Read Western Krahn 2 Pitɛ 3 Bible Online

2 Pitɛ 3 - Western Krahn bible

2 Pitɛ 3

¹Ǎn tìh kma nyɔ̍, chlǐh-dɛ̍ᵻá sɔɔ̌n naɛ la ǎn chlǐh-a mɔ̀ we̍. Ǎn sǐi mɔ̀ tìh wlì i̍ dě i̍h nɛ-a sɔɔ̌n-ɛ di̍i̍, wɛ̀ mɔ̀ iě dɛ̍ᵻ chɛ̀ wlùh i̍ naɛ dǒ mɔ̀ wlùh kɛ̍n.

²Wlu̍ Nyɔsoa-a tu̍owli po̍ nyɔ̍ bla̍-a dě mɔ̀ we̍ tɛin-ɛ, ǎn pɔ̀n mɔ̀ iě i̍h wlùh we̍ nu̍, ɛ̍ ke à Joi ɔ̀ nu̍-a à Sèìe Nyɔ̍-ɛ, ɔ̍ nyɔ̍ slǔh po̍-ɛ ɔ̍ jaɛ-a dě mɔ̀-a gba̍tòà ja̍a̍-ɛ ke.

³Sàǐtòò dɛ ǎn pɔ̀n-a mɔ̀ iě-a juo-ɛ, dǒ bɔ̌ɛ-o wǐh di̍i̍-ɛ, jlii̍h nu̍ nyɔ̍-a mu̍ mɔ̀ kɛ̍n wlǔh-i. U̍h-a chɛ̀-a dɛ̍ᵻ sɔ̀nᵻá mu̍ u̍h wlu̍ i̍ kɔn wɛ̀ u̍h iě mɔ̀ jlii̍h kɛ̍n i̍ nui.

⁴Nɛ̀ u̍h-a mu̍ mɔ̀ i̍ tèle-ɛ ka dǎ, “Ɔ̀ po̍-a wlu̍ tɔ̀ma̍a̍ ɔ̀ iě-a de̍ ji̍-ɛ, tà ɔ̍ nɛ ɛ? À baaᵻ mɛ̌ wɛ̀-ɛ se̍e̍, jɛ ka due dɛ̍ᵻ kli̍hgbɛ̍ nɛ-a sɔ dě kmɔ̌-a gbɔ̀ tè la̍-ɛ, kǎ i̍h nɛ ke̍.”

⁵Jɛ nɛ̀ u̍h mǎle-e fu̍u̍ ka Nyɔsoa-a wlu̍ bo ɔ̍ nui-a blǔh ke ja̍u̍n tɛin-ɛ. Dě nǐ di̍i̍ bo blǔh sɔ-ɔ, wɛ̀ ɛ̍ nui ɛ̍ dǒ nǐ we̍.

⁶Nǐ due laa̍ bo ɛ̀ jǐ wɛ̀ ɛ̍ gbɔ̀lɔ u̍h-a tɛin kmɔ̌-ɔ.

⁷Jɛ Nyɔsoa-a wlu̍ due laa̍ bo ɛ̀ nu̍ ɛ̍ wɛ̀ blǔh ke ja̍u̍n ìh nɛ-a ka kmɔ̌-ɛ, iě nɛ̍ tè ka i̍h de̍e̍ i̍ wɛ̀ ɛ̍ iě se̍ Nyɔsoa dɛ-ɛ nɛ nyɔ̍-a sàwi̍h sì weɛ̍ jɛɛ, wɛ̀ u̍h iě-e gbɔ̀lɔ.

⁸Jɛ ǎn tìh kma nyɔ̍, dɛ̍ due bo mɔ̀ bɔ̌ we̍ mǎle-ɛ, weɛ̍ due wɔ̀ sɔ̀nᵻá wlǔ due, wɛ̀ sɔ̀nᵻá wlǔ due wɔ̀ weɛ̍ due dǒ Joi we̍. I̍h-a dɛ̍ se̍ dɔɔ̌ nɛ dǒ ɔ̍ we̍.

⁹Joi-i tlɛ̀n dǒ ɔ̍ tɔ̀ma̍a̍ wlu̍ we̍, jɛ kǎ nyɔ̍ duuh-a nu̍ ɛ̍ jě ɛ̍. Ɔ̍ gbɛ̍n wlùh i̍ dǒ mɔ̀ we̍ dɛbo. Dɛ̍nu̍ɛ, ɔ̍ se̍ pɔ̀n nyɔ̍-o-nyɔ̍ iě-e gbɔ̀lɔ, jɛ ɔ̍ pɔ̀n nyɔ̍ kli̍hgbɛ̍ iě u̍h-a gblɛ̍n sɔ̀ɛ̀n kɛ̍n i̍ poe.

¹⁰Jɛ Joi-a ji̍-i weɛ̍ ke jlǐ-nyɔ̍-a dě gbò pa̍-a mu̍ wɔ̀ɛ. Dǒ weɛ̍ laa̍ di̍i̍-ɛ, ja̍u̍n-a tìh-a i̍ wɛ̀-ɛa mu̍ dě slɛ̀-ɛ jii. Nɛ̀ ɛ̍ we̍ na dɛ̍ᵻá mu̍ si̍n, wɛ̀ i̍h iě-e gbɔ̀lɔ-ɛ. Nɛ̀ blǔh ke ɛ̍ kɛ̍n i̍ na dɛ̍ᵻ kli̍hgbɛ̍-a mu̍ mǎ.

¹¹Ka dɛ̍ᵻ kli̍hgbɛ̍-a mu̍-a ka gbɔ̀lɔ-ɛ nu̍-ɛ, nɛ̀ dɛ̍ɛ nyɔ̍ we̍ bo mɔ̀-a mu̍ ka nu̍ ɛ? Mɔ̀ kɔn mɔ̀ iě nɛi̍ wɛ̀, mɔ̀ iě Nyɔsoa kmɔ̌-ɔ nɛ.

¹²Ka ja̍u̍n-a mu̍-a la̍ si̍n dǒ Joi-a ji̍-i weɛ̍ di̍i̍ wɛ̀ ɛ̍ di̍i̍ i̍ dɛ̍ᵻ iě-a wlɔ̍ dǒ fuun we̍-ɛ, nɛ̀ mɔ̀ɔ̍ ùh-a fuo-a weɛ̍ laa̍ ɛ̍ ji̍-ɛ kɛ̍ɛ̍n-ɛ, mɔ̀ fɔ̀n dɛ̍ we̍ wɛ̀ ɛ̍ iě tèwe.

¹³Jɛ blǔh delee ke ja̍u̍n delee kɔn wlu̍ Nyɔsoa po̍-a tɔ̀ma̍a̍-ɛ, ɛ̍ bo à fuo kɛ̍ɛ̍n. Dě-e bo i̍ slɛ̌-ɛ nɛ.

¹⁴Ɛ̍ tìh-ɛ, ǎn tìh kma nyɔ̍, ka mɔ̀-a fuo-a weɛ̍ la kɛ̍ɛ̍n-ɛ, mɔ̀ fɔ̀n dɛ̍ we̍ mɔ̀-a nynɛ̌-ɛ je̍e kɔ̌, mɔ̀ɔ̍ je̍e nɛi̍ nɛ, wɛ̀ wlùh-a i̍ tè-ɛ iě dǒ ɔ̍ ke mɔ̀ nynɛ̌ nɛ.

¹⁵Mɔ̀ blě-e ɛ̀ la dǒ wlùh kɛ̍n, à Joi-a wlùh i̍ gbɛ̍n-a nyǐ mɔ̀ flɔna̍ mɔ̀ iě pǔh. Kǎ à tìh kma de̍di̍i̍ Pɔɔ nu̍ mɔ̀ we̍ chlǐh-ɛ ke dǒ flɔ̍nwlùh Nyɔsoa nyǐ-a ɔ̍-ɛ we̍.

¹⁶I̍h-i bo ɔ̍ bla̍ dě ɔ̍ chlǐh-dɛ̍ᵻ kli̍hgbɛ̍ ɔ̍ chlǐh-aɛ di̍i̍. Diih ìh kma-a i̍ wɔ̌n-ɛ dě i̍h di̍i̍-ɛ, i̍h kɔn klě bo nyɔ̍ duuh-a fiǎn, ɛ̀ u̍h-a nu̍-a Nyɔsoa-a wlu̍ diih-ɛ. Se̍ dɛ̍ i̍ juo nyɔ̍ ke dli̍h wlɔ̍nᵻ we̍ nyɔ̍ bo ùh-a nu̍ la̍a̍n, jɛ nɛ̀ i̍ gbɔ̀lɔ-ɛ bo u̍h-a ja u̍h-a chɛ̀ we̍.

¹⁷Ǎn tìh kma nyɔ̍, mɔ̀ɔ̍ nɔ̀ɔ̍, mɔ̀ juo ìh la wɛ̀-ɛ se̍e̍. Ɛ̍ tìh-ɛ, mɔ̀ nu̍ mɔ̀-a chɛ̀-a nɛnɛ̌ wɛ̀ klǐ-dɛ̍ᵻ nu̍ nyɔ̍-ɔ je̍e mɔ̀-a wlùh fèàɛ̀ dě klǐ-dɛ̍ᵻ we̍, wɛ̀ mɔ̀ɔ̍ je̍e nyna la̍-a wlǔh.

¹⁸Jɛ ɔ̀ nu̍-a à Joi ke à Sèìe Nyɔ̍ Jusu Klai-ɛ, dě ɔ̍ juo-ɛ ke ɔ̍ blɛ nɛ-ɛ di̍i̍ bo mɔ̀ iě nya̍ pàɛ̀n. Ɔ̍-ɔ bo tìh-a i̍ bɛ̌-ɛ kɔn dǒ we̍ kaka ke nɔ̌ kmɔ̌-a kmɔ̌. Kǎ ɛ̍-ɛ nɛ.