Read Western Panjabi مرقس 8 Bible Online

مرقس 8 - Western Panjabi bible

مرقس 8

¹اوہناں دِناں وِچ جدوں فیر وڈّی بِھیڑ اکٹّھی ہوگئی۔ تے اوہناں کول کھان نُوں کُجھ نئیں سی۔ تے اوس اپنے شاگِرداں نُوں کول سَدّ کے اوہناں نُوں آکھیا۔

²مَینُوں لوکاں اُتّے ترس آؤندا اے۔ کیوں جو ہُن تَرے دِن ہوئے نیں پئی اوہ میرے نال رہے نیں۔ تے اوہناں کول کُجھ کھان نُوں نئیں اے۔

³تے جے مَیں اوہناں نُوں بُھکھیاں گھر نُوں ٹوراں۔ تے راہ وِچ ای ماندے پَے جان گے۔ تے اوہناں وِچوں کئی دُوروں آئے ہوئے نیں۔

⁴تے اوہدے شاگِرداں اوہنوں جواب دِتّا پئی کِتّھوں ایس اُجاڑ وِچ کوئی ایہناں نُوں روٹی نال رَجّا سکے گا؟

⁵تے اوس اوہناں توں پُچھیا پئی تُہاڈے کول کِنیاں روٹِیاں نیں۔ اوہ آکھن لگّے سَتّ۔

⁶فیر اوس لوکاں نُوں حُکم کِیتا پئی زمین اُتّے بَہہ جان۔ تے اوس اوہی سَتّ روٹِیاں لئیاں تے شُکر کر کے توڑیاں تے اپنے شاگِرداں نُوں دِتّیاں۔ پئی اوہ اوہناں دے اگّے رکھن تے اوہناں نیں لوکاں دے اگّے رکھ دِتّیاں۔

⁷اوہناں دے کول تھوڑیاں جِہیاں نِکّیاں مچھّیاں سن۔ سو اوس اوہناں اُتّے برکت منگ کے آکھیا۔ پئی ایہہ وی اوہناں دے اگّے رکھو۔

⁸سو اوہناں کھادا تے رَجّ گئے۔ تے بچیاں ہویاں ٹُکّراں نال اوہناں سَتّ ٹوکرے بھرے ہوئے چُک لَئے۔

⁹تے اوہ چار کُو ہزار بندے سن۔ فیر اوس اوہناں نُوں ٹور دِتّا۔

¹⁰تے اوہ اپنے شاگِرداں دے نال اونویں بیڑی اُتّے چڑھ کے دَلَمنُوتہ دے دیس وِچ آیا۔

¹¹تے فریسی نِکلے تے اوہدے ازمان لئی اسمان ولّوں اوہدے توں نِشان منگ کے اوہدے نال جھگڑا کرن لگّے۔

¹²تے اوس اپنے دِلوں ہَوکا بھرکے آکھیا۔ ایس زمانے دے لوک کیوں نِشان منگدے نیں۔ مَیں تُہانوں سَچ آکھنا آں۔ پئی ایس زمانے دے لوکاں نُوں کوئی نِشان دِتّا نا جائے گا۔

¹³تے اوہناں نُوں چھڈ کے فیر بیڑی اُتّے چڑھیا۔ تے پار ٹُر گیا۔

¹⁴تے اوہ روٹی لینی بُھل گئے سن۔ تے بیڑی وِچ بِناں اِک روٹی دے اوہناں کول کُجھ نئیں سی۔

¹⁵تے اوس اوہناں نُوں آکھیا۔ پئی خبردار۔ فرِیسیاں دے خمیر توں۔ تے ہیرودیس دے خمیر توں ہُشیار رہو۔

¹⁶تَد اوہ آپو وِچ چَرچا کر کے آکھن لگّے۔ ساڈے کول روٹی جو نئیں اے۔

¹⁷یِسُوع ایہہ جان کے اوہناں نُوں آکھیا۔ تُسی کیوں چَرچا کر دے اوہ۔ پئی ساڈے کول روٹی نئیں؟

¹⁸تُسی اجے نئیں جان دے تے نا سمجھدے اوہ۔ تُہاڈا مَن سُنّ ہویا اے؟ اَکھّیاں ہوندیاں نئیں ویکھدے تے کنّ ہوندیاں نئیں سُندے؟ تے تُہانوں یاد نئیں؟

¹⁹جد مَیں پنج روٹِیاں پنج ہزار لئی توڑیاں تَد تُساں ٹُکّراں دِیاں کِنیاں ٹوکریاں بھریاں ہویاں چُکیاں؟ اوہناں اوہنوں آکھیا۔ باراں۔

²⁰تے جد سَتّ روٹِیاں چَوہاں ہزاراں لئی توڑیاں۔ تَد تُساں ٹُکّراں دے کِنے ٹوکرے بھر کے چُکے؟ اوہناں آکھیا۔ سَتّ۔

²¹تَد اوس اوہناں نُوں آکھیا۔ اجے تُہانوں سمجھ نئیں آؤندی؟

²²فیر اوہ بَیت صَیدا وِچ آئے۔ تے لوک اِک اَنھے نُوں اوہدے کول لیائے۔ تے اوہدی مِنّت کِیتی۔ پئی اوہنوں چُھوئے۔

²³تے اوہ اَنھے دا ہتّھ پھڑ کے اوہنوں پِنڈوں باہر لے گیا۔ تے اوہدیاں اَکھّیاں وِچ تُھک کے اوہدے اُتّے ہتّھ رکھیا۔ تے اوہنوں پُچھیا۔ پئی تینُوں کُجھ دِسدا اے؟

²⁴تے اوس نظر کر کے آکھیا۔ مَیں بندیاں نُوں ویکھنا آں پئی اوہ بُوٹیاں وانگُوں ٹُر دے ہوئے مَینُوں دِسدے نیں۔

²⁵تَد اوس فیر اوہدیاں اَکھّیاں اُتّے ہتّھ رکھّے تے اوس بنا کے ویکھیا۔ تے اوہ سُجاکھا ہوگیا۔ تے سبھ کُجھ صاف صاف ویکھن لگّا۔

²⁶تے اوس اوہنوں ایہہ آکھ کے اوہدے گھر نُوں گھل دِتّا۔ پئی تُوں پِنڈ وِچ وی نا وڑِیں۔

²⁷تَد یِسُوع تے اوہدے شاگِرد قَیصریہ فِلپّی دے پِنڈاں وِچ گئے۔ تے راہ وِچ اوس اپنے شاگِرداں کولوں ایہہ پُچھیا۔ پئی لوک کِیہ آکھدے نیں پئی مَیں کون آں؟

²⁸تے اوہناں اوہنوں آکھیا۔ یُوحنّا بپتِسمہ دین والا تے کئی ایلیّاہ تے کئی نبیاں وِچوں اِک۔

²⁹فیر اوس اوہناں نُوں پُچھیا۔ تُسی کِیہ آکھدے ہو پئی مَیں کون آں؟ پطرس نے اوہنوں جواب دے کے آکھیا۔ تُوں مسِیح ایں۔

³⁰تَد اوس اوہناں نُوں تاکِید کِیتی پئی میری ولّوں کِسے نُوں نا دسو۔

³¹فیر اوہ اوہناں نُوں سکھالن لگّا پئی ضرُور اے۔ پئی اِبنِ آدم بُہت دُکھ جھلّے۔ تے اوہ بزُرگاں تے سردار کاہِناں تے فقِیہاں توں رَدّ کِیتا جائے۔ تے جانوں ماریا جائے۔ تے تِنّاں دِناں پِچّھوں جی اُٹھے۔

³²تے اوس ایہہ گلّ کھول کے دسی تَد پطرس اوہنوں اِک پاسے لے جا کے اوہنوں جِھڑکن لگّا۔

³³پر اوس مُنھ پھیر لیا۔ تے اپنے شاگِرداں ولّ ویکھ کے پطرس نُوں جِھڑکیا۔ تے آکھیا۔ اَے شیطان میرے اگّوں دُراڈے ہو جا۔ کیوں جو تُوں خُدا دِیاں گلّاں دا نئیں پر بندیاں دِیاں گلّاں دا دھیان رکھنا ایں۔

³⁴تَد اوس بِھیڑ نُوں اپنے شاگِرداں سَنے کول سدّیا تے اوہناں نُوں آکھن لگّا پئی جے کوئی میرے پِچّھے آؤنا چاہے۔ اوہ اپنا اِنکار کرے تے اپنی صلِیب چُک کے میرے مگر ٹُر پئے۔

³⁵کیوں جو جیہڑا اپنی جان بچانی چاہے سو اوہنوں گوائے گا۔ پر جیہڑا میرے لئی تے اِنجِیل دے لئی اپنی جان گنواوے سو اوہنوں بچاوے گا۔

³⁶کیوں جو بندے نُوں کِیہ فائدہ ہوئے گا۔ جے ساری دُنیا نُوں کماوے تے اپنی جان دا نُقصان کرے۔

³⁷بندہ اپنی جان دے بدلے کِیہ دیوے؟

³⁸کیوں جو جیہڑا ایس زنا ایں تے گُنا ایں پِیڑھی دے وِچ مَیتھوں تے میرے کلام توں شرمائے گا۔ اِبنِ آدم وی اوہدے توں شرمائے گا۔ جِس ویلے اوہ اپنے باپ دے جلال نال پاک فرِشتیاں دے نال آوے گا۔