Read Western Panjabi مرقس 11 Bible Online

مرقس 11 - Western Panjabi bible

مرقس 11

¹تے جد یرُوشلِیم دے نیڑے زَیتُون دے پہاڑ کول بَیت فگے تے بَیت عَنِیاہ تِیکر پہنچے۔ تے اوس اپنے شاگِرداں وِچوں دو بندیاں نُوں گھلّیا۔

²تے اوہناں نُوں آکھیا۔ اوس پِنڈ نُوں جاؤ۔ جیہڑا تُہاڈے سامھنے اے تے اوہدے وِچ وڑدیاں سار اِک کھوتی دے بچّے نُوں بَدّھا ہویا تُسی ویکھو گے۔ جیہدے اُتّے کدی کوئی سوار نئیں ہویا۔ اوہنوں کھول لیاؤ۔

³تے جے کوئی تُہانوں آکھے۔ تُسی ایہہ کیوں کر دے ہو؟ تے آکھنا خُداوند نُوں ایہدی لوڑ اے۔ تے اوہ جھٹ پَٹ مُڑ اوہنوں ایتھے پرتا دے گا۔

⁴تے اوہ گئے۔ تے کھوتی دے بچّے نُوں باہر دروازے دے کول گلی وِچ بَدّھا ہویا ویکھیا تے اوہنوں کھولیا۔

⁵تے کئیاں اوہناں وِچوں جیہڑے اوتھے کھلوتے سن اوہناں نُوں آکھیا۔ تُسی کِیہ کر دے اوہ۔ پئی کھوتی دے بچّے نُوں کھول دے اوہ؟

⁶تے اوہناں جیہا یِسُوع آکھیا سی اوہناں نُوں آکھیا۔ تے اوہناں نیں اوہناں نُوں جان دِتّا۔

⁷تے اوہ اوس بچّے نُوں یِسُوع کول لے آئے۔ تے اپنے کپڑے اوہدے اُتّے پائے۔ تے اوہ اوہدے اُتّے چڑھ بَیٹھا۔

⁸تے بتھیریاں اپنے کپڑے راہ وِچ وچھائے تے ہورناں پَیلِیاں وِچوں پَتّر توڑ کے اوہناں دا فرش وچھا دِتّا۔

⁹تے اوہ جیہڑے اگّے اگّے جاندے تے مگر آوندے سن اُچّی اُچّی آکھدے سن۔ ہوشعنا۔ دھنّ اوہ جیہڑا خُدا دے ناں اُتّے آؤندا اے۔

¹⁰دھنّ ساڈے پئیو داؤد دی بادشاہی۔ جیہڑی آؤندی اے۔ اسماناں وِچ ہوشعنا۔

¹¹تے یرُوشلِیم اَپڑ کے ہیکل وِچ گیا۔ تے جد اوس چَواں پاسے سبھ کُجھ ویکھ لیا۔ تَد اوہ باراں نال بَیت عَنِیاہ نُوں گیا۔ ایس لئی اودُوں شام دا ویلا سی۔

¹²تے اگلے دِن جد اوہ بَیت عَنِیاہ توں باہر آئے تَد اوہنوں بُھکھ لگّی۔

¹³تے ہنجیر دا اِک رُکھّ پَتّراں نال لدّیاں ہویا دُوروں ویکھ کے گیا۔ پئی شاید اوہدے وِچوں کُجھ ہتّھ آوے۔ تے جد اوہدے نیڑے آیا تے پَتّراں دے بِناں اوہدے وِچ کُجھ نا لَبّھیا۔ کیوں جو ہنجیراں دی رُت نئیں سی۔

¹⁴تَد اوس آکھیا۔ تَیتھوں کوئی کَدے وی پَھل نا کھاوے۔ تے اوہدے شاگِرداں ایہہ گلّ سُنی۔

¹⁵فیر اوہ یرُوشلِیم وِچ آئے۔ تے اوہ ہیکل دے اندر جا کے اوہناں نُوں جیہڑے ہیکل وِچ ویچدے تے مُل لَیندے سن۔ باہر کڈھن لگّا۔ تے صرّافاں دے تختے تے کبُوتر ویچن والیاں دِیاں چَوکِیاں اُلٹا دِتّیاں۔

¹⁶تے کِسے نُوں ہیکل وِچوں دی بھانڈا لے کے لنگھن نا دِتّا۔

¹⁷تے تعلِیم دے کے اوہناں نُوں آکھیا۔ ایہہ نئیں لِکھیا اے۔ پئی میرا گھر سارِیاں قوماں دے لئی دُعا دا گھر اکھوائے گا؟ پر تُساں اوہنوں ڈاکُوؤاں دی کھوہ بنا دِتّا اے۔

¹⁸تے سردار کاہِن تے فقِیہ ایہہ سُن کے سوچ وِچ پئے۔ پئی اوہدا ناس کِیویں کریئے۔ کیوں جو اوہدے کولوں ڈردے سن۔ ایس لئی پئی سارے لوک اوہدی تعلِیم توں حَیران ہو گئے سن۔

¹⁹تے شام پَیاں اوہ شہروں باہر جاندا ہوندا سی۔

²⁰تے سویرے اوہناں اودھروں دی لنگھدیاں ہویاں ویکھیا۔ پئی ہنجیر دا رُکھّ جڑوں سُک گیا اے۔

²¹تے پطرس چیتا کر کے اوہنوں آکھیا۔ اَے ربّی۔ ویکھ ہنجیر دا رُکھّ جِہنُوں تُوں لعنت دِتّی سُک گیا اے۔

²²تے یِسُوع جواب دے کے اوہناں نُوں آکھیا خُدا اُتّے اِیمان لیاؤ۔

²³مَیں تُہانوں سَچ آکھنا آں پئی جو کوئی ایس پہاڑ نُوں آکھے پئی اُٹھ تے سمُندر وِچ جا پَو۔ تے اپنے مَن وِچ شک نا لیاوے۔ پر یقِین کرے۔ پئی جو کُجھ آکھنا آں اوہ ہوندا اے سو اوہدے لئی ہوئے گا۔

²⁴ایس لئی مَیں تُہانوں آکھنا آں۔ پئی دُعا منگدیاں سبھ کُجھ جو تُسی منگدے اوہ۔ یقِین کرو پئی اوہ تُہانوں لَبّھ گیا۔ تے تُہاڈے لئی ہو جائے گا۔

²⁵تے جد کدی تُسی کھلو کے دُعا منگدے اوہ۔ جیکر تُہاڈا کِسے اُتّے گِلہ ہوئے۔ اوہنوں مُعاف کرو۔ تاں جو تُہاڈا باپ وی جیہڑا اسماناں اُتّے اے تُہاڈے قصوراں نُوں مُعاف کرے۔

²⁶[تے جے تُسی مُعاف نا کرو گے تے تُہاڈا باپ وی جیہڑا اسماناں اُتّے اے مُعاف نا کرے گا۔]

²⁷تے اوہ فیر یرُوشلِیم وِچ آئے۔ تے جد اوہ ہیکل وِچ پِھردا سی۔ تَد سردار کاہِن تے فقِیہ تے بزُرگ اوہدے کول آئے۔

²⁸تے اوہنوں آکھن لگّے۔ پئی تُوں کیہڑے اختیار نال ایہہ کمّ کرنا ایں؟ یا کِس ایہہ کمّ کرن دا تینُوں اختیار دِتّا؟

²⁹یِسُوع اوہناں نُوں آکھیا۔ مَیں تُہاتھوں اِک گلّ پُچھنا آں تُسی مَینُوں جواب دیو۔ تے مَیں تُہانوں دساں گا۔ پئی کیہڑے اختیار نال ایہہ کمّ کرنا آں۔

³⁰یُوحنّا دا بپتِسمہ اسمان ولّوں سی یا بندیاں ولّوں؟ مَینُوں جواب دیو۔

³¹تے اوہناں آپو وِچ وچار کرے آکھیا۔ جے آکھئے اسمان ولّوں۔ تے اوہ آکھے گا فیر تُساں اوہدا یقِین کیوں نا کِیتا؟

³²پر جے آکھیئے پئی بندیاں ولّوں۔ تے اوہ لوکاں کولوں ڈر دے سن۔ ایس لئی پئی سبھے یُوحنّا نُوں سَچّی مُچّی نبی مَن دے سن۔

³³تے اوہناں یِسُوع نُوں جواب دِتّا۔ اسی نئیں جان دے۔ یِسُوع اوہناں نُوں آکھیا۔ مَیں وی تُہانوں نئیں دسدا۔ پئی کیہڑے اختیار نال مَیں ایہہ کمّ کرنا آں۔