Read Western Panjabi متّی 15 Bible Online

متّی 15 - Western Panjabi bible

متّی 15

¹تَد فریسی تے فقِیہ یِسُوع کول یرُوشلیِموں آ کے آکھن لگّے۔

²تیرے شاگِرد وڈّیاں دی رِیت رِوایت نُوں کاہِنُوں ٹال دیندے نیں؟ پئی روٹی کھان دے ویلے ہتّھ نئیں دھوندے۔

³اوس اوہناں نُوں جواب دِتّا۔ تُسی وی کاہِنُوں اپنی رِیت رِوایت دے سبّب خُدا دے حُکم نُوں ٹال دیندے اوہ۔

⁴کیوں جو خُدا حُکم دے کے آکھیا پئی ماں پئیو دی عِزّت کر۔ تے جیہڑا پئیو یا ماں نُوں مَندا بولے اوہ جانوں ماریا جاوے۔

⁵پر تُسی آکھدے ہو پئی جیہڑا کوئی پئیو یا ماں نُوں آکھے پئی جو کُجھ مَیتھوں تینُوں فائدہ سی سو خُدا دی نذر ہوگیا۔

⁶اوہ بے شک اپنے باپ دی عِزّت نا کرے۔ ایس لئی تُساں اپنی رِیت رِوایت دے سبّب خُدا دے کلام نُوں رَدّ کِیتا۔

⁷مکّارو! یسعیاہ تُہاڈے حق وِچ کنّی چنگی نبُوّت کِیتی۔

⁸پئی ایہہ لوک بُلّاں نال میری عِزّت کر دے نیں پر اوہناں دا دِل مَیتھوں دُور اے۔

⁹اوہ بے فائدہ میری عبادت کر دے نیں جیہڑے بندیاں دیاں حُکماں دی تعلِیم دیندے نیں۔

¹⁰تے اوس لوکاں نُوں کول سَدّ کے اوہناں نُوں آکھیا۔ گلّ سُنو۔ تے سمجھو۔

¹¹جیہڑی شے مُنھ وِچ جاندی اے بندے نُوں پلِیت نئیں کر دی۔ پر اوہ جیہڑی مُنھوں باہر آؤندی اے اوہو ای بندے نُوں پلِیت کر دی اے۔

¹²تَد اوہدے شاگِرد نیڑے آ کے اوہنوں آکھن لگّے تینُوں پتا اے پئی فرِیسیاں نیں ایہہ گلّ سُن کے ٹھوکر کھادِی اے؟

¹³اوس جواب دِتّا پئی ہر اِک بُوٹا جیہڑا میرے اسمانی باپ نئیں لایا سو جڑاں سَنے پُٹیا جائے گا۔

¹⁴اوہناں نُوں جان دیو۔ اوہ تے اَنھیاں دے اَنھے راہ دسن والے نیں۔ تے جے اَنھا اَنھے نُوں راہ دسے تے دونویں ٹوئے وِچ ڈِگّ پَین گے۔

¹⁵تے پطرس اگّوں اوہنوں آکھیا سانُوں ایس تمثِیل دا مطلب دس۔

¹⁶اوس آکھیا بھلا تُسی وی اجے انجان ہو؟

¹⁷تُہانوں ایہہ معلُوم نئیں پئی سبھ کُجھ جو مُنھ وِچ جاندا اے سو ڈِھڈ وِچ پَیندا تے رُوڑی اُتّے سُٹّیا جاندا اے؟

¹⁸پر جیہڑیاں گلّاں مُنھوں باہر آؤندیاں نیں سو دِل وِچوں نِکل دِیاں نیں۔ تے اوہ ای بندے نُوں پلِیت کر دیاں نیں۔

¹⁹کیوں جو بُرے خیال۔ خُون۔ زناکارِیاں۔ حرامکاریاں۔ چوریاں۔ جُھوٹھی گواہِیاں۔ کُفر۔ دِلوں ای نِکل دے نیں۔

²⁰ایہو کمّ بندے نُوں پلِیت کر دے نیں پر اَن دھوتی ہتّھِیں روٹی کھانی بندے نُوں پلِیت نئیں کر دی۔

²¹تے یِسُوع اوتھوں ٹُر کے صُور تے صَیدا دے علاقے وِچ گیا۔

²²تے ویکھو اِک کِنعانی عورت اوس پاسے ولّوں آ کے چچلا کے آکھن لگّی پئی اَے خُداوند داؤد دے پُتر میرے اُتّے رَحم کر۔ میری دِھی دا بھوت چمبڑن دے سبّب بُرا حال اے۔

²³پر اوس اوہنوں کُجھ جواب نا دِتّا۔ تَد اوہدے شاگِرداں نیں اوہدے کول آ کے عرض کِیتی پئی اوہنوں وِداع کر کیوں جو اوہ ساڈے مگر کُرلاؤندی اے۔

²⁴پر اوس جواب دِتّا۔ مَیں اِسرائیل دے گھر دِیاں گواچائیاں ہویاں بھیڈاں دے باہجوں ہور کِسے ولّ نئیں گھلّیا گیا۔

²⁵پر اوہ آئی تے اوہدے اگّے سجدہ کر کے آکھیا۔ خُداوند میری مدد کر۔

²⁶تَد اوس جواب دِتّا بچّیاں دی روٹی لے کے کُتّیاں اگّے سُٹّنی چنگی نئیں۔

²⁷اوس آکھیا ہاں خُداوند پر کُتّے وی اپنے مالکاں دے میز توں ڈِگّے ہوئے بھورے بھارے کھالَیندے نیں۔

²⁸تَد یِسُوع اوہنوں جواب دِتّا۔ اَے بی بی تیرا اِیمان بڑا اے جو جیویں تُوں چاہنی ایں تیرے لئی تویں ای ہوئے۔ اوسے گھڑی اوہدی دِھی چنگی بھلی ہوگئی۔

²⁹فیر یِسُوع اوتھوں ٹُرکے گلِیل دے سمُندر دے نیڑے آیا۔ تے پہاڑ اُتّے چڑھ کے اوتھے بَہہ گیا۔

³⁰تے بتھیرے لوک لَنگیاں اَنھیاں گُونگیاں ٹُنڈیاں تے ہور بتھیریاں بِیماراں نُوں اپنے نال لے کے اوہدے کول آئے۔ تے اوہناں نُوں اوہدے پیراں کول سُٹّیا۔ تے اوس اوہناں نُوں چَنگا کِیتا۔

³¹ایتھوں توڑی پئی لوک ویکھ کے حَیران ہوگئے۔ پئی گُونگے بولدے نیں۔ ٹُنڈے چنگے ہوندے نیں۔ تے لنگے ٹُردے پِھردے نیں۔ تے اَنھے سُجاکھے ہو جاندے نیں۔ تے اوہناں اِسرائیل دے خُدا دی وڈیائی کِیتی۔

³²تَد یِسُوع اپنے شاگِرداں نُوں اپنے کول سَدّ کے آکھیا مَینُوں لوکاں اُتّے ترس آؤندا اے کیوں جو اوہ تِنّاں دِناں توں میرے نال نیں۔ تے اوہناں دے کول کھان نُوں کُجھ نئیں تے مَیں اوہناں نُوں بُھکھیاں ٹورنا نئیں چاہندا۔ کِتے اجیہا نا ہوئے پئی رہ وِچ ای ماندے پَے جان۔

³³تے شاگِرداں اوہنوں آکھیا۔ اُجاڑ وِچ اینِیاں روٹِیاں کِتّھوں سانُوں ہتّھ آؤن پئی ایڈی بِھیڑ نُوں رجایئے۔

³⁴تَد یِسُوع اوہناں نُوں آکھیا تُہاڈے کول کِنیاں روٹِیاں نیں؟ اوہناں آکھیا سَتّ نالے کُجھ نِکّیاں مچھّیاں۔

³⁵تے اوس لوکاں نُوں زمین اُتّے بیہن دا حُکم دِتّا۔

³⁶تے اوس اوہناں ستّاں روٹِیاں تے مچھّیاں نُوں لیا۔ تے شُکر کر کے توڑیاں۔ تے شاگِرداں نُوں دِتّیاں۔ تے شاگِرداں لوکاں نُوں۔

³⁷تے اوہناں سبھناں نیں کھادا تے رَجّ گئے۔ تے وَدھیاں ہویاں ٹُکّراں دے بھرے ہوئے سَتّ ٹوکرے چُکے۔

³⁸تے کھاون والے بِناں بُڈِّھیاں تے بالاں دے چار ہزار مرد سن۔

³⁹تے خلقت نُوں وِداع کر کے اوہ بیڑی اُتّے چڑھ گیا۔ تے مگدَن دے علاقے وِچ آیا۔