Read Western Panjabi یُوحنّا 1 Bible Online

یُوحنّا 1 - Western Panjabi bible

یُوحنّا 1

¹مُڈھوں کلام سی تے کلام خُدا دے نال سی تے کلام خُدا سی۔

²ایہو ازلوں خُدا دے نال سی۔

³سارِیاں شیواں اوہدی راہِیں پَیدا ہویاں۔ تے بِناں اوہدے اِک شے وی پَیدا نا ہوئی جیہڑی پَیدا ہوئی اے۔

⁴زِندگی اوہدے وِچ سی تے اوہ زِندگی لوکاں دا چانن سی۔

⁵تے چانن ہنیرے وِچ چمکدا اے۔ تے ہنیرے نیں اوہنوں نا پِچھانیا۔

⁶اِک بندہ خُدا دا گھلّیا ہویا سی۔ اوہدا ناں یُوحنّا سی۔

⁷اوہ گواہی دے لئی آیا پئی چانن دی بابت گواہی دے۔ تاں جو سبھ لوک اوہدی راہِیں اِیمان لیاؤن۔

⁸اوہ چانن اوہ آپ نئیں سی پر اوس چانن دی گواہی دین آیا سی۔

⁹اصل چانن جیہڑا ہر اِک بندے نُوں چانن دیندا اے دُنیا وِچ آؤن والا سی۔

¹⁰اوہ دُنیا وِچ سی تے دُنیا اوہدی راہِیں پَیدا ہوئی۔ تے دُنیا اوہنوں نا جانیا۔

¹¹اوہ اپنیاں کول آیا تے اوہناں اوہنوں قبول نا کِیتا۔

¹²پر جِنّیاں اوہنوں قبول کِیتا اوس اوہناں نُوں حق دِتّا پئی خُدا دے پُتر بن جان یعنی اوہناں نُوں جیہڑے اوہدے ناں اُتّے اِیمان لیاؤندے نیں۔

¹³اوہ نا لہو توں نا بدن دی چاہ توں نا اِنسان دی چاہ توں پر خُدا توں پَیدا ہوئے سن۔

¹⁴تے جِسم لیا تے فضل تے سچیائی نال بھرپُور ہو کے ساڈے کول ڈیرہ کِیتا۔ تے اساں اُسدا اجیہا جلال ویکھیا جیویں باپ دے اِکلَوتے دا جلال۔

¹⁵یُوحنّا اوہدے حق وِچ گواہی دِتّی تے پُکار کے آکھیا پئی ایہو سی جِہدی گلّ مَیں کر دا ساں پئی اوہ جیہڑا میرے پِچّھوں آیا اے مَیتھوں اگیترا ہویا اے کیوں جو اوہ مَیتھوں پہلاں سی۔

¹⁶تے اوہدی بھرپُوری وِچوں اساں سبھناں نُوں مِلیا یعنی فضل اُتّے فضل۔

¹⁷کیوں جو شریعت مُوسیٰ دی راہِیں دِتّی گئی سی۔ پر فضل تے سچیائی یِسُوع مسِیح دی راہِیں آئی۔

¹⁸خُدا نُوں کدی کِسے نئیں ڈِٹّھا پر اِکلَوتے پُتر نیں جیہڑا باپ دی گدّ وِچ اے اوہنوں ظاہر کِیتا۔

¹⁹تے یُوحنّا دی گواہی ایہہ اے پئی جِس ویلے یہُودِیاں نیں کاہِناں تے لاویاں نُوں یرُوشلِیم توں گھلّیا پئی پچُھّن تُوں کون ایں؟

²⁰تے اوس اِقرار کِیتا تے مُکّریا نئیں تے اِقرار کِیتا پئی مَیں مسِیح نئیں آں۔

²¹تے اوہناں اوہنوں پُچھیا۔ فیر تُوں کون ایں؟ تُوں ایلیّاہ ایں؟ اوس آکھیا مَیں نئیں آں۔ تُوں اوہ نبی ایں؟ اوس جواب دِتّا نئیں۔

²²تَد اوہناں اوہنوں آکھیا تُوں ایں کون؟ تاں جو اسی اپنے گھلّن والیاں نُوں جواب دئیے۔ تُوں اپنے آپ نُوں کِیہ دسنا ایں؟

²³اوس آکھیا مَیں جیویں یسعیاہ نبی آکھیا سی۔ اُجاڑ وِچ اِک ہوکا دین والے دی اواز ہاں پئی خُداوند دے راہ نُوں سِدّھا کرو۔

²⁴تے اوہ فرِیسیاں ولّوں گھلّے ہوئے سن۔

²⁵تے اوہناں اوہدے توں پُچھ کے اوہنوں آکھیا جے تُوں نا مسِیح ایں نا ایلیّاہ تے نا اوہ نبی تے فیر بپتِسمہ کیوں دینا ایں؟

²⁶یُوحنّا اوہناں نُوں جواب دِتّا پئی مَیں تے پانی نال بپتِسمہ دینا آں۔ تُہاڈے وِچ اِک کھلوتا ہویا اے جِہنُوں تُسی نئیں جان دے۔

²⁷اوہ میرے پِچّھے آؤندا اے۔ اوہدی جُتّی دی وَدّھری کھولن دے مَیں لائق نئیں۔

²⁸ایہہ گلّاں بَیت عَنِیاہ وِچ یَردنوں پار ہویاں جِتّھے یُوحنّا بپتِسمہ دیندا سی۔

²⁹دُوجے دِن یُوحنّا یِسُوع نُوں اپنے ولّ آؤندیاں ویکھ کے آکھیا ویکھو خُدا دا برّہ جیہڑا دُنیا دا گُناہ چُک لے جاندا اے۔

³⁰ایہہ اوہو اے جِہدی بابت مَیں آکھیا سی پئی اِک بندہ میرے پِچّھے آؤندا اے۔ جیہڑا مَیتھوں اگیترا ہوگیا اے کیوں جو اوہ مَیتھوں پہلاں سی۔

³¹تے مَیں تے اوہنوں جان دا نئیں ساں۔ پر مَیں ایس لئی پانی نال بپتِسمہ دیندا آیا تاں جو اوہ اِسرائیل اُتّے ظاہر ہوئے۔

³²تے یُوحنّا ایہہ آکھ کے گواہی دِتّی پئی مَیں رُوح نُوں کبُوتر وانگُوں اسمانوں اُتر دیاں ویکھیا اے۔ تے اوہ اوہدے اُتّے آ ٹھیریا۔

³³تے مَیں اوہنوں جان دا نئیں ساں پر جِس مَینُوں گھلّیا سی پئی پانی نال بپتِسمہ دیاں اوس مَینُوں آکھیا سی پئی جِہدے اُتّے تُوں رُوح نُوں اُتر دیاں تے اوہدے اُتّے ٹھیر دیاں ویکھیں اوہو ای اے جیہڑا پاک رُوح نال بپتِسمہ دیندا اے۔

³⁴تے مَیں ویکھیا تے گواہی دِتّی اے پئی اوہ خُدا دا پُتر اے۔

³⁵فیر دُوجے دِن یُوحنّا تے اوہدیاں شاگِرداں وِچوں دو کھلوتے ہوئے سن۔

³⁶تے اوس یِسُوع نُوں جاندِیاں ویکھ کے آکھیا ویکھو خُدا دا لیلا۔

³⁷تے اوہناں دوہاں شاگِرداں اوہنوں ایہہ گلّ کر دیاں سُنیا تے یِسُوع دے مگر ٹُر پئے۔

³⁸تَد یِسُوع مُڑ کے تے اوہناں نُوں مگر آؤندیاں ویکھ کے اوہناں نُوں آکھیا تُسی کِیہ لبّھدے ہو؟ اوہناں اوہنوں آکھیا اے ربّی (جِہدا مطلب ایہہ اے اَے اُستاد) تُوں کِتّھے رہناں ایں؟

³⁹اوس اوہناں نُوں آکھیا آؤ ویکھو۔ سو اوہ آئے تے جِتّھے اوہ رہندا سی ویکھیا تے اوس دِہاڑے اوہدے کول رہئے۔ اوہ دسویں کُو گھنٹے سی۔

⁴⁰اوہناں دوہاں وِچوں جیہڑے یُوحنّا کولوں سُن کے اوہدے مگر ٹُر پئے سن اِک شمعُون پطرس دا بھرا اندریاس سی۔

⁴¹اوس پہلاں اپنے سَکّے بھرا شمعُون نُوں لَبّھ کے اوہنوں آکھیا پئی اساں نُوں خُرستُس یعنی مسِیح مل گیا اے۔

⁴²تے اوہ اوہنوں یِسُوع کول لِیائیا۔ یِسُوع اوہدے ولّ ویکھ کے آکھیا تُوں یُوحنّا دا پُتر شمعُون ایں۔ تُوں کیفا یعنی پطرس اے اکھوائیں گا۔

⁴³اگلے بَھلک اوہ گلِیل دے دیس نُوں جانا چاہندا سی۔ تے فِلپُّس نُوں لَبّھیا تے یِسُوع اوہنوں آکھیا میرے مگر ٹُر پَو۔

⁴⁴فِلپُّس بَیت صَیدا دا سی جیہڑا اندریاس تے پطرس دا شہر اے۔

⁴⁵فِلپُّس نیں نتنی ایل نُوں لَبّھ کے اوہنوں آکھیا۔ جِہدی گلّ توریت وِچ مُوسیٰ تے نبیاں نیں لِکھی ہوئی اے اوہنوں اساں لَبّھ لیا اے۔ اوہ یِسُوع ناصری یُوسف دا پُتر اے۔

⁴⁶تے نتنی ایل اوہنوں آکھیا کِیہ ناصرۃ وِچوں کوئی چنگی شے نِکل سکدی اے؟ فِلپُّس اوہنوں آکھیا۔ آ تے ویکھ لے۔

⁴⁷یِسُوع نتنی ایل نُوں اپنے ولّ آؤندیاں ویکھ کے اوہدی بابت آکھیا۔ ویکھو ایہہ اصل اِسرائیلی اے جِہدے وِچ مکر نئیں۔

⁴⁸نتنی ایل اوہنوں آکھیا تُوں میرا کِتّھوں دا واقف ایں؟ یِسُوع اوہنوں جواب دِتّا۔ فِلپُّس دے تینُوں سَدّن توں پہلاں جدوں تُوں ہنجیر دے بُوٹے ہیٹھ سَیں مَیں تینُوں ویکھ لیا سی۔

⁴⁹نتنی ایل اوہنوں جواب دِتّا۔ اَے ربّی تُوں تے خُدا دا پُتر ایں۔ تُوں تے اِسرائیل دا بادشاہ ایں۔

⁵⁰یِسُوع اوہنوں جواب دِتّا تُوں ایس لئی اِیمان لیاؤنا ایں پئی مَیں تینُوں آکھیا پئی مَیں تینُوں ہنجیر دے بُوٹے ہیٹھ ویکھیا؟ تُوں ایہناں توں وی وَھڈِیاں گلّاں ویکھیں گا۔