nyɔ̍ kli̍hgbɛ̍ dɛ̍ɛ̍ jě, ɛ̍ ke Bloa̍ Joi ke,

¹⁴ɛ̍ ke kɔ̀mla̍ᵻ ɔ̍ tba̍-a chèɛ̀ ùh iě-a dɛ̍ᵻ sɔ̀nᵻ nu̍ nyɔ̍ kàn gbɛ̍n, wɛ̀ ùh iě-a dɛ̍ᵻ chɛ̀ nu̍ nyɔ̍ tìhwe̍ po̍-ɛ ke.

¹⁵Nyɔsoa-a pɔ̀n mɔ̀ iě dɛ̍ᵻ chɛ̀ nu̍ wɛ̀ sa̍a̍sa̍ nu̍ nyɔ̍ ùh-a sà-a dɛ̍ᵻ dounᵻ i̍-ɛ, u̍h-u je̍e mɔ̀ dɛ̍ sɔ̀n pùn bla̍.

¹⁶Mɔ̀ nu̍ dɛ̍ᵻ ka pǔh-u nyɔ̍-ɛ, jɛ mɔ̀ bɔ̌ dě mɔ̀-a pǔh-ɛ de̍e̍ kɛ̍n poe-ɛ, wɛ̀ mɔ̀ bɔ̌ dɛ̍ᵻ sɔ̀nᵻ nu̍-ɛ. Jɛ mɔ̀ nu̍ dɛ̍ᵻ ka Nyɔsoa-a pòi̍nynuu̍-ɛ.

¹⁷Mɔ̀ tè nyɔ̍ kli̍hgbɛ̍ ja̍. Mɔ̀ jbɛɛ mɔ̀ ba̍ᵻ Nyɔsoa nyɔ̍. Mɔ̀ jě Nyɔsoa gbiǐh, nɛ̀ mɔ̀ tè Bloa̍ Joi ja̍.

¹⁸Pòi̍nynuu̍, mɔ̀ jě mɔ̀-a dlǔtuᵻ dɛ̍ɛ̍, mɔ̀ iě u̍h ja̍ tè ti̍ kli̍hgbɛ̍ we̍. Mɔ̀ bɔ̌ ɛ̍ dlǔtuᵻ ùh nmɔ-a gblɛ̍n i̍-ɛ ke, ùh gbɛ̍n-a gba̍n-ɛ nɛ due pùn nu̍-ɛ. Jɛ mɔ̀ nu̍ ɛ̍ ùh kma-a wɔ̍n-ɛ pùn ke.

¹⁹Nyɔ̍ ɔ̀ tìh se̍-a tìh u̍h-a mu̍-a jua̍i̍ sàɛ̀ ɔ̍ Nyɔsoa nyɔ̍ nu̍ tìh wɛ̀ ɔ̍ iě-e klì i̍ ku̍-ɛ, nɛ̀ ɔ̍ mu̍ pɔ̀ìě jě.

²⁰Pò mɔ̀ ja bla̍-ɛ dɛ̍ sɔ̀n nu̍ tìh wɛ̀ mɔ̀ iě ɛ̍ wlùh ku̍-ɛ, nɛ̀ dɛ̍ ɛ̍ mu̍-o mɔ̀ po̍ ɛ? Jɛ pò u̍h ja mɔ̀ jua̍i̍ sàɛ̀ dɛ̍ chɛ̀ nu̍ tìh wɛ̀ mɔ̀ iě ɛ̍ wlùh ku̍-ɛ, nɛ̀ Nyɔsoa-a mu̍ mɔ̀ pɔ̀ìě nyǐ.

²¹Ɛ̍ kɔn tìh bo Nyɔsoa dǎ mɔ̀, dɛ̍nu̍ɛ, Klai-a chɛ̀ sàɛ̀ jua̍i̍ ke dǒ mɔ̀ we̍. Mɔ̀ɔ̍ bo ùh nu̍ ɔ̍ blaiɛ̍ ɔ̍ si̍e̍ mɔ̀ iě-e ɔ̍ wɔ̀ɔ̀ i̍ sà.

²²Ɔ̍ se̍ gblɛ̍n sɔ̀ɛ̀n nu̍, nyɔ̍ wɔ̍ se̍ ɔ̍ si̍h wlu̍-a chɛ̀ wɔ̍ɔ̍n wɔ̌n ke.

²³Ti̍ u̍h chlèe-a ɔ̍-ɛ, ɔ̍ se̍ gba̍ sà. U̍h sàɛ̀-ɛ ɔ̍ jua̍i̍-ɛ, ɔ̍ se̍ plǐn, jɛ Nyɔsoa ɔ̀ nu̍-a i̍ slɛ̌-ɛ taɔ-ɛ, ɔ̍ bo ɔ̍ tè wlì.

²⁴Klai tù à gblɛ̍n sɔ̀ɛ̀n dǒ ɔ̍ chɛ̀ pùn wɛ̀ ɔ̍ gba̍ i̍h dǒ gbàɛ̍ kɛ̍n i̍ tu̍ wlì. Ɔ̍ nu̍ ɛ̍-ɛ à ke gblɛ̍n sɔ̀ɛ̀n-a wloa̍ iě chɛn, wɛ̀ à iě dě i̍ slɛ̌-ɛ kmɔ̌ di̍i̍ nɛ. Ɔ̍ dɛ̍ᵻá i̍ tbaɛ bo ɛ̀ pǔh-i mɔ̀.

²⁵Mɔ̀ wɔ̀ blawɛ̌ᵻ ìh gbǎ-ɛa tàmlain-ɛ, jɛ kaka la̍ mɔ̀ ja-ɛ de̍ wɛ̀ dǒ ɔ̀ tù-a mɔ̀-a tìh jlǐhɛ̍-ɛ we̍.