Read Western Panjabi لُوقا 7 Bible Online

لُوقا 7 - Western Panjabi bible

لُوقا 7

¹تے جد اوس اپنیاں سارِیاں گلّاں لوکاں نُوں سُنا لئیاں۔ تَد کَفرنحُوم وِچ آیا۔

²تے کِسے صُوبیدار دا نوکر جیہڑا اوہنوں پیارا سی بیماری نال مرن والا سی۔

³اوس یِسُوع دی خبر سُن کے یہُودِیاں دیاں کئیاں بزُرگاں نُوں اوہدے کول گھل کے اوہدے اگّے عرض کِیتی پئی آ کے میرے نوکر نُوں بچا۔

⁴تے اوہناں یِسُوع کول اَپڑ دیاں ای اوہدی بڑی مِنّت کر کے آکھیا پئی اوہ ایس لائق اے پئی تُوں اوہدے لئی ایہہ کمّ کریں۔

⁵کیوں جو اوہ ساڈی قوم نُوں پیار کر دا اے تے ساڈے عبادت خانے نُوں اوسے ای بنوایا۔

⁶یِسُوع اوہناں دے نال ٹُرپیا۔ تے جدوں اوہ گھر دے نیڑے اَپڑیا۔ تَد صُوبیدار نے دوستاں نُوں اوہنوں ایہہ آکھن لئی اوہدے کول گھلّیا پئی خُداوند کھیچل نا کر کیوں جو مَیں ایس لائق نئیں پئی تُوں میری چھت ہیٹھاں آویں۔

⁷ایس کر کے ای مَیں اپنے آپ نُوں ایس لائق نا جانیا۔ پئی تیرے کول آواں۔ نِرا آکھ ای دے تے میرا نوکر شفا پائے گا۔

⁸کیوں جو مَیں وی کِسے دے اختیار وِچ آں تے سپاہی میرے آکھے وِچ نیں۔ جد مَیں ایس نُوں آکھنا آں پئی جا اوہ جاندا اے۔ تے کِسے ہور نُوں پئی آ اوہ آؤندا اے۔ تے اپنے نوکر نُوں پئی ایویں کر اوہ کر دا اے۔

⁹یِسُوع نے ایہہ سُن کے اوہدے اُتّے تعجُّب کِیتا تے مُڑ کے بِھیڑ نُوں جیہڑی اوہدے مگر آؤندی سی۔ آکھیا مَیں تُہانوں آکھنا آں پئی اجیہا اِیمان مَیں اِسرائیل وِچ وی نئیں ویکھیا۔

¹⁰تے اوہ جیہڑے گھلّے گئے سن۔ جد گھر وِچ مُڑ آئے۔ تے اوس نوکر نُوں تگڑا ویکھیا۔

¹¹تے تھوڑے چِر پِچّھوں اجیہا ہویا۔ پئی اوہ ناِئن ناں شہر نُوں گیا تے اوہدے شاگِرد تے وڈّی بِھیڑ اوہدے نال ٹُری جاندی سی۔

¹²جد اوہ شہر دے بُوہے دے نیڑے اَپڑیا۔ تے ویکھو اِک مُردے نُوں باہر لئی جاندے سن۔ جیہڑا اپنی ماں دا اکلّا پُتر سی۔ تے اوہ عورت بیوہ سی۔ تے شہر دے بتھیرے لوک اوہدے نال سن۔

¹³تے اوہنوں ویکھ کے خُداوند نُوں اوہدے اُتّے ترس آیا۔ تے اوہنوں آکھیا رو نا۔

¹⁴تے اگانہہ ہو کے جنازے نُوں چُھوئیا۔ تے چُکن والے کھلو گئے۔ تَد اوس آکھیا۔ اَے جوان مَیں تینُوں آکھنا آں۔ اُٹھ۔

¹⁵تے اوہ مُردہ اُٹھ بَیٹھا تے بولن لگ پیا۔ اوس اوہنوں اوہدی ماں دے حوالے کِیتا۔

¹⁶تے ساریاں خَوف کھادا تے خُدا دی وڈیائی کر کے آکھن لگّے پئی وَڈا نبی ساڈے وِچ اُٹھیا اے۔ تے خُدا اپنی اُمّت اُتّے نِگاہ کِیتی اے۔

¹⁷تے اوہدی بابت ایہہ گلّ سارے یہُودیہ تے سارے آلے دوالے دے مُلک وِچ مشہُور ہو گئی۔

¹⁸تے یُوحنّا دے شاگِرداں ایہناں سارِیاں گلّاں دی خبر اوہنوں کر دِتّی۔

¹⁹تے یُوحنّا اپنے شاگِرداں وِچوں دو نُوں سَدّ کے خُداوند نُوں اکھوا گھلّیا۔ پئی جیہڑا آؤن والا اے۔ اوہ تُوں ای ایں یا اسی کِسے ہور نُوں اُڈِیکئے؟

²⁰اوہناں بندیاں اوہدے کول اَپڑ کے آکھیا سانُوں یُوحنّا بپتِسمہ دین والے تیرے کولوں پچُھّن نُوں گھلّیا اے۔ پئی جیہڑا آؤن والا اے اوہ تُوں ای ایں یا اسی کِسے ہور نُوں اُڈِیکئے؟

²¹اوہنے اوسے ویلے بتھیریاں نُوں روگاں تے بلاواں تے بُریاں رُوحاں توں شفا دیتی۔ تے بتھیریاں اَنھیاں نُوں سوجاکھِیاں کِیتا۔

²²تے اوس اوہناں نُوں جواب دِتّا۔ پئی جو کُجھ تُساں ویکھیا تے سُنیاں اے۔ جا کے یُوحنّا نُوں دسو پئی اَنھے ویکھ دے نیں۔ لنگے ٹُردے نیں۔ کوڑھے پاک صاف کِیتے جاندے نیں۔ تے بولے سُندے نیں۔ مُردے جوالے جاندے نیں۔ غرِیباں نُوں خُوشخبری سُنائی جاندی اے۔

²³تے دھنّ اوہ اے جیہڑا میرے وِچ ٹھوکر دا سبّب نا پاوے۔

²⁴جد یُوحنّا دے گھلّے ہوئے ٹُر گئے۔ تَد اوہ یُوحنّا دی بابت لوکاں نُوں آکھن لگّا پئی تُسی اُجاڑ وِچ کِیہ ویکھن نُوں گئے سو؟ اِک کانا جیہڑا وَا نال ہِلدا اے؟

²⁵فیر تُسی کِیہ ویکھن نُوں گئے سو؟ اِک بندہ جِس سُچے کپڑے پائے ہوئے نیں؟ ویکھو اوہ جیہڑے سوہنے کپڑے پاندے تے وڈّی شان وِچ رہندے نیں۔ سو بادشاہاں دے محلّاں وِچ ہوندے نیں۔

²⁶فیر تُسی کِیہ ویکھن نُوں گئے سو؟ اِک نبی نُوں؟ ہاں مَیں تُہانوں آکھنا آں سگوں نبی نالوں وی وَڈا۔

²⁷ایہہ اوہو اے جِہدے حق وِچ لِکھیا ہویا اے پئی ویکھ مَیں اپنے ہلکارے نُوں تیرے اگّے گھلّنا آں جیہڑا تیرے اگّے تیری راہ نُوں تیار کرے گا۔

²⁸مَیں تُہانوں آکھنا آں پئی اوہناں وِچوں جیہڑے عَورتاں توں جمّے یُوحنّا نالوں کوئی وَڈا نئیں اے۔ پر جیہڑا خُدا دی بادشاہی وِچ نِکّا اے۔ اوہ اوہدے نالوں وَڈا اے۔

²⁹تے ساریاں لوکاں تے مصُولیاں وی سُن کے خُدا نُوں سَچّا مَنّیا کیوں جو اوہناں یُوحنّا دا بپتِسمہ لیا۔

³⁰پر فرِیسیاں تے شریعت دے سکھالن والیاں نیں خُدا دی صلاح نُوں اپنے ولّوں ماڑیاں جانیا کیوں جو اوہناں اوہدے کولوں بپتِسمہ نا لیا۔

³¹ایس زمانے دے لوکاں نُوں مَیں کیہو جیہا آکھاں۔ تے اوہ کِہدے وانگر نیں؟

³²اوہ اوہناں مُنڈیاں وانگر نیں جیہڑے بازار وِچ بَہہ کے اِک دُوجے نُوں اَوازاں مار کے آکھدے نیں پئی اساں تُہاڈے لئی بانسری وَجائی تے تُسی نا نچّے۔ اسی پِٹّے تے تُسی نا روئے۔

³³کیوں جو یُوحنّا بپتِسمہ دین والا نا روٹی کھاندا آیا۔ نا انگور دی رَس پَیندا تے تُسی آکھدے ہو پئی اوہدے نال اِک بد رُوح اے۔

³⁴اِبنِ آدم کھاندا پَیندا آیا اے۔ تے تُسی آکھدے ہو پئی ویکھو اِک کھاؤُ تے شرابی بندہ مصُولیاں تے گُناہِیاں دا یار۔

³⁵پر حِکمت اپنے ساریاں بچّیاں ولّوں سَچّی مِتھی گئی۔

³⁶تے کِسے فریسی اوہدے اگّے عرض کِیتی پئی میرے نال کھانا کھا۔ تے اوہ فریسی دے گھر جا کے کھان بَیٹھا۔

³⁷تے ویکھو اِک بدچلن زنانی جیہڑی اوس شہر دی سی جد جانیا پئی اوہ فریسی دے گھر کھان بَیٹھا اے۔ سنگِ مَرمَر دی شِیشی وِچ عِطر لیائی۔

³⁸تے پِچّھے ولّ اوہدے پیراں کول کھلو کے روندی روندی اَتھرُواں نال اوہدے پَیر بِھیون لگّی۔ تے اپنے سِر دیاں والاں نال پُونجھ کے اوہدے پیراں نُوں بُہت چُمّیا تے عِطر مَلیا۔

³⁹تے اوہ فریسی جِس اوہدی دعوت کِیتی سی ایہہ ویکھ کے دِل وِچ آکھن لگّا پئی جے ایہہ بندہ نبی ہوندا تاں جان لَیندا پئی زنانی جیہڑی اوہنوں چھوندی اے کون اے تے کِس طرح دی اے۔ کیوں جو اوہ بد چَلّن اے۔

⁴⁰تے یِسُوع اوہنوں آکھیا اَے شمعُون مَیں تینُوں کُجھ آکھنا اے اوس آکھیا اَے اُستاد آکھ۔

⁴¹کِسے ساہوکار دے دو قرضئی سن۔ اِک پنج سَو دیناراں دا تے دُوجا پنجاہاں دا۔

⁴²جد اوہناں دے ہتّھ پلّے دین نُوں کُجھ نا رہیا اوس دوہاں نُوں بخش چھڈیا۔ ہُن اوہناں وِچوں کیہڑا اوہنوں وَدّھ پیار کرے گا؟

⁴³شمعُون جواب دِتّا میرے خیال وِچ اوہ جِہنُوں اوس وَدّھ بخشیا۔ اوس اوہنوں آکھیا تُوں ٹھیک فیصلہ کِیتا۔

⁴⁴تے اوس زنانی ولّ مُنھ کر کے شمعُون نُوں آکھیا۔ تُوں ایس زنانی نُوں ویکھنا ایں؟ مَیں تیرے گھر آیا تُوں میرے پیراں لئی پانی نا دِتّا۔ پر ایس میرے پَیر اَتھرُواں نال بھیویں۔ تے اپنے والاں نال پُونجھے۔

⁴⁵تُوں مَینُوں نا چُمّیا۔ پر جدوں دا مَیں آیا آں ایس میرے پیراں نُوں چُمّنا نئیں چھڈیا۔

⁴⁶تُوں میرے سِر نُوں تیل نا لایا۔ پر ایس میرے پیراں نُوں عِطر مَلیا۔

⁴⁷ایس لئی مَیں تینُوں آکھنا آں اوہدے گُناہ جیہڑے بُہت نیں مُعاف ہوئے۔ کیوں جو ایس وَدّھ پیار کِیتا۔ پر جِہدے تھوڑے مُعاف ہوئے اوہ تھوڑا پیار کر دا اے۔

⁴⁸تے اوس زنانی نُوں آکھیا تیرے گُناہ مُعاف ہوئے۔

⁴⁹تَد اوہ جیہڑے اوہدے نال کھان بَیٹھے سن دِل وِچ آکھن لگّے۔ پئی ایہہ کون اے جیہڑا گُناہاں نُوں وی مُعاف کر دا اے؟

⁵⁰پر اوہنے زنانی نُوں آکھیا تیرے اِیمان تینُوں بچایا اے۔ سلامتی نال ٹُر جا۔