Read Western Panjabi لُوقا 22 Bible Online

لُوقا 22 - Western Panjabi bible

لُوقا 22

¹تے فطِیری روٹی دی عید جِہنُوں فسح آکھدے نیں نیڑے آئی۔

²تے سردار کاہِن تے فقِیہ داء لبّھدے سن۔ پئی اوہنوں کِس طرح مار سُٹّن۔ کیوں جو اوہ لوکاں توں ڈر دے سن۔

³تَد یہُوداہ وِچ جیہڑا اِسکریُوتی اکھواؤندا تے جیہڑا باراں دی گنتری وِچ سی شیطان سمایا۔

⁴تے اوس جا کے سردار کاہِناں تے صُوبیداراں نال صلاح کِیتی پئی اوہنوں کِیویں اوہناں دے حوالے کرے۔

⁵تے اوہ خُوش ہوئے تے اوہدے نال رُپئے دین دا اِقرار کِیتا۔

⁶تے اوس مَن لیا تے موقع لَبّھدا سی پئی جد بِھیڑ نا ہوئے اودُوں اوہنوں اوہناں دے حوالے کر دے۔

⁷تَد فطِیری روٹِیاں دا دِن آیا۔ جِہدے وِچ فسح حلال کرنا سی۔

⁸تے اوس پطرس تے یُوحنّا نُوں ایہہ آکھ کے گھلّیا۔ پئی جا کے ساڈے لئی فسح تیار کرو۔ پئی اسی کھائیے۔

⁹اوہناں اوہنوں آکھیا۔ تُوں کِتّھے چاہنا ایں پئی اسی تیار کریئے؟

¹⁰اوس اوہناں نُوں آکھیا۔ جد شہر وِچ تُسی وڑو گے ویکھو اِک بندہ پانی دا گھڑا چُکیا ہویا تُہانوں ٹکّرے گا۔ اوہ جِس گھر وِچ جائے اوہدے مگر جاؤ۔

¹¹تے گھر دے مالک نُوں آکھو اُستاد تینُوں آکھدا اے۔ پئی پَروہنیاں دی تھاں کِتّھے اے جِتّھے مَیں اپنے شاگِرداں نال فسح کھاواں؟

¹²تے اوہ آپ اِک وَڈا چوبارا تیار ہویا تُہانوں وکھالے گا۔ اوتھے تیار کرو۔

¹³اوہناں جا کے جِہیا اوس اوہناں نُوں دسیا سی ویکھیا۔ تے فسح تیار کِیتی نیں۔

¹⁴تے جد ویلا آگیا اوہ بَہہ گیا تے رسُول اوہدے نال۔

¹⁵تے اوہناں نُوں آکھیا۔ مَینُوں بڑی چاہ سی پئی دُکھ سہن توں پہلاں ایہہ فسح تُہاڈے نال کھانواں۔

¹⁶کیوں جو مَیں تُہانوں آکھنا آں۔ پئی مَیں ایہہ کدی نا کھانواں گا جد تِیکر خُدا دی بادشاہی وِچ اوہ پُورا نا ہوئے۔

¹⁷تے پیالہ لے کے شُکر کِیتا تے آکھیا ایہہ نُوں پھڑو تے آپو وِچ ونڈ لو۔

¹⁸کیوں جو مَیں تُہانوں آکھنا آں پئی ایدوں اگّے مَیں انگور دی رَس کدی نا پِیاں گا جد تِیکر خُدا دی بادشاہی نا آوے۔

¹⁹تے روٹی لئی تے شُکر کر کے توڑی تے ایہہ آکھ کے اوہناں نُوں دِتّی پئی ایہہ میرا بدن اے۔ جیہڑا تُہاڈے واسطے دِتّا جاندا اے۔ ایہہ میری یادگیری لئی کریا کرو۔

²⁰تے ایسے طرح کھان دے مگروں اوس پیالے نُوں ایہہ آکھ کے دِتّا۔ پئی ایہہ پیالہ میرے لہو وِچ جیہڑا تُہاڈے لئی وگایا جاندا اے نواں عہد اے۔

²¹پر ویکھو میرے پھڑان والے دا ہتّھ میرے نال میز اُتّے اے۔

²²کیوں جو اِبنِ آدم جاندا اے جیویں اوہدے لئی ٹھیرایا گیا اے۔ پر افسوس اوس بندے اُتّے جِہدی راہِیں اوہ پھڑوایا جاندا اے۔

²³تے اوہ آپو وِچ پچُھّن لگّے پئی ساڈے وِچوں اوہ کیہڑا اے جیہڑا ایہہ کمّ کرے گا؟

²⁴تے اوہناں وِچ جھگڑا وی پیا پئی ساڈے وِچوں کیہڑا وَڈا مَنّیا جاندا اے؟

²⁵اوس اوہناں نُوں آکھیا پئی غیر قوماں دے بادشاہ اوہناں اُتّے حکُومت چلاؤندے نیں۔ تے جیہڑے لوک اوہناں اُتّے اختیار رکھدے نیں سو غرِیب پرور اکھواؤندے نیں۔

²⁶پر تُہاڈا اوہ حال نئیں۔ سگوں تُہاڈے وِچ جیہڑا وَڈا اے اوہ نِکّے وانگر تے جیہڑا سردار اے اوہ ٹہلئے وانگر اے۔

²⁷کیوں جو وَڈا کیہڑا اے۔ اوہ جیہڑا کھان بَیٹھا۔ یا اوہ جیہڑا سیوا کر دا اے؟ اوہ نئیں جیہڑا کھان بَیٹھا اے؟ پر مَیں تُہاڈے وِچ ٹہلئے وانگر آں۔

²⁸تُسی اوہو ای اوہ جیہڑے میرِیاں ازمایشاں وِچ برابر میرے نال رہے اوہ۔

²⁹تے جیویں میرے باپ میرے لئی اِک بادشاہی ٹھیرائی مَیں تُہاڈے لئی ٹھہرانا آں۔

³⁰تاں جو میری بادشاہی وِچ میرے میز اُتّے کھاؤ پِیو۔ تے تُسی تختاں اُتّے بَہہ کے اِسرائیل دے باراں قبیلیاں دا نیاں کرو گے۔

³¹اَے شمعُون اَے شمعُون ویکھ شیطان نے تُساں لوکاں نُوں منگیا۔ پئی کنک وانگُوں تُہانوں چھٹّے۔

³²پر مَیں تیرے لئی دُعا کِیتی۔ پئی تیرا اِیمان جاندا نا رہے۔ تے جد تُوں مُڑ پئیں تے اپنے بھراواں نُوں تگڑیاں کریں۔

³³اوس اوہنوں آکھیا اَے خُداوند تیرے نال مَیں تیار آں بھانویں قید نُوں تے مَوت نُوں جانا پَوے۔

³⁴اوس آکھیا پطرس مَیں تینُوں آکھنا آں پئی کُکّڑ دے بانگ دین توں پہلاں تُوں تَرے واری میرا اِنکار کریں گا پئی مَیں اینوں نئیں جان دا۔

³⁵تے اوس اوہناں نُوں آکھیا جِس ویلے مَیں تُہانوں بٹوے تے جھولی تے جُتِّیاں بِناں گھل دِتّا تَد تُہانوں کِسے شے دی تھوڑ تے نئیں سی؟ اوہ آکھن لگّے کِسے دی نئیں۔

³⁶تَد اوس اوہناں نُوں آکھیا پر ہُن جِہدے کول بٹوا ہوئے سو لے لَئے تے ایسے طرح جھولی وی۔ تے جِہدے کول نا ہوئے اوہ اپنا کپڑا ویچ کے تلوار مُل لَوے۔

³⁷کیوں جو مَیں تُہانوں آکھنا آں۔ پئی ایہہ جو لِکھیا ہویا اے پئی اوہ بُریاں وِچ گِنیا گیا۔ میرے حق اندر پُورا ہونا ضرُور اے۔ کیوں جو کُجھ میرے نال تعلق رکھدا اے سو پُورا ہونا اے۔

³⁸اوہناں آکھیا اَے خُداوند ویکھ ایتھے دو تلواراں تے ہے نیں۔ اوس اوہناں نُوں آکھیا۔ ایہہ بتھیریاں نیں۔

³⁹تے اوہ باہر نِکل کے اپنے دستُور دے سببّوں زَیتُون دے پہاڑ نُوں گیا۔ تے شاگِرد وی اوہدے مگر ٹُرپَئے۔

⁴⁰تے اوس تھاں اَپڑ کے اوس اوہناں نُوں آکھیا۔ دُعا کرو پئی ازمایش وِچ نا پَوو۔

⁴¹تے آپی اوہناں توں کوئی ڈھیم دی مار دی وِتھ جِنّاں وکھرا ہوگیا تے گوڈے نواکے دُعا منگی۔

⁴²پئی اَے باپ جے تُوں چاہیں تے ایس پیالے نُوں میرے کولوں ہٹا دے۔ فیر وی میری مرضی نئیں پر تیری مرضی ہوئے۔

⁴³تے اسمانوں اِک فرِشتے اوہنوں وکھالی دِتّی۔ اوہ اوہنوں طاقت دیندا سی۔

⁴⁴فیر اوہ بُہت پریشان ہو کے بڑی تانگھ نال دُعا منگن لگّا تے اوہدا مُڑھکا لہو دے تُبکیاں وانگُوں زمین اُتّے ڈِگّدا سی۔

⁴⁵تے دُعا توں اُٹھ کے اوہ شاگِرداں دے کول آیا تے اوہناں نُوں غم دیاں مارِیاں سُتّیاں ہویاں ویکھیا۔

⁴⁶تے اوہناں نُوں آکھیا تُسی کاہِنُوں سَوندے اوہ؟ اُٹھ کے دُعا منگو۔ پئی ازمایش وِچ نا پَوو۔

⁴⁷اوہ اجے بولدا ای سی پئی ویکھو اِک بِھیڑ آئی تے باراں وِچوں اِک جیہڑا یہُوداہ اکھواؤندا سی اوہناں دے اگّے اگّے آؤندا سی۔ تے اوہ یِسُوع دے کول آیا پئی اوہنوں چُمّے۔

⁴⁸پر یِسُوع اوہنوں آکھیا یہُوداہ تُوں چُمّ کے اِبنِ آدم نُوں پھڑانا ایں؟

⁴⁹جد اوہدے آلے دوالے والیاں ویکھیا پئی کِیہ ہون لگّا تے آکھیا اَے خُداوند اسی تلوار چلائیے۔

⁵⁰تے اوہناں وِچوں اِک نے سردار کاہِن دے غلام اُتّے چلا کے اوہدا سَجّا کنّ اُڈا دِتّا۔

⁵¹یِسُوع جواب دِتّا۔ ہُن صبر کرو۔ تے اوہدا کنّ چُھو کے اوہنوں چَنگا کِیتا۔

⁵²تَد یِسُوع سردار کاہِناں تے ہیکل دے صُوبیداراں تے بزُرگاں نُوں جیہڑے اوہدے اُتّے چڑھ آئے سن آکھیا۔ تُسی مَینُوں چور سمجھ کے تلواراں تے ڈانگاں لے کے نِکلے ہوئے ہو؟

⁵³جد مَیں روز ہیکل وِچ تُہاڈے نال ساں تُساں میرے اُتّے ہتّھ نا پائے پر ایہہ تُہاڈی گھڑی تے ہنیرے دا اختیار اے۔

⁵⁴تَد اوہ اوہنوں پھڑ کے لے آئے۔ تے سردار کاہِن دے گھر وِچ لے گئے۔ تے پطرس ڈردا ڈردا مگر ٹُریا جاندا سی۔

⁵⁵تے جد اوہ ویہڑے دے اندر اَگ بال کے اکٹّھے بَیٹھے ہوئے سن تَد پطرس اوہناں وِچ بَہہ گیا۔

⁵⁶تے اِک ٹہلن اوہنوں لو وِچ بَیٹھیا ویکھیا۔ تے اوہدے ولّ چنگی طرح دھیان کر کے آکھیا۔ ایہہ وی اوہدے نال سی۔

⁵⁷پر اوہ مُکّر گیا تے آکھیا اَے بی بی مَیں اوہنوں نئیں جان دا۔

⁵⁸تھوڑے چِر مگروں ہور کِسے اوہنوں ویکھ کے آکھیا۔ تُوں وی اوہناں وِچوں ایں۔ پطرس آکھیا اوہ پائی مَیں اوہناں وِچوں نئیں آں۔

⁵⁹تے گھڑی کُو مگروں ہور کِسے نے پَکّی کر کے آکھیا پئی بے شک ایہہ وی اوہدے نال سی۔ کیوں جو اوہ گلِیلی بندہ اے۔

⁶⁰پطرس آکھیا اوہ پائی مَیں نئیں سمجھدا پئی تُوں کِیہ آکھنا ایں۔ تے اوہ اجے بولدا ای پیا سی پئی جھٹ کُکّڑ نے بانگ دِتّی۔

⁶¹تَد خُداوند مُڑ کے پطرس ولّ ویکھیا۔ تے پطرس نُوں خُداوند دی اوہ گلّ یاد آئی۔ جیہڑی اوس اوہنوں آکھی سی پئی اَج کُکّڑ دے بانگ دین توں پہلاں تُوں میرا تَرے واری اِنکار کریں گا۔

⁶²اوہ باہر ٹُر گیا تے بڑا رویا۔

⁶³تے اوہ بندے جِنہاں یِسُوع نُوں پھڑیا ہویا سی۔ اوہنوں مخَول کر دے تے مار دے سن۔

⁶⁴تے اوہ اوہدیاں اَکھّیاں بَنّھ کے اوہنوں ایہہ پُچھ دے سن پئی نبُوّت کر کے دس تینُوں کِس ماریا؟

⁶⁵تے طعنہ مار کے ہور کئی سارِیاں گلّاں اوہ دے برخلاف آکھیاں۔

⁶⁶تے جد دِن چڑھیا تے قوم دے بزُرگاں دی جماعت اکٹّھی ہوئی۔ سردار کاہِن وی تے فقِیہ وی۔ تے اوہنوں اپنی وڈّی پنچایت وِچ لیا کے آکھیا۔

⁶⁷جے تُوں مسِیح ایں۔ تے سانُوں دس۔ اوس اوہناں نُوں آکھیا جے مَیں تُہانوں دساں تُسی کدی نا مَنّو گے۔

⁶⁸تے جے پُچھاں کدی جواب نا دیو گے۔

⁶⁹ہُن توں اگّے اِبنِ آدم خُدا دی قُدرت دے سَجّے ہتّھ بَیٹھا رہے گا۔

⁷⁰تَد ساریاں آکھیا تُوں خُدا دا پُتر ایں؟ اوس اوہناں نُوں آکھیا۔ تُسی آکھدے ہو کیوں جو مَیں ہاں۔

⁷¹تَد اوہناں آکھیا سانُوں ہور گواہی دی ہُن کِیہ لوڑ؟ اساں آپ جو اوہدے مُنھوں سُنیا۔