Read Western Krahn Judi 1 Bible Online

Judi 1 - Western Krahn bible

Judi 1

¹Mɔ̍ Chiin de̍di̍i̍ Judi ɔ̀ nu̍-a Jusu Klai-a pòi̍ju-ɛ. Ǎn chlǐh chlǐh-dɛ̍ la dě nyɔ̍ ùh Nyɔsoa dǎ-aɛ we̍, ɛ̍ ke ùh Baa Nyɔsoa jbɛɛ-aɛ iě Jusu Klai pe̍ɛ-ɛ ka u̍h kɛ̍n i̍-ɛ.

²Ǎn sà nǐ wɔ̍n Nyɔsoa-a wɔɛ kɔn-ɛ ke, ɔ̍ wlùh-a i̍ tè-ɛ ke jbɛɛ-ɛ iě kɛ̍n i̍ gboǎɛ dǒ mɔ̀ we̍.

³Ǎn tìh kma nyɔ̍, sèìe la mɔ̀ ke à gblè-a kwa̍a̍ i̍-ɛ, ɛ̍ kɔn tìh bo ǎn wlùh-a nu̍ jàjà de iě mɔ̀ we̍ chlǐh. Jɛ kaka la̍, wlùh gbaɛ ɛ̀ Nyɔsoa nyǐ-a ɔ̍ nyɔ̍ wɛ̀ kleǐnklein-ɛ, ɛ̍ kɔn tìh bo ǐn kɔn iě mɔ̀ we̍ chlǐh, iě mɔ̀-a wlùh fùka, wɛ̀ mɔ̀ iě ɛ̍ tìh we̍ fɔ̀n.

⁴Nyɔ̍ duuh ùh kɔn kɛ̀n sà tìh chlǐh-a dě Nyɔsoa-a wlu̍ di̍i̍ tɛin-ɛ, u̍h gbǎ mɔ̀ nynɛ̌ soɛɛ. U̍h se̍ Nyɔsoa dɛ-ɛ nɛ, ɛ̍ kɔn u̍h-a bǐi blɛ Nyɔsoa nyǐ-a àɔ̀-ɛ kwa̍ i̍, wɛ̀ u̍h iě ɛ̍ se̍i̍kɔɛn nui. Wɛ̀ Jusu Klai ɔ̀ nɛ due nu̍-a à Joi ke à Dlǔtu-ɛ, iě u̍h tba̍ ɔ̍ chla.

⁵Ìh kli̍hgbɛ̍ la mɔ̀ juo i̍h, jɛ ǎn pɔ̀n iě mɔ̀ tìh wlì i̍ sǐ-i ka Joi nu̍-a Eslɔɛ nyɔ̍ sèìe-ɛ tɛin dě Iche bloa̍ kɛ̍n-ɛ. Jɛ ti̍ gbɔ̍ sì-aɛ, iě ɔ̍ gbɔ̀lɔ u̍h-a nyɔ̍ ùh se̍-a ɔ̍ tìh chɛ̀ po̍-ɛ.

⁶Kǎ ɛ̍ nɛ ke dǒ Nyɔsoa-a ǐnchɔ̀ we̍. Gbǐh jɛ kɔn-a dǒ i̍h we̍-ɛ, i̍h se̍ ɛ̍ kɛ̍n i̍ gbɛ̍n iě i̍h-a tàn kòi̍h. Ɛ̍ kɔn ɔ̍ po̍ i̍h jɔɔ ìh se̍-a chɛn la̍ kɔn-ɛ bu̍hᵻ i̍. Wɛ̀ ɔ̍ tèè i̍h dě kwile gbeu di̍i̍ i̍ te̍e̍, wɛ̀ sàwi̍h sì weɛ̍ ɛ̀ ku̍-a wɔ̍n-ɛ ɛ̍ iě ji̍.

⁷Ɛ̀ kɔn ba̍ Sɔdɔm ke Kɔmowla ke wlɔ̀ᵻ gbàɛ̀ nɛ-a i̍h de̍e̍ i̍ ìh nu̍-a se̍i̍kɔɛn ke tba̍ɛ kɛ̍n i̍, wɛ̀ i̍h gbɛ̍n-ɛa kàn dě kàn nɛ̍ ɛ̀ se̍-a siee la̍ kɔn-ɛ di̍i̍-ɛ, wɛ̀ ɛ̍ iě nyɔ̍ kli̍hgbɛ̍ slɛ̌n tù.

⁸Nyɔ̍ la ùh gbǎ-a mɔ̀ nynɛ̌-ɛ, u̍h-a ja̍ᵻ ja-a bo ɛ̀ nu̍ ɛ̍ iě u̍h-a nu̍ u̍h-a chɛ̀ se̍i̍kɔɛn pùn i̍. Ɛ̍ kɔn u̍h se̍ u̍h-a chɛ̀ dǒ Nyɔsoa sɔ̀n po̍, iě u̍h chlèe ɔ̍ ǐnchɔ̀ ke.

⁹Jɛ ti̍ Nyɔsoa-a ǐnchɔ̀-a dlǔtu Makɔ ke Kǔ sà-a Mose-a kǔ we̍ tìh i̍-ɛ, dǒ nyɔ̍ ɔ̀ mu̍-a ɛ̍ gba̍-a tìh-ɛ, Makɔ se̍ ɛ̍ chɛ̀-a gbǐh i̍ dǔ ɛ̍ iě Kǔ chlèe. Jɛ ɛ̍ la̍a̍, “Bɔ̌ o, Joi bo ɔ̀ mu̍ ìn bɔ̌ i̍ po̍ o.”

¹⁰Jɛ u̍h-u laa̍ pò u̍h se̍ dɛ̍ jɛ we̍i̍ wɔ̌n sǔh-ɛ, nɛ̀ u̍h-a po̍ la̍ chlèwli̍ kleǐn. U̍h wɔ̀ kwlǎ-nmi̍i̍, u̍h-a chɛ̀-a slɛ̌ bo u̍h-a nui dɛ̍. Ɛ̍ bo ɛ̀ mu̍ u̍h-u gbɔ̀lɔ.

¹¹Chlě dǒ u̍h we̍, dɛ̍nu̍ɛ, u̍h-a sà-e Kein-a wɔ̀ɔ̀ i̍. U̍h iě wlǐ jě klùh tìh, ɛ̍ kɔn u̍h-a tèwe. Iě u̍h sìì wìè ka Belɛm-ɛ. U̍h-a blaɛ tùn blě nyɔ̍ wɔ̍n ka Kɔwla-ɛ, ɛ̍ bo ɛ̀ mu̍ u̍h-u gbɔ̀lɔ.

¹²U̍h ke mɔ̀-a sɔ̍n jǔ gbo̍a̍ɛ-ɛ dǒ jbɛɛ dɛ̍ di̍ la̍-a ɛ̍ po̍ ɛ̍ mlɔ̌ wɔ̍n. Dɛ̍nu̍ɛ, u̍h ku̍ jii̍, iě u̍h-u gbɛ̍n u̍h-a chɛ̀ i̍. U̍h-a sì u̍h-a chɛ̀-a tìh sǔh. U̍h wɔ̀ nǐgbanᵻ ìh poɔ-a gba̍-a wɛ̀ i̍h-i dba̍-ɛa nǐ-ɛ. Tu̍ᵻ ìh kɔn tlo-o nɔɔ ji̍-a wɛ̀ i̍h-i tlo-aɛ, i̍h bo u̍h wɔ̀. Ɛ̍ kɔn i̍h wɔ̌li, wɛ̀ i̍h mɛ̌ jlɛjlɛ.

¹³U̍h wɔ̀ jbǒ-a je̍ɔ̍ dǒ ìh-a tè-a feɔn mlǎ i̍-ɛ, kǎ u̍h nu̍ mlɔ̌ dǒ jua̍a̍ i̍ tè-ɛ. Chǔhtlɛ̀n poɔ blě-a wlɛ̌ jǔ ìh kɔn tè la̍ Nyɔsoa po̍-a gba̍a̍ dě kwile gbeu di̍i̍ nɔ̌ kmɔ̌-a kmɔ̌-ɛ, i̍h bo u̍h wɔ̀.

¹⁴Inɔ ɔ̀ po̍-a jǎɛ-o nyɔ̍-a gbɔ̍ᵻ mɛ̀sɔɔ̌n sɔ dě Adaun we̍-ɛ, ɔ̍ bo ɔ̀ po̍ gbànwli dǒ u̍h pùn. Ɔ̍ la̍a̍, “Joi ke ɔ̍ ǐnchɔ̀-a wlǔ-a wlǔ-a mu̍ ji̍

¹⁵wɛ̀ ɔ̍ iě nyɔ̍ kli̍hgbɛ̍-a taɔ pa̍. Wɛ̀ ɔ̍ iě se̍ Nyɔsoa dɛ-ɛ nɛ nyɔ̍ kli̍hgbɛ̍ kɛ̀n sà dǒ u̍h-a se̍ Nyɔsoa dɛ-ɛ nɛ gblɛ̍n u̍h nu̍-aɛ we̍, ɛ̍ ke wlu̍ sɔ̀nᵻ gblɛ̍n sɔ̀ɛ̀n nyɔ̍ laa̍ u̍h bla̍-a dǒ ɔ̍ pùn-ɛ ke.”

¹⁶Nyɔ̍ la u̍h blě sàǎsà, iě u̍h-a kɔ̌-ɛ nyɔ̍ duuh-a nynɛ̌. U̍h-a wlùh-u tè i̍. U̍h-a nu̍ dɛ̍ᵻ sɔ̀nᵻ, ìh nu̍-a u̍h-a chɛ̀-a wlùh dɛ̍ᵻɛ́, iě u̍h-a blɔ̌-ɛ u̍h-a chɛ̀ dɛ i̍, wɛ̀ u̍h-a sɛ̌ɛ nyɔ̍gbei i̍ u̍h iě u̍h dɛ̍ kɛ̍n jě.

¹⁷Jɛ ǎn tìh kma nyɔ̍, dɛ̍ à Joi Jusu Klai-a gba̍tòà sèàɛ̍-a mɔ̀ wlùh tɛin-ɛ, mɔ̀ bɔ̌ ɛ̍ we̍ mǎle-ɛ.

¹⁸Dɛ̍ u̍h sèàɛ̍-a mɔ̀ wlùh-ɛ, u̍h la̍a̍, “Dǒ bɔ̌ɛ-o wǐh di̍i̍-ɛ, jlii̍h nu̍ nyɔ̍ ùh se̍-a Nyɔsoa dɛ-ɛ nɛ, ùh-a nu̍-a u̍h-a chɛ̀-a wlùh-ɛ, u̍h-a mu̍ mɔ̀ kɛ̍n wlǔh-i.”

¹⁹Kmɔ̌ we̍ nyɔ̍ la, ùh se̍-a Nyɔsoa-a Sùù blě-ɛ, u̍h-u bo ùh-a po̍ nyɔ̍ sàǎsà nynɛ̌ i̍.

²⁰Jɛ ǎn tìh kma nyɔ̍, mɔ̀ kui mɔ̀-a chɛ̀ i̍ dě Nyɔsoa wlùh gbaɛ di̍i̍. Nɛ̀ mɔ̀ ba̍le dě ɔ̍ Sùù di̍i̍.

²¹Mɔ̀ naɛ dě Nyɔsoa-a jbɛɛ di̍i̍ ma̍u̍, nɛ̀ mɔ̀ fuo kmɔ̌ sie feɛ à Joi Jusu Klai-a mu̍-a mɔ̀ nyǐ ɔ̍ wɔɛ kɔn tìh-ɛ.

²²Mɔ̀ blě wɔɛ wlùh dǒ nyɔ̍ ùh kɔn di̍i̍ gbe-a i̍-ɛ we̍.

²³Mɔ̀ flǎ nyɔ̍ duuh dě nɛ̍-ɛ, u̍h iě pǔh. Nɛ̀ mɔ̀ blě wɔɛ wlùh dǒ duuh we̍, jɛ nɛ̀ kǎ mɔ̀-a ple̍ faɔn o. U̍h-a jlii̍-a chɛ̀ ìh u̍h-a gblɛ̍n sɔ̀ɛ̀n nui-a flɛ̀n-ɛ, mɔ̀ ple̍ i̍h jǔ o.

²⁴Nyɔsoa bo ɔ̀ bɛ̌ɛ kmɔ̌ nɛ-ɛ iě mɔ̀ se̍ tàmlain gbǎ-ɛ mu̍, wɛ̀ mɔ̀ iě nɛi̍ wɛ̀. Nɛ̀ ɔ̍ mu̍ mɔ̀ dǒ ɔ̍ chɛ̀ jlǐhwai gba̍ dǒ mɔna̍ dɔu we̍, wɛ̀ mɔ̀ iě ɔ̍ tìh-a i̍ bɛ̌-ɛ jě.

²⁵Nyɔsoa nɛ due gbài̍ bo ɔ̀ nu̍ à Sèìe Nyɔ̍. Dǒ ɔ̍ we̍ bo tìh-a i̍ bɛ̌-ɛ ke, baajiɔ̍ dɛ ke, kmu-ɛ ke tùn blě-ɛ kɔn sɔ dě tɔ̀blɔ̍ɔ̍, ɛ̍ ke kaka ke nɔ̌ kmɔ̌-a kmɔ̌ dě à Joi Jusu Klai ja̍a̍. Kǎ ɛ̍-ɛ nɛ.