Read Western Krahn Wlɛfeleseɔn 3 Bible Online

Wlɛfeleseɔn 3 - Western Krahn bible

Wlɛfeleseɔn 3

¹Wɛ̀ ɔ̍ la̍a̍ dě ǐn we̍, “Chlǐh Nyɔsoa-a ǐnchɔ̀ ɛ̀ nɛ-a dě Sade wlɔ̀-a chɔchi̍h-ɛ we̍. Nɛ̀ nàa̍, “Tu̍owli la ɛ̍ sɔ dě nyɔ̍ ɔ̀ blě-a sùù mɛ̀sɔɔ̌n ìh-a dbee-a Nyɔsoa jǔ-ɛ ke chǔhtlɛ̀n mɛ̀sɔɔ̌n-ɛ we̍. Ǐn juo mɔ̀-a nu̍-dɛ̍ᵻ. Mɔ̀ wɔ̀ kmɔ̌ nɛ nyɔ̍, jɛ mɔ̀ mɛ̌-ɛ.

²Mɔ̀ sɔ bloɔ̍ mɔ̀ iě dɛ̍ ɛ̀ sie-aoɛ gbǐh we̍ po̍ duedɛ wɛ̀ ɛ̍-ɛ je̍e mɛ̌. Dɛ̍nu̍ɛ, nɛ̌ se̍a mɔ̀-a nu̍-dɛ̍ᵻá gblɛ̍ja̍i̍ wɛ̀ naɛ jě dǒ ǎn Nyɔsoa jlǐhwai.

³Dɛ̍ᵻ ǐn poe-a mɔ̀ nǎ wɛ̀ mɔ̀ cheǎn-aɛ, mɔ̀ nu̍ i̍h wlùh we̍. Nɛ̀ mɔ̀ jě i̍h dɛ̍ɛ̍ mɔ̀ iě mɔ̀-a gblɛ̍n sɔ̀ɛ̀n kɛ̍n i̍ poe. Jɛ pò mɔ̀ se̍ bloɔ̍ sɔ mu̍-ɛ, nɛ̀ ǎn ji̍-ɛa mu̍ nyɔ̍ kɛ̍n kèè ka jlǐ-nyɔ̍-ɛ. Nɛ̀ mɔ̀ se̍ ti̍ ǎn mu̍-a ja-ɛ juo mu̍.

⁴Jɛ mɔ̀-a gbɔ̍ nɛ-a dǒ Sade-ɛ, u̍h-u se̍a gblɛ̍n sɔ̀ɛ̀n nu̍. U̍h-a mu̍ jlii̍ plǔᵻ pa̍, wɛ̀ u̍h ke ǐn ke à iě na. Dɛ̍nu̍ɛ, u̍h nɛ ɛ̍ ka̍.

⁵Nyɔ̍ ɔ̀ sà-a dɛ̍ sɔ̀n klà-a, nɛ̀ kǎ ɔ̍ mu̍ jlii̍ plǔᵻ pa̍-a nu̍ ke. Nɛ̀ ǐn se̍ ɔ̍ nynɛ̌ dě feɛ chlǐh-dɛ̍ di̍i̍ sà mu̍. Jɛ nɛ̀ ǎn mu̍ ɔ̍ ǎn nyɔ̍ slè-e dǒ ǐn Baa ke ɔ̍ ǐnchɔ̀ jǔ.

⁶“Nyɔ̍ ɔ̀ flɔn-a dounᵻɛ́, nɛ̀ ɔ̍ po̍ dě dɛ̍ Nyɔsoa-a Sùù bla̍-a dě chɔchi̍h nyɔ̍ we̍-ɛ dounᵻ.”

⁷Wɛ̀ ɔ̍ la̍a̍ dě ǐn we̍, “Chlǐh Nyɔsoa-a ǐnchɔ̀ ɛ̀ nɛ-a dě Feledɛɛfia wlɔ̀-a chɔchi̍h-ɛ we̍. Nɛ̀ nàa̍, “Tu̍owli la nyɔ̍ ɔ̀ wɛ̀-a nɛi̍ ɔ̀ nu̍-a gblangbai̍ nyɔ̍-ɛ, dě ɔ̍ we̍ ɛ̍ sɔ-ɔ. Ɔ̍ blě Depe-a kɔɛ̍n. Ɔ̍ pɔ̀ni gbò wɔ̍i̍n-ɛ, nɛ̀ nyɔ̍ se̍ ɛ̍ wɔ̍i̍n ka̍n-a bɛ̌ɛ, iě pò ɔ̍ ka̍n ɛ̍ wɔ̍i̍n-ɛ, nɛ̀ nyɔ̍ se̍ ɛ̍ pɔ̀ni-ɛ bɛ̌ɛ.

⁸Ǐn juo mɔ̀-a nu̍-dɛ̍ᵻ. Ǐn juo ka mɔ̀ blě-a gbǐh-a dɛ̍wɛ-ɛ, jɛ mɔ̀ wɔ̀ dǒ ǎn nǎ po̍ wlu̍ de̍e̍, iě mɔ̀ se̍ mɔ̀-a wlùh gbaɛ i̍ tǎli. Ǐn flɔn-ɛ gbò wɔ̍n wɛ̀ dǒ mɔ̀ jǔ, ɛ̀ nyɔ̍ dɔɔ se̍-a ka̍n-a bɛ̌ɛ-ɛ.

⁹Mɔ̀ gbɛ̀n-e, nyɔ̍ ùh kɔn-a dǒ Setɔn-a gbɔ̀ù we̍-ɛ, u̍h nu̍ si̍h nyɔ̍. U̍h la̍ u̍h-u Juu nyɔ̍, jɛ u̍h se̍ Juu nyɔ̍. Jɛ ǎn mu̍ ɛ̍ nu̍ u̍h iě ji̍ wɛ̀ u̍h iě i̍ chlìi dǒ mɔ̀ jǔ. Wɛ̀ u̍h kli̍hgbɛ̍ iě ɛ̍ i̍ juo ka ǐn jbɛɛ-a mɔ̀ɔ̍-ɛ.

¹⁰Ǎn mu̍ mɔ̀ kɛ̍n kaɛn dǒ jua̍i̍ sàɛ̀ ɛ̀ mu̍-a kmɔ̌ kli̍hgbɛ̍ la we̍ ji̍ ɛ̀ iě-a nyɔ̍ kli̍hgbɛ̍ nɛ-a nɔ̌ blǔh la kɛ̍n-ɛ tɛ̀n-ɛ we̍. Dɛ̍nu̍ɛ, mɔ̀ nu̍ ǎn wlu̍ dǒ mɔ̀-a wlùh i̍ gbɛ̍n-ɛ ke mɔ̀-a dě klì i̍ ku̍-ɛ di̍i̍.

¹¹Ǎn mu̍ ji̍ suei̍. Tà mɔ̀ gbɛ̍n-a i̍-ɛ, dǒ mɔ̀ iě i̍ gbɛ̍n gba̍i̍ngba̍i̍n wɛ̀ nyɔ̍ dɔɔ je̍e mɔ̀-a blawɛ̌ mɔ̀ kwa̍a̍ sà.

¹²Nyɔ̍ ɔ̀ sà-a dɛ̍ sɔ̀n klà-a, nɛ̀ ǎn mu̍ ɔ̍ sìtù we̍i̍ nu̍ dě ǎn Nyɔsoa-a slaǎ sà gbò sɔ̀n. Nɛ̀ ɔ̍ se̍ gba̍ deě sɔ dɛ. Nɛ̀ ǎn mu̍ ǎn Nyɔsoa-a nynɛ̌ chlǐh dǒ ɔ̍ pùn, ɛ̍ ke ǎn Nyɔsoa-a tùgbàwlɔ̀-a nynɛ̌ ke, ɛ̀ nu̍-a Juluslɛn wlɔ̀ delee ɛ̀ sɔ-a dě ǎn Nyɔsoa we̍ ja̍i̍wlɔ̀-ɛ. Ǎn mu̍ ǎn chɛ̀-a nynɛ̌ delee chlǐh ke dǒ ɔ̍ pùn.

¹³“Nyɔ̍ ɔ̀ flɔn-a dounᵻɛ́, nɛ̀ ɔ̍ po̍ dě dɛ̍ Nyɔsoa-a Sùù bla̍-a dě chɔchi̍h nyɔ̍ we̍-ɛ dounᵻ.”

¹⁴Wɛ̀ ɔ̍ la̍a̍ dě ǐn we̍, “Chlǐh Nyɔsoa-a ǐnchɔ̀ ɛ̀ nɛ-a dě Leodesia wlɔ̀-a chɔchi̍h-ɛ we̍. Nɛ̀ nàa̍, “Tu̍owli la ɛ̍ sɔ dě nyɔ̍ ɔ̀ kɔn nynɛ̌ nu̍-a Kǎ Ɛ̍-ɛ Nɛ-ɛ we̍. Ɔ̍-ɔ gblìh wlu̍ kɛ̍n iě ɔ̍ nu̍ gblangbai̍ sàànsi̍i̍h. Ɔ̍-ɔ bo ɔ̀ nu̍ dɛ̍ᵻ Nyɔsoa nu̍-aɛ i̍h-a gbɔ̀.

¹⁵Ǐn juo mɔ̀-a nu̍-dɛ̍ᵻ. Mɔ̀ se̍ seɔn nɛ iě mɔ̀ wɔ̍ se̍ jlo̍jlo̍ nɛ ke. Ǎn pɔ̀n mɔ̀ iě fɔ̌ due kɛ̍n gbǎ, jɛ mɔ̀ bɔ̌ dǒ wèa̍ nɛ-ɛ.

¹⁶Ka mɔ̀ sɔ̀ìà mɔ̀ se̍-a seɔn nɛ iě mɔ̀ wɔ̍ se̍-a jlo̍jlo̍ nɛ-ɛ, ɛ̍ tìh-ɛ, ǎn mu̍ mɔ̀-a dɛ kwa̍ i̍ sà.

¹⁷Mɔ̀ la̍ mɔ̀ pàn-ɛ, mɔ̀ blě dɛ̍ᵻ kli̍hgbɛ̍, mɔ̀-ɔ pɔ̀n dɛ̍ i̍. Jɛ mɔ̀ se̍ i̍h juo ka mɔ̀ nɛ-a chlě i̍ iě mɔ̀ nɛ-a wɔɛ-ɛ. Mɔ̀ pa̍ nyɔ̍gbà, iě mɔ̀ dɔ̌ mɔ̀ chɛn gbaǎn.

¹⁸Ɛ̍ tìh-ɛ, ǎn tù mɔ̀ slɛ̌n mɔ̀ iě kòo̍ wlihwlǐh tɛ̀n nɔ̌ ǐn we̍, wɛ̀ mɔ̀ iě pàn. Mɔ̀ tɛ̀n jlii̍ plǔᵻ ke mɔ̀ iě-e pa̍. Wɛ̀ mɔ̀ iě dɛ̍ jǔ wlǎ, tɛ̀n-ɛ je̍e mɔ̀ nu̍. Mɔ̀ tɛ̀n kwɛ̍i̍n mɔ̀ iě jlǐh i̍ po̍, wɛ̀ mɔ̀ iě i̍ jě.

¹⁹Nyɔ̍ ǐn jbɛɛ-aɛ u̍h bo ǎn gbɛ̍n kàn iě ǎn sà gblɛ̍n kwa̍ i̍. Ɛ̍ tìh-ɛ, mɔ̀-a wlùh nu̍ jàjà mɔ̀ iě mɔ̀-a gblɛ̍n sɔ̀ɛ̀n kɛ̍n i̍ poe.

²⁰Kaka la̍, ǐn nyna i̍ dǒ gbaba kɛ̍ɛ̍n iě ǎn bla̍ ɛ̍. Pò nyɔ̍-o-nyɔ̍ wɔ̌n ǎn wlu̍ wɛ̀ ɔ̍ iě dǒ gbò wɔ̍i̍n pɔ̀ni-ɛ, nɛ̀ ǎn mu̍ dě ɔ̍ we̍ gbò pa̍ ɔ̍ ke ǐn ke à iě sɔ̍n jǔ gbo̍a̍ɛ.

²¹Nyɔ̍ ɔ̀ sà-a dɛ̍ sɔ̀n klà-a, nɛ̀ ǎn mu̍ ɔ̍ bu̍hᵻ de̍e̍ i̍ tba̍ ɔ̍ iě dǒ ǐn pùn i̍ tè dǒ ǎn nynɛ̌ gbalǎ kɛ̍n ka ǎn chɛ̀ nu̍-a dɛ̍ sɔ̀n klà sà-a wɛ̀ ǐn tè-a dǒ ǐn Baa pùn i̍ dǒ ɔ̍ nynɛ̌ gbalǎ kɛ̍n-ɛ.

²²“Nyɔ̍ ɔ̀ flɔn-a dounᵻɛ́, nɛ̀ ɔ̍ po̍ dě dɛ̍ Nyɔsoa-a Sùù bla̍-a dě chɔchi̍h nyɔ̍ we̍-ɛ dounᵻ.”