Read Western Krahn 1 Chɔɔn 5 Bible Online

1 Chɔɔn 5 - Western Krahn bible

1 Chɔɔn 5

¹Nyɔ̍ jɔ po̍-a ɛ̍ tìh chɛ̀ ka Jusu nu̍-a Nyɔsoa-a Chèɛ̀ Tba̍ju-ɛ, nɛ̀ ɔ̍-ɔ Nyɔsoa-a jǔ. Nɛ̀ nyɔ̍ jɔ jbɛɛ-a baa-ɛ, nɛ̀ ɔ̍ jbɛɛ ɔ̍ jǔ wɛ̀ ke.

²À jbɛɛ Nyɔsoa-a iě à jě ɔ̍ telě dɛ̍ɛ̍, dǒ à juo-e dɛ̍ i̍ ka à jbɛɛ-a ɔ̍ nynuu̍-ɛ.

³Nyɔsoa-a telě dɛ̍ɛ̍ jě-ɛ bo ɛ̀ nu̍ à Nyɔsoa-a jbɛɛ. Ɔ̍ telě dɛ̍ɛ̍ jě-ɛ se̍ wɔ̍n kma.

⁴Dɛ̍nu̍ɛ, nyɔ̍ jɔ nu̍-a Nyɔsoa-a jǔ-ɛ, nɛ̀ ɔ̍ sà kmɔ̌-a dɛ̍ᵻ sɔ̀nᵻ klà wɛ̀. Dɛ̍ à du̍ i̍-a kmɔ̌ tu̍h-uɛ, ɛ̍ nu̍ à wlùh gbaɛ.

⁵Nyɔ̍ bo ɔ̀ bɛ̌ɛ kmɔ̌-a dɛ̍ᵻ sɔ̀nᵻ klà sà-a ɛ? Nyɔ̍ ɔ̀ po̍-a ɛ̍ tìh chɛ̀ ka Jusu nu̍-a Nyɔsoa-a Jǔ-ɛ, ɔ̍ due gbài̍ ɔ̀ mu̍ ɛ̍ klà sà.

⁶Jusu Klai la bo ɔ̀ ji̍ dǒ nǐ ke nymɔ̍ we̍. Ɛ̍ bo ɛ̀ nu̍-a ɔ̍ nǐ dlǔ po̍-ɛ ke ɔ̍ mɛ̌ɛ. Ɔ̍ se̍ ji̍ dǒ nǐ nɛ due we̍, jɛ ɔ̍ ji̍-i dǒ nǐ ke nymɔ̍ we̍. Nyɔsoa-a Sùù à tè-a wlì-ɛ bo ɛ̀ nu̍ ɛ̍ sàànsi̍i̍h, dɛ̍nu̍ɛ, Sùù nu̍ tìh-a taǐn.

⁷Nɛ̀ sàànsi̍i̍h ta̍a̍n-a chɛ̀ nu̍,

⁸Sùù ke, nǐ ke, nymɔ̍. I̍h nɛ-a ta̍a̍n-a, i̍h-a wlu̍ nɛ due.

⁹À wɔ̌ɛn nyi̍ɔ̍-a sàànsi̍i̍h dɛ we̍, jɛ Nyɔsoa naɛ sàànsi̍i̍h ɔ̍ nu̍-aɛ bo ɛ̀ ku̍ wɔ̍n ɛ̀ sìì nyi̍ɔ̍ naɛ. Dɛ̍nu̍ɛ, ɔ̍-ɔ bo ɔ̀ nu̍ sàànsi̍i̍h dǒ ɔ̍ Jǔ we̍.

¹⁰Nɛ̀ɛ̍, nyɔ̍ ɔ̀ gbaɛ-a Nyɔsoa-a Jǔ wlùh-ɛ, nɛ̀ ɔ̍-ɔ bo ɔ̀ po̍ dɛ̍ Nyɔsoa dǎ-a tìh chɛ̀. Jɛ nyɔ̍ ɔ̀ se̍-a Nyɔsoa tìh chɛ̀ po̍-ɛ, nɛ̀ ɔ̍ jě ɔ̍ si̍h-i. Dɛ̍nu̍ɛ, nɛ̀ sàànsi̍i̍h Nyɔsoa nu̍-a dǒ ɔ̍ Jǔ we̍-ɛ, ɛ̍ bo ɔ̍ se̍ tìh chɛ̀ po̍.

¹¹Nyɔsoa nyǐ à kmɔ̌ sie feɛ dě ɔ̍ Jǔ ja̍a̍. Ɛ̍ bo ɛ̀ nu̍ Nyɔsoa naɛ sàànsi̍i̍h.

¹²Nyɔ̍ ɔ̀ gba̍-a Jǔ la-ɛ, nɛ̀ ɔ̍ blě feɛ. Nyɔ̍ ɔ̀ se̍-a Jǔ la gba̍-ɛ, nɛ̀ ɔ̍ se̍ feɛ blě.

¹³Mɔ̀ɔ̍ ùh gbaɛ-a Nyɔsoa-a Jǔ wlùh-ɛ, ǎn chlǐh mɔ̀ ɛ̀ la we̍ wɛ̀ mɔ̀ iě ɛ̍ juo ka mɔ̀ blě-a kmɔ̌ sie feɛ-ɛ.

¹⁴À bɛ̌ wlì i̍ dǒ Nyɔsoa jǔ, dɛ̍nu̍ɛ, à juo ɛ̍-ɛ, pò à jbǎ-ɛ ɔ̍ dɛ̍-o-dɛ̍ ɛ̀ nu̍-a ɔ̍ wlùh dɛ̍-ɛ, nɛ̀ ɔ̍ wɔ̌n à wlu̍.

¹⁵Pò à jbǎ-ɛ ɔ̍ dɛ̍-o-dɛ̍ wɛ̀ à iě ɛ̍ juo ka ɔ̍ wɔ̌n-a à wlu̍-ɛ, nɛ̀ à juo ɛ̍-ɛ dɛ̍ à jbǎ-ɛa ɔ̍-ɛ, à jě ɛ̍ wɛ̀.

¹⁶Pò nyɔ̍-o-nyɔ̍ jě ɔ̍ de̍di̍i̍ ɔ̍ nu̍ gblɛ̍n sɔ̀ɛ̀n ɛ̀ se̍-a mɛ̌ɛ wìè gba̍-ɛ, nɛ̀ ɔ̍ ba̍le ɔ̍ Nyɔsoa ɔ̍ iě kmɔ̌ nɛ. Ùh kɔn gblɛ̍n sɔ̀ɛ̀n se̍-a mɛ̌ɛ wìè gba̍-ɛ bo ǎn dǎ. Gblɛ̍n sɔ̀ɛ̀n jih-a gba̍-a mɛ̌ɛ wìè-ɛ, ǐn se̍ la̍ ɔ̍ iě Nyɔsoa ba̍le dǒ i̍h nɔ̀ɔ̍ we̍.

¹⁷Klǐ-dɛ̍ᵻ kli̍hgbɛ̍ gblɛ̍n sɔ̀ɛ̀n bo, jɛ gblɛ̍n sɔ̀ɛ̀n jih ìh-i gba̍-a mɛ̌ɛ wìè-ɛ i̍h nɛ-o.

¹⁸À juo ɛ̍-ɛ, nyɔ̍ ùh nu̍-a Nyɔsoa-a nynuu̍-ɛ, u̍h-u gba̍ gblɛ̍n sɔ̀ɛ̀n nu̍-ɛ dluwe̍ i̍. Dɛ̍nu̍ɛ, Nyɔsoa-a Jǔ-a gbɛ̀n dǒ u̍h we̍ i̍. Sɔ nɛ̀ Nyɔ̍ Sɔ̀n se̍ u̍h i̍ tǔh-ɛ bɛ̌ɛ.

¹⁹À juo ɛ̍-ɛ, àɔ̀ nɔ̀ɔ̍, à sɔ dě Nyɔsoa we̍, jɛ kmɔ̌ gbài̍ la Nyɔ̍ Sɔ̀n bo ɔ̀ kɔn ɛ̍ wlu̍ i̍.

²⁰À juo ɛ̍-ɛ, Nyɔsoa-a Jǔ ji̍-i iě ɔ̍ flɔn-ɛ dě à di̍i̍ i̍, wɛ̀ à iě Nyɔsoa ɔ̀ nu̍-a tìh-a taǐn-ɛ juo. À nɛ dě ɔ̀ nu̍-a tìh-a taǐn-ɛ ja̍a̍, dɛ̍nu̍ɛ, à nɛ dě ɔ̍ Jǔ Jusu Klai ja̍a̍. Klai bo ɔ̀ nu̍ tìh-a taǐn Nyɔsoa ke kmɔ̌ sie feɛ.

²¹Ǎn nynuu̍, mɔ̀ sà kwɛ̍i̍n gbo̍ᵻ dɛ sɔ̍n di̍i̍.