Read Western Panjabi مرقس 15 Bible Online

مرقس 15 - Western Panjabi bible

مرقس 15

¹تے سویرے ای سردار کاہِناں نیں بزُرگاں تے فقِیہاں نُوں اپنے نال رَلا کے تے ساری مجلس نے صلاح کر کے یِسُوع نُوں بَدّھا۔ تے اوہنوں لے جا کے پِیلاطُس دے حوالے کِیتا۔

²تے پِیلاطُس اوہدے توں پُچھیا۔ یہُودِیاں دا بادشاہ تُوں ای ایں؟ اوس اوہنوں جواب دِتّا۔ تُوں آپے آکھ دِتّا اے۔

³تے سردار کاہِناں اوہدے اُتّے بُہت نالشاں کِیتیاں۔

⁴پِیلاطُس اوہنوں فیر پُچھیا پئی تُوں کُجھ جواب نئیں دیندا؟ ویکھ اوہ تیرے اُتّے کِنیاں نالشاں کر دے نیں۔

⁵پر یِسُوع فیر کُجھ جواب نا دِتّا۔ ایتھوں تِیکر پئی پِیلاطُس تعجُّب کِیتا۔

⁶تے اوہ عید اُتّے اِک قیدی جِہدے لئی اوہ عرض کرن۔ اوہناں دی خاطر چھڈ دا ہوندا سی۔

⁷تے برابّا ناں اِک بندہ قیدے پیا ہویا سی۔ اوہناں فسادِیاں دے نال جِنہاں فساد وِچ خُون کِیتا سی۔

⁸تے لوک نیڑے جا کے عرض کرن لگّے پئی دستُور دے سببّوں ساڈے لئی کر۔

⁹پِیلاطُس اوہناں نُوں جواب دِتّا۔ پئی تُسی چاہندے ہو پئی مَیں یہُودِیاں دے بادشاہ نُوں چھڈ دیاں؟

¹⁰کیوں جو اوس معلُوم کِیتا پئی سردار کاہِناں کھار دے مارِیاں اوہنوں حوالے کِیتا سی۔

¹¹پر سردار کاہِناں لوکاں نُوں چُکیا پئی برابّا نُوں ای اوہناں دی خاطر چھڈ دیوے۔

¹²تَد پِیلاطُس مُڑ اوہناں نُوں آکھیا۔ فیر جِہنُوں تُسی یہُودِیاں دا بادشاہ آکھدے اوہ۔ اوہدے نال مَیں کِیہ کراں؟

¹³اوہ فیر اُچّی اُچّی آکھن لگّے اوہنوں صلِیب اُتّے چاڑھ۔

¹⁴پِیلاطُس اوہناں نُوں آکھیا کیوں۔ اوس کِیہ بُرائی کِیتی اے؟ پر اوہ ہور وی زور نال بولے اوہنوں صلِیب اُتّے چاڑھ۔

¹⁵تَد پِیلاطُس ایس اِرادے نال پئی لوکاں نُوں راضی کرے برابّا نُوں اوہناں دے لئی چھڈ دِتّا۔ تے یِسُوع نُوں کولڑے مروا کے حوالے کِیتا۔ پئی صلِیب اُتّے چاڑھیا جائے۔

¹⁶تے سپاہی اوس وَیڑے وِچ جیہڑا حاکم دی کچہری اے۔ اوہنوں لے گئے تے ساری ٹولی نُوں سَدّ کے اکٹّھا کِیتا۔

¹⁷تے اوہناں اوہنوں لال کپڑے پائے تے کنڈیاں دا تاج بنا کے اوہدے سِر اُتّے رکھیا۔

¹⁸تے اوہنوں سلام کرن لگّے۔ پئی یہُودِیاں دے بادشاہ سلام۔

¹⁹تے اوہ اوہدے سِر اُتّے کانے مار دے تے اوہدے اُتّے تُھکدے تے گوڈے نواکے اوہنوں مَتّھا ٹیکدے رہے۔

²⁰تے جد اوہدے نال ٹھٹّھے کر لَئے تے اوہدے توں لال کپڑے لاہ لَئے۔ تے اوہدے اپنے کپڑے اوہنوں پا دِتّے۔ تے اوہنوں صلِیب اُتّے چاڑھن لئی باہر لے گئے۔

²¹تے اوہناں سکندر تے رُوفس دے پئیو شمعُون ناں اِک کُرینی بندے نُوں جیہڑا پِنڈوں آؤندیاں اوتھوں دی پیا لنگھدا سی۔ بیگار پھڑیا۔ پئی اوہدی صلِیب چُک کے لے چلّے۔

²²تے اوہ اوہنوں اِک تھاں۔ گُلگُتا ناں جِہدا مطلب کھوپڑی دا تھاں اے۔ لے آئے۔

²³تے اوہنوں انگور دی رَس مُر نال مِلائی ہوئی دین لگّے۔ پر اوس نا لئی۔

²⁴تے اوہنوں صلِیب اُتّے چاڑھیا۔ تے اوہدے کپڑے ونڈن لئی گُنے پائے پئی کِنوں کِنوں مِلن۔

²⁵تے پہر دِن چڑھیا سی تے اوہناں اوہنوں صلِیب اُتّے چاڑھیا۔

²⁶تے اوہدا الزام اوہدے اُتّے ایہہ لِکھیا ہویا سی۔ یہُودِیاں دا بادشاہ۔

²⁷تے اوہناں اوہدے نال دو ڈاکُو اِک نُوں اوہدے سَجّے تے اِک نُوں اوہدے کھبّے ہتّھ صلِیب اُتّے چاڑھیا۔

²⁸[تدوں ایس مضمُون دا اوہ نوِشتہ کہ اوہ بدکاراں دے وِچ گِنیا گیا پُورا ہویا۔]

²⁹تے آؤن جان والیاں اوہنوں مِہنا ماریا۔ تے سِر ہلا کے آکھیا۔ واہ تُوں جیہڑا ہیکل نُوں ڈھانا تے تَرے دِناں وِچ بنانا ایں۔

³⁰اپنے آپ نُوں صلِیبوں اُتر کے بچا لے۔

³¹ایسے طرح سردار کاہِن وی آپو وِچ فقِیہاں نال مِل کے ٹھٹّھہ مار کے آکھن لگّے۔ ایس ہورناں نُوں بچایا۔ اپنے آپ نُوں نئیں بچا سکدا اے۔

³²اِسرائیل دا بادشاہ مسِیح ہُنے صلِیبوں ہیٹھاں اُتر آوے۔ تے اسی ویکھئے۔ تے اِیمان لیائے۔ تے جیہڑے اوہدے نال صلِیب اُتّے چاڑھے گئے اوہنوں مِہنے مار دے سن۔

³³تے دوپہر دے ویلے سارے دیس اُتّے ہنیرا ہوگیا۔ تے ترِیجے پَہر تِیکر رہیا۔

³⁴تے ترِیجے پَہر نُوں یِسُوع اُچّی اواز نال پُکاریا۔ اِلوہی اِلوہی۔ لما شبقتنی۔ جِہدا مطلب ایہہ اے۔ اے میرے خُدا۔ اے میرے خُدا! تُوں مَینُوں کیوں چھڈ دِتّا اے۔

³⁵تے کئی اوہناں وِچوں جیہڑے نیڑے کھلوتے سن۔ ایہہ سُن کے آکھن لگّے۔ ویکھو۔ اوہ ایلیّاہ نُوں اواز مار دا اے۔

³⁶تے کِسے دَوڑ کے اسپنج نُوں سر کے نال بھیوں کے اِک کانے نال بَدّھا۔ تے ایہہ آکھ کے اوہنوں چُپایا۔ پئی کھلو جاؤ ویکھئے ایلیّاہ اوہنوں اُتارن لئی آؤندا اے کہ نئیں۔

³⁷تَد یِسُوع اُچّی اواز نال دَم دے دِتّا۔

³⁸تے ہیکل دا پردہ اُتّوں لے کے ہیٹھاں تِیکر پاٹ گیا۔

³⁹تے اوس صُوبیدار جیہڑا اوہدے سامھنے کول کھلوتا سی جدوں ویکھیا پئی اوس ایویں دَم دِتّا۔ تے آکھیا۔ ٹھیک ایہہ خُدا دا ای پُتر سی۔

⁴⁰تے کئی عَورتاں دُوروں ویکھدِیاں سن۔ اوہناں وِچوں مریم مگدلِینی۔ تے نِکّے یعقُوب تے یوسیس دی ماں مریم تے سلومی سی۔

⁴¹جدوں اوہ گلِیل وِچ سی ایہہ اوہدے مگر ٹُردیاں تے سیوا کر دیاں ہوندیاں سن تے ہور وی بتھیریاں عَورتاں جیہڑیاں یرُوشلِیم نُوں اوہدے نال آئِیاں سن۔

⁴²تے جان لَوہڈا ویلا ہویا۔ ایس کر کے پئی اوہ تیاری دا دِن سی۔ جیہڑا سبت توں پہلے ہوندا اے۔

⁴³تے یُوسف ارِمَتِیاہ دا اِک عِزّت والا صلاحکار جیہڑا آپ وی خُدا دی بادشاہی دی اُڈِیک وِچ سی آیا۔ تے تگڑا ہو کے پِیلاطُس کول اندر گیا۔ تے یِسُوع دی لوتھ منگی۔

⁴⁴تے پِیلاطُس حَیران ہویا۔ پئی ایڈی چھیتی اوہ مر گیا اے۔ تے صُوبیدار نُوں سَدّ کے پُچھیا۔ اوہنوں مریاں کُجھ چِر ہوگیا؟

⁴⁵تے صُوبیدار کولوں معلُوم کر کے لوتھ یُوسف نُوں دَوا دِتّی۔

⁴⁶اوس مَلمَل دا کپڑا مُل لیا تے لوتھ نُوں اُتار کے مَلمَل وِچ وھلیٹ کے کفنایا۔ تے اِک قبر وِچ جیہڑی پتّھر وِچ کُھدوائی گئی سی اوہنوں دفنایا۔ تے قبر دے مُنھ اُتّے اِک پتّھر ریڑھ کے رکھ دِتّا۔

⁴⁷مریم مگدلِینی تے مریم یوسیس دی ماں اوس تھاں نُوں جِتّھے اوہ دفنایا گیا سی ویکھدِیاں سن۔