Read Western Panjabi متّی 12 Bible Online

متّی 12 - Western Panjabi bible

متّی 12

¹اوس ویلے یِسُوع سبت دے دِن پَیلِیاں وِچوں دی لنگھیا تے اوہدے شاگِرداں نُوں بُھکھ لگّی ہوئی سی۔ تے اوہ سِٹّے توڑ توڑ کے چَبّن لگّے۔

²تے فرِیسیاں ایہہ ویکھ کے اوہنوں آکھیا۔ ویکھ تیرے شاگِرد اوہ کمّ پَے کر دے نیں جیہڑا سبت نُوں کرنا روا نئیں۔

³پر اوس اوہناں نُوں آکھیا تُسی نئیں پڑھیا پئی داؤد نے کِیہ کِیتا جدوں اوہ تے اوہدے ساتھی بُھکھے سن۔

⁴اوہ کِس طرح خُدا دے گھر وِچ گیا تے چڑھاوے دِیاں روٹِیاں کھادِیاں جیہڑیاں نا اوہنوں نا اوہدے ساتھِیاں نُوں پر نِریاں کاہِناں نُوں کھانِیاں روا سن۔

⁵یا تُسی توریت وِچ نئیں پڑھیا پئی کاہِن سبت دے دِن ہیکل دے وِچ سبت نُوں توڑ دیندے نیں۔

⁶تے بے دوسے رہندے نیں۔ پر مَیں تُہانوں آکھنا آں پئی ہیکل نالوں ایتھے اِک وَڈا اے۔

⁷تے جیکر تُسی سمجھدے پئی ایہہ کِیہ گلّ اے۔ پئی ”مَیں قُربانی نُوں نئیں چاہندا پر رَحم نُوں چاہناں آں۔“ تے تُسی بے گُناہِیاں اُتّے الزام نا لاندے۔

⁸کیوں جو اِبنِ آدم سبت دا خُداوند اے۔

⁹تے اُتّوں ٹُرکے اوہ اوہناں دے عبادت خانے وِچ گیا۔

¹⁰تے ویکھو اِک بندہ سی جِہدا ہتّھ سُکّیا ہویا سی۔ تے اوہناں ایس مطلب نال پئی اوہدے اُتّے عیب لان ایہہ آکھ کے اوہدے کولوں پُچھیا۔ سبت دے دِن بندے نُوں چَنگا کرنا روا اے؟

¹¹تے اوس اوہناں نُوں آکھیا پئی تُہاڈے وِچوں کیہڑا بندہ اے جِہدے کول اِک بھیڈ ہوئے تے اوہ سبت دے دِن ٹوئے وِچ ڈِگّ پَوے۔ اوہ اوہنوں پَھڑکے نا کڈھے گا؟

¹²سو بندہ بھیڈ نالوں کِنّاں وَدّھ چَنگا اے۔ ایس لئی سبت دے دِن بھلا کرنا روا اے۔

¹³تَد اوہ اوس بندے نُوں آکھن لگّا اپنا ہتّھ وَدّھا۔ تے اوس وَدھایا تے اوہ دُوجے وانگر فیر چَنگا ہوگیا۔

¹⁴تَد فرِیسیاں باہر جا کے اوہدے خلاف صلاح کِیتی پئی اوہنوں کِس طرح مار سُٹّیئے۔

¹⁵تے یِسُوع ایہہ سمجھ کے اوتھوں ٹُر گیا۔ تے بتھیرے لوک اوہدے مگر ٹُر پئے۔ تے اوس اوہناں سبھناں نُوں ولّ کِیتا۔

¹⁶تے اوس اوہناں نُوں تاکِید کِیتی پئی مَینُوں مشہُور نا کرنا۔

¹⁷تاں جو اوہ گلّ جیہڑی یسعیاہ نبی دی راہِیں آکھی گئی سی پُوری ہوئے۔

¹⁸پئی ویکھو میرا بندہ جِہنُوں مَیں چُنیا۔ میرا پیارا جِہدے توں میرا جی خُوش اے مَیں اپنا رُوح اوہدے اُتّے رکھاں گا تے اوہ غیر قوماں نُوں نیاں دی خبر کرے گا۔

¹⁹اوہ نا جھگڑا کرے گا۔ تے نا اُچّی بولے گا تے نا کوئی اوہدی اواز چَونکاں وِچ سُنے گا۔

²⁰مِدّھے ہوئے کانے نُوں اوہ نئیں بھنّے گا۔ تے دُھکھدی ہوئی سن نُوں نئیں بُجھائے گا۔ جد تِیکر اوہ نیاں دی فتح نا کرا دیوے۔

²¹تے اوہدے ناں اُتّے غیر قوماں آسرا رکھن گِئیاں۔

²²تَد اِک بدرُوح والا بندہ جیہڑا اَنھا تے گُونگا سی اوہدے کول لیاندا گیا۔ تے اوس اوہنوں چَنگا کِیتا تے اوہ گُونگا بولن تے ویکھن لگ پیا۔

²³تے ساریاں لوکاں تعجُّب کر کے آکھیا! ایہہ داؤد دا پُتر نئیں؟

²⁴پر فرِیسیاں سُن کے آکھیا۔ ایہہ بدرُوحاں نُوں نئیں کڈھدا پر بدرُوحاں دے سردار بَعلزبُول دی مدد نال۔

²⁵تے اوس اوہناں دیاں خیالاں نُوں بُجھ کے اوہناں نُوں آکھیا ہر اِک راج جِہدے وِچ پُھٹ پَے جاوے سو اُجّڑ جاندا اے۔ تے ہر اِک شہر یا گھر جِہدے وِچ پُھٹ پَے جاوے اوہ قیم نئیں رہے گا۔

²⁶تے جے شیطان شیطان نُوں کڈھدا اے تے اوہدے اپنے آپ وِچ ای پُھٹ پئی اے فیر اوہدا راج کِیویں قیم رہے گا۔

²⁷تے جے مَیں بَعلزبُول دی مدد نال بدرُوحاں نُوں کڈھناں آں۔ تے تُہاڈے پُتر کِہدی مدد نال کڈھدے نیں؟ بس اوہی تُہاڈی مُنصفی کرن گے۔

²⁸پر جے مَیں خُدا دے رُوح نال بدرُوحاں نُوں کڈھناں آں۔ تے خُدا دی بادشاہی بے شک تُہاڈے کول آ پہنچی اے۔

²⁹یا کوئی کِسے زوراور بندے دے گھر وِچ کِس طرح اندر وڑ کے اوہدا مال لُٹ سکدا اے۔ جے پہلاں اوہ اوس زوراور نُوں بَنّھ نا لَئے۔ تے تَد اوہدا گھر لُٹّے گا۔

³⁰جیہڑا میرے نال نئیں میرے برخلاف اے تے جیہڑا میرے نال اکٹّھا نئیں کر دا سو کھِلار دا اے۔

³¹ایس لئی مَیں تُہانوں آکھنا آں پئی ہر اِک گُناہ تے کُفر بندیاں نُوں بخشیا جائے گا پر اوہ کُفر جیہڑا رُوح دے حق وِچ ہوئے بخشیا نا جائے گا۔

³²تے جیہڑا کوئی اِبنِ آدم دے برخلاف کوئی گلّ کرے اوہ اوہنوں بخشیا جائے گا۔ پر جیہڑا پاک رُوح دے برخلاف بولے اوہنوں بخشیا نا جائے گا۔ نا ایس جہان وِچ نا اگلے جہان وِچ۔

³³یا تے رُکھّ چَنگا بناؤ تے اوہدے پَھل نُوں وی چَنگا۔ یا رُکھّ ماڑا بناؤ تے اوہدے پَھل نُوں وی ماڑا۔ کیوں جو رُکھّ اپنے پَھل توں پِچھانیا جاندا اے۔

³⁴سپّاں دے بچّیو تُسی بُرے ہو کے کِس طرح چَنگیاں گلّاں کر سکدے ہو؟ کیوں جو جیہڑا مَن وِچ بھریا ہویا اے مُنھ اُتّے آؤندا اے۔

³⁵کھرا بندہ اپنے کھرے خزانے وِچوں کھرِیاں گلّاں کڈھدا اے۔ تے بُرا بندہ بُرے خزانے وِچوں بُریاں گلّاں کڈھ دا اے۔

³⁶پر مَیں تُہانوں آکھنا آں پئی ہر اِک وادھی گلّ جیہڑی لوکی بولن گے عدالت دے دِن اوہ اوہدا حِساب دین گے۔

³⁷کیوں جو تُوں اپنیاں گلّاں توں سَچّا تے اپنیاں گلّاں توں مُجرم ٹھیرایا جائیں گا۔

³⁸تَد بعضیاں فقِیہاں تے فرِیسیاں اوہنوں جواب دے کے آکھیا اَے اُستاد اسی تَیتھوں کوئی نِشان ویکھنا چاہنے آں۔

³⁹پر اوس اوہناں نُوں جواب دِتّا پئی بُرے تے زناکار لوک نِشان لبّھدے نیں۔ پر اوہناں نُوں کوئی نِشان دِتّا نا جاوے گا۔ بِناں یُوناہ نبی دے نِشان دے۔

⁴⁰کیوں جو جیویں یُوناہ تِنّ رات دِن مچّھی دے ڈِھڈ وِچ رہیا اوسے طرح اِبنِ آدم تِنّ رات دِن زمین دے اندر رہے گا۔

⁴¹نِینوہ دے لوک عدالت وِچ ایس زمانے دے لوکاں نال اُٹھن گے تے ایہناں نُوں مُجرم ٹھہران گے کیوں جو اوہناں یُوناہ دی منادی سُن کے تَوبہ کر لئی۔ تے ویکھو یُوناہ نالوں ایتھے اِک وَڈا اے۔

⁴²دَکھّن دی رانی ایس زمانے دیاں لوکاں نال عدالت دے دِن اُٹھے گی۔ تے اوہناں نُوں مُجرم ٹھیرائے گی۔ کیوں جو اوہ تے سُلیمان دی دانائی سُنن لئی زمین دِیاں حداں توں آئی۔ تے ویکھو ایتھے سُلیمان نالوں وی اِک وَڈا اے۔

⁴³پلِیت رُوح جد بندیوں باہر نِکل گئی ہوئے تے سُکّیاں تھانواں وِچ آرام لَبھّدی پِھردی اے۔ پر نئیں پاندی۔

⁴⁴تَد آکھدی اے مَیں اپنے گھر نُوں جِتّھوں نِکلی ساں مُڑ جاواں گی۔ تے آ کے اوہنوں ویہلا تے جھاڑیا سنواریا ہویا ویکھدی اے۔

⁴⁵تَد اوہ جاندی اے تے ہور سَتّ رُوحاں اپنے نالوں بُریاں نال لیاؤندی اے تے اوہ وِچ وڑ کے اوتھے وسدِیاں نیں۔ تے اوس شخص دا پِچّھلا حال پہلے نالوں بَھیڑا ہو جاندا اے۔ ایس بُرے زمانے دے لوکاں دا وی ایہو جِہیا حال ہوئے گا۔

⁴⁶اجے اوہ لوکاں نال گلّاں پیا کر دا سی تے ویکھو اوہدی ماں تے بھرا باہر کھلوتے ہوئے اوہدے نال گلّ کرنی چاہندے سن۔

⁴⁷تے کِسے اوہنوں آکھیا ویکھ تیری ماں تے تیرے بھرا باہر کھلوتے ہوئے نیں تے تیرے نال گلّ کرنی چاہندے نیں۔

⁴⁸پر اوس دسن والے نُوں جواب دِتّا کون اے میری ماں تے کون نیں میرے بھرا۔

⁴⁹تے اپنے شاگِرداں ولّ اپنا ہتّھ کر کے آکھیا ویکھو میری ماں تے میرے بھرا۔

⁵⁰کیوں جو جیہڑا کوئی میرے باپ دی جیہڑا اسماناں وِچ اے مرضی نُوں پُورا کر دا اے اوہو اے میرا بھرا تے بھین تے ماں۔