Read Western Panjabi لُوقا 5 Bible Online

لُوقا 5 - Western Panjabi bible

لُوقا 5

¹تے جد بِھیڑ اوہدے اُتّے ڈِگّدی جاندی سی تے خُدا دا کلام سُندی سی تَد ایویں ہویا پئی اوہ گنّیسرت دی جِھیل دے کنڈھے کھلوتا ہویا سی۔

²تے اوس جِھیل دے کنڈھے دو بیڑیاں لگِیاں ہویاں ویکھیاں پر مچھیرے اوہناں اُتّوں اُترے ہوئے اپنے جال پئے دھوندے سن۔

³اوس اوہناں بیڑیاں وِچوں اِک اُتّے جیہڑی شمعُون دی سی چڑھ کے اوہنوں آکھیا پئی کنڈھیوں ذرا ہٹا لے۔ تے بَیہہ کے بیڑی اُتّوں لوکاں نُوں تعلِیم دین لگّا۔

⁴تے جد گلّاں مُکالیاں تے شمعُون نُوں آکھیا ڈُونگھے پانی لے چَل تے شِکار لئی اپنے جال سُٹّو۔

⁵شمعُون جواب دِتّا۔ خُداوند اساں ساری رات محنت کِیتی پر کُجھ نئیں پھڑیا۔ تے وی تیرے آکھے جال سُٹّناں۔

⁶تے جد اوہناں ایہہ کِیتا تے ڈھیر سارِیاں مچھّیاں گھیر لَیاں تے اوہناں دے جال پاٹن لگّے۔

⁷تَد اوہناں اپنے سَنگیاں نُوں جیہڑے دُوجی بیڑی اُتّے سن سینت ماری پئی آؤ تے ساڈی مدد کرو۔ اوہ آئے تے دونویں بیڑیاں اینِیاں بھر دِتّیاں پئی ڈُبن لگِیاں۔

⁸شمعُون پطرس ایہہ ویکھ کے یِسُوع دے پَیرِیں پَے کے آکھیا۔ اَے خُداوند میرے کولوں ٹُرجا کیوں جو مَیں گُنہگار بندہ آں۔

⁹کیوں جو مچھّیاں دے ڈھیر دے سبّب جیہڑیاں اوہناں پَھڑیاں سن۔ اوہ وی تے اوہدے سارے سنگی بُہت گھابرے ہوئے سن۔

¹⁰تے ایسے طرح زبدی دے پُتر یعقُوب تے یُوحنّا جیہڑے شمعُون دے سنگی سن۔ تَد یِسُوع شمعُون نُوں آکھیا۔ نا ڈر ایدوں اگّے تُوں بندیاں دا پھڑن والا بنے گا۔

¹¹اوہ بیڑیاں کنڈھے اُتّے کھِچّ لیائے تے سبھ کُجھ چھڈ کے اوہدے مگر ٹُر پئے۔

¹²تے ایویں ہویا جد اوہ اِک شہر وِچ سی تَد ویکھو اِک بندہ کوڑھ دا بھریا ہویا سی۔ تے یِسُوع نُوں ویکھ کے اوہ مُنھ پرنے ڈِگّا تے اوہدی مِنّت کر کے آکھیا خُداوندا جے تُوں چاہیں تے مَینُوں پاک صاف کر سکنا ایں۔

¹³تے اوس ہتّھ وَدّھا کے اوہنوں چُھوئیا تے آکھیا مَیں چاہناں آں تُوں پاک صاف ہو جا۔ تے اوسے ویلے کوڑھ اوہدے تُھوں جاندا رہیا۔

¹⁴تے اوس اوہنوں تاکِید کِیتی۔ پئی کِسے نُوں نا دسیں پر جا کے اپنا آپ کاہِن نُوں وکھا تے اپنے پاک صاف ہو جان لئی مُوسیٰ دے حُکم دے سببّوں نذر چڑھا۔ تاں جو اوہناں لئی گواہی ہوئے۔

¹⁵پر اوہدی ہور وی دُھم پَے گئی۔ تے بڑی خلقت اکٹّھی ہوئی پئی سُنن تے اپنیاں روگاں توں چنگے ہون۔

¹⁶پر اوہ اُجاڑاں وِچ اکلّا جا کے دُعا منگدا ہوندا سی۔

¹⁷تے اِک دِن ایویں ہویا پئی جِس ویلے اوہ پیا سِکھاؤندا سی فریسی تے شریعت دے سکھالن والے جیہڑے گلِیل دے ہر اِک پِنڈ تے یہُودیہ تے یرُوشلِیم توں آئے سن اوتھے بَیٹھے ہوئے سن تے خُداوند دی قُدرت شفا دین لئی اوہدے نال سی۔

¹⁸تے ویکھو کئی بندے مَنجی اُتّے چُک کے اِک بندے نُوں جیہڑا جھولے دا ماریا ہویا سی لئی آوندے سن تے حیلہ کر دے سن پئی اوہنوں اندر لیاوے تے اوہدے اگّے رکھیے۔

¹⁹تے جد بِھیڑ دے سببّوں اوہنوں اندر لے جان دا راہ نا لَبھّا تے اوہ کوٹھے اُتّے چڑھ گئے تے کھپریلاں دے وِچوں دی اوہنوں مَنجی سَنے وِچکار یِسُوع دے اگّے لمکا دِتّا۔

²⁰اوس اوہناں دا اِیمان ویکھ کے آکھیا اے بندیا تیرے گُناہ بخشے گئے۔

²¹تَد فقِیہ تے فریسی ایہہ آکھ کے پُھس پُھسان لگّے پئی ایہہ کُفر بکن والا کون اے؟ خُدا باہجوں گُناہاں نُوں کون بخش سکدا اے؟

²²یِسُوع اوہناں دا خیال جان کے اوہناں نُوں آکھیا تُسی اپنے دِلاں وِچ کِیہ سوچدے ہو۔

²³کیہڑی گلّ اسان اے۔ ایہہ آکھنا پئی تیرے گُناہ بخشے گئے یا ایہہ آکھنا پئی اُٹھ تے ٹُر پھر۔

²⁴پر ایس لئی پئی تُسی جانو پئی اِبنِ آدم نُوں دھرتی اُتّے گُناہ بخشن دا اختیار اے (اوس مفلُوج نُوں آکھیا) مَیں تینُوں آکھنا آں پئی اُٹھ تے اپنی مَنجی لے کے گھر جا۔

²⁵اوہ اوسے ویلے اوہناں دے اگّے اُٹھیا تے جِہدے اُتّے پیا ہویا سی اوہنوں چُک کے خُدا دی وڈیائی کر دا ہویا اپنے گھر ٹُر گیا۔

²⁶تَد اوہ سارے بڑے حَیران ہوئے تے خُدا دی وڈیائی کرن لگّے۔ تے بڑے ڈر کے آکھن لگّے اَج اساں اچرج کمّ ویکھے۔

²⁷تے ایہناں گلّاں دے پِچّھوں اوہ باہر نِکلیا تے اِک محصُولئے نُوں جِہدا ناں لاوی سی چونگی دے چبُوترے اُتّے بَیٹھیاں ہویاں ویکھیا۔ تے اوہنوں آکھیا میرے مگر ٹُر آ۔

²⁸تے اوہ سبھ کُجھ چھڈ کے اُٹھ بَیٹھا تے اوہدے مگر ٹُرپیا۔

²⁹تے لاوی اپنے گھر وِچ اوہدی خاطر وڈّی ضیافت کِیتی تے محصُولِیاں تے ہورناں دی جیہڑے اوہدے نال کھان بَیٹھے سن بڑی بِھیڑ سی۔

³⁰تَد فریسی تے اوہناں دے فقِیہ اوہدے شاگِرداں اُتّے کُڑ کُڑا کے آکھن لگّے پئی تُسی کاہِنُوں محصُولِیاں تے گُناہِیاں نال کھاندے پِیندے ہو؟

³¹تے یِسُوع اوہناں نُوں جواب دِتّا۔ پئی بھلیاں چَنگیاں نُوں نئیں۔ پر بِیماراں نُوں حکِیم دی لوڑ اے۔

³²مَیں نیکاں نُوں نئیں پر گُناہِیاں نُوں تَوبہ لئی سَدّن آیا آں۔

³³تے اوہناں اوہنوں آکھیا پئی یُوحنّا دے شاگِرد بُہت روزہ رکھدے تے دُعا منگ دے نیں تے ایسے طرح فرِیسیاں دے وی۔ پر تیرے شاگِرد کھاندے پِیندے نیں۔

³⁴تے یِسُوع اوہناں نُوں آکھیا جانجیاں توں جِنّاں چِر لاڑا اوہناں دے نال اے۔ تُسی روزہ رکھّوا سکدے اوہ؟

³⁵پر اوہ دِن آؤن گے جد لاڑا اوہناں توں وَکھ کِیتا جائے گا۔ تے اونہی دِنیں اوہ روزہ رکھن گے۔

³⁶تے اوس اوہناں نُوں اِک تمثِیل وی دسی۔ پئی نَوِیں کپڑے وِچوں ٹاکی پاڑ کے پرانے کپڑے اُتّے کوئی نئیں لاندا۔ جے لاوے وی تے نواں وی پاٹے گا تے نالے نَوِیں دی ٹاکی پرانے نال مِلے گی نئیں۔

³⁷تے انگور دی نَوِیں رَس پرانیاں مشکاں وِچ کوئی نئیں بھردا جے بھرے وی تے نَوِیں رَس مشکاں نُوں پاڑے گی۔ تے آپ ڈُلھ جائے گی تے مشکاں دا وی ناس ہوئے گا۔

³⁸سگوں انگور دی نَوِیں رَس نَوِیاں مشکاں وِچ بھرنی چاہیدی اے۔

³⁹تے انگور دی پرانی رَس پی کے کوئی نَوِیں نئیں چاہندا کیوں جو اوہ آکھدا اے۔ پئی پرانی چنگی اے۔