Read Western Krahn Wlɛfeleseɔn 2 Bible Online

Wlɛfeleseɔn 2 - Western Krahn bible

Wlɛfeleseɔn 2

¹Wɛ̀ ɔ̍ la̍a̍ dě ǐn we̍, “Chlǐh Nyɔsoa-a ǐnchɔ̀ ɛ̀ nɛ-a dě Ɛfɛsɔ wlɔ̀-a chɔchi̍h-ɛ we̍. Nɛ̀ nàa̍, “Tu̍owli la ɛ̍ sɔ dě ɔ̀ blě-a chǔhtlɛ̀n mɛ̀sɔɔ̌n dě ɔ̍ di̍na̍ kwa̍a̍ wɛ̀ ɔ̍ naɛ-a dě chlǎn nape̍ᵻá kɛ̍n tè dɛ̍ᵻ mɛ̀sɔɔ̌n ìh nui-a kòo̍-ɛ nynɛ̌ we̍.

²Ǐn juo mɔ̀-a nu̍-dɛ̍ᵻ ke mɔ̀-a kmu-u dbo̍ nu̍-ɛ ke wlùh i̍ gbɛ̍n-ɛ. Ǐn juo ka mɔ̀ faɛn-a dɛ̍ᵻ sɔ̀nᵻ nyɔ̍-ɛ. Mɔ̀ tɛ̀n nyɔ̍ ùh-a dǎɛ-a u̍h-a chɛ̀ Klai-a gba̍tòà jɛ nɛ̀ ɛ̍ se̍-a u̍h mɔ-ɛ. Wɛ̀ mɔ̀ juo u̍h-a si̍h tmɔ̌ tìh. Ǐn ju̍o̍e i̍h we̍ i̍ kli̍hgbɛ̍.

³Mɔ̀ gbɛ̍n wlùh i̍ iě mɔ̀ sàɛ̀ jua̍i̍ wɛ̀ ǎn tìh, iě mɔ̀ se̍ se̍a̍.

⁴Jɛ ɛ̀ la bo ɛ̀ nu̍ mɔ̀-a kɔ̌ɛ nynɛ̌ ǐn blě. Ka mɔ̀ nu̍-a ǐn jbɛɛ sàì-ɛ, ɛ̍ bo mɔ̀ sà sɔ̍n we̍.

⁵Ka mɔ̀ nu̍-a tàmlain gbǎ-ɛɛ, ɛ̍-ɛ bo mɔ̀ iě wlùh we̍ nu̍. Mɔ̀ bǐi i̍ mɔ̀ iě mɔ̀-a gblɛ̍n sɔ̀ɛ̀n kɛ̍n i̍ poe, mɔ̀ iě ìh mɔ̀-a nu̍-a sàì-ɛ nu̍. Pò mɔ̀ se̍ la̍a̍n nu̍-ɛ, nɛ̀ ǎn mu̍ dě mɔ̀ we̍ ji̍ iě mɔ̀-a chlǎn nape̍-a kɛ̍n tè dɛ̍ tèla̍ sà.

⁶Jɛ dɛ̍ due bo ǎn po̍-e mɔ̀ tìhwe̍. Nikola ke ɔ̍ nyɔ̍-a nu̍-dɛ̍ᵻ ǐn faɛn-aɛ, i̍h bo mɔ̀ faɛn ke.

⁷“Nyɔ̍ ɔ̀ flɔn-a dounᵻɛ́, nɛ̀ ɔ̍ po̍ dě dɛ̍ Nyɔsoa-a Sùù bla̍-a dě chɔchi̍h nyɔ̍ we̍-ɛ dounᵻ. “Nyɔ̍ ɔ̀ sà-a dɛ̍ sɔ̀n klà-a, tu̍ ɛ̀ nɛ-a dě Nyɔsoa-a wlɔ̀ plǔ di̍i̍ ɛ̀ nyǐ-a nyɔ̍ feɛ-ɛ, nɛ̀ ǎn mu̍ ɛ̍ buǒᵻ ɔ̍ nyǐ ɔ̍ iě i̍h di̍.”

⁸Wɛ̀ ɔ̍ la̍a̍ dě ǐn we̍, “Chlǐh Nyɔsoa-a ǐnchɔ̀ ɛ̀ nɛ-a dě Smana wlɔ̀-a chɔchi̍h-ɛ we̍. Nɛ̀ nàa̍, “Tu̍owli la ɛ̍ sɔ dě ɔ̀ nu̍-a sàǐtòò nyɔ̍ ke bɔ̌ɛ-o nyɔ̍-ɛ we̍, ɔ̀ mɛ̌-a wɛ̀ ɔ̀ wlǔh-aeɛ.

⁹Ɔ̍ la̍a̍, Ǐn juo ɛ̍-ɛ ka mɔ̀ pa̍-a nyɔ̍gbà iě mɔ̀-a sàɛ̀-a jua̍i̍-ɛ. Jɛ mɔ̀ pàn-ɛ o. Nyɔ̍ ùh se̍-a Juu nyɔ̍ wɛ̀ u̍h la̍ u̍h nu̍-a Juu nyɔ̍-ɛ, wlu̍ sɔ̀nᵻ u̍h-a po̍-a mɔ̀ pùn i̍-ɛ, ǐn ju̍o̍e i̍h we̍ i̍. Jɛ u̍h bo ùh nu̍ Setɔn-a nyɔ̍.

¹⁰Mɔ̀ bɔ̌ faɔn ple̍-ɛ dǒ jih kɔn jua̍i̍ mɔ̀-a ji̍-a sàɛ̀ la̍-a we̍. Kǔ-a mu̍ mɔ̀-a nyɔ̍ duuh kasoo po̍ wɛ̀ mɔ̀-a wlùh gbaɛ iě i̍ tɛ̀n-ɛ. Wɛ̀ mɔ̀ iě klě jě dǒ wǐh pùè di̍i̍. Pò ɛ̍ jɛ ja mɔ̀ dbǎ mu̍-ɛ, mɔ̀ blě wlùh gbaɛ, nɛ̀ ǎn mu̍ mɔ̀ feɛ-a blawɛ̌ tèè.

¹¹“Nyɔ̍ ɔ̀ flɔn-a dounᵻɛ́, nɛ̀ ɔ̍ po̍ dě dɛ̍ Nyɔsoa-a Sùù bla̍-a dě chɔchi̍h nyɔ̍ we̍-ɛ dounᵻ. “Nyɔ̍ ɔ̀ sà-a dɛ̍ sɔ̀n klà-a, nɛ̀ mɛ̌ɛ-a sɔɔ̌n naɛ se̍ ɔ̍ dɛ̍ nui mu̍.”

¹²Wɛ̀ ɔ̍ la̍a̍ dě ǐn we̍, “Chlǐh Nyɔsoa-a ǐnchɔ̀ ɛ̀ nɛ-a dě Pɛkamɔ wlɔ̀-a chɔchi̍h-ɛ we̍. Nɛ̀ nàa̍, “Tu̍owli la ɛ̍ sɔ dě nyɔ̍ ɔ̀ blě-a nmǎ-a plàn chlɛ̀n-ɛ we̍.

¹³Ǐn juo àn tǐn la̍. Tà kɔn taǐn Setɔn-a nynɛ̌ gbalǎ nɛ-a bo ìn tǐn. Wɛ̀ ìn gbaɛ ǐn wlùh ke ma̍u̍. Antipa-a chɛ̀ jɔ nu̍-a ǎn wlùh gbaɛ nyɔ̍ ke sàànsi̍i̍h-ɛ, ti̍ u̍h dbǎ-a ɔ̍ dě mɔ̀ blǐ wlɔ̀ tà Setɔn tǐn-aɛ, mɔ̀ se̍ mɔ̀-a wlùh gbaɛ-ɛ i̍ tǎli.

¹⁴Jɛ ǐn blě mɔ̀-a kɔ̌ɛ nynɛ̌ wei. Mɔ̀ blě nyɔ̍ duuh dě mɔ̀ we̍ u̍h gbǎ dǒ Belɛm-a nǎ po̍ wlu̍ de̍e̍. Belɛm po̍ Bela nǎ ɔ̍ iě ɛ̍ nu̍ Eslɔɛ nyɔ̍ iě gblɛ̍n sɔ̀ɛ̀n nu̍, u̍h iě di̍-dɛ̍ᵻ ìh sà-ɛa slaǎ dǒ kwɛ̍i̍n gbo̍ᵻ we̍-ɛ di̍ wɛ̀ u̍h iě gbǎn nu̍ dɛ̍-ɛ gbǎ.

¹⁵U̍h gbǎ dǒ Nikola ke ɔ̍ nyɔ̍-a nǎ po̍ wlu̍ de̍e̍ ke.

¹⁶Mɔ̀ bǐi i̍ mɔ̀ iě mɔ̀-a gblɛ̍n sɔ̀ɛ̀n kɛ̍n i̍ poe duedɛ. Jɛ pò ɛ̍ se̍ la̍a̍n nɛ-ɛ, nɛ̀ ǎn mu̍ dě mɔ̀ we̍ ji̍ suei̍ wɛ̀ iě nyɔ̍ laa̍ we̍ fɔ̀n dǒ plàn chlɛ̀n sɔ-a dě ǐn wɔ̍ɔ̍n-ɛ we̍.

¹⁷“Nyɔ̍ ɔ̀ flɔn-a dounᵻɛ́, nɛ̀ ɔ̍ po̍ dě dɛ̍ Nyɔsoa-a Sùù bla̍-a dě chɔchi̍h nyɔ̍ we̍-ɛ dounᵻ. “Nyɔ̍ ɔ̀ sà-a dɛ̍ sɔ̀n klà-a, nɛ̀ di̍-dɛ̍ᵻ u̍h-a dǎɛ-a mana ìh sìle-aɛ, ǎn mu̍ ɔ̍ diih nyǐ. Nɛ̀ ǎn mu̍ ɔ̍ sɔɔ̌ gbo̍ plǔ nyǐ, nynɛ̌ delee iě chlǐh-ɛ dǒ ɛ̍ kɛ̍n. Nyɔ̍ dɔɔ se̍ nynɛ̌ laa̍ juo mu̍. Nyɔ̍ ɔ̀ blě-a sɔɔ̌ laa̍-ɛ, ɔ̍ kɔn tɛ̀ ǐn sà-o.”

¹⁸Wɛ̀ ɔ̍ la̍a̍ dě ǐn we̍, “Chlǐh Nyɔsoa-a ǐnchɔ̀ ɛ̀ nɛ-a dě Taɛtawla wlɔ̀-a chɔchi̍h-ɛ we̍. Nɛ̀ nàa̍, “Tu̍owli la ɛ̍ sɔ dě Nyɔsoa-a Jǔ ɔ̀ kɔn jlǐh wɔ̀-a nɛ̍-a pàìbǒ iě ɔ̍ bu̍hᵻ wɔ̀-a ka nyɔ̍ po̍-a tìɛ̀n jlǐh-ɛ we̍.

¹⁹Ǐn juo mɔ̀-a nu̍-dɛ̍ᵻ ke, mɔ̀-a jbɛɛ-ɛ ke, mɔ̀-a wlùh gbaɛ ke nyɔ̍ jǔ dbee-ɛ. Mɔ̀-a wlùh i̍ gbɛ̍n-ɛ ke mɔ̀-a dě klì i̍ ku̍-ɛ ku̍ i̍. Mɔ̀-a nu̍ la̍ dɛ̍ᵻ chɛ̀ dɔu ɛ̍ sìì ti̍ mɔ̀ sàɛ̀-a wlùh gbaɛ blě-ɛ i̍-ɛ.

²⁰Jɛ ɛ̀ la bo ɛ̀ nu̍ mɔ̀-a kɔ̌ɛ nynɛ̌ ǐn blě. Nynɔ̌ la ɔ̀ kɔn nynɛ̌ nu̍-a Jɛsebeɔ-ɛ, ɔ̍ bo ɔ̀ dǎɛ-a ɔ̍ chɛ̀ Nyɔsoa-a tu̍owli po̍ nyɔ̍. Ɔ̍ po̍ ǎn pòi̍nynuu̍ nǎ ɔ̍ boe u̍h i̍ iě u̍h-a nu̍ gbǎn u̍h-a di̍ di̍-dɛ̍ᵻ ìh sà-ɛa slaǎ dǒ kwɛ̍i̍n gbo̍ᵻ we̍-ɛ. Wɛ̀ mɔ̀ se̍ ɔ̍ bɔ̌ i̍ po̍ dǒ i̍h we̍.

²¹Ǐn nyǐ ɔ̍ ti̍ wɛ̀ ɔ̍ iě i̍ bǐi ɔ̍ iě ɔ̍ gblɛ̍n sɔ̀ɛ̀n kɛ̍n i̍ poe, ɔ̍ iě ɔ̍ gbǎn nu̍ dɛ̍ i̍ tǎli. Jɛ ɔ̍ se̍ ɛ̍ nu̍-ɛ i̍ pɔ̀n.

²²Ɛ̍ tìh-ɛ, ǎn mu̍ ɔ̍ dǒ wɛ̌ bèe̍ kɛ̍n po̍, wɛ̀ nyɔ̍ ke ɔ̍ nu̍-a nynɛ̌à-aɛ, u̍h iě jua̍i̍ sàɛ̀ dɛ̍blɔ. Jɛ pò u̍h bǐi i̍-ɛ, nɛ̀ ɛ̍ kɔn tɛ̀ ǐn sà-o.

²³Nɛ̀ ǎn mu̍ ɔ̍ nynuu̍ dbǎ, wɛ̀ chɔchi̍h nyɔ̍ kli̍hgbɛ̍ iě ɛ̍ juo ka mɔ̍ bo ɔ̀ juo-a dɛ̍ nɛ-a dě nyɔ̍ wlùh di̍i̍-ɛ. Nɛ̀ jɔ-ɛ ka ɔ̍ nu̍-dɛ̍ᵻ nɛ-a, kǎ ǎn mu̍ ɔ̍ pɛ̌ɛ-ɛ nu̍.

²⁴“Jɛ mɔ̀ɔ̍ juh sie-a dě Taɛtawla-ɛ, mɔ̀ se̍ dǒ nynɔ̌ la ɔ̍ nǎ po̍ wlu̍ de̍e̍ gbǎ. Mɔ̀ se̍ ìh u̍h-a dǎɛ-a Setɔn-a sìle dɛ̍ᵻɛ́ we̍ i̍ ju̍o̍e. Ɛ̍ kɔn na̍ ǐn se̍ mɔ̀ slùgbɛ̀ dɛɛ kleǐ po̍ mu̍ dɛ.

²⁵Jɛ tà mɔ̀ gbɛ̍n-a i̍-ɛ, dǒ mɔ̀ iě i̍ gbɛ̍n gba̍i̍ngba̍i̍n te̍e̍ wɛ̀ iě ji̍.

²⁶Nyɔ̍ ɔ̀ sà-a dɛ̍ sɔ̀n klà-a, wɛ̀ ɔ̍ iě ǎn wlùh nu̍ te̍e̍ wɛ̀ ti̍ iě dlǔ i̍ chlà-ɛ, nɛ̀ ǎn mu̍ ɛ̍ nu̍ ɔ̍ iě bloa̍ wlu̍ i̍ kɔn.

²⁷Ka ǐn Baa nu̍-a ǐn bloa̍ wlu̍ i̍ kɔn-ɛ nyǐ-ɛɛ, kǎ ɔ̍ mu̍ bloa̍ wlu̍ i̍ kɔn-ɛ nu̍ ke dǒ nɛ̍ne̍ɛ̍ bliku we̍ wɛ̀ ɔ̍ iě i̍h i̍ waɛ flɛ̀ɛ̌nflɛ̀ɛ̌n ka jawih waɛ i̍-ɛ.

²⁸Nɛ̀ ǎn mu̍ ɔ̍ chǔhtlɛ̀n ɛ̀ fa̍n-a klàɛ̍we̍-ɛ nyǐ ke.

²⁹“Nyɔ̍ ɔ̀ flɔn-a dounᵻɛ́, nɛ̀ ɔ̍ po̍ dě dɛ̍ Nyɔsoa-a Sùù bla̍-a dě chɔchi̍h nyɔ̍ we̍-ɛ dounᵻ.”