Read Western Krahn 2 Pitɛ 2 Bible Online

2 Pitɛ 2 - Western Krahn bible

2 Pitɛ 2

¹Ka Nyɔsoa-a tu̍owli po̍ nyɔ̍-a si̍h naɛ nu̍-a nyɔ̍ɔ nynɛ̌ gbǎ-a tɛin-ɛ, kǎ nǎ po̍ nyɔ̍-a si̍h naɛ-a mu̍ mɔ̀ nynɛ̌ gbǎ-a nu̍ ke ti̍laa. Nɛ̀ si̍h ɛ̀ gbɔ̀lɔ-a dɛ̍ɛ̍-ɛ, ɛ̍ bo u̍h-a mu̍ nyɔ̍gbei nǎ poe. Wɛ̀ Dlǔtu jɔ pùhbɔ-a u̍h kɛ̍ɛ̍n-ɛ, u̍h iě ɔ̍ chla tba̍. Wɛ̀ i̍-i gbɔ̀lɔ-ɛ ɛ̀ kèè-a nyɔ̍ kɛ̍n-ɛ, u̍h iě ɛ̍ u̍h-a chɛ̀ we̍ ja.

²Nyɔ̍ dɔu-a mu̍ dǒ u̍h-a se̍i̍kɔɛn laa̍ de̍e̍ gbǎ. Nɛ̀ u̍h-a tìh bo nyɔ̍gbei-a mu̍ Nyɔsoa-a tìh-a taǐn wìè la wlu̍ sɔ̀nᵻ pùn i̍ po̍.

³Nǎ po̍ nyɔ̍-a si̍h naɛ laa̍ u̍h kɔn klǎn, ɛ̍ tìh u̍h-a mu̍ si̍h tmɔ̌ wɛ̀ u̍h iě mɔ̀ dɛ̍ kɛ̍n jě. U̍h-a se̍ kɛ̀n gba̍ pèle dǒ u̍h de̍e̍-ɛ se̍e̍, iě u̍h-aa gbɔ̀lɔ nyɔ̍ wɔ̍ se̍ mɔ̌ dɛ ke.

⁴Nyɔsoa bo ɔ̀ gbɛ̍n ɔ̍ chɛ̀-a ǐnchɔ̀ nu̍-a gblɛ̍n sɔ̀ɛ̀n-ɛ kàn. Wɛ̀ ɔ̍ po̍ i̍h dě kàn nɛ̍ di̍i̍ dě biě jlu̍jlu̍ di̍i̍ i̍h iě-e nɛ te̍e̍ wɛ̀ sàwi̍h sì ti̍ iě nyni̍.

⁵Wɛ̀ Nyɔsoa se̍ tɛin kmɔ̌ bu̍h i̍ kaɛn iě ɔ̍ dbo̍ jǐ-nǐ wɛ̀ ɛ̍ gba̍ se̍ Nyɔsoa dɛ-ɛ nɛ nyɔ̍ kli̍hgbɛ̍. Nɔa ɔ̀ bla̍-a tìh nyɔ̍ iě-a i̍ slɛ̌-ɛ, ɔ̍ bo ɔ̍ pǔh-i, ɛ̍ ke nyɔ̍ mɛ̀sɔɔ̌n duuh ke.

⁶Nyɔsoa sà Sɔdɔm ke Kɔmowla wlɔ̀ᵻ kɛ̀n, iě ɔ̍ gbɔ̀lɔ i̍h dǒ nɛ̍ we̍. I̍h bo ìh nu̍ juola dǒ nyɔ̍ ùh se̍-a Nyɔsoa dɛ-ɛ nɛ-ɛ we̍.

⁷Wɛ̀ Laa ɔ̀ nu̍-a i̍ slɛ̌-nyɔ̍, iě kà kɔn nyɔ̍-a jěe-a tìh dǒ u̍h-a se̍i̍kɔɛn we̍-ɛ, wɛ̀ Nyɔsoa sèìe ɔ̍.

⁸I̍-i slɛ̌-nyɔ̍ laa̍ ɔ̀ tǐn-a dě u̍h nynɛ̌-ɛ, ka sɔ̀n-a sɛ̀n-aɛ, kǎ ɔ̍ pɔluh-a si̍n dǒ u̍h-a kà gblɛ̍n-a tìh ɔ̍ wɔ̌n-a iě ɔ̍ jlǐh-a jě-aɛ we̍.

⁹Ka ɛ̍ nɛ-a ka-ɛ, nɛ̀ Joi juo ka ɔ̍ iě-a ɔ̍ nyɔ̍ sèìe-ɛ nu̍-ɛ. Wɛ̀ ɔ̍ juo ka ɔ̍ iě-a se̍ i̍ slɛ̌-nyɔ̍ kàn gbɛ̍n-ɛ nu̍ wɛ̀ ɔ̍ iě-a u̍h kwa̍ kɛ̍n tè te̍e̍ ɛ̍ iě-a sàwi̍h sì ti̍ jɛɛ-ɛ.

¹⁰Nyɔ̍ ùh wɔ̀-a dǒ u̍h-a chɛ̀-a wlùh dɛ̍ᵻ de̍e̍, iě u̍h-a nu̍-a se̍i̍kɔɛn, wɛ̀ ùh-u jě-a tùn blě nyɔ̍ dɛ̍ɛ̍-ɛ, u̍h-u bo Nyɔsoa-a mu̍ kàn gbɛ̍n chɛ̀ɛ̌chɛ̀. Nǎ po̍ nyɔ̍-a si̍h naɛ la u̍h bɛ̌ wlì i̍, iě u̍h-a chɛ̍n ko̍o̍. Tìh-a i̍ bɛ̌-ɛ nyɔ̍ nɛ-a dě à dlǔwèàì-ɛ, u̍h-u ple̍ faɔn dǒ u̍h wlu̍ pùn i̍ po̍ la̍.

¹¹Nyɔsoa-a ǐnchɔ̀ jih kmu-a kaa̍ wɛ̀ ìh kɔn-a gbǐh ìh sìì-a nǎ po̍ nyɔ̍-a si̍h naɛ-ɛ, i̍h-i ja ùh laa̍ tìh i̍ blaɛ dě Joi we̍ wɛ̀ i̍h-i po̍ chlèwli̍.

¹²Jɛ nǎ po̍ nyɔ̍-a si̍h naɛ la ùh se̍ dɛ̍ we̍ i̍ wɔ̌n-ɛ, nɛ̀ u̍h-a po̍-a ɛ̍ wlu̍ pùn i̍-ɛ, u̍h wɔ̀ nmi̍i̍ ìh-a nu̍-a i̍h-a chɛ̀-a slɛ̌-ɛ. Kwlǎ nmi̍i̍ la ìh nɛ-a nɔ̌ kmɔ̌ sǔh gbɛ̍n ìè dbǎ tìh-ɛ, i̍h bo u̍h wɔ̀. U̍h-a mu̍-u gbɔ̀lɔ ke ka kwlǎ nmi̍i̍-ɛ.

¹³Ka u̍h-a nu̍-dɛ̍-a nu̍-a nyɔ̍ i̍ poa-ɛ, nɛ̀ nu̍-dɛ̍-a nyɔ̍ i̍ poa bo ɛ̀ mu̍ u̍h-a pɛ̌ɛ la̍ nu̍. Se̍i̍kɔɛn nu̍-ɛ jlǔh gbàɔ̀ kloklǒ bo u̍h-a dǎɛ kmɔ̌ nu̍-ɛ. Ɛ̍ nu̍ tɛ̀n dɛ̍-ɛ wɛ̀ ɛ̍ nu̍ nyɔ̍ mlɔ̌ wɔ̍n po̍ dɛ̍, u̍h iě mɔ̀ nynɛ̌ gbǎ dǒ dɛ̍ di̍ la̍. Pò u̍h ja mɔ̀ i̍ boe-ɛ, nɛ̀ ɛ̍ pɛ̌n-ɛ u̍h-a pɔluh i̍.

¹⁴U̍h nɛ sɛ̌ jlǐh kleǐn, u̍h-u bɔ̌ gblɛ̍n sɔ̀ɛ̀n nu̍-ɛ. U̍h-a po̍ dli̍h wlɔ̍nᵻ we̍ nyɔ̍ blu̍ja̍a̍. Klǎn kɔn-ɛ bo u̍h cheǎn. Jɛ Nyɔsoa-a mu̍ u̍h wlu̍we̍i̍ po̍.

¹⁵U̍h sɔ dǒ wìè ɛ̀ slɛ̌-a i̍-ɛ kɛ̍n wɛ̀ u̍h sie kwlǎ. Iě u̍h wɔ̀ dǒ Nyɔsoa-a tu̍owli po̍ nyɔ̍ Belɛm de̍e̍, ɔ̀ nu̍-a Beɔ-a jǔ ɔ̀ jbɛɛ-a dɛ̍ᵻ sɔ̀nᵻ nu̍ dɛ-ɛ wlǐ tìh-ɛ.

¹⁶Jɛ ɔ̍ soo̍pà wǐi ɔ̍ dlǔ-i ɔ̍ dɛ̍ᵻ sɔ̀nᵻ nu̍ tìh. Nmi̍ɛ̍ ɛ̀ se̍-a wlu̍ kɔn-ɛ, iě ɛ̍ wlu-i nyi̍ɔ̍ wlu̍-u, wɛ̀ ɛ̍ po̍ ɔ̍ jlǐh-a mlɛ̌-ɛ dɛ̍ᵻ nu̍-ɛ bɔ̌ i̍.

¹⁷Nyɔ̍ la u̍h wɔ̀ kao̍dluᵻ ìh se̍-a nǐ blě-ɛ, ɛ̍ ke nǐgbanᵻ ìh tìlèè poɔ-a gba̍-aɛ ke. Nyɔsoa po̍ kwile puo gba̍a̍ wɛ̀ dǒ u̍h we̍.

¹⁸U̍h-a chɛ̍n blɔ̌-ɛ ke bo-sɔ̀ìn. Wɛ̀ u̍h-a nu̍ se̍i̍kɔɛn, nyɔ̍ ùh-a ple̍-a la̍ de ùh-a sɔ-a dě dɛ̍ᵻ sɔ̀nᵻ di̍i̍ tǐn nyɔ̍ we̍-ɛ, u̍h-u bo u̍h-a po̍ dě de̍ biě laa̍ di̍i̍.

¹⁹Nǎ po̍ nyɔ̍-a si̍h naɛ la u̍h-a po̍ wlu̍ tɔ̀ma̍a̍ u̍h iě nyɔ̍ dě kèìe̍e̍ sà, jɛ nɛ̀ u̍h-a chɛ̀ nɛ dě tba̍ɛ kɛ̍n i̍-a kèìe̍e̍. Nyɔ̍ ɔ̀ dɛ̍-o-dɛ̍ kɔn-a wlu̍ i̍-ɛ, nɛ̀ ɔ̍ nɛ dě ɛ̍ kèìe̍e̍.

²⁰Jusu Klai ɔ̀ nu̍-a à Joi ke à Sèìe Nyɔ̍-ɛ, ɔ̍ bo nyɔ̍ duuh juo, ɛ̍ kɔn u̍h sà kmɔ̌-a tba̍ɛ kɛ̍n i̍ sɔ̍n di̍i̍. Jɛ pò u̍h gbǎ i̍h-a gbɛɛ̍ dode̍ wɛ̀ i̍h iě u̍h-a gbɛ̍n la̍ jě-ɛ, nɛ̀ tu̍ jɛ u̍h-a mu̍-a dě di̍i̍ nɛ-ɛ bɔ̌ɛ-ɛ, nɛ̀ ɛ̍ nu̍ ɛ̍ ìèke̍e̍ ɛ̍ sìì sàǐtòò naɛ.

²¹Pò u̍h se̍ i̍ slɛ̌-wìè juo de kleǐn-ɛ, nɛ̀ ɛ̍ nmɔ jii̍ ɛ̍ sìì u̍h wɔ̀ ɛ̍ juo-ɛ, wɛ̀ u̍h poe Nyɔsoa-a telě jɛ nyɔ̍ bla̍-a dě u̍h we̍-ɛ kɛ̍n i̍.

²²Dɛ̍ ɛ̀ nɛ-a u̍h jii̍-ɛ, ɛ̍ to ɛ̍ ka nɛnǎᵻ la i̍h nu̍-a tìh-a taǐn-ɛ. I̍h la̍a̍, “Gbè bǐi i̍ wɛ̀ ɛ̍ bɛ̍ ɛ̍ chɛ̀-a wlàwi̍h. Be̍e̍ ɛ̀ wɔ̀-a dle-ɛɛ, ɛ̍ bo ɛ̀ bǐi i̍ wɛ̀ ɛ̍ gbǎ dě pɔlɔ̌ di̍i̍ dode̍.”