Read Western Panjabi متّی 28 Bible Online

متّی 28 - Western Panjabi bible

متّی 28

¹سبت دے اخِیری ویلے۔ ہفتے دے پہلے دِن جدوں دِن چڑھن والا سی۔ تَد مریم مگدلِینی تے دُوجی مریم قبر نُوں ویکھن آئِیاں۔

²تے ویکھو اِک بڑا بُھچال آیا ایس لئی پئی خُداوند دا فرِشتہ اسمانوں اُتر کے نیڑے آیا۔ تے اوس پتّھر نُوں رِیہڑ کے اوہدے اُتّے بَہہ گیا۔

³اوہدی صُورت بِجلی جیہی سی تے اوہدی پوشاک برف جیہی چِٹّی سی۔

⁴تے اوہدے ڈر نال راکھے کنب گئے مُردیاں وانگُوں ہوگئے۔

⁵پر فرِشتے زنانِیاں نُوں اگّوں آکھیا۔ تُسی نا ڈرو۔ کیوں جو مَیں جاننا آں پئی تُسی یِسُوع نُوں جیہڑا صلِیب اُتّے چڑھایا گیا سی لَبّھ دِیاں اوہ۔

⁶اوہ ایتھے نئیں اے کیوں جو جیویں اوس آکھیا سی اوہ جی اُٹھیا اے آؤ اوہ جگہ ویکھو جِتّھے خُداوند پیا ہویا سی۔

⁷تے چھیتی جا کے اوہدے شاگِرداں نُوں آکھو۔ پئی اوہ مُردیاں وِچوں جی اُٹھیا اے تے ویکھو اوہ تُہاڈے اگّے گلِیل نُوں جاندا اے۔ اوہنوں تُسی اوتھے ویکھو گے لوؤ مَیں تُہانوں دس دِتّا۔

⁸تے اوہ ڈر تے بڑی خُوشی نال قبر کولوں چھیتی ٹُرگِئیاں تے اوہدے شاگِرداں نُوں خبر دین بھجیاں گِئیاں۔

⁹تے ویکھو یِسُوع اوہناں نُوں اگّوں ہو کے مِلیا تے آکھیا سلام۔ تے اوہناں اوہدے کول آ کے اوہدے پَیر پھڑے۔ تے اوہنوں سجدہ کِیتا۔

¹⁰تَد یِسُوع اوہناں نُوں آکھیا ڈرو نا۔ جاؤ میرے بھراواں نُوں آکھو پئی گلِیل نُوں جان تے اوہ اوتھے مَینُوں ویکھن گے۔

¹¹جد اوہ لگِیاں جاندِیاں سن ویکھو پہرے والیاں وِچوں کئیاں شہر وِچ جا کے سبھ کُجھ جو ہویا سی سردار کاہِناں نُوں دسیا۔

¹²تے اوہناں بزُرگاں نال اکٹّھ کر کے آپو وِچ صلاح کِیتی تے سپاہیاں نُوں بُہت سارا رُپیا دِتّا تے آکھیا۔

¹³تُساں ایہہ آکھنا پئی ساڈے سُتّیاں ہویاں اوہدے شاگِرد رات نُوں آئے تے اوہنوں چوری کڈھ کے لے گئے۔

¹⁴تے جے ایہہ گلّ حاکم دے کنّاں تِیکر اَپڑے گی۔ تے اسی اوہنوں منالاں گے۔ تے تُہاڈا فِکر لاہ دیاں گے۔

¹⁵تے اوہناں رُپئے لے کے اوہ ای کِیتا۔ جیویں اوہناں نُوں سکھایا گیا سی تے ایہہ گلّ یہُودِیاں وِچ مشہُور کِیتی گئی تے اَج تِیکر لگی آؤندی اے۔

¹⁶پر یارھاں شاگِرد گلِیل نُوں ٹُر گئے۔ اوس پہاڑ ولّ جِتّھے یِسُوع اوہناں نال ٹھہرایا ہویا سی۔

¹⁷تے اوہناں اوہنوں ویکھ کے سجدہ کِیتا۔ پر بعضیاں نیں شک کِیتا۔

¹⁸تے یِسُوع کول آ کے اوہناں دے نال گلّ کِیتی۔ تے آکھیا پئی اسمان وِچ تے زمین اُتّے سارا اختیار مَینُوں دِتّا گیا اے۔

¹⁹ایس کر کے تُسی جاؤ تے سارِیاں قوماں نُوں شاگِرد بناؤ۔ تے باپ تے پُتر تے پاک رُوح دے نال اُتّے اوہناں نُوں بپتِسمہ دیو۔

²⁰تے اوہناں نُوں سکھاؤ پئی اوہناں سارِیاں گلّاں دی پالنا کرن جِنہاں دا مَیں تُہانوں حُکم دِتّا سی۔ تے ویکھو دُنیا دے اخِیر تِیکر ہر ویلے مَیں تُہاڈے نال آں۔ آمِین۔