Read Western Panjabi لُوقا 15 Bible Online

لُوقا 15 - Western Panjabi bible

لُوقا 15

¹تَد سارے محصُولئے تے گُنہگار لوک اوہدی سُنن لئی اوہدے نیڑے آوندے سن۔

²تے فریسی تے فقِیہ بُڑبُڑ کر کے آکھن لگّے پئی ایہہ بندہ گُناہِیاں نُوں قبولدا تے اوہناں نال کھاندا اے۔

³تَد اوس اوہناں نُوں ایہہ تمثِیل سُنائی۔

⁴پئی تُہاڈے وِچوں کیہڑا بندہ اے۔ جِہدِیاں سَو بھیڈاں ہون تے اوہناں وِچوں اِک گواچ جائے۔ تے اوہ نڑنّویاں نُوں اُجاڑ وِچ چھڈ کے اوس گواچی ہوئی دے مگر نا جائے جد تِیکر نا لَبھّے۔

⁵تے لَبّھ کے خُوشی نال اپنے موڈھیاں اُتّے رکھ نا لَئے۔

⁶تے جد گھر اَپڑے دوستاں تے گوانڈِھیاں نُوں سَدّ کے اوہناں نُوں نا آکھے پئی میرے نال خُوشی کرو۔ کیوں جو مَیں اپنی گواچی ہوئی بھیڈ لَبّھی۔

⁷مَیں تُہانوں آکھنا آں۔ پئی ایسے طرح اسمان وِچ اِک تَوبہ کرن والے گُنہگار دے سبّب نڑنّویاں نیکاں نالوں جِنہاں نُوں تَوبہ دی لوڑ نئیں اے۔ وَدّھ خُوشی ہوئے گی۔

⁸یا کیہڑی زنانی اے جَدے کول دَس دِرم ہون جے اوہدے کولوں اِک گواچ جائے تے اوہ دِیوا بال کے گھر نُوں نا ہُونجے۔ تے کوشش نال لَبھّدی نا رہے جِنّاں چِکر اوہنوں لَبّھ نا لیئے؟

⁹تے جد لَبّھ لیئے سہیلیاں تے گوانڈِھیاں نُوں سَدّ کے نا آکھے پئی میرے نال خُوشی کرو۔ کیوں جو مَیں اپنا گواچیا دِرم لَبّھ لیا۔

¹⁰ایسے طرح مَیں تُہانوں آکھنا آں پئی خُدا دے فرِشتیاں دے اگّے اِک تَوبہ کرن والے گُنہگار دی بابت بُہت خُوشی ہوندی اے۔

¹¹فیر اوس آکھیا کِسے بندے دے دو پُتر سن۔

¹²اوہناں وِچوں نِکّے پئیو نُوں آکھیا۔ اَے ابّا! وِرثہ دا حِصّہ جیہڑا مَینُوں آؤندا اے۔ مَینُوں دے دے۔ اوس اپنا مال اوہناں نُوں ونڈ دِتّا۔

¹³تے تھوڑے دِناں پِچّھوں نِکّے پُتر سبھو کُجھ اکٹّھیاں کِیتا تے دُوردراڈے دیس ٹُرگیا۔ تے اوتھے اپنا مال بدچلنی وِچ اُڈا دِتّا۔

¹⁴تے جد اوہنے سارا خرچ کر لیا۔ تَد اوس دیس وِچ ڈاڈھا کال پیا۔ تے اوہنوں تُھڑ آؤن لگّی۔

¹⁵تَد اوس مُلک دے کِسے واسی دے کول جا رہیا۔ تے اوس اوہنوں اپنیاں پَیلِیاں وِچ سُؤر چارن گھلّیا۔

¹⁶تے اوہدا جی کر دا سی پئی مَیں اوہناں پَھلِیاں نال جیہڑیاں سُؤر کھاندے نیں اپنا ڈِھڈ بھراں تے کوئی اوہنوں کُجھ نئیں سی دیندا۔

¹⁷تَد اوس ہوش وِچ آ کے آکھیا میرے پئیو دے کئیاں مزدُوراں نُوں لوڑ توں وَدّھ روٹِیاں مِل دِیاں نیں تے مَیں ایتھے بُھکھا پیا مرنا۔

¹⁸مَیں اُٹھ کے اپنے پئیو کول جاواں گا۔ تے اوہنوں آکھاں گا۔ پئی اَے پئیو مَیں اسمان دا تے تیرا گُناہ کِیتا اے۔

¹⁹تے ہُن مَیں ایس گلّ جوگا وی نئیں۔ پئی فیر تیرا پُتر اکھواواں۔ مَینُوں اپنے مزدُوراں وِچوں اِک جِہیا بنا۔

²⁰تَد اُٹھ کے اوہ اپنے پئیو ولّ ٹُر پیا تے اوہ اجے دُراڈے ای سی۔ پئی اوہنوں ویکھ کے اوہدے پئیو نُوں ترس آیا۔ تے دَوڑ کے اوہنوں گل نال لایا تے مُنھ سِر چُمّیا۔

²¹پُتر اوہنوں آکھیا اَے پئیو مَیں اسمان دا تے تیرا گُناہ کِیتا اے۔ تے ہُن مَیں ایس گلّ جو گا وی نئیں رہیا پئی فیر تیرا پُتر اکھواواں۔

²²پئیو اپنے ٹہلِیاں نُوں آکھیا چنگے توں چنگے کپڑے چھیتی کڈھ لیاؤ۔ تے اوہنوں پاؤ۔ تے اوہدی ہتّھِیں چھاپ تے پَیرِیں جُتّی پاؤ۔

²³تے پلیا ہویا وَچّھا لیا کے حلال کرو پئی کھائیے تے خُوشی کریئے۔

²⁴کیوں جو میرا ایہہ پُتر مر گیا سی۔ سو جی پیا اے اوہ گواچ گیا سی ہُن لَبّھ گیا اے۔ تَد اوہ خُوشی کرن لگّے۔

²⁵تے اوہدا وَڈا پُتر باہر پَیلِیاں وِچ سی تے اوس گھر دے نیڑے آؤندیاں آؤندیاں گاؤن وجان تے نچّن دی اواز سُنی۔

²⁶تَد اِک نوکر نُوں سَدّ کے پُچھیا۔ پئی ایہہ کِیہ پیا ہوندا اے؟

²⁷اوس اوہنوں آکھیا پئی تیرا بھرا آیا اے تے تیرے پئیو پلے ہوئے وَچّھے نُوں حلال ایس لئی کِیتا اے۔ پئی اوہنوں بھلا چَنگا پایا۔

²⁸پر اوہ رُسّ پیا تے اندر جان نُوں راضی نا ہویا۔ تَد اوہدا پئیو باہر آ کے اوہنوں منان لگّا۔

²⁹اوس اپنے پئیو نُوں جواب دِتّا ویکھاں۔ اینے ورھیاں توں مَیں تیری سیوا کرنا واں کدی تیرے حُکموں باہر نئیں گیا پر تُوں کدی اِک لیلا وی مَینُوں نا دِتّا۔ پئی اپنے دوستاں نال خُوشی کراں۔

³⁰تے جِس ویلے تیرا ایہہ پُتر آیا۔ جِس تیرا مال کنجرِیاں دے نال اُڈایا تے تُوں اوہدے لئی پلے ہوئے وَچّھے نُوں حلال کرایا۔

³¹اوس اوہنوں آکھیا۔ پُتر تُوں سدا میرے نال ایں تے جو کُجھ میرا اے۔ سو تیرا اے۔

³²پر خُوش ہونا تے خُوشی کرنی چاہی دی سی۔ کیوں جو تیرا ایہہ بھرا مر گیا سی۔ ہُن جی پیا اے۔ اوہ گواچ گیا سی تے ہُن لَبّھ گیا اے۔