Read Western Krahn Wlɛfeleseɔn 8 Bible Online

Wlɛfeleseɔn 8 - Western Krahn bible

Wlɛfeleseɔn 8

¹Wɛ̀ Blawɛ̌ Jǔ wa̍ slu̍-a mɛ̀sɔɔ̌n naɛ. Iě dě ja̍i̍wlɔ̀ nɛ tùàa̍n, ɛ̍ bɛ̌ɛ mini̍ jlǐh-a kwela ta̍a̍n nu̍-ɛ.

²Iě ǐn jě Nyɔsoa-a ǐnchɔ̀ mɛ̀sɔɔ̌n i̍h nyna i̍ dǒ Nyɔsoa jǔ. Wɛ̀ dɔ̍gbɛ̍ᵻ mɛ̀sɔɔ̌n nyǐ-ɛ i̍h.

³Wɛ̀ ǐnchɔ̀ dɛɛ ɛ̀ blě-a nɔ̌-dɛ̍ᵻá di̍i̍ fɔ̍n-ɛ dɛ̍ ɛ̀ nui-a kòo̍-ɛ, iě ɛ̍ ji̍. Wɛ̀ ɛ̍ nyna i̍ dǒ gblǒ pùn. Wɛ̀ ɛ̍ nyǐ-ɛ nɔ̌-dɛ̍ᵻ dɔu i̍h iě dǒ Nyɔsoa nyɔ̍ kli̍hgbɛ̍-a ba̍le wlu̍ kɛ̍n gbǎ. Wɛ̀ i̍h iě kwlǎ sà-ɛ dǒ kòo̍ gblǒ ɛ̀ nyna-a i̍ dǒ nynɛ̌ gbalǎ jǔ-ɛ kɛ̍n.

⁴Iě nɔ̌-dɛ̍ᵻá daluh ke Nyɔsoa nyɔ̍-a ba̍le wlu̍ sɔ dě ǐnchɔ̀ laa̍ kwa̍a̍, wɛ̀ i̍h mu̍ ja̍i̍ dǒ Nyɔsoa jǔ.

⁵Wɛ̀ ǐnchɔ̀ laa̍ ɛ̍ dǔ nɔ̌-dɛ̍ᵻá di̍i̍ fɔ̍n-ɛ dɛ̍-ɛ, ɛ̍ jǐi ɛ̍ dǒ nɛ̍ ɛ̀ sɔ-a dǒ gblǒ kɛ̍n-ɛ we̍. Iě ɛ̍ fìle ɛ̍ dǒ bloa̍ kɛ̍n. Wɛ̀ tɛ̀n-a plǎn-ɛ i̍, slɛ̀-a wlu, iě nǐ-a chlɛ jlǐh, wɛ̀ wlù poɔ-a ji̍.

⁶Wɛ̀ Nyɔsoa-a ǐnchɔ̀ mɛ̀sɔɔ̌n laa̍ ìh blě-a dɔ̍gbɛ̍ᵻɛ́, i̍h po̍ i̍h gba̍a̍ i̍h iě i̍h bla̍.

⁷Wɛ̀ sàǐtòò ǐnchɔ̀ bla̍ ɛ̍ dɔ̍gbɛ̍, iě seɔn gbo̍ᵻ ke nɛ̍ sìàɛ̍n nymɔ̍-ɔ, wɛ̀ i̍h wlǎ-ɛ bloa̍ kɛ̍n i̍. Wɛ̀ bloa̍-a fɔ̌ᵻ nɛ-a ta̍a̍n-ɛ, i̍h-a due-a tu̍ᵻ ke ɛ̍ pei jaɔ kli̍hgbɛ̍ i̍h si̍n.

⁸Wɛ̀ ǐnchɔ̀-a sɔɔ̌n naɛ bla̍ ɛ̍ dɔ̍gbɛ̍, iě dɛ̍ ɛ̀ wɔ̀-a nɛ̍ gbà tlu̍h klaa-ɛ, iě ɛ̍ fìle-ɛ dě jbǒ kɛ̍n. Wɛ̀ jbǒ-a fɔ̌ᵻ nɛ-a ta̍a̍n-ɛ, i̍h-a due sàɛ̀ nymɔ̍.

⁹Iě nmi̍i̍-a gbɔ̍ᵻ nɛ-a ta̍a̍n dě jbǒ kɛ̍n-ɛ, i̍h-a gbɔ̍ due mɛ̌. Wɛ̀ niɔ̍ mɛɛ̍ᵻá gbɔ̍ᵻ nɛ-a ta̍a̍n-ɛ, i̍h-a gbɔ̍ due gbɔ̀lɔ.

¹⁰Wɛ̀ ǐnchɔ̀-a ta̍a̍n naɛ bla̍ ɛ̍ dɔ̍gbɛ̍, iě chǔhtlɛ̀n klaa ɛ̀ wa̍n-a tàù-a dɛ̍-ɛ, wɛ̀ ɛ̍ blu̍ dě ja̍u̍n wlì. Iě ɛ̍ gbǎ nǐᵻ klaaᵻá gbɔ̍ᵻ ta̍a̍n naɛ-a due kɛ̍n ɛ̍ ke kao̍dluᵻ ke.

¹¹Chǔhtlɛ̀n-a chɛ̀ ɛ̍ nynɛ̌ bo Nɛ̍nɛ. Nǐᵻá gbɔ̍ᵻ nɛ-a ta̍a̍n-ɛ, i̍h-a due nɛ̍nɛ-ɛ. Wɛ̀ nyɔ̍ dɔu ùh nǎ-a nǐ-a chɛ̀-ɛ mɛ̌. Dɛ̍nu̍ɛ, ɛ̍ nɛ̍nɛ-ɛ.

¹²Wɛ̀ ǐnchɔ̀-a nyìɛ̍ naɛ bla̍ ɛ̍ dɔ̍gbɛ̍, iě jlǔh-a fɔ̌ᵻ nɛ-a ta̍a̍n-ɛ, i̍h-a due tba̍-ɛ dɛ̍. Iě chǔh-a fɔ̌ᵻ nɛ-a ta̍a̍n i̍h-a due ke chǔhtlɛ̀n-a fɔ̌ᵻ nɛ-a ta̍a̍n-ɛ, i̍h-a due tba̍-ɛ dɛ̍ ke. Ɛ̍ kɔn i̍h-a sɔ̀npli-a fɔ̌ᵻ nɛ-a ta̍a̍n-ɛ, i̍h-a due due mɔ̌ i̍. Wɛ̀ weɛ̍-a fɔ̌ᵻ nɛ-a ta̍a̍n-ɛ, jlǔh se̍ i̍h-a due kɛ̍n i̍ fa̍n-ɛ. Wlù-a fɔ̌ᵻ nɛ-a ta̍a̍n-ɛ, chǔh ke chǔhtlɛ̀n se̍ i̍h-a due kɛ̍n i̍ fa̍n-ɛ.

¹³Wɛ̀ ǐn gbɛ̀n-e, iě ǐn wɔ̌n chìsǐ-a wlu, nɛ̀ ɛ̍ wa̍n-ɛ dě ja̍u̍n wlì, iě ɛ̍ we̍le. Ɛ̍ la̍a̍, “Chlě, chlě dǒ nyɔ̍ ùh nɛ-a nɔ̌ bloɔ̍ wɛ̀ bɔ̌ɛ-o ǐnchɔ̀ ta̍a̍n iě-a dɔ̍gbɛ̍ᵻ bla̍-ɛ we̍.”