Read Western Panjabi لُوقا 18 Bible Online

لُوقا 18 - Western Panjabi bible

لُوقا 18

¹فیر اوس اوہناں نُوں ایس مطلب لئی اِک تمثِیل سُنائی۔ پئی سدا دُعا وِچ لگّے رہن۔ ڈِھلّے نا ہون۔

²پئی کِسے شہر وِچ اِک قاضی سی نا اوہ خُدا توں ڈر دا سی تے نا بندے دی پرواہ کر دا سی۔

³تے اوسے شہر وِچ اِک بیوہ سی جیہڑی اوہدے کول آ کے آکھدی ہوندی سی۔ پئی نیاں کر کے مَینُوں میرے مُدّعی توں بچا۔

⁴تے کُجھ چِر تِیک اوس نا مَنّیا۔ مگروں اپنے دِل وِچ آکھیا۔ بھانویں مَیں نا خُدا توں ڈرنا تے نا بندے دی پرواہ کرنا آں۔

⁵تے وی ایس کر کے پئی ایہہ بیوہ مَینُوں اَوکھیاں کر دی اے۔ مَیں اوہدا نیاں کراں گا۔ اجیہا نا ہوئے پئی اوہ گھڑی مُڑی آؤن نال میرا سِر کھا جاوے۔

⁶تے خُداوند آکھیا سُنو ایہہ بے انصاف قاضی کِیہ آکھدا اے۔

⁷خُدا اپنے چُنیاں ہویاں لوکاں دا جیہڑے دِنیں راتِیں اوہنوں فریاد کر دے نیں نیاں نا کرے گا؟ کِیہ اوہ اوہناں دا چوکھا چِر لاؤندا اے؟

⁸مَیں تُہانوں آکھنا آں پئی اوہ چھیتی اوہناں دا نیاں کرے گا۔ پر جدوں اِبنِ آدم آوے گا دسو اوہ زمین اُتّے۔ اِیمان ویکھے گا؟

⁹فیر اوس کئیاں نُوں۔ جیہڑے اپنے اُتّے بھروسا رکھدے سن۔ پئی اسی نیک آں تے جیہڑے ہورناں نُوں ماڑیاں جاندے سن۔ ایہہ تمثِیل سُنائی۔

¹⁰پئی دو بندے ہیکل وِچ دُعا منگن گئے۔ اِک فریسی سی تے دُوجا محصُولیا۔

¹¹فریسی کھلو کے اپنے جی وِچ ایویں دُعا منگن لگّا۔ اَے خُدا مَیں تیرا شُکر کرنا آں پئی مَیں ہورناں لوکاں وانگُوں لُٹیرا ظالم زانی یا ایس محصُولئے جِہیا نئیں آں۔

¹²مَیں تے ہفتے وِچ دو واری روزہ رکھناں آں مَیں اپنی ساری کمائی دا دسواں حِصّہ دینا آں۔

¹³پر محصُولئے دُوروں کھلو کے اینا وی نئیں چاہیا۔ پئی اسمان ولّ اَکھّیاں کرے۔ سگوں پِٹ پِٹ کے ایہہ آکھدا سی۔ پئی اَے خُدا مَیں جو گُناہیں ہاں میرے اُتّے رَحم کر۔

¹⁴مَیں تُہانوں آکھنا آں۔ پئی ایہہ بندے دُوجے نالوں ودِھیک نیک ہو کے اپنے گھر گیا۔ کیوں جو جیہڑا کوئی اپنے آپ نُوں اُچیاں کر دا اے۔ نِیواں کِیتا جائے گا۔ پر جیہڑا اپنے آپ نُوں نِیواں کر دا اے اوہ اُچّا کِیتا جائے گا۔

¹⁵تے لوک اپنے نِکّے بالاں نُوں اوہدے کول لیائے پئی اوہ اوہناں اُتّے ہتّھ رکھّے تے شاگِرداں ویکھ کے اوہناں نُوں جِھڑکیا۔

¹⁶پر یِسُوع بالاں نُوں اپنے کول سَدّ کے آکھیا۔ پئی بالاں نُوں میرے کول آؤن دیو تے اوہناں نُوں روکو نا۔ کیوں جو خُدا دی بادشاہی ایہو جِہیاں دی اے۔

¹⁷مَیں تُہانوں سَچ آکھنا آں پئی جیہڑا خُدا دی بادشاہی نُوں بچّے وانگُوں قبول نا کرے۔ اوہ اوہدے وِچ کدی نا وڑے گا۔

¹⁸تے کِسے سردار نے اوہنوں ایہہ پُچھیا۔ پئی اَے نیک اُستاد مَیں کِیہ کراں پئی مَینُوں ہمیشہ دی زِندگی دا وِرثہ مِلے؟

¹⁹یِسُوع اوہنوں آکھیا۔ تُوں کیوں مَینُوں نیک آکھنا ایں؟ بِناں اِک دے جیہڑا خُدا اے کوئی نیک نئیں اے۔

²⁰تُوں حُکماں نُوں تے جانناں ایں۔ پئی زنا نا کر۔ خُون نا کر۔ چوری نا کر۔ جُھوٹھی گواہی نا دے۔ اپنے ماں پئیو دی عِزّت کر۔

²¹اوس آکھیا۔ ایہہ سبھو مَیں اپنے نِکّیاں ہوندیاں توں مَندا آیا آں۔

²²یِسُوع سُن کے اوہنوں آکھیا۔ تے وی اجے تیرے وِچ اِک گلّ دی کسر اے۔ اپنا سبھ کُجھ ویچ تے غرِیباں نُوں دے دے تے تینُوں اسمان وِچ خزانہ مِلے گا۔ تے آ کے میرے مگر ٹُر پَو۔

²³اوہ ایہہ سُن کے اُداس ہویا۔ کیوں جو اوہ بڑا ای دَولت والا سی۔

²⁴یِسُوع اوہنوں ویکھ کے آکھیا مالداراں دا خُدا دی بادشاہی وِچ وڑنا بڑا اَوکھا اے۔

²⁵کیوں جو سُوئی دے نکّے وِچ اُوٹھ دا لنگھ جانا اوہدے نالوں سوکھا اے پئی دَولت والا خُدا دی بادشاہی وِچ داخل ہوئے۔

²⁶تے سُنن والیاں آکھیا تے فیر کون بچ سکدا اے؟

²⁷اوس آکھیا پئی بندیاں دے اگّے جو اَنہونا اے۔ اوہ خُدا اگّے ہوسکدا اے۔

²⁸تَد پطرس آکھیا ویکھ اسی سبھ کُجھ چھڈ کے تیرے مگر ٹُر پئے آں۔

²⁹اوس اوہناں نُوں آکھیا۔ مَیں تُہانوں سَچ آکھنا آں پئی اِنج کوئی نئیں اے جِنّہے گھر یا بیوی یا بھراواں یا ماں پئیو یا اولاد نُوں خُدا دی بادشاہی دی خاطر چھڈ دِتّا اے۔

³⁰تے ایس زمانے وِچ ایہناں نالوں کِنّاں ای ودِھیک تے اگلے جہان وِچ سدا دی زِندگی نا پاوے۔

³¹تے اوس باراں نُوں نال لے کے اوہناں نُوں آکھیا ویکھو اسی یرُوشلِیم نُوں جانے آں تاں جو کُجھ نبیاں دی راہِیں لِکھیا ہویا اے اِبنِ آدم دے حق وِچ سبھو پُورا ہوئے گا۔

³²کیوں جو اوہ غیر قوماں دے حوالے کِیتا جائے گا۔ تے لوک اوہنوں مخَول کرن گے تے بے عِزّت کرن گے۔ تے اوہدے اُتّے تُھکن گے۔

³³تے اوہنوں کولڑے مار کے مار سُٹّن گے۔ تے ترِیجے دِہاڑے اوہ جی اُٹھے گا۔

³⁴پر اوہ اوہناں وِچوں اِک گلّ وی نا سمجھے۔ تے ایہہ گلّ اوہناں توں لُکی رہی تے جیہڑیاں گلّاں آکھیاں گِئیاں سن اوہناں نا سمجھِیاں۔

³⁵تے یرِیحُو دے نیڑے اوہدے اَپڑ دیاں ای ایویں ہویا پئی اِک اَنھا راہ دے کنڈھے بَیٹھا خَیر منگدا سی۔

³⁶اوس بِھیڑ لنگھ دی دا کھڑاک سُن کے پُچھیا۔ پئی ایہہ کِیہ اے؟

³⁷تَد اوہناں اوہنوں دسیا۔ پئی یِسُوع ناصری جان دا اے۔

³⁸اوس اواز ماری پئی اَے یِسُوع داؤد دے پُتر میرے اُتّے رَحم کر۔

³⁹تے اگّے جان والیاں اوہنوں دھمکایا پئی چُپ کر۔ پر اوس ہور وی زور نال سدّیا۔ پئی اَے داؤد دے پُتر میرے اُتّے رَحم کر۔

⁴⁰تَد یِسُوع کھلو کے آکھیا۔ پئی اوہنوں میرے کول لیاؤ۔ جد اوہ نیڑے آیا تے اوس اوہنوں پُچھیا۔

⁴¹پئی تُوں کِیہ چاہنا ایں۔ پئی مَیں تیرے لئی کراں؟ اوس آکھیا خُداوندا پئی مَیں سُجاکھا ہو جاواں۔

⁴²یِسُوع اوہنوں آکھیا سُجاکھا ہو جا تیرے اِیمان تینُوں چَنگا کِیتا اے۔

⁴³اوہ اوسے ویلے سُجاکھا ہوگیا۔ تے خُدا دی وڈیائی کر دا ہویا اوہدے مگر ٹُر پیا تے ساریاں لوکاں ویکھ کے خُدا دی وڈیائی کِیتی۔