Read Western Krahn 1 Chɔɔn 3 Bible Online

1 Chɔɔn 3 - Western Krahn bible

1 Chɔɔn 3

¹Mɔ̀ jě ka Baa Nyɔsoa nu̍-a à tìh kma-a kaa̍-ɛ. Ɛ̍ tìh ɔ̍ dǎɛ àɔ̀ ɔ̍ nynuu̍. Àɔ̀ Nyɔsoa-a nynuu̍, ɛ̍ kɔn kmɔ̌ se̍ à juo, dɛ̍nu̍ɛ, ɛ̍ se̍ ɔ̍ juo.

²Ǎn tìh kma nyɔ̍, àɔ̀ Nyɔsoa-a nynuu̍ nɔ̀ɔ̍ wɛ̀, jɛ ka à mu̍-a nɛ dě nya̍-ɛ, ɛ̍ se̍ we̍i̍ flɔn ke̍. Jɛ à juo ka à mu̍-a nɛ-ɛ, ti̍ ɔ̍ mu̍-a àɔ̀ kɛ̍n wlǔh-iɛ, nɛ̀ à mu̍ ɔ̍ wɔ̀. Dɛ̍nu̍ɛ, ka ɔ̍ nɛ-aɛ, nɛ̀ à mu̍ ɛ̍ jě.

³Nyɔ̍ jɔ tè-a Nyɔsoa wlì ɛ̀ la ɛ̍ tìh-ɛ, nɛ̀ ka Klai nu̍-a wlaǎwla nɛ-ɛɛ, kǎ ɔ̍ nu̍ ɔ̍ chɛ̀-a wlaǎwla nu̍-ɛ wɛ̀ ke.

⁴Nyɔ̍ jɔ nu̍-a gblɛ̍n sɔ̀ɛ̀n-ɛ, nɛ̀ ɔ̍ wa̍ Nyɔsoa-a telě, dɛ̍nu̍ɛ, gblɛ̍n sɔ̀ɛ̀n nu̍-ɛ laa̍ telě wa̍-a bo.

⁵Mɔ̀-a chɛ̀ juo ɛ̍-ɛ Klai ji̍-i ɔ̍ iě à gblɛ̍n sɔ̀ɛ̀n i̍ sà. Dě ɔ̍ ja̍a̍ bo gblɛ̍n sɔ̀ɛ̀n se̍ nɛ.

⁶Nyɔ̍ jɔ nɛ-a dě Klai ja̍a̍-ɛ, ɔ̍-ɔ gba̍ gblɛ̍n sɔ̀ɛ̀n dluwe̍ i̍. Jɛ nyɔ̍ ɔ̀ gba̍-a gblɛ̍n sɔ̀ɛ̀n dluwe̍ i̍-ɛ, nɛ̀ ɔ̍-ɔ se̍a ɔ̍ jě, àe̍e̍ ɔ̍ se̍ ɔ̍ juo.

⁷Ǎn nynuu̍, mɔ̀ bɔ̌ wɔ̌n-ɛ nyɔ̍ bɔ̌ mɔ̀ i̍ boe-ɛ. Nyɔ̍ jɔ nu̍-a i̍ slɛ̌-dɛ̍-ɛ, nɛ̀ ka Klai nu̍-a i̍ slɛ̌-ɛɛ, nɛ̀ kǎ ɔ̍ nɛ wɛ̀ ke.

⁸Nyɔ̍ jɔ gba̍-a gblɛ̍n sɔ̀ɛ̀n dluwe̍ i̍-ɛ, nɛ̀ ɔ̍ kɔn dǒ Kǔ we̍. Dɛ̍nu̍ɛ, Kǔ sà gblɛ̍n sɔ̀ɛ̀n nu̍-ɛ dě tɔ̀blɔ̍ɔ̍. Ɛ̍ kɔn Nyɔsoa-a Jǔ ji̍ wɛ̀ ɔ̍ iě Kǔ-a nu̍-dɛ̍ᵻ i̍ gbɔ̀lɔ.

⁹Nyɔ̍-ɔ nu̍ Nyɔsoa-a jǔ wɛ̀ ɔ̍-ɔ gba̍ gblɛ̍n sɔ̀ɛ̀n dluwe̍ i̍, dɛ̍nu̍ɛ, Nyɔsoa-a gblɛ̍n nɛ dě ɔ̍ ja̍a̍. Nɛ̀ ɔ̍ se̍ gblɛ̍n sɔ̀ɛ̀n nu̍-ɛ bɛ̌ɛ, dɛ̍nu̍ɛ, ɔ̍-ɔ Nyɔsoa-a jǔ.

¹⁰Kǎ à nu̍ ka Nyɔsoa ke Kǔ-a nynuu̍ we̍ sèàɛ̍-ɛ. Nyɔ̍ ɔ̀-ɔ nu̍-a i̍ slɛ̌-dɛ̍-ɛ, nɛ̀ ɔ̍ se̍ Nyɔsoa-a jǔ, ɛ̍ ke nyɔ̍ ɔ̀ se̍-a ɔ̍ de̍di̍i̍ i̍ jbɛɛ-ɛ ke.

¹¹Ɛ̀ nu̍-a tu̍owli mɔ̀ sà-a wɔ̌n-ɛ dě tɔ̀blɔ̍ɔ̍-ɛ, ɛ̍ nu̍, à iě we̍ jbɛɛ.

¹²Mɔ̀ à bɔ̌ Kein-a dɛ nu̍-ɛ. Ɔ̍ kɔn dǒ Nyɔ̍ Sɔ̀n we̍, ɛ̍ kɔn ɔ̍ po̍ ɔ̍ de̍di̍i̍ gbe̍ja̍a̍. Kein po̍ ɔ̍ gbe̍ja̍a̍, dɛ̍nu̍ɛ, Kein naɛ nu̍-dɛ̍ᵻ klǐ-i, iě ɔ̍ de̍di̍i̍ naɛ slɛ̌ i̍.

¹³Ǐn de̍di̍i̍ᵻ, pò kmɔ̌-a nyɔ̍ faɛn mɔ̀ɔ̍-ɛ, nɛ̀ ɛ̍ bɔ̌ mɔ̀ i̍ kèle-ɛ.

¹⁴À juo ɛ̍-ɛ à sì dě mɛ̌ɛ di̍i̍ wɛ̀ iě à jɛɛ feɛ, dɛ̍nu̍ɛ, à jbɛɛ à de̍di̍i̍ᵻ. Jɛ nyɔ̍ ɔ̀ se̍-a ɔ̍ de̍di̍i̍ i̍ jbɛɛ-ɛ, nɛ̀ ɔ̍ nɛ dě mɛ̌ɛ di̍i̍ ke̍.

¹⁵Nyɔ̍-o-nyɔ̍ ɔ̀ faɛn-a ɔ̍ de̍di̍i̍-ɛ, nɛ̀ nyɔ̍ gbe̍ja̍a̍ po̍ nyɔ̍ bo. Mɔ̀ juo ɛ̍-ɛ nyɔ̍ gbe̍ja̍a̍ po̍ nyɔ̍ se̍ kmɔ̌ sie feɛ blě.

¹⁶Tà à juo-ea nyɔ̍-ɔ jbɛɛ dɛ̍ i̍-ɛ dǒ-o la, ɛ̍ nu̍ Jusu Klai sà ɔ̍ feɛ kwlǎ dǒ à we̍. Nɛ̀ à kɔn à iě à feɛ kwlǎ sà ke dǒ à de̍di̍i̍ᵻ we̍.

¹⁷Pò nyɔ̍ pàn da̍a kmɔ̌ la we̍, wɛ̀ ɔ̍ iě ɔ̍ de̍di̍i̍ jě ɔ̍ iě dɛ̍ ɔ̍ nɛ-a blě ka̍-a i̍ pɔ̀n, wɛ̀ ɔ̍ iě wlùh kàà po̍ dǒ ɔ̍ we̍-ɛ, nɛ̀ ka ɔ̍ nu̍ Nyɔsoa-a jbɛɛ dluwe̍ i̍ gba̍-a ɛ?

¹⁸Nɛ̀ɛ̍, ǎn nynuu̍, à jbɛɛ-ɛ bɔ̌ dǒ wɔ̍i̍n nɛ-ɛ sǔh. Jɛ mɔ̀ à nu̍ ɛ̍ sɔ̍nᵻ dě tìh-a taǐn di̍i̍.

¹⁹À nyɔ̍-ɔ jbɛɛ-ɛ bo ɛ̀ nu̍ ɛ̍ wɛ̀ à juo-o dɛ̍ i̍ ka à kɔn-a dǒ tìh-a taǐn we̍-ɛ, wɛ̀ à wɛ̀ faɔn dǒ Nyɔsoa jǔ.

²⁰Pò à chɛ̀-a wlùh sà à kɛ̀n-ɛ, jɛ Nyɔsoa ku̍ wɔ̍n ɔ̍ sìì à wlùh, iě ɔ̍ juo dɛ̍ᵻ kli̍hgbɛ̍.

²¹Ǎn tìh kma nyɔ̍, pò à wlùh se̍ à kɛ̀n sà-ɛ, nɛ̀ à mu̍ wlì i̍ bɛ̌ dǒ Nyɔsoa jǔ.

²²À jbǎ-ɛ ɔ̍ dɛ̍ jɛ-ɛ, nɛ̀ à jě ɛ̍-ɛ, dɛ̍nu̍ɛ, à tè-o ɔ̍ telě i̍, iě à nu̍ dɛ̍ ɛ̀ tè-ea ɔ̍ wlùh i̍-ɛ.

²³Ɔ̍ telě-a chɛ̀ nu̍, à gbaɛ ɔ̍ Jǔ Jusu Klai wlùh, à iě we̍ jbɛɛ. Kǎ ɔ̍ nu̍ à wlùh sèàɛ̍.

²⁴Nyɔ̍ jɔ tè-ao Nyɔsoa-a telě i̍-ɛ, nɛ̀ ɔ̍ nɛ dě Nyɔsoa ja̍a̍ iě Nyɔsoa nɛ ɔ̍-ɔ. Nyɔsoa-a Sùù ɔ̍ nyǐ-a àɔ̀-ɛ bo ɛ̀ nu̍ ɛ̍ iě à juo-o dɛ̍ i̍ ka ɔ̍ nɛ-a dě à ja̍a̍-ɛ.