Read Western Panjabi متّی 3 Bible Online

متّی 3 - Western Panjabi bible

متّی 3

¹اونہی دِنیں یُوحنّا بپتِسمہ دین والا یہُودیہ دے بیابان وِچ آیا تے منادی کر کے۔

²آکھن لگّا تَوبہ کرو کیوں جو اسمان دی بادشاہی نیڑے آگئی اے۔

³کیوں جو ایہہ اوہی اے جِہدی یسعیاہ پیغمبر گلّ کِیتی سی پئی بیابان وِچ اِک ہوکا دین والے دی اواز آؤندی اے۔ پئی خُداوند دا راہ تیار کرو۔ اوہدے راہاں نُوں سِدّھیاں بناؤ۔

⁴تے یُوحنّا دے اپنے کپڑے اُوٹھ دی جَت دے سن۔ تے چَمّ دی پیٹی اوہدے لکّ دوالے سی تے اوہدی خُوراک مکڑی تے بیابان دا شہد سی۔

⁵تَد یرُوشلِیم تے سارا یہُودیہ تے یَردن دے سارے علاقہ دے لوک اوہدے کول ٹُر آئے۔

⁶تے اپنے گُناہاں دا اِقرار کر کے یَردن ندی وِچ اوہدے ہتھّوں بپتِسمہ لیا۔

⁷پر جد اوس ویکھیا پئی بتھیرے فریسی تے صدوقی میرے کول بپتِسمہ لین آوندے نیں تَد اوس اوہناں نُوں آکھیا سپّاں دے بچّیو! تُہانوں آؤن والے غضبوں بھجنا کِس دسیا؟

⁸تُسی تَوبہ جوگا پَھل لیاؤ

⁹تے اپنے دِلاں وِچ ایس گلّ دا خیال نا کرو پئی ابرہام ساڈا پئیو اے کیوں جو مَیں تُہانوں آکھنا آں پئی خُدا ایہناں پتّھراں وِچوں ابرہام دے لئی اولاد پَیدا کر سکدا اے۔

¹⁰پر ہُن رُکھّاں دی جڑ اُتّے کُہاڑا رکھیا ہویا اے سو جیہڑا جیہڑا رُکھّ ہَچھّا پَھل نئیں لیاؤندا اوہ وَڈّھیا جاندا تے اَگ وِچ سُٹّیا جاندا اے۔

¹¹مَیں تے تُہانوں تَوبہ دے واسطے پانی نال بپتِسمہ دینا آں۔ پر اوہ جیہڑا میرے پِچّھے آؤندا اے مَیتھوں زوراور اے۔ اوہدی جُتّی چُکن دے مَیں لائق نئیں آں۔ اوہ ای تُہانوں پاک رُوح تے اَگ نال بپتِسمہ دیوے گا۔

¹²اوہدا چھج اوہدے ہتّھ وِچ اے۔ تے اوہ اپنے کھلواڑے نُوں چنگی طرح صاف کرے گا۔ تے اپنی کنک نُوں کوٹھی وِچ جمع کرے گا پر تُوڑی نُوں اوس اَگ نال ساڑ دے گا۔ جیہڑی کدی نئیں بُجھدی۔

¹³تَد یِسُوع گلِیل توں یَردن دے کنڈھے یُوحنّا کول آیا پئی اوہدے ہتھّوں بپتِسمہ لَئے

¹⁴پر یُوحنّا اوہنوں ایہہ آکھ کے روکیا پئی مَینُوں تَیتھوں بپتِسمہ لین دی لوڑ اے تے تُوں میرے کول آیا ایں؟

¹⁵تے یِسُوع اوہنوں جواب دِتّا۔ حالی تے ہون دے کیوں جو سانُوں چاہیدا ایہہ پئی ایسے طرح ساری راست بازی نُوں پُورا کریئے۔ تَد اوس ہون دِتّا۔

¹⁶تے یِسُوع بپتِسمہ لے کے جھٹ پانیوں باہر نِکل آیا۔ تے ویکھو اسمان اوہدے لئی کُھل گیا تے اوس خُدا دے رُوح نُوں کبُوتر وانگُوں اُتر دیاں تے اپنے اُتّے آؤندیاں ویکھیا۔

¹⁷تے ویکھو اسماناں توں اِک اواز آئی پئی ایہہ میرا پیارا پُتر اے جِس توں مَیں بڑا خُوش آں۔