Read Western Krahn 1 Pitɛ 3 Bible Online

1 Pitɛ 3 - Western Krahn bible

1 Pitɛ 3

¹Nynɔ̌gbaɔᵻ, kǎ mɔ̀ iě nu̍ ke. Mɔ̀ jě mɔ̀-a kɔanᵻ dɛ̍ɛ̍, wɛ̀ pò u̍h-a nyɔ̍ se̍ Nyɔsoa-a wlu̍ tìh chɛ̀ po̍-ɛ, wɛ̀ mɔ̀-a nu̍-dɛ̍ᵻ iě ɛ̍ nu̍ u̍h iě ɔ̍ wlùh gbaɛ. Ɛ̍ se̍ mɔ̀ iě tìh bla̍ gbɔ̀ dě u̍h we̍.

²Dɛ̍nu̍ɛ, mɔ̀-a wlaǎwla nɛ-ɛ ke u̍h-a gbiǐh jě-ɛ bo u̍h-a mu̍ jě.

³Mɔ̀-a jii̍ nmɔ-ɛ bɔ̌ dǒ ku̍ kɛ̍n nɛ-ɛ dǒ mɔ̀-a pùn tù dɛ̍ᵻ we̍. Ɛ̍ bo ɛ̀ nu̍-a mǐ dba̍-a ke kòo̍-a pɛ̀ɛ̀-dɛ̍ᵻ ke jlii̍ chɛ̀ dǒ pùn tù-ɛ.

⁴Jɛ mɔ̀-a gblɛ̍n bo ɛ̀ iě mɔ̀ jii̍ nmɔ-ɛ, ɛ̀ se̍-a wlà la̍ kɔn, ɛ̀ gbɛ̍n-a gba̍n wɛ̀ ɛ̀ gbɛ̍n-a tìh i̍-ɛ. Ɛ̍-ɛ bo ɛ̀ kɔn dɛ̍kɛ̍n gbǎ-a ku̍ wɔ̍n dě Nyɔsoa jlǐh.

⁵Tɛin-ɛ, nynɔ̌gbaɔᵻ ùh gbaɛ-a Nyɔsoa wlùh wɛ̀ ùh tè-a ɔ̍ wlì-ɛ, u̍h-a jě u̍h-a kɔanᵻ dɛ̍ɛ̍, ɛ̍-ɛ bo ɛ̀ nmɔ-ɛ u̍h jii̍.

⁶Ɛ̀ kɔn ba̍ Selɔ nu̍-a Eblaɛɛn-a wlu̍ wɛ̀ ɔ̍ dǎɛ-a ɔ̍ joi-ɛ, ɛ̍ mɔ̀ iě nu̍. Pò mɔ̀ ja dɛ̍ chɛ̀ nu̍ wɛ̀ ɛ̍ iě mɔ̀ faɔn sà dǒ mɔ̀-a kɔanᵻ we̍-ɛ, nɛ̀ mɔ̀ɔ̍ Selɔ-a nynuu̍.

⁷Kɔanᵻ, kǎ mɔ̀ iě nu̍ ke, mɔ̀ ke mɔ̀-a nynɔ̌gbaɔᵻ iě wlu̍ i̍ wɔ̌ɛn, ka u̍h se̍-a kmu u̍h se̍-a mɔ̀ sìì-ɛ. Mɔ̀ tè u̍h ja̍, dɛ̍nu̍ɛ, Nyɔsoa-a kmɔ̌ sie feɛ ɔ̍ mu̍-a mɔ̀ nyǐ-ɛ, ɛ̍ kɔn dǒ u̍h we̍ ke. Kǎ mɔ̀ iě nu̍ wɛ̀ mɔ̀-a Nyɔsoa ba̍le-ɛ je̍e cha̍n we̍ gbǎ.

⁸Nɛ̀ɛ̍, mɔ̀ kli̍hgbɛ̍ mɔ̀ blě wlùh due, mɔ̀-a ku̍-a chlɛ̌n-ɛ iě due nɛ. Mɔ̀ jbɛɛ mɔ̀ ba̍ᵻ Nyɔsoa nyɔ̍-ɔ, nɛ̀ mɔ̀ nmɔ gblɛ̍n-ɛ, mɔ̀ bɔ̌ mɔ̀-a chɛ̀ i̍ bɛ̌-ɛ.

⁹Bɔ̌ dɛ̍ sɔ̀n-a gba̍ sà-a, bɔ̌ wlu̍ sɔ̀n-a gba̍ sà-a ke, jɛ mɔ̀ sà-ɛ u̍h nǐ wɔ̍n. Dɛ̍nu̍ɛ, ti̍ Nyɔsoa dǎ-a mɔ̀-ɛ, ɔ̍ po̍ wlu̍ tɔ̀ma̍a̍ ɔ̍ iě mɔ̀ nǐ wɔ̍n sà-ɛ.

¹⁰Nyɔsoa-a wlu̍ la̍a̍, “Nyɔ̍-o-nyɔ̍ ɔ̀ pɔ̀n-a kmɔ̌ nu̍-ɛ i̍ ɔ̍ iě-a ti̍ chɛ̀ kɛ̍n jɛɛ-ɛ, ɔ̍ bɔ̌ dɛ̍ sɔ̀n wlu̍ di̍i̍ po̍-ɛ. Ɔ̍ bɔ̌ si̍h tmɔ̌-ɛ.

¹¹Ɔ̍ tǎli dɛ̍ sɔ̀n i̍ ɔ̍ iě dɛ̍ chɛ̀ nu̍. Kmɔ̌ i̍ gbe̍ɛ̍ɛn bo ɔ̍ iě i̍ pɔ̀n wɛ̀ ɔ̍ iě ɛ̍ kɛ̍ɛ̍n nɛ̌.

¹²Dɛ̍nu̍ɛ, Joi-a tù i̍ slɛ̌-nyɔ̍ jlǐhɛ̍ we̍. Nɛ̀ ɔ̍ wɔ̌n u̍h-a ba̍le wlu̍. Jɛ ɔ̍ dbǎ jua̍i̍ dǒ dɛ̍ sɔ̀n nu̍ nyɔ̍ we̍.”

¹³Pò mɔ̀-a wlùh ja jàjà nu̍ dɛ̍ chɛ̀ nu̍ tìh-ɛ, nɛ̀ nyɔ̍ mu̍ mɔ̀ dɛ̍ sɔ̀n pùn nu̍ ɛ?

¹⁴Jɛ pò mɔ̀-a jɛ sàɛ̀ jua̍i̍ i̍ slɛ̌-dɛ̍ nu̍ tìh-ɛ, nɛ̀ mɔ̀ nmɔ i̍ wɛ̀. Mɔ̀ bɔ̌ nyɔ̍ jǔ ple̍-ɛ, nɛ̀ sèò bɔ̌ mɔ̀ nu̍-ɛ ke.

¹⁵Mɔ̀ jě Klai dɛ̍ɛ̍ kleǐnklein ka ɔ̍ nu̍-a mɔ̀-a Joi-ɛ. Mɔ̀ gbàɛ̀ ti̍ kli̍hgbɛ̍ we̍ nyɔ̍ mu̍-a mɔ̀ i̍ tèle-ɛ, wɛ̀ mɔ̀ iě u̍h wlùh sèàɛ̍ dɛ̍ kɔn tìh mɔ̀ tè-a Nyɔsoa wlì-ɛ.

¹⁶Jɛ mɔ̀ bɔ̌ ɛ̍ nu̍-ɛ dǒ blɔ̌-ɛ we̍, mɔ̀ nu̍ ɛ̍ dǒ gba̍n gbɛ̍n-ɛ we̍. Mɔ̀ nu̍ ɛ̍ wɛ̀ dɛ̍-ɛ je̍e mɔ̀-a wlùh-u kǎ. Nɛ̀ pò u̍h chlèe mɔ̀, wɛ̀ u̍h iě mɔ̀ wlu̍-u po̍ dɛ̍ chɛ̀ nu̍ tìh ka mɔ̀ gbǎ-a dǒ Klai de̍e̍-ɛ, wɛ̀ tɛ̀n iě u̍h nu̍.

¹⁷Pò ɛ̍ nu̍ Nyɔsoa-a wlùh-ɛ, wɛ̀ mɔ̀ iě jua̍i̍ sàɛ̀ dɛ̍ chɛ̀ nu̍ tìh-ɛ, nɛ̀ ɛ̍ nmɔ jii̍ ɛ̍ sìì dɛ̍ sɔ̀n nu̍ tìh.

¹⁸Klai nu̍ mɛ̌-ɛ due gbài̍ dǒ gblɛ̍n sɔ̀ɛ̀n kli̍hgbɛ̍-a tìh we̍. Nyɔ̍ chɛ̀ gbǎ-ɛ dǒ nyɔ̍ sɔ̀n wɔ̀ɔ̀. Ɔ̍ nu̍ ɛ̍-ɛ, wɛ̀ ɔ̍ iě ìn Nyɔsoa wlì gba̍. U̍h dbǎ ɔ̍ nyi̍ɔ̍tu, jɛ Nyɔsoa nu̍ ɛ̍ ɔ̍ nɛ kmɔ̌ dě Sùù di̍i̍.

¹⁹Sùù laa̍ di̍i̍ ɔ̍ nɛ iě ɔ̍ mu̍ wɛ̀ ɔ̍ bla̍ tìh dě nyɔ̍ slàɔ̀n blǔh gbɛ̍n-a kàn-ɛ we̍.

²⁰Ti̍ Nyɔsoa gbɛ̍n-a wlùh-i tɛin wɛ̀ ɔ̍ chlì-a Nɔa-a blǎgbè kɔ̍-ɛ we̍ i̍-ɛ, nyɔ̍ ùh se̍-a ɔ̍ wlu̍ nu̍-ɛ, u̍h-a sùù bo. Jɛ jǐ-nǐ laa̍ nyɔ̍ jɔ̌ wei bo ùh pǔh ɛ̍ i̍, u̍h nɛ mɛ̀ta̍a̍n gbài̍.

²¹Nǐ dlǔ po̍-ɛ ɛ̀ pǔh-ia ka mɔ̀-ɛ, ɛ̍-ɛ bo jǐ-nǐ laa̍ wɔ̀. Nǐ dlǔ po̍-ɛ se̍ flɛ̀n ja̍i̍ sà-a. Jɛ wlu̍ tɔ̀ma̍a̍ po̍-ɛ bo dě Nyɔsoa we̍ dǒ à wlùh-a wlaǎwla nɛ-ɛ we̍. Mɔ̀ pǔh-i, dɛ̍nu̍ɛ, Jusu Klai wlǔh-e.

²²Jusu Klai ɔ̀ mu̍-a dě ja̍i̍wlɔ̀ dǒ Nyɔsoa-a di̍na̍ we̍-ɛ, Nyɔsoa-a ǐnchɔ̀ ke tùn blě-ɛ ke gbǐh kli̍hgbɛ̍ nɛ dǒ ɔ̍ sɔ̀n.