Read Western Panjabi متّی 17 Bible Online

متّی 17 - Western Panjabi bible

متّی 17

¹تے چھِئیاں دِناں پِچّھوں یِسُوع پطرس تے یعقُوب تے اوہدے بھرا یُوحنّا نُوں نال لیا۔ تے اوہناں نُوں اِک اُچّے پہاڑ اُتّے وکھری تھاں لے گیا۔

²تے اوہدا رُوپ اوہناں دے سامھنے بدل گیا۔ تے اوہدا مُنھ سُورج وانگُوں چمکیا۔ تے اوہدے کپڑے چانن وانگُوں چِٹّے ہوگئے۔

³تے ویکھو مُوسیٰ تے ایلیّاہ اوہدے نال گلّاں کر دے اوہناں نُوں وکھالی دِتّے۔

⁴تَد پطرس نیں یِسُوع نُوں آکھیا خُداوندا ساڈے لئی ایتھے رہنا چَنگا اے جے تُوں چاہیں تے مَیں تِنّ ڈیرے ایتھے بناواں۔ اِک تیرے لئی تے اِک مُوسیٰ لئی۔ تے اِک ایلیّاہ لئی۔

⁵اوہ تے اجے پیا بول دا ای سی تے ویکھو اِک نُورانی بدّل اوہناں اُتّے چھاں کِیتی۔ تے بدّل وِچوں اِک اواز ایہہ آکھدی آئی پئی ”ایہہ میرا پیارا پُتر اے جِس توں مَیں خُوش آں۔ اوہدی سُنو۔“

⁶تے شاگِرد ایہہ سُن کے مُنھدڑے مُنھ ڈِگّ پئے تے بُہت ڈر گئے۔

⁷تَد یِسُوع نیڑے آ کے اوہناں نُوں چُھوئیا تے آکھیا اُٹھو تے نا ڈرو۔

⁸اوہناں اپنیاں اَکھّیاں چُک کے ہور کِسے نُوں نئیں پر یِسُوع نُوں اکلّا ویکھیا۔

⁹جد اوہ پہاڑوں پئے اُتر دے سن یِسُوع اوہناں نُوں حُکم کِیتا پئی جد تِیکر اِبنِ آدم مُردیاں وِچوں جی نا اُٹھے۔ جو کُجھ تُساں ویکھیا اے اوہدا ذِکر کِسے اگّے نا کرنا۔

¹⁰تے اوہدے شاگِرداں نیں اوہنوں پُچھیا فیر فقِیہ کیوں آکھدے نیں پئی ایلیّاہ دا پہلاں آؤنا ضرُور اے؟

¹¹اوس جواب دِتّا ایلیّاہ تے ٹھیک آوے گا تے سبھ کُجھ فیر بحال کرے گا۔

¹²پر مَیں تُہانوں آکھنا آں پئی ایلیّاہ تے ہُن آوی گیا تے اوہناں اوہنوں نئیں سیانیاں۔ سگوں جو کُجھ دِل کِیتا سو اوہدے نال کِیتا۔ ایسے طرح اِبنِ آدم اوہناں دی ہتّھِیں دُکھ پاوے گا۔

¹³تَد شاگِرداں نیں سمجھیا پئی اوس ساڈے نال یُوحنّا بپتِسمہ دین والے دی گلّ کِیتی اے۔

¹⁴تے جد اوہ بِھیڑ دے کول اَپڑے اِک بندہ اوہدے کول آیا تے اوہدے اگّے گوڈے نواکے آکھن لگّا۔

¹⁵خُداوند۔ میرے پُتر اُتّے رَحم کر کیوں جو اوہنوں مِرگی پَیندی اے تے اوہنوں بڑی تکلیف ہوندی اے۔ اوہ تے بہتیری واری اَگ وِچ ڈِگّ پَیندا اے۔ تے پانی وِچ بہتیری واری۔

¹⁶تے مَیں تیرے شاگِرداں کول اوہنوں لیایا ساں پر اوہ اوہنوں چَنگا نئیں کر سکے۔

¹⁷تَد یِسُوع نے جواب دِتّا۔ اَے بے اِیمان اَڑبنگی نسل مَیں کدوں تِیکر تُہاڈے نال ہوواں گا مَیں کدوں تِیکر تُہاڈی برداشت کراں گا؟ اوہنوں ایتھے میرے کول لیاؤ۔

¹⁸تے یِسُوع اوہنوں جِھڑکیا۔ تے بدرُوح اوہدے وِچوں نِکل گئی۔ تے نوکر اوسے گھڑیوں چَنگا ہوگیا۔

¹⁹تَد شاگِرداں نیں یِسُوع کول وَکھریاں ہو کے آکھیا۔ اسی اوہنوں کیوں کڈھ نا سکے؟

²⁰تے اوس اوہناں نُوں آکھیا اپنے اِیمان دی کمزوری دے سبّب کیوں جو مَیں تُہانوں ٹھیک آکھنا آں پئی جے تُہاڈا اِیمان رائی دے دانے جِنّاں وی ہوئے تے تُسی ایس پہاڑ نُوں آکھو گے۔ ”ایدھروں ہَٹ کے اوتھے ٹُرجا“ تے اوہ ٹُر جائے گا۔ تے تُہاڈے اگّے کوئی کمّ اَنہونا نا ہوئے گا۔

²¹[پر ایہہ قِسم دُعا دے بِناں ہور کِسے طرح نئیں نِکل سکدی۔]

²²تے جد اوہ گلِیل وِچ رہندے سن یِسُوع اوہناں نُوں آکھیا اِبنِ آدم بندیاں دے حوالے کِیتا جائے گا۔

²³تے اوہ اوہنوں مار سُٹّن گے تے ترِیجے دِہاڑے اوہ اُٹھایا جائے گا۔ تَد اوہ بُہت اُداس ہوئے۔

²⁴تے جد اوہ کَفرنحُوم وِچ آئے۔ ادھا مِثقال لین والِیاں پطرس نُوں آکھیا۔ تُہاڈا اُستاد ادھا مِثقال نئیں دیندا؟

²⁵اوہ آکھن لگّا آہو دیندا اے تے جد اوہ گھر آیا یِسُوع اگّوں ای اوہنوں آکھیا شمعُون تُوں کِیہ سمجھنا ایں پئی دُنیا دے بادشاہ کِنّاں کولوں چُنگی یا محصُول لَیندے نیں؟ اپنیاں پُتراں کولوں یا پرایاں کولوں۔

²⁶جد اوس آکھیا پئی پرایاں کولوں۔ یِسُوع نیں اوہنوں آکھیا۔ فیر تے پُتر مُعاف ہوئے۔

²⁷پر ایس کر کے پئی ساڈے توں اوہناں نُوں ٹھوکر نا لگّے تُوں جا کے سمُندر وِچ کُنڈی سُٹ تے جیہڑی مچّھی پہلاں نِکلے تُوں پَھڑلَے۔ تے اوہدا مُنھ کھول تے تینُوں اِک مِثقال لَبھّے گا۔ اوہنوں لے کے میرے تے اپنے واسطے اوہناں نُوں دے۔