Read Western Panjabi متّی 1 Bible Online

متّی 1 - Western Panjabi bible

متّی 1

¹یِسُوع مسِیح داؤد دے پُتر ابرہام دے پُتر دا شجرہ۔

²ابرہام توں اِضحاق جمّیا۔ تے اِضحاق توں یعقُوب جمّیا۔ تے یعقُوب توں یہُوداہ تے اوہدے بھرا جمّے۔

³تے یہُوداہ توں فارص تے زارح تمر ولّ جمّے۔ تے فارص توں حِصرُون جمّیا۔ تے حِصرُون توں رام جمّیا۔

⁴تے رام توں عمّینداب جمّیا۔ تے عمّینداب توں نحسون جمّیا۔ تے نحسون توں سلمون جمّیا۔

⁵تے سلمون توں راحب ولّ بوعز جمّیا۔ تے بوعز توں عوبید رُوت ولّ جمّیا۔ تے عوبید توں یسّی جمّیا۔

⁶تے یسّی توں داؤد بادشاہ جمّیا۔ تے داؤد دے گھر سُلیمان اوہدے ولّ جمّیا۔ جیہڑی اگّے اُورِیّاہ دی بیوی سی

⁷تے سُلیمان توں رحُبِعام جمّیا۔ تے رحُبِعام توں اَبیّاہ جمّیا۔ تے اَبیّاہ توں آسا جمّیا۔

⁸تے آسا توں یہوسفط جمّیا۔ تے یہوسفط توں یُورام جمّیا۔ تے یُورام توں عُزِّیاہ جمّیا۔

⁹تے عُزِّیاہ توں یُوتام جمّیا۔ تے یُوتام توں آخز جمّیا۔ تے آخز توں حِزقیاہ جمّیا۔

¹⁰تے حِزقیاہ توں منسّی جمّیا۔ تے منسّی توں امُون جمّیا۔ تے امُون توں یُوسیاہ جمّیا۔

¹¹تے بابل وِچ کھڑے جان دے ویلے یُوسیاہ دے گھر یکُونیاہ تے اوہدے بھرا جمّے۔

¹²تے بابل وِچ کھڑے جان توں پِچّھے یکُونیاہ توں سیالتی ایل جمّیا تے سیالتی ایل توں زَرُبّابُل جمّیا۔

¹³تے زَرُبّابُل توں اَبِیہُود جمّیا۔ تے اَبِیہُود توں اِلیاقِیم جمّیا۔ تے اِلیاقِیم توں عازور جمّیا۔

¹⁴تے عازور توں صدوق جمّیا۔ تے صدوق توں اخیم جمّیا۔ تے اخیم توں اِلیہُود جمّیا۔

¹⁵تے اِلیہُود توں الیعزر جمّیا۔ تے الیعزر توں متّان جمّیا۔ تے متّان توں یعقُوب جمّیا۔

¹⁶تے یعقُوب توں یُوسف جمّیا۔ جیہڑا مریم دا گھر والا سی جِہدے ولّ یِسُوع جیہڑا مسِیح اکھواؤندا اے جمّیا۔

¹⁷سو ابرہام توں لے کے داؤد تِیکر سبھ چودہ پِیڑھیاں نیں۔ تے داؤد توں لے کے بابل نُوں کھڑے جان تِیکر چودہ پِیڑھیاں نیں۔ تے بابل نُوں کھڑے جان دے ویلیوں لے کے مسِیح تِیکر چودہ پِیڑھیاں نیں۔

¹⁸تے یِسُوع مسِیح دا جمّنا ایویں ہویا پئی جد اوہدی ماں مریم دی یُوسف نال کُڑمائی ہوئی تَد اوہناں دے اکٹّھے ہون توں پہلاں جاپیا پئی اوہ پاک رُوح ولّوں جنّن والی اے۔

¹⁹تَد اوہدے گھر والے یُوسف جیہڑا نیک بندہ سی تے اوہنوں بدنام کرنا نئیں سی چاہندا۔ ایہہ صلاح کِیتی پئی چُپ کِیتاں اوہنوں چھڈ دیاں۔

²⁰پر جد اوہ ایہناں گلّاں دی سوچ وچار کر دا سی۔ ویکھو خُداوند دے فرِشتے سُفنے وِچ اوہنوں وکھالی دے کے آکھیا۔ اَے یُوسف داؤد دے پُتر۔ تُوں اپنی بیوی مریم نُوں اپنے کول لیاؤن توں نا ڈر۔ کیوں جو جیہڑا اوہدے گربھ وِچ ہویا ایہہ پاک رُوح توں اے۔

²¹اوہ پُتر جمّے گی۔ تے تُوں اوہدا ناں یِسُوع رکھّیں کیوں جو اوہو اپنے لوکاں نُوں اوہناں دے گُناہاں توں بچائے گا۔

²²ایہہ سبھ کُجھ ایس لئی ہویا پئی اوہ گلّ جیہڑی خُداوند پیغمبر دی زبانی آکھی سی پُوری ہوئے پئی۔

²³”ویکھو اِک کواری جمّن والی ہوئے گی تے اوہدے ولّ پُتر ہوئے گا۔ تے اوہدا ناں عمانوایل رکھن گے۔ جِہدا مطلب اے خُدا ساڈے نال۔“

²⁴تے یُوسف نے جاگ کے جیویں خُداوند دے فرِشتے اوہنوں آکھیا سی اِنجے ای کِیتا۔ تے اپنی بیوی نُوں اپنے گھر لیاندا۔

²⁵تے اوہدے نیڑے نا گیا جد تِیکر اوس پُتر نا جمّیا۔ تے اوس اوہدا ناں یِسُوع رکھیا۔