Read Western Krahn Wlɛfeleseɔn 21 Bible Online

Wlɛfeleseɔn 21 - Western Krahn bible

Wlɛfeleseɔn 21

¹Wɛ̀ ǐn jě ja̍u̍n delee ke blǔh delee. Blǔh ke ja̍u̍n jih nɛ-a sàǐtòò-ɛ, nɛ̀ i̍h-a tìh wɛ̀ i̍ wɛ̀. Iě jbǒ se̍ nɛ dɛ kleǐnklein.

²Iě ǐn jě tùgbàwlɔ̀ ɛ̀ kɔn-a dǒ Nyɔsoa we̍ ɛ̀ nu̍-a Juluslɛn wlɔ̀ delee-ɛ. Wlɔ̀ la ɛ̍ sɔ dě ja̍i̍wlɔ̀ dě Nyɔsoa we̍. Ɛ̍ po̍-eɛ gba̍a̍ ka nynɔ̌ delee pɛ̀ɛ̀ ɔ̍ iě jla̍ mu̍-ɛ.

³Wɛ̀ ǐn wɔ̌n we̍le wlu̍ ɛ̍ sɔ dě nynɛ̌ gbalǎ kɛ̍n, ɛ̍ la̍a̍, “Nyɔsoa-a tèla̍ nɛ nɔ̌ wlɔ̀-nyɔ̍ we̍ wɛ̀. Ɔ̍ mu̍ la̍ dě u̍h we̍ tǐn, wɛ̀ u̍h iě ɔ̍ nyɔ̍ nu̍. Nyɔsoa-a chɛ̀-a mu̍ dǒ u̍h we̍ nɛ.

⁴Ɔ̍ mu̍ la̍ u̍h mǐtɛɛn kli̍hgbɛ̍ jlǐh i̍ slǎn. Mɛ̌ɛ ke, sùàɛ̀n pa̍-a ke, fìn-ɛ ke ku̍-a wɔ̍n kma-a se̍ nɛ mu̍ dɛ. Dɛ̍nu̍ɛ, dɛ̍ᵻ jih nɛ-a sàì-ɛ, i̍h sì i̍ wɛ̀.”

⁵Wɛ̀ ɔ̀ tè-a i̍ dǒ nynɛ̌ gbalǎ kɛ̍n-ɛ la̍a̍, “Ǎn nu̍ la̍ dɛ̍ᵻ kli̍hgbɛ̍ delee we̍i̍.” Ɔ̍ la̍a̍ dě ǐn we̍ ke, “Chlǐh ɛ̀ la, dɛ̍nu̍ɛ, wlu̍ la i̍h nu̍ gblangbai̍ ke wlì tè dɛ̍.”

⁶Iě ɔ̍ la̍a̍ dě ǐn we̍, “Ɛ̍ wɛ̀ i̍ wɛ̀. Mɔ̍ bo ɔ̀ nu̍ dɛ̍ᵻ kli̍hgbɛ̍-a Gbɔ̀ Tè-ɛ ke i̍h-a Dlǔ I̍ Chlà-a. Mɔ̍ bo ɔ̀ nu̍ de̍ ke nya̍. Nyɔ̍ ɔ̀ nǐ nǎ tɔ̌n-a nu̍-aɛ, nɛ̀ ǎn mu̍ ɔ̍ nǎ-nǐ ɛ̀ sɔ-a dě kao̍dlu ɛ̀ nyǐ-a nyɔ̍ feɛ-ɛ nyǐ bu̍ɛ̍i̍.

⁷Nyɔ̍ ɔ̀ sà-a dɛ̍ sɔ̀n klà-a, nɛ̀ ɔ̍ mu̍ dɛ̍ kɔn wlu̍ ǐn po̍-a tɔ̀ma̍a̍-ɛ nyǐ-ɛ. Ǎn mu̍ ɔ̍ Nyɔsoa nu̍, wɛ̀ ɔ̍ iě ǎn jǔ nu̍.

⁸Jɛ faɛn nyɔ̍ ke, se̍ wlùh gbaɛ blě nyɔ̍ ke, ùh-a nu̍-a sììjii̍-ɛ ke, nyɔ̍ gbe̍ja̍a̍ poe nyɔ̍ ke, gbǎn nu̍ nyɔ̍ ke, wù po̍ nyɔ̍ ke, kwɛ̍i̍n gbo̍ᵻ wɛɛ sà nyɔ̍ ke, si̍h tmɔ̌ nyɔ̍ kli̍hgbɛ̍ u̍h-a nɛ la̍-a mu̍ dě pɔ̀nɔ̌ nɛ̍-a pàìbǒ di̍i̍ nu̍. Ɛ̍ bo ɛ̀ nu̍ mɛ̌ɛ-a sɔɔ̌n naɛ.”

⁹Wɛ̀ ǐnchɔ̀ mɛ̀sɔɔ̌n laa̍ ìh blě-a boo̍ᵻ mɛ̀sɔɔ̌n ìh bɔ̌ɛ-o dlǐ dɛ̍ᵻ mɛ̀sɔɔ̌n jǐ-a dě di̍i̍-ɛ, iě i̍h-a due ji̍. Iě ɛ̍ la̍a̍ dě ǐn we̍, “Ji̍, ǎn mu̍ ìn Nynɔ̌ Delee toe ɔ̀ nu̍-a Blawɛ̌ Jǔ-a nynɔ̌-ɛ.”

¹⁰Nyɔsoa-a Sùù jǐi ǐn i̍ wɛ̀ ǐnchɔ̀ gba̍ ǐn dě tlu̍h tɔ̀ɔ̀n kɛ̍n. Wɛ̀ ɛ̍ toe ǐn Juluslɛn wlɔ̀ ɛ̀ kɔn-a dǒ Nyɔsoa we̍-ɛ. Wlɔ̀-a chɛ̀ ɛ̍ sɔ dě Nyɔsoa we̍ ja̍i̍wlɔ̀.

¹¹Ɛ̍ blě Nyɔsoa-a tìh-a i̍ bɛ̌-ɛ, iě ɛ̍ fa̍n ka dɛ̍kɛ̍n gbǎ sɔɔ̌-ɛ. Ɛ̍ wɔ̀ sɔɔ̌ ɛ̀ ke wùe̍i̍-a ku̍ wɔ̀ɛ-aɛ. Ɛ̍ nɛ wlihwlǐh ka klàsi̍-ɛ.

¹²Ɛ̍ blě wɔ̍n ku̍ saǎn tɔ̀ɔ̀n ɛ̍ sì-i ɛ̍ de̍e̍ i̍. Wɛ̀ ɛ̍ blě pa̍la̍ wɔ̍nᵻá pùè jɔ̌ sɔɔ̌n, iě Nyɔsoa-a ǐnchɔ̀-a pùè jɔ̌ sɔɔ̌n-a due due nɛ i̍h kli̍hgbɛ̍ we̍ i̍. Iě chɛ̌tu-a pùè jɔ̌ sɔɔ̌n ùh nu̍-a Eslɔɛ nyɔ̍-ɛ, u̍h-a nynɛ̌ chlǐh-ɛ due due dǒ pa̍la̍ wɔ̍nᵻ laa̍ pùn.

¹³Wɔ̍nᵻ ta̍a̍n wɔ̀ dě tà jlǔh-a wlǔh-ia kwlǎ-a, iě ta̍a̍n wɔ̀ dě jlǔh-a gbǎ la̍-a, wɛ̀ ta̍a̍n wɔ̀ dě kwe̍na̍ i̍, iě ta̍a̍n wɔ̀ dě di̍na̍ i̍.

¹⁴Saǎn-a chɛ̀ ɛ̍ blě sɔɔ̌ gbo̍ bu̍hᵻá pùè jɔ̌ sɔɔ̌n. Wɛ̀ Blawɛ̌ Jǔ-a gba̍tòà-a pùè jɔ̌ sɔɔ̌n-a nynɛ̌ chlǐh-ɛ due due dǒ i̍h pùn.

¹⁵Ǐnchɔ̀ ɛ̀ wlu-a dě ǐn we̍-ɛ, nɛ̀ ɛ̍ blě kòo̍ tu̍ ɛ̀ nu̍-a dbee dɛ̍-ɛ kwa̍, ɔ̍ iě tùgbàwlɔ̀ laa̍ ke, ɛ̍ saǎn ke, ɛ̍ wɔ̍nᵻ dbee.

¹⁶Tùgbàwlɔ̀-a fɔ̌ᵻ nɛ-a nyìɛ̍-ɛ i̍h beɛ̍ɛ. Ɛ̍ chɛɛn kɛ̍n ke ɛ̍ gbààngbaǎn ti̍ɛ̍ɛn. Wɛ̀ ǐnchɔ̀ nu̍ ɛ̍ tu̍ laa̍ iě ɛ̍ dbee tùgbàwlɔ̀-a chɛ̀. Wɛ̀ ɛ̍ nu̍ gbɛna-a poa due wlǔ-a kmɛ ta̍a̍n kwela sɔɔ̌n (1,320,000). Ɛ̍ gbààngbaǎn ke, ɛ̍ chɛɛn kɛ̍n ke ɛ̍ ja̍ tɛn-ɛ beɛ̍ɛ.

¹⁷Iě ɛ̍ dbee saǎn ke, wɛ̀ ɛ̍-ɛ ku̍-ɛ nu̍ gbɛna-a kwela ta̍a̍n jɔ̌ mɛ̀o̍ (36) dǒ dbee dɛ̍ ǐnchɔ̀ dbee-aɛ we̍.

¹⁸Dɛ̍kɛ̍n gbǎ sɔɔ̌ᵻá tu̍ due bo u̍h poe saǎn laa̍. U̍h poe wlɔ̀ nɔ̀ɔ̍ kòo̍-a sǔh iě ɛ̍ nɛ wlihwlǐh ka klàsi̍-ɛ.

¹⁹Saǎn ɛ̀ sì-a wlɔ̀-a chɛ̀ de̍e̍ i̍-ɛ, sɔɔ̌ᵻ maloo kaɛn kaɛn bo ìh pɛ̀ɛ̀-ɛ gbo̍ bu̍hᵻ nu̍-a pùè jɔ̌ sɔɔ̌n-ɛ. Ɛ̍ sàǐtòò naɛ nu̍ sɔɔ̌ ɛ̀ ke wùe̍i̍-a ku̍ wɔ̀ɛ-aɛ, iě ɛ̍ sɔɔ̌n naɛ nu̍ bli sɔɔ̌, wɛ̀ ɛ̍ ta̍a̍n naɛ nu̍ sɔɔ̌ klɛnklɛ̌n. Iě ɛ̍ nyìɛ̍ naɛ nu̍ sɔɔ̌ wlihwlǐh.

²⁰M̀m̌ naɛ nu̍ gbɔ̀plu̍ sɔɔ̌, iě mɛ̀o̍ naɛ nu̍ sɔɔ̌ sàɛ̀n. Wɛ̀ mɛ̀sɔɔ̌n naɛ nu̍ sɔ̌n jlǐh sɔɔ̌. Mɛ̀ta̍a̍n naɛ nu̍ wùe̍i̍ sɔɔ̌ mlamla, mɛ̀nyìɛ̍ naɛ nu̍ dɔgbɔ sɔɔ̌, wɛ̀ pùè naɛ nu̍ sɔɔ̌ plǔ. Pùè jɔɛ̍ due naɛ nu̍ pàn sɔɔ̌, wɛ̀ pùè jɔ̌ sɔɔ̌n naɛ nu̍ nǐnmɛ sɔɔ̌.

²¹Saǎn-a pa̍la̍ wɔ̍nᵻ nu̍-a pùè jɔ̌ sɔɔ̌n-ɛ, wli̍h plǔᵻá pùè jɔ̌ sɔɔ̌n bo i̍h nui-ɛ. Wɔ̍n jɛ-ɛ nɛ̀ ɛ̍ nui-ɛ wlu̍h jɔ̌ɛ due. Wɛ̀ wlɔ̀-a chɛ̀ ɛ̍ wìè nu̍ kòo̍-a sǔh ɛ̀ nɛ-a wlihwlǐh ka klàsi̍-ɛ.

²²Ǐn se̍ slaǎ sà gbò jě dǒ tùgbàwlɔ̀-a chɛ̀ di̍i̍, dɛ̍nu̍ɛ, ɛ̍ slaǎ sà gbò bo ɛ̀ nu̍ Joi Nyɔsoa Ɔ̀ Blě-a Gbǐh Kli̍hgbɛ̍-ɛ, ɛ̍ ke Blawɛ̌ Jǔ ke.

²³Wlɔ̀-a chɛ̀ se̍ jlǔh àe̍e̍ chǔh-a fa̍n-a i̍ pɔ̀n, dɛ̍nu̍ɛ, Nyɔsoa-a tìh-a i̍ bɛ̌-ɛ bo ɛ̀ nu̍ ɛ̍ sɔ̀npli, wɛ̀ Blawɛ̌ Jǔ nu̍ ɛ̍ chlǎn nape̍.

²⁴Wlɔ̀ la ɛ̍ sɔ̀npli bo bloa̍ kli̍hgbɛ̍-a mu̍ we̍ na, wɛ̀ kmɔ̌-a blǔh baaᵻ iě u̍h-a pàn-a dǒ ɛ̍ di̍i̍ gba̍.

²⁵Ɛ̍ saǎn-a pa̍la̍ wɔ̍nᵻ se̍ ka̍n mu̍ sɔ̀n sɛ̀n bla, dɛ̍nu̍ɛ, wlù se̍-e wɔ̀-ɛ mu̍.

²⁶Bloa̍ kli̍hgbɛ̍-a pàn-a ke nynɛ̌ wlǔh-ɛ bo ìh-a mu̍ dǒ tùgbàwlɔ̀ laa̍ di̍i̍ ja-ɛ.

²⁷Jɛ dɛ̍-ɛ se̍ nɛi̍ wɛ̀ wɛ̀ ɛ̍-ɛ sǐ-e i̍, ɛ̍ ke nyɔ̍ jɔ nu̍-a sììjii̍ ke si̍h tmɔ̌ dɛ̍-ɛ ke. Jɛ ùh kɔn nynɛ̌ chlǐh-a dě Blawɛ̌ Jǔ-a feɛ chlǐh-dɛ̍ di̍i̍-ɛ, u̍h nɛ due bo ùh-a mu̍ dě-e i̍ sǐ.