Read Western Krahn Wlɛfeleseɔn 12 Bible Online

Wlɛfeleseɔn 12 - Western Krahn bible

Wlɛfeleseɔn 12

¹Wɛ̀ nyɔ̍ wɔ̍n flɔn-ɛ dɛ̍ klaa wlǔh-i dě ja̍u̍n wlì. Nynɔ̌ due nɛ-a deě-ɛ, jlǔh nu̍ ɔ̍ gbà-a jliɛ̍. Wɛ̀ chǔh nu̍ ɔ̍ bu̍hᵻ kɛ̍n i̍ tba̍ dɛ̍. Iě chǔhtlɛ̀n-a pùè jɔ̌ sɔɔ̌n nu̍ blawɛ̌ ɔ̍ tèè.

²Ɔ̍ nɛ kwlǐ, iě kwlǐ-a nu̍ ɔ̍ wɛ̀ ɔ̍ wǐi i̍.

³Wɛ̀ nyɔ̍ wɔ̍n flɔn-ɛ dɛ̍ dɛɛ wlǔh-i dě ja̍u̍n wlì. Dɔ̍sɛ sàɛ̀n klaa due bo ɛ̀ blě dlǔᵻ mɛ̀sɔɔ̌n ke gbɔ̀nᵻ pùè. Iě ɛ̍ dlǔᵻ nɛ-a mɛ̀sɔɔ̌n-ɛ, i̍h tèè blawɛ̌ᵻ kli̍hgbɛ̍.

⁴Wɛ̀ ɛ̍ wɔ̀n sà chǔhtlɛ̀n-a gbɔ̍ᵻ nɛ-a ta̍a̍n-ɛ i̍h-a gbɔ̍ due dě ja̍u̍n wlì, iě ɛ̍ po̍ i̍h sɔ̀n nɔ̌ bloɔ̍. Iě dɔ̍sɛ-a chɛ̀ nyna i̍ dǒ kwlǐ nynɔ̌ laa̍ jǔ, pò ɔ̍ jǔ wlǔh-ɛ, ɛ̍ iě ɔ̍ di̍.

⁵Wɛ̀ ɔ̍ wlǔh-i jɔ̍gbau jǔ ɔ̀ mu̍-a bloa̍ kli̍hgbɛ̍-a wlu̍ kwa̍ blě dǒ nɛ̍ne̍ɛ̍ bliku we̍-ɛ. Jɛ jǔ-a chɛ̀ ɔ̍ flǎ-ɛ, iě ɔ̍ gba̍-ɛ dě Nyɔsoa ke ɔ̍ nynɛ̌ gbalǎ we̍.

⁶Wɛ̀ nynɔ̌ gbǎ kwlǎ ɔ̍ mu̍ dě kwlǎslò we̍ tà Nyɔsoa po̍-a gba̍a̍ dǒ ɔ̍ we̍-ɛ. Dǒ ɔ̍ mu̍ we̍ i̍ gbɛ̀n-ɛ dǒ wǐh-a wlǔ due kmɛ sɔɔ̌n kwela mɛ̀o̍ (1,260) di̍i̍.

⁷Wɛ̀ tu̍h wlǔh ja̍ dě ja̍i̍wlɔ̀. Maakɔ ke ɔ̍ ǐnchɔ̀-a fɔ̀n dɔ̍sɛ we̍, iě dɔ̍sɛ ke ɛ̍ ǐnchɔ̀ fɔ̀n u̍h we̍ ke.

⁸Jɛ dɔ̍sɛ ke ɛ̍ ǐnchɔ̀ du̍-iɛ, sɔ i̍h se̍ tèla̍ nyǐ-ɛ dɛ kleǐnklein dě ja̍i̍wlɔ̀.

⁹Wɛ̀ wɔ̍n ku̍ dɔ̍sɛ laa̍ ɛ̍ poe-ɛ sɔ̀n. Tɛin tɛin sɛ̍ bo, iě ɛ̍ nynɛ̌ nu̍ Kǔ ke Setɔn. Ɛ̍ bo ɛ̀ nu̍ kmɔ̌ kli̍hgbɛ̍ i̍ boe nyɔ̍. Ɛ̍ poe-ɛ sɔ̀n nɔ̌ bloɔ̍, ɛ̍ ke ɛ̍ ǐnchɔ̀ kli̍hgbɛ̍ ke.

¹⁰Wɛ̀ ǐn wɔ̌n we̍le wlu̍ dě ja̍i̍wlɔ̀. Ɛ̍ la̍a̍, “Kaka-ɛ, à Nyɔsoa-a nyɔ̍ sèìe-ɛ ke, ɔ̍ gbǐh ke ɔ̍ kmɔ̌ wlu̍ i̍ kɔn ti̍ nyni̍ wɛ̀, ɛ̍ ke ɔ̍ Chèɛ̀ Tba̍ju-a tùn blě-ɛ ke. Dɛ̍nu̍ɛ, ɛ̀ nyna-a i̍ de dǒ à Nyɔsoa jǔ wlù ke sɔ̀n wɛ̀ ɛ̍ nyni-a à de̍di̍i̍ᵻá wlu̍ wɔ̍i̍n-ɛ, ɛ̍ poe-ɛ sɔ̀n wɛ̀.

¹¹À de̍di̍i̍ᵻ du̍ ɛ̍ wɛ̀ dǒ Blawɛ̌ Jǔ-a nymɔ̍ ke tìh-a taǐn tu̍owli u̍h po̍-a we̍. Iě u̍h sà u̍h-a feɛ kwlǎ u̍h iě mɛ̌.

¹²Ɛ̍ tìh-ɛ, ja̍i̍wlɔ̀, nmɔ àn dɛ̍, ɛ̍ ke mɔ̀ɔ̍ tǐn-a dě ɛ̍ di̍i̍-ɛ ke. Jɛ chlě dǒ blǔh ke jbǒ we̍. Kǔ gbǎ jlu̍h-u kaa̍ iě ɛ̍ ji̍ dě mɔ̀ we̍. Dɛ̍nu̍ɛ, ɛ̍ juo ɛ̍-ɛ ɛ̍ ti̍ se̍ dlǔ tɛn dɛ.”

¹³Ti̍ dɔ̍sɛ juo-ao dɛ̍ i̍ ka ɛ̍ poe-a sɔ̀n nɔ̌ bloɔ̍-ɛ, sɔ ɛ̍ nɛ̌ nynɔ̌ ɔ̀ wlǔh-ia jɔ̍gbau jǔ-ɛ kɛɛn wɛ̀ sǔh.

¹⁴Jɛ dǒ nynɔ̌-a chɛ̀ nyǐ-ɛ chìsǐ klaa-a gbawaᵻ sɔɔ̌n, ɔ̍ iě wa̍n ɔ̍ iě dǒ dɔ̍sɛ we̍ sɔ wɛ̀ ɔ̍ iě dě kwlǎslò we̍ mu̍. Dě ɔ̍ mu̍ we̍ i̍ gbɛ̀n-ɛ dǒ sɔ̀nᵻ ta̍a̍n chǔhᵻ mɛ̀o̍ di̍i̍.

¹⁵Wɛ̀ dɔ̍sɛ sà nǐ klaa wɔ̍n iě ɛ̍ po̍ ɛ̍ dǒ nynɔ̌ laa̍ de̍e̍ ɛ̍ iě ɔ̍ gba̍.

¹⁶Jɛ blǔh gbǎ nynɔ̌ laa̍ we̍, ɛ̍ pɔ̀ni wɔ̍n wɛ̀ ɛ̍ mla̍ jǐ-nǐ dɔ̍sɛ sà-a wɔ̍n-ɛ.

¹⁷Wɛ̀ dɔ̍sɛ gbǎ-ɛ nynɔ̌ jlu̍h-u, iě ɛ̍ mu̍ ɔ̍ tloemlai tu̍h we̍ pa̍-ɛ la̍, ùh gbɛ̍n-a Nyɔsoa-a telě ke Jusu-a gblangbai̍ wlu̍ i̍-ɛ.

¹⁸Wɛ̀ dɔ̍sɛ nyna dǒ jbǒ penɔ̍ɔ̍ kɛ̍n i̍.