Read Western Panjabi متّی 23 Bible Online

متّی 23 - Western Panjabi bible

متّی 23

¹تَد یِسُوع نے لوکاں نُوں تے اپنے شاگِرداں نُوں آکھیا۔

²پئی فقِیہ تے فریسی مُوسیٰ دی گدّی اُتّے بَیٹھے ہوئے نیں۔

³ایس لئی سبھ کُجھ جو اوہ تُہانوں آکھن تُسی عمل کرو تے مَنّو پر اوہناں جیہے کمّ نا کرو کیوں جو اوہ آکھدے نیں پر عمل نئیں کر دے۔

⁴ہاں اوہ بھاریاں پَنڈاں جیہڑیاں اَوکھیاں چُکیاں جاندِیاں نیں بَنّھ چھڈ دے نیں۔ تے بندیاں دے موڈھیاں اُتّے رکھدے نیں۔ پر آپ اوہ اپنی اُنگل نال اوہناں نُوں کھِس کانا نئیں چاہندے۔

⁵تے اوہ اپنے سارے کمّ لوکاں نُوں وکھان لئی کر دے نیں اوہ تے اپنے تعویذ چَوڑے تے اپنے چوغے دی جھالر وڈّی بناندے نیں۔

⁶تے مہمانِیاں وِچ اُچّے تھاں تے عبادت خانیاں وِچ اگلیاں کُرسِیاں چاہندے نیں۔

⁷تے بازاراں وِچ سلام لین تے لوکاں کولوں ربّی اکھوان دے بُھکھے نیں۔

⁸پر تُسی ربّی نا اکھواؤ۔ کیوں جو اِک ای تُہاڈا اُستاد اے تے تُسی سارے بھرا اوہ۔

⁹تے زمین اُتّے کِسے نُوں اپنا پئیو نا آکھو۔ کیوں جو اِک اے تُہاڈا باپ جیہڑا اسماناں اُتّے اے۔

¹⁰تے نا تُسی ہادی اکھواؤ کیوں جو اِک اے تُہاڈا ہادی یعنی مسِیح۔

¹¹پر جیہڑا تُہاڈے وِچوں وَڈا اے سو تُہاڈا خادم ہوئے گا۔

¹²تے جیہڑا کوئی اپنے آپ نُوں اُچیاں کرے گا سو نِیواں کِیتا جائے گا تے جیہڑا کوئی اپنے آپ نُوں نِیویاں کرے گا۔ سو اُچّا کِیتا جائے گا۔

¹³پر ہائے افسوس تُہاڈے اُتّے فقِیہو تے فرِیسیو مکّارو۔ ایس لئی پئی تُسی اسمان دی بادشاہی نُوں لوکاں اُتّے بند کر دے اوہ۔ تُسی تے نا آپ وِچ وڑدے تے نا وڑن والیاں نُوں وڑن دیندے اوہ۔

¹⁴[ہائے افسوس تُہاڈے اُتّے فقِیہو تے فرِیسیو مکّارو ایس لئی پئی تُسی بیوہ عَورتاں دے گھراں نُوں نِگل جاندے اوہ تے وکھالن لئی لمبی چَوڑی نماز پڑھدے اوہ۔ تُہانوں بُہتی سزا مِلے گی۔]

¹⁵پر ہائے افسوس تُہاڈے اُتّے فقِیہو تے فرِیسیو مکّارو ایس لئی پئی تُسی اِک بندے نُوں اپنے دین وِچ لے آؤن واسطے سمُندر تے زمین گاہ مار دے اوہ جد آگیا تے تُسی اوہنوں اپنے نالوں دُونا جہنّم دا پُتر بناندے اوہ۔

¹⁶پر ہائے افسوس تُہاڈے اُتّے اَنھے راہ دسن والیو جیہڑے آکھدے ہو پئی ”جے کوئی ہیکل دی سَونہہ چُکے تے کوئی گلّ نئیں پر جے کوئی ہیکل دے سونے دی سَونہہ چُکے تے پُوری کرنی پَوے گی۔“

¹⁷مُورکھو تے اَنھیو۔ وَڈا کیہڑا اے؟ سونا؟ کہ ہیکل جِس سونے نُوں پاک کِیتا اے؟

¹⁸”تے جے کوئی قُربان گاہ دی سَونہہ چُکے تے کوئی گلّ نئیں۔ پر جے کوئی اوس چڑھاوے دی جیہڑا اوہدے اُتّے اے سَونہہ چُکے تے اوہنوں پُوری کرنی پَوے گی۔“ اوہ اوہدا دین دار اے۔

¹⁹اَنھیو وَڈا کیہڑا اے چڑھاوا کہ قُربان گاہ جیہڑی چڑھاوے نُوں پاک کر دی اے؟

²⁰ایس لئی جیہڑا قُربان گاہ دی سَونہہ چُکدا اے۔ اوہ اوہدی تے نالے سارِیاں شیواں دی وی جیہڑیاں اوہدے اُتّے نیں سَونہہ چُکدا اے۔

²¹تے جیہڑا ہیکل دی سَونہہ چُکدا اے اوہ اوہدی تے نالے اوہدی وی جیہڑا ہیکل وِچ رہندا اے سَونہہ چُکدا اے۔

²²تے جیہڑا اسمان دی سَونہہ چُکدا اے۔ اوہ خُدا دے تخت دی تے اوہدے اُتّے بیہن والے دی وی سَونہہ چُکدا اے۔

²³ہائے افسوس تُہاڈے اُتّے فقِیہو تے فرِیسیو مکّارو ایس لئی پئی تُسی پُودنے تے سونف تے زِیرے دے اُتّے دَہ یکّی لاندے اوہ۔ پر شریعت دِیاں بھاریاں بھاریاں گلّاں نُوں یعنی عدالت تے رَحم تے اِیمان نُوں تُساں چھڈ دِتّا اے۔ چاہیدا سی پئی تُسی ایہناں نُوں کر دے تے اوہناں نُوں وی نا چھڈ دے۔

²⁴اَنھے راہ دسن والیو جیہڑے مچھر نُوں پُن کے کڈھ چھڈ دے ہو تے اُوٹھ نُوں لنگھا جاندے اوہ۔

²⁵ہائے افسوس تُہاڈے اُتّے فقِیہو تے فرِیسیو مکّارو۔ تُسی کٹورے تے تھالی نُوں باہروں صاف کر دے ہو پر اوہ اندروں لُٹ تے بدپرہیزی نال بھرے ہوئے نیں۔

²⁶اَے اَنھے فریسی پہلاں کٹورے تے تھالی دا اندر صاف کر تاں جو اوہ باہروں وی صاف ہو جاوے۔

²⁷ہائے افسوس تُہاڈے اُتّے فقِیہو تے فرِیسیو مکّارو۔ ایس لئی پئی تُسی چُونے گج قبراں وانگُوں ہو جیہڑیاں باہروں تے بڑیاں سوہنِیاں جاپدیاں نیں۔ پر اندروں مُردیاں دِیاں ہڈِّیاں نال تے ہر طرح دی پلِیتی نال بھریاں ہویاں نیں۔

²⁸ایسے طرح تُسی وی باہروں تے لوکاں نُوں نیک جاپدے اوہ۔ پر اندروں مکر تے بے دِینی نال بھرے ہوئے اوہ۔

²⁹ہائے افسوس تُہاڈے اُتّے فقِیہو تے فرِیسیو مکّارو۔ ایس لئی پئی تُسی نبیاں دِیاں قبراں بناندے ہو تے نیکاں دیاں مقبریاں نُوں سنوار دے اوہ۔

³⁰تے آکھدے ہو پئی جے اسی اپنے پئیو دادیاں دے دِناں وِچ ہوندے تے اسی اوہناں نال نبیاں دے خُون وِچ شریک نا ہوندے۔

³¹سو تُسی آپ اپنے اُتّے گواہ بن دے ہو پئی اسی اوہناں لوکاں دے پُتر آں جِنہاں نبیاں نُوں مار سُٹّیا۔

³²اپنے پئیو دادیاں دے پَیمانے نُوں بھر دیو۔

³³اَے سپّو۔ سپّاں دے بچّیو۔ تُسی جہنّم دی سزا توں کِس طرح بھجو گے؟

³⁴ایس کر کے ویکھو مَیں نبیاں تے داناواں تے فقِیہاں نُوں تُہاڈے کول گھلّنا آں۔ اوہناں وِچوں کئیاں نُوں تُسی مار سُٹّو گے تے صلِیب دیؤگے۔ تے کئیاں نُوں اپنے عبادت خانیاں وِچ کولڑے مارو گے تے شہروں شہر بھجا کے اَوکھیاں کرو گے۔

³⁵تاں جو نیکاں دا لہو جِنّاں زمین اُتّے وگایا گیا نیک ہابل دے لہو توں لے کے برکیاہ دے پُتر زکریاہ دے لہو تِیکر جِہنُوں تُساں ہیکل تے قُربان گاہ دے وِچکار مار دِتّا سی۔ سبھو تُہاڈے اُتّے آ جاوے۔

³⁶مَیں تُہانوں سَچ آکھنا آں ایہہ سبھ کُجھ ایس زمانے دے لوکاں اُتّے آوے گا۔

³⁷اَے یرُوشلِیم اَے یرُوشلِیم نبیاں نُوں مار سُٹّن والی تے اوہناں نُوں پتّھراؤ کرن والی جیہڑے تیرے کول گھلّے گئے سن۔ کِنی واری مَیں چاہندا ساں پئی تیرے بچّیاں نُوں اوسے طرح اکٹّھے کراں۔ جیویں کُکّڑی اپنے چُوچیاں نُوں کھنباں ہیٹھ اکٹّھے کر دی اے پر تُسی نئیں سو چاہندے۔

³⁸ویکھو تُہاڈا گھر تُہاڈے لئی اُجاڑ چھڈیا جاندا اے۔

³⁹کیوں جو مَیں تُہانوں آکھنا آں پئی ہُن توں تُسی مَینُوں فیر نا ویکھو گے جد توڑی ایہہ نا آکھو گے پئی دھنّ اے اوہ جیہڑا خُداوند دے ناں اُتّے آؤندا اے۔