Read Western Panjabi مرقس 5 Bible Online

مرقس 5 - Western Panjabi bible

مرقس 5

¹تے اوہ سمُندر دے پار گراسِینیاں دے دیس وِچ اَپڑے۔

²تے جدوں اوہ بیڑی اُتّوں اُتریا۔ تے اونویں اِک بندہ جِہنُوں پلِیت رُوح چمبڑی ہوئی سی قبراں وِچوں نِکل کے اوہنوں آ مِلیا۔

³اوہ قبراں وِچ وَسدا سی۔ تے ہُن کوئی اوہنوں سنگلاں نال وی جکڑ نئیں سی سکدا۔

⁴کیوں جو اوہ کئی واری بیڑیاں تے سنگلاں نال جکڑیا گیا سی۔ تے اوس سنگلاں نُوں توڑ سُٹّیا۔ تے بیڑیاں نُوں ٹوٹے ٹوٹے کر دِتّا تے کوئی اوہنوں قابُو نئیں سی کر سکدا۔

⁵تے اوہ ہمیشہ دِن رات قبراں تے پہاڑاں وِچ چِیکاں مار دا تے اپنے آپ نُوں پتّھراں نال وَڈھدا ہوندا سی۔

⁶پر جیؤں اوس یِسُوع نُوں دُوروں ویکھیا تیؤں دَوڑیا۔ تے اوہنوں سجدہ کِیتا۔

⁷تے اُوچی اواز نال پُکار کے آکھیا میرا تیرا کِیہ لاگا؟ یِسُوع خُدا تعالیٰ دے پُتر۔ تینُوں خُدا دی سَونہہ دینا آں۔ مَینُوں دُکھ نا دے۔

⁸کیوں جو اوس اوہنوں آکھیا سی۔ اَے پلِیت رُوح ایس بندے وِچوں نِکل جا۔

⁹فیر اوس اوہنوں پُچھیا پئی تیرا کِیہ ناں اے؟ اوس اوہنوں آکھیا۔ میرا ناں لشکر اے۔ کیوں جو اسی بتھیرے آں۔

¹⁰تے اوس اوہدیاں بُہت مِنّتاں کِیتیاں پئی سانُوں ایس دیس وِچوں نا کڈھ۔

¹¹تے اوتھے پہاڑاں دے نیڑے سُؤراں دا اِک بڑا اِجّڑ چُگدا سی۔

¹²تے اوہناں اوہدی مِنّت کر کے آکھیا۔ پئی سانُوں سُؤراں دے وِچ گھل دے پئی اسی اوہناں دے وِچ جاوَڑیئے۔

¹³تے اوس اوہناں نُوں جان دِتّا۔ تے پلِیت رُوحاں نِکل کے سُؤراں وِچ وڑگیّاں۔ تے اِجّڑ کھڈ اُتّوں سِر توڑ بھج کے سمُندر وِچ جا ڈِگّیا۔ اوہ گنتری وِچ دو ہزار سن۔ تے اوہ سمُندر وِچ ڈُب موئے۔

¹⁴تے اوہناں دے چارن والیاں نَسّ کے شہر تے پِنڈاں وِچ خبر دِتّی۔ تے لوک ویکھن آئے۔ پئی کِیہ کِیہ ہویا۔

¹⁵تے یِسُوع دے کول آ کے اوس دِیوانے نُوں جِہدے وِچ بدرُوحاں دا لشکر سی۔ بَیٹھیاں۔ ہویاں تے کپڑے پایاں ہویاں۔ تے سُرت سمبھالیاں ہویاں ویکھیا۔ تے ڈر گئے۔

¹⁶تے جِنہاں ایہہ ویکھیا سی اوس دِیوانے دا حال تے سُؤراں دا حال دسیا۔

¹⁷تَد اوہ اوہدی مِنّت کرن لگّے پئی ساڈی حدّوں باہر چلیا جا۔

¹⁸تے جدوں اوہ بیڑی اُتّے چڑھن لگّا اوس جِہنُوں بدرُوحاں چمبڑیاں ہویاں سن۔ اوہدے نال رہن واسطے اوہدے اگّے عرض کِیتی۔

¹⁹تے اوس اوہنوں اجازت نا دِتّی پر اوہنوں آکھیا۔ پئی اپنے گھر اپنیاں کول جا۔ تے اوہناں نُوں دس۔ پئی خُداوند نے تیرے لئی کیڈے وڈّے کمّ کِیتے نیں۔ تے تیرے اُتّے دَیا کِیتی۔

²⁰تے اوہ ٹُرپیا تے دِکَپُلِس دے دیس وِچ منادی کرنی شُروع کِیتی۔ پئی یِسُوع اوہدے لئی کیڈے کمّ کِیتے۔ تے سارے لوک حَیران ہوئے۔

²¹تے جدوں یِسُوع بیڑی اُتّے فیر پار لنگھیا۔ تے وڈّی بِھیڑ اوہدے کول اکٹّھی ہوئی۔ تے اوہ سمُندر دے کنڈھے اُتّے سی۔

²²تے عبادت خانے دے سرداراں وِچوں یائِیر ناں اِک بندہ آیا تے اوہنوں ویکھ کے اوہدے پَیرِیں پیا۔

²³تے اوہدی بُہت مِنّت کِیتی۔ پئی میری نِکّی دِھی پئی مر دی اے چَل کے اوہدے اُتّے ہتّھ رکھ پئی اوہ چنگی ہوئے تے جیوندی رہے۔

²⁴تَد اوہ اوہدے نال گیا۔ تے بڑی بِھیڑ اوہدے مگر ٹُرپئی تے اوہدے اُتّے ڈِگّدی پئی سی۔

²⁵تے اِک زنانی جِہنُوں باراں ورھیاں توں لہو آؤندا سی۔

²⁶تے اوس بُہت حکیماں دے ہتھّوں بڑا دُکھ پایا۔ تے اپنا سارا مال خرچ کر دِتّا سی۔ پر کُجھ وی آرام نا پایا۔ سگوں اوہدا ہور وی ماڑا حال ہوگیا سی۔

²⁷اوہ یِسُوع دی خبر سُن کے بِھیڑ وِچ اوہدے پِچّھوں دی ہو کے آئی۔ تے اوہدا کپڑا چُھوئیا۔

²⁸کیوں جو اوہ آکھدی سی۔ پئی جے مَیں اوہدا کپڑا ای چُھو لَواں تے چنگی ہو جاواں گی۔

²⁹تے اونویں ای اوہدے لہو دا سُنب سُک گیا۔ تے اوس اپنے بدن توں معلُوم کر لیا۔ پئی مَیں ایس بلا توں چُھٹی۔

³⁰تَد یِسُوع نے اوسے ویلے اپنے وِچ جان کے پئی میرے وِچوں قُوّت نِکلی بِھیڑ ولّ مُڑ کے آکھیا۔ میرے کپڑیاں نُوں کِس چُھوئیا؟

³¹تے اوہدے شاگِرداں اوہنوں آکھیا۔ تُوں ویکھنا ایں۔ پئی بِھیڑ تینُوں دَباندی پئی اے فیر تُوں آکھنا ایں پئی مَینُوں کِس چُھوئیا؟

³²تَد اوس چَوفیرے نظر ماری پئی ایس کمّ دے کرن والی نُوں ویکھے۔

³³پر اوہ زنانی جدوں اوہنوں معلُوم ہویا پئی میرے اُتّے کِیہ گُذریا اے تے ڈردی تے کمبدی آئی تے اوہدے اگّے ڈِگّ پئی۔ تے ساری حِقیقت اوہنوں دس دِتّی۔

³⁴تے اوس اوہنوں آکھیا۔ دِھیے تیرے اِیمان نے تینُوں ولّ کِیتا اے سلامت ٹُر جا تے اپنی بلا توں بچی رہو۔

³⁵اوہ اجے بولدا ای سی پئی عبادت خانے دے سردار دے گھروں لوکاں آ کے آکھیا۔ تیری دِھی مر گئی۔ ہُن تُوں اُستاد نُوں کیوں ہور اَوکھیاں کرنا ایں؟

³⁶پر یِسُوع اوس گلّ دی جو اوہ آکھدے سن پرواہ نا کر کے عبادت خانے دے سردار نُوں آکھیا۔ نا ڈر صرف اِیمان رکھ۔

³⁷تے اوس بِناں پطرس۔ تے یعقُوب۔ تے یعقُوب دے بھرا یُوحنّا دے ہور کِسے نُوں اپنے نال نا آؤن دِتّا۔

³⁸جد اوہ عبادت خانے دے سردار دے گھر پہنچے تَد اوس رَولا پیا ہویا تے لوکاں نُوں روندے کُرلاؤندے ویکھیا۔

³⁹تے اندر جا کے اوہناں نُوں آکھیا پئی تُسی کاہدے لئی رَولا پاندے تے روندے ہو؟ کُڑی موئی نئیں پر سُتّی ہوئی اے۔

⁴⁰تے اوہ اوہدے اُتّے ہسّے پر اوہ سبھناں نُوں باہر کڈھ کے کُڑی دے پئیو تے اوہدی ماں تے اپنے ساتھِیاں نُوں نال لے کے جِتّھے کُڑی سی اوتھے اندر گیا۔

⁴¹تے اوس کُڑی دا ہتّھ پھڑ کے اوہنوں آکھیا تلیتا قُومی۔ جیہدے معنے ایہہ نیں۔ کُڑیئے مَیں تینُوں آکھنا آں اُٹھ۔

⁴²تے جھٹ کُڑی اُٹھ کھلوتی تے ٹُرن پِھرن لگ پئی۔ کیوں جو اوہ باراں ورھیاں دی سی۔ تَد اوہ اونویں بڑے ای حَیران ہوئے۔

⁴³تے اوس اوہناں نُوں بڑی تاکِید کِیتی پئی ایہہ گلّ کوئی نا جانے تے آکھیا۔ اوہنوں کُجھ کھان نُوں دیو۔