Read Western Krahn Wlɛfeleseɔn 14 Bible Online

Wlɛfeleseɔn 14 - Western Krahn bible

Wlɛfeleseɔn 14

¹Wɛ̀ ǐn gbɛ̀n-e, iě ǐn jě Blawɛ̌ Jǔ, nɛ̀ ɔ̍ nyna i̍ dǒ Saiɛn Tlu̍h kɛ̍n. Ɔ̍ ke nyɔ̍-a wlǔ-a kmɛ due kwela nyìɛ̍ jɔ̌ nyìɛ̍ (144,000) nyna i̍, ùh kɔn jua̍i̍ ɔ̍ ke ɔ̍ Baa-a nynɛ̌ chlǐh-aɛ.

²Iě ǐn wɔ̌n wlu̍ ɛ̍ sɔ dě ja̍i̍wlɔ̀ ka nǐ-a klu̍h-ɛ, ɛ̍ ke ka tɛ̀n-a plǎn-ɛ i̍-ɛ. Wlu̍ ǐn wɔ̌n-aɛ, nɛ̀ ka kainᵻ bla̍ nyɔ̍-a bla̍ kainᵻɛ́.

³Wɛ̀ nyɔ̍-a wlǔ-a kmɛ due kwela nyìɛ̍ jɔ̌ nyìɛ̍ (144,000) laa̍ ùh Nyɔsoa sèìe-aɛ, u̍h ble̍ duǐh delee dǒ nynɛ̌ gbalǎ ke, kmɔ̌ nɛ dɛ̍ᵻ nyìɛ̍ laa̍ ke nyɔ̍ klaaᵻ jǔ. Nyɔ̍ dɔɔ se̍ duǐh laa̍ cheǎn-a bɛ̌ɛ.

⁴Nyɔ̍ ùh se̍-a nynɔ̌ àe̍e̍ jɔ̍gbau dɛ̍ i̍ juo iě u̍h nmɔ-a dě Nyɔsoa jlǐh i̍-ɛ, u̍hɔ̍ɔ̍ bo ùh wɔ̀ dǒ Blawɛ̌ Jǔ de̍e̍ tà-o-tà ɔ̍ mu̍-aɛ. U̍h pùhbɔ-ɛ kɛ̍ɛ̍n wɛ̀ dě nyɔ̍ɔ nynɛ̌, iě u̍h tè-ɛ pɔ̌ dǒ Nyɔsoa ke Blawɛ̌ Jǔ we̍ sàǐtòò.

⁵Nyɔ̍-ɔ se̍a u̍h-a si̍h nynɛ̌ wɔ̌n sàì. U̍h se̍ kɔ̌ɛ nynɛ̌ blě.

⁶Wɛ̀ ǐn jě ǐnchɔ̀ dɛɛ, nɛ̀ ɛ̍ wa̍n-ɛ dě ja̍u̍n wlì. Nɛ̀ ɛ̍ blě kmɔ̌ sie tu̍owli ɛ̀ nu̍-a Nyɔsoa-a pɔ̀n chɛ̀-ɛ, ɛ̍ iě bla̍-ɛ dě nyɔ̍ tǐn-a nɔ̌ bloɔ̍-ɛ we̍, ùh nu̍-a dakɔ̍ ke, chɛ̌tu ke bloa̍ kli̍hgbɛ̍-ɛ.

⁷Iě ɛ̍ we̍le, ɛ̍ la̍a̍, “Mɔ̀ tè Nyɔsoa ja̍, nɛ̀ mɔ̀ bɛ̌-ɛ ɔ̍ nynɛ̌ i̍, dɛ̍nu̍ɛ, ti̍ nyni̍ wɛ̀ ɔ̍ iě nyɔ̍ kli̍hgbɛ̍-a taɔ pa̍. Mɔ̀ sà ɔ̍ wɛɛ. Ɔ̍-ɔ bo ɔ̀ nu̍ bloa̍ ke, ja̍i̍wlɔ̀ ke, jbǒ ke kao̍dluᵻ.”

⁸Wɛ̀ ǐnchɔ̀ dɛɛ ɛ̀ po̍-a sɔɔ̌n-ɛ, ɛ̍ tba̍ dǒ sàì naɛ de̍e̍. Iě ɛ̍ la̍a̍, “Babeloun wlɔ̀ wa̍ wɛ̀. Ɛ̀ ku̍-a wɔ̍n de-ɛ, ɛ̍ wa̍ wɛ̀. Ɛ̍ nu̍ ɛ̍ iě bloa̍ kli̍hgbɛ̍ nu̍ gbǎn ka nyɔ̍ sìèè nyɔ̍-a chɛ̀ wɔ̍n kma nmɔ̍ wlì-ɛ.”

⁹Iě ǐnchɔ̀ dɛɛ ɛ̀ po̍-a ta̍a̍n-ɛ, ɛ̍ tba̍ dǒ i̍h de̍e̍. Wɛ̀ ɛ̍ we̍le, ɛ̍ la̍a̍, “Pò nyɔ̍-o-nyɔ̍ sà nmi̍ɛ̍ ke ɛ̍ mɛ̍-dɛ̍ wɛɛ wɛ̀ ɔ̍ iě ɛ̍ juola blě dǒ ɔ̍ jua̍i̍ àe̍e̍ sɔ̍n i̍-ɛ,

¹⁰nɛ̀ ɔ̍ chɛ̀-a mu̍ Nyɔsoa-a jlu̍h nmɔ̍ nǎ ɛ̀ ɔ̍ chɛ̌li-a dě ɔ̍ jlu̍h kàu̍n di̍i̍-ɛ. Wɛ̀ ɔ̍ iě jua̍i̍ sàɛ̀ kaa̍ dǒ nɛ̍ ke pɔ̀nɔ̌ we̍ dǒ Nyɔsoa-a ǐnchɔ̀ ke Blawɛ̌ Jǔ jlǐhwai.

¹¹Nɛ̀ u̍h-a jua̍i̍ sàɛ̀ nɛ̍-a daluh-a mu̍ ja̍i̍ mu̍ te̍e̍ kleǐn. U̍h-u bo ùh nu̍-a nyɔ̍ ùh-a sà-a nmi̍ɛ̍ ke ɛ̍ mɛ̍-dɛ̍ wɛɛ, iě u̍h blě ɛ̍ nynɛ̌-a juola ke. U̍h-u bo ùh se̍-a feɛ i̍ jě mu̍ wlù ke sɔ̀n.”

¹²Ka ɛ̍ nɛ-a ka-ɛ, nɛ̀ Nyɔsoa-a nyɔ̍ ùh-a tè-ao ɔ̍ telě i̍, iě u̍h gbaɛ-a Jusu wlùh-ɛ, nɛ̀ u̍h kɔn u̍h iě-e klì i̍ ku̍.

¹³Wɛ̀ ǐn wɔ̌n wlu̍ ɛ̍ sɔ dě ja̍i̍wlɔ̀. Ɛ̍ la̍a̍, “Chlǐh wlu̍ la. Sɔ da̍a sèàn blǐ nyɔ̍ ùh ke Joi nɛ-a due wɛ̀ u̍h mɛ̌-aɛ, nɛ̀ u̍h nmɔ i̍.” Nyɔsoa-a Sùù la̍a̍, “Nɛ̀ u̍h nmɔ i̍ kaa̍, u̍h-a mu̍ feɛ i̍ jě. Dɛ̍nu̍ɛ, u̍h-a nu̍-dɛ̍ᵻ wɔ̀ dǒ u̍h de̍e̍.”

¹⁴Wɛ̀ ǐn gbɛ̀n-e, iě ǐn jě nǐgban plǔ. Nɛ̀ ɔ̀ tè-a dǒ ɛ̍ kɛ̍n i̍-ɛ, ɔ̍ ke nyi̍ɔ̍-a jǔ wɔ̀ɛ. Ɔ̍ tèè-e kòo̍ blawɛ̌, iě ɔ̍ blě kɔɔ chɛ̍n faa nyǎnyǎ kwa̍.

¹⁵Wɛ̀ ǐnchɔ̀ dɛɛ sɔ dě slaǎ sà gbò sɔ̀n, iě ɛ̍ we̍le ɔ̀ tè-a i̍ dǒ nǐgban kɛ̍n-ɛ. Ɛ̍ la̍a̍, “Nu̍ àn faa ìè kɔɔ chɛ̍n, dɛ̍nu̍ɛ, po̍-dɛ̍ᵻ nɛ-a nɔ̌ bloɔ̍-ɛ, i̍h sàni i̍ iě i̍h-a chɛ̍n-ɛ ti̍ nyni̍ wɛ̀.”

¹⁶Wɛ̀ ɔ̀ tè-a i̍ dǒ nǐgban kɛ̍n-ɛ jaɛ ɔ̍ faa nɔ̌ bloɔ̍ i̍, iě ɛ̍ chɛ̍n po̍-dɛ̍ᵻ ìh sàni-a.

¹⁷Wɛ̀ ǐnchɔ̀ dɛɛ sɔ dě slaǎ sà gbò nɛ-a dě ja̍i̍wlɔ̀-ɛ di̍i̍. Nɛ̀ ɛ̍ blě kɔɔ chɛ̍n faa nyǎnyǎ ke.

¹⁸Iě ǐnchɔ̀ dɛɛ sɔ dǒ slaǎ sà gblǒ pùn, ɛ̀ blě-a gblǒ-a nɛ̍-a wlu̍ kwa̍-ɛ. Wɛ̀ ɛ̍ we̍le jɔ blě-a faa nyǎnyǎ kwa̍-ɛ. Ɛ̍ la̍a̍, “Nu̍ àn faa ìè bloa̍-a tlo-dɛ̍ᵻá ta̍ᵻ i̍ chɛ̍n, dɛ̍nu̍ɛ, i̍h ku̍ wɛ̀.”

¹⁹Wɛ̀ ǐnchɔ̀ jaɛ ɛ̍ faa nɔ̌ bloɔ̍ i̍, iě ɛ̍ chɛ̍n tlo-dɛ̍ᵻ ìh nɛ-a dě klè-ɛ. Wɛ̀ ɛ̍ po̍ i̍h dě Nyɔsoa-a tlo-dɛ̍ᵻá plǐn-biě di̍i̍, ɛ̀ nu̍-a ɔ̍ wɔ̍n ku̍ jlu̍h-ɛ.

²⁰Wɛ̀ tlo-dɛ̍ᵻ na-ɛ kɛ̍n i̍ dě biě laa̍ di̍i̍ dǒ wlɔ̀ gbɔ̀. Nymɔ̍ bo ɛ̀ sɔ dě ɛ̍ di̍i̍ ka jǐ-nǐ-ɛ. Nymɔ̍-a chɛ̀ ɛ̍ gbààngbaǎn nu̍ gbɛna-a wlǔ-a kmɛ due kwela mɛ̀sɔɔ̌n jɔ̌ mɛ̀o̍ (176,000). Wɛ̀ ɛ̍ di̍i̍ tɛn-ɛ nu̍ gbɛna due.