Read Western Panjabi متّی 2 Bible Online

متّی 2 - Western Panjabi bible

متّی 2

¹تے جد یِسُوع ہیرودیس بادشاہ دے ویلے یہُودیہ دے بَیت لحم وِچ جمّیا۔ تے ویکھو نجُومِیاں چڑھدے پاسیوں یرُوشلِیم وِچ آ کے آکھیا۔

²پئی یہُودِیاں دا بادشاہ جیہڑا جمّیا اے اوہ کِتّھے وے؟ کیوں جو اساں چڑھدے پاسے اوہدا تارا ویکھیا اے تے اوہنوں سجدہ کرن آئے آں۔

³ایہہ گلّ سُن کے ہیرودیس بادشاہ گھابر گیا۔ تے سارا یرُوشلِیم اوہدے نال۔

⁴تے اوس سارے سردار کاہِناں تے قوم دے فقِیہاں نُوں اکٹّھیاں کر کے اوہناں نُوں پُچھیا۔ پئی مسِیح کِتّھے جمّے گا؟

⁵اوہناں نیں اوہنوں آکھیا یہُودیہ دے بَیت لحم وِچ۔ کیوں جو پیغمبر دی راہِیں ایس طرح لِکھیا ہویا اے۔

⁶پئی اے بَیت لحم یہُوداہ دے دیس توں یہُوداہ دیاں سرداراں وِچوں کِسے طرح نِکّا نئیں کیوں جو تیرے وِچوں اِک سردار نِکلے گا جیہڑا میری قوم اِسرائیل دی راکھی کرے گا۔

⁷تَد ہیرودیس نجُومِیاں نُوں پڑدے نال سدّیا تے اوہناں کولوں ٹھیک پَتا لیا پئی تارا کدوں وکھالی دِتّا۔

⁸تے اوس اوہناں نُوں ایہہ آکھ کے بَیت لحم نُوں گھلّیا پئی جاؤ جا کے اوس بال دا چنگی طرح پتا کرو۔ تے جد تُسی اوہنوں لَبّھ لوؤ تَد مُڑ کے مَینُوں خبر دیو۔ تاں جو مَیں وی جا کے اوہنوں سجدہ کراں۔

⁹تے بادشاہ دی گلّ سُن کے اوہ ٹُرپَئے۔ تے ویکھو اوہ تارا جیہڑا اوہناں چڑھدے پاسے ویکھیا سی اوہناں دے اگّے اگّے ٹُر دا گیا تے جِتّھے اوہ بال سی اوس تھاں دے اُتّے جا کھلوتا۔

¹⁰تے تارے نُوں ویکھ کے اوہ بڑے خُوش ہوئے۔

¹¹تے اوہناں اوس گھر دے اندر جا کے بال نُوں اوہدی ماں مریم دے نال ویکھیا۔ تے پَیرِیں پَے کے اوہنوں سجدہ کِیتا۔ تے اپنیاں تھیلِیاں کھول کے سونا تے لوبان تے مُر اوہدی نذر کِیتا۔

¹²تے سُفنے وِچ خبر پا کے پئی ہیرودیس دے کول مُڑ نا جان۔ اوہ ہوری راہ اپنے دیس نُوں مُڑ گئے۔

¹³جد اوہ ٹُر گئے سن تے ویکھو خُداوند دے فرِشتے یُوسف نُوں سُفنے وِچ وکھالی دے کے آکھیا اُٹھ مُنڈے تے اوہدی ماں نُوں نال لے تے مِصر وِچ نَسّ جا۔ تے جِنّاں چِر مَیں تینُوں نا آکھاں اوتھے ای رہو کیوں جو ہیرودیس مُنڈے نُوں لَبھّے گا پئی اوہنوں مار سُٹّے۔

¹⁴تَد اوہ اُٹھ کے مُنڈے تے اوہدی ماں نُوں نال لے کے راتوں رات مِصر نُوں ٹُر پیا۔

¹⁵تے ہیرودیس دے مرن تِیکر اوتھے ای رہیا۔ تاں جو اوہ گلّ جیہڑی خُداوند پیغمبر دی راہِیں آکھی سی پُوری ہوئے۔ پئی مَیں اپنے پُتر نُوں مِصروں سدّیا۔

¹⁶جد ہیرودیس ویکھیا پئی نجُومِیاں میرے نال مخَول کِیتا اوہ بڑا غُصّے ہویا تے بندہ گھل کے ساریاں مُنڈیاں نُوں جیہڑے بَیت لحم تے اوہدے آلے دوالے وِچ سن دو ورھیاں دِیاں تے اودُوں نِکّیاں نُوں مروا سُٹّیا یعنی اوس ویلے دے حِساب دے سببّوں جیہڑا اوس نجُومِیاں کولوں پَکّی طرح پُچھیا ہویا سی۔

¹⁷تَد اوہ جو یِرمیاہ پیغمبر دی راہِیں آکھیا گیا سی پُورا ہویا۔ پئی۔

¹⁸رامہ وِچ اِک اواز سُنائی دیندی سی رون تے بڑے سیاپے دی۔ پئی راخِل اپنے بچّیاں نُوں روندی اے تے تسلّی نئیں چاہندی۔ کیوں جو اوہ ہَین نئیں۔

¹⁹جد ہیرودیس مر گیا تَد ویکھو خُداوند دے فرِشتے مِصر وِچ یُوسف نُوں سُفنے وِچ وکھالی دے کے آکھیا۔

²⁰اُٹھ مُنڈے نُوں تے اوہدی ماں نُوں نال لے کے اِسرائیل دے دیس وِچ جا۔ کیوں جو جیہڑے لوک مُنڈے دی جان دے وَیری سن اوہ مر گئے نیں۔

²¹تَد اوہ اُٹھیا تے مُنڈے تے اوہدی ماں نُوں نال لے کے اِسرائیل دے دیس وِچ آیا۔

²²پر جد سُنیا پئی اَرخلاؤس اپنے پئیو ہیرودیس دے تھاں یہُودیہ وِچ راج کر دا اے تَد اوتھے جان توں ڈریا پر سُفنے وِچ خبر پا کے گلِیل دے علاقے ولّ ٹُر پیا۔

²³تے ناصرۃ ناں اِک نگّر وِچ جا وسّیا۔ تاں جو اوہ جیہڑا پیغمبر آکھیا سی پُورا ہوئے پئی اوہ ناصری اکھوائے گا۔