Read Western Panjabi مرقس 9 Bible Online

مرقس 9 - Western Panjabi bible

مرقس 9

¹تے اوس اوہناں نُوں آکھیا۔ مَیں تُہانوں سَچ آکھنا آں پئی بعضے جیہڑے ایتھے کھلوتے نیں۔ جد تِیکر خُدا دی بادشاہی نُوں قُدرت نال آیا نا ویکھن گے کدی مَوت دا سواد نا لین گے۔

²تے چِھیئاں دِناں پِچّھوں یِسُوع پطرس تے یعقُوب تے یُوحنّا نُوں نال لیا۔ تے اوہناں نُوں اِک اُچّے پہاڑ اُتّے وکھرا اکلّیاں لے گیا۔ تے اوہدا رُوپ اوہناں دے سامھنے بدل گیا۔

³تے اوہدے کپڑے لِشکن لگّے تے بڑے چِٹّے ہوگئے۔ اجیہے پئی دُنیا وِچ کوئی دھوبی ایہو جیہے چِٹّے نئیں کر سکدا۔

⁴تَد ایلیّاہ مُوسیٰ دے نال اوہناں نُوں وکھالی دِتّا۔ تے اوہ یِسُوع دے نال گلّاں کر دے سن۔

⁵تَد پطرس یِسُوع نُوں آکھیا۔ اَے ربّی ساڈا ایتھے رہنا چَنگا اے۔ تے اسی تَرے ڈیرے بنائیے۔ اِک تیرے لئی۔ تے اِک مُوسیٰ لئی۔ تے اِک ایلیّاہ دے لئی۔

⁶کیوں جو اوہ نئیں سی جان دا پئی اگّوں کِیہ جواب دے۔ کیوں جو اوہ وَاہوَا ڈر گئے سن۔

⁷تَد اِک بدّل آیا۔ تے اوہناں اُتّے چھاں کِیتی۔ تے بدّل وِچوں اِک اواز آئی۔ پئی ایہہ میرا پیارا پُتر اے۔ اوہدی سُنو۔

⁸تے اوسے ویلے اوہناں چَوفیرے دھیان کر کے بِناں اکلّے یِسُوع دے فیر ہور کِسے نُوں اپنے نال نا ویکھیا۔

⁹تے پہاڑوں اُتر دیاں اوس اوہناں نُوں حُکم کِیتا پئی جو کُجھ تُساں ویکھیا جد تِیکر اِبنِ آدم مُردیاں وِچوں جی نا اُٹھے۔ تَد تِیکر کِسے نُوں نا دسنا۔

¹⁰تے اوہناں ایس گلّ نُوں آپو وِچ رکھیا۔ تے اِک دُوجے نال چَرچا کر دے سن پئی مُردیاں وِچوں جی اُٹھنا کِیہ اے؟

¹¹تے اوہناں ایہہ اوہنوں پُچھیا پئی فقِیہ تے آکھدے نیں پئی پہلے ایلیّاہ دا آنا ضرُوری اے۔

¹²تے اوس اوہناں نُوں آکھیا۔ ایلیّاہ تے ٹھیک پہلاں آن کے سبھ کُجھ سُدھار دا اے۔ تے اِبنِ آدم دے حق وِچ کِیویں لِکھیا اے۔ پئی اوہ بڑا دُکھ جھلّے گا تے ناچیز سمجھیا جائے گا۔

¹³پر مَیں تُہانوں آکھنا آں۔ پئی ایلیّاہ آ وی گیا اے۔ تے نالے جیہا اوہدے حق وِچ لِکھیا گیا اے۔ اوہناں دا جو کُجھ دِل کِیتا سو ای اوہدے نال کِیتا۔

¹⁴تے جد شاگِرداں کول آئے تے اوہناں دے چَوفیرے بڑی بِھیڑ تے فقِیہاں نُوں اوہناں دے نال بحث کر دیاں ویکھیا۔

¹⁵تے اونویں ساری بِھیڑ اوہنوں ویکھ کے بڑی حَیران ہوئی۔ تے لوکاں نیں اوہدے ولّ دَوڑ کے اوہنوں سلام کِیتا۔

¹⁶تَد اوس اوہناں نُوں پُچھیا تُسی ایہناں نال کِیہ بحث کر دے ہو؟

¹⁷تے بِھیڑ وِچوں اِک نیں اوہنوں جواب دِتّا۔ اَے اُستاد۔ مَیں اپنے پُتر نُوں تیرے کول لیاندا اے۔ اوہنوں گونگی رُوح چمبڑی ہوئی اے۔

¹⁸تے اوہ جِتّھے کِتے اوہنوں پھڑ دی اے اوتھے ای پٹکا دیندی اے۔ تے اوہ جھگ چھڈ دا اے۔ تے دَند پِیہندا اے۔ تے سُکدا جاندا اے۔ تے مَیں تیرے شاگِرداں نُوں آکھیا سی پئی اوہ اوہنوں کڈھ دین۔ تے اوہ اوہنوں کڈھ نا سکے۔

¹⁹اوس جواب دے کے اوہناں نُوں آکھیا۔ اے بے اعتبار قوم؟ مَیں کد تِیک تُہاڈے نال رہاں گا؟ کد تِیکر تُہاڈی سہاں گا؟ اوہنوں میرے کول لیاؤ۔

²⁰تے اوہناں اوہنوں اوہدے کول لیاندا۔ تے جد اوس اوہنوں ویکھیا اونویں رُوح اوہنوں مروڑیا۔ تے اوہ زمین اُتّے ڈِگّا۔ تے جھگ چھڈ کے لیٹن لگّا۔

²¹تَد اوس اوہدے پئیو کولوں پُچھیا کِنے کُو چِر توں ایہدا ایہہ حال ہویا اے؟ اوس آکھیا۔ نِکّے ہوندیاں توں۔

²²تے اوس اوہنوں بہتیری واری ایہدا ناس کرن لئی اَگ وِچ تے پانی وِچ وی سُٹّیا۔ پر جے تُوں کُجھ کر سکنا ایں تے ساڈے اُتّے ترس کھا کے ساڈی مدد کر۔

²³یِسُوع اوہنوں آکھیا۔ جے تُوں کر سکنا ایں؟ اِیمان لیان والے لئی تے سبھ کُجھ ہوسکدا اے۔

²⁴اوس مُنڈے دے پئیو نے اونویں اُچّی اواز نال آکھیا۔ مَیں اِیمان لیاؤنا واں۔ میرے اِیمان دے گھاٹے دا علاج کر۔

²⁵جد یِسُوع نے ویکھیا پئی لوک بھج کے اکٹّھے ہوندے جاندے نیں۔ تَد اوس پلِیت رُوح نُوں جِھڑکیا۔ تے اوہنوں آکھیا۔ اَے گونگی بولی رُوح۔ مَیں تینُوں حُکم کرنا آں۔ ایہدے وِچوں باہر نِکل۔ تے اوہدے وِچ مُڑ کدی نا وڑِیں۔

²⁶اوہ چِیک مار کے تے اوہنوں بُہت مروڑ کے اوہدے وِچوں نِکل گئی۔ تے اوہ مُنڈا مُردے وانگُوں ہوگیا۔ ایتھوں تِیکر پئی بتھیریاں آکھیا اوہ مر گیا اے۔

²⁷تَد یِسُوع اوہدا ہتّھ پَھڑکے اوہنوں اُٹھا لیا۔ تے اوہ اُٹھ کھلوتا۔

²⁸تے جد اوہ گھر وِچ آیا۔ اوہدے شاگِرداں نیں وَکھ ہو کے اوہدے اگّے عرض کِیتی۔ پئی اسی اوہنوں کیوں نا کڈھ سکے۔

²⁹اوس اوہناں نُوں آکھیا۔ ایہہ قِسم دُعا بِناں کِسے ہور طرح نئیں نِکل سکدی۔

³⁰تے اوتھوں ٹُر کے اوہ گلِیل وِچوں دی لنگھ گئے۔ تے اوہ نئیں چاہندا سی پئی کِسے نُوں خبر ہوئے۔

³¹ایس لئی پئی اوہ اپنے شاگِرداں نُوں سِکھالدا۔ تے اوہناں نُوں آکھدا سی پئی اِبنِ آدم بندیاں دے ہتّھِیں پھڑوایا جاندا اے۔ تے اوہ اوہنوں مار سُٹّن گے تے مر جان توں تَرے دِن پِچّھوں اوہ فیر جی اُٹھے گا۔

³²پر اوہناں ایہہ گلّ نا سمجھی۔ تے اوہنوں پچُھّن لئی ڈر دے سن۔

³³تے اوہ کَفرنحُوم وِچ آئے تے جد اوہ گھر وِچ سی اوس اوہناں کولوں پُچھیا۔ پئی تُسی راہ وِچ کِیہ گلّ بات کر دے سو۔

³⁴پر اوہ چُپ ای رہے کیوں جو اوہناں وٹے اِک دُوجے نال ایہہ بحث کِیتی سی پئی وَڈا کیہڑا اے؟

³⁵تے اوس بَہہ کے اوہناں باراں نُوں سدّیا۔ تے اوہناں نُوں آکھیا۔ جے کوئی پہلا ہونا چاہے تے اوہ سبھناں توں پِچّھلا۔ تے ساریاں دا کاماں ہوئے۔

³⁶تے اوس اِک بال نُوں لے کے اوہناں دے وِچکار کھلھاریا؟ تے اوہنوں کُچھّڑ چُک کے اوہناں نُوں آکھیا۔

³⁷جو کوئی میرے ناں کر کے ایہو جیہے بالاں وِچوں اِک نُوں قبول کر دا اے۔ سو مَینُوں قبول کر دا اے۔ تاں جو کوئی مَینُوں قبول کر دا اے۔ سو مَینُوں نئیں پر اوہنوں جِس مَینُوں گھلّیا قبول کر دا اے۔

³⁸یُوحنّا اوہنوں آکھیا۔ اُستاد۔ اساں اِک نُوں تیرا ناں لے کے پلِیت رُوحاں نُوں کڈھدیاں ویکھیا۔ تے اساں اوہنوں منع کِیتا۔ کیوں جو اوہ ساڈے پیچھے نئیں سی ٹُر دا۔

³⁹پر یِسُوع آکھیا۔ اوہنوں نا منع کرو۔ کیوں جو اجیہا کوئی نئیں۔ جیہڑا میرا ناں لے کے کرامات وکھالے۔ تے مَینُوں چھیتی بُرا آکھ سکے۔

⁴⁰کیوں جو جیہڑا ساڈا مخالف نئیں سو ساڈے ولّ اے۔

⁴¹کیوں جو جیہڑا اِک کٹورا پانی تُہانوں پِیا دے ایس کر کے پئی تُسی مسِیح دے اوہ۔ مَیں تُہانوں سَچ آکھنا آں۔ پئی اوہ اپنا پَھل پائے بِناں کدی نا رہے گا۔

⁴²تے جے کوئی ایہناں نِکّیاں وِچوں جیہڑے میرے اُتّے اِیمان لیاؤندے نیں اِک نُوں ٹھوکر کھوائے۔ اوہدے لئی ایہہ چَنگا سی پئی چکّی دا پُڑ اوہدے گلّ وِچ پایا جاندا تے اوہ سمُندر وِچ سُٹّیا جاندا۔

⁴³تے جے تیرا ہتّھ تینُوں ٹھوکر کھوا وے اوہنوں وَڈّھ سُٹ۔ زِندگی وِچ ٹُنڈا ہو کے وڑنا ایہدے نالوں چَنگا اے۔ پئی دو ہتّھ ہوندیاں تُوں جہنّم دی اوس اَگ وِچ سُٹّیا جائیں جیہڑی بُجھدی نئیں۔

⁴⁴[جِتّھے اوہناں دا کِیڑا نئیں مر دا۔ تے اَگ نئیں بُجھدی۔]

⁴⁵تے جے تیرا پَیر تینُوں ٹھوکر کھوائے اوہنوں وَڈّھ سُٹ۔ زِندگی وِچ لَنگیاں ہو کے وڑنا تیرے لئی ایہدے نالوں چَنگا اے پئی دو پَیر ہوندیاں جہنّم وِچ سُٹّیا جائیں۔

⁴⁶[جِتّھے اوہناں دا کِیڑا نئیں مر دا۔ تے اَگ نئیں بُجھدی۔]

⁴⁷تے جے تیری اَکھ تینُوں ٹھوکر کھوائے۔ تے اوہنوں کڈھ سُٹ۔ خُدا دی بادشاہی وِچ کانیاں ہو کے وڑنا تیرے لئی ایہدے نالوں چَنگا اے پئی دو اَکھّیاں ہوندیاں جہنّم وِچ سُٹّیا جائیں۔

⁴⁸جِتّھے اوہناں دا کِیڑا نئیں مر دا۔ تے اَگ نئیں بُجھدی۔

⁴⁹کیوں جو ہر کوئی اَگ نال سلُونا کِیتا جائے گا [تے ہر اِک قُربانی لُون نال سلُونی کِیتی جائے گی۔]

⁵⁰لُون چنگی شے اے۔ پر جیکر لُون بے سوادا ہو جائے تے کاہدے نال اوہنوں مزیدار کرو گے؟ سو اپنے وِچ لُون رکھو تے آپو وِچ مِلے رہو۔