Read Western Panjabi یُوحنّا 11 Bible Online

یُوحنّا 11 - Western Panjabi bible

یُوحنّا 11

¹اِک بندہ لعزر کر کے بیمار سی۔ جیہڑا مریم تے اوہدی بھین مرتھا دے پِنڈ بَیت عَنِیاہ دا سی۔

²تے ایہہ مریم اوہ سی۔ جِس خُداوند نُوں عِطر مَلیا تے اوہدے پَیر اپنے والاں نال پُونجھے سن۔ اوسے دا بھرا لعزر ماندا سی۔

³تَد اوہدی بھیناں اوہنوں ایہہ سنیہا گھلّیا۔ پئی اَے خُداوند ویکھ جِہنُوں تُوں پیار کرنا ایں اوہ ماندا اے۔

⁴یِسُوع ایہہ سُن کے آکھیا ایہہ بیماری مَوت دی نئیں اے پر خُدا دے جلال لئی۔ تاں جو خُدا دے پُتر دا اوہدے کر کے جلال ہوئے۔

⁵مرتھا نُوں تے اوہدی بھین تے لعزر نُوں یِسُوع پیار کر دا سی۔

⁶سو جد اوس سُنیا پئی اوہ ماندا اے تے جِتّھے اودُوں سی اوتھے دو دِن رہیا۔

⁷اوہدے پِچّھوں یِسُوع شاگِرداں نُوں آکھن لگّا چلّو یہُودیہ نُوں فیر چلّئے۔

⁸شاگِرد اوہنوں آکھن لگّے اَے ربّی یہُودی ہُنے تینُوں پتّھر مارنا چاہندے سن تے تُوں فیر اوتھے جانا ایں؟

⁹یِسُوع جواب دِتّا دِن دے باراں گھینٹے نئیں ہوندے جے کوئی دِن نُوں ٹُرے تے ٹھوکر نئیں کھاندا کیوں جو اوہ ایس دُنیا دا چانن ویکھ دا اے۔

¹⁰پر جے کوئی رات نُوں ٹُرے تے ٹھوکر کھاندا اے کیوں جو اوہدے اندر چانن نئیں اے۔

¹¹ایہہ گلّاں آکھ کے اوہناں نُوں آکھن لگّا پئی ساڈا دوست لعزر سَوں گیا اے۔ پر مَیں جانا آں پئی اوہنوں جگاواں۔

¹²تَد شاگِرداں نیں اوہنوں آکھیا۔ اَے خُداوندا جے سَوں گیا اے تے چَنگا بھلا ہو جائے گا۔

¹³یِسُوع نیں اوہدے مرن ولّوں آکھیا سی پر اوہناں سمجھیا اوس نِیندر دے آرام دی گلّ کِیتی اے۔

¹⁴تَد فیر یِسُوع اوہناں نُوں صاف آکھیا پئی لعزر مر گیا اے۔

¹⁵تے مَیں تُہاڈے لئی ایس گلّے خُوش آں پئی مَیں اوتھے نئیں ساں تاں جو تُسی اِیمان لیاؤ۔ پر چلّو اوہدے کول چلّئے۔

¹⁶تَد تُوما جِہنُوں جوڑا آکھدے نیں اپنے نال دے شاگِرداں نُوں آکھیا آؤ اسی وی چلّئے تاں جو اوہدے نال مریئے۔

¹⁷تَد یِسُوع آ کے معلُوم کِیتا پئی اوہنوں قبر وِچ پَیاں چار دِن ہوئے نیں۔

¹⁸تے بَیت عَنِیاہ یرُوشلِیم دے نیڑے سی۔ یعنی ڈیڑھ کوہ دے نیڑے تریڑے۔

¹⁹تے بتھیرے یہُودی مرتھا تے مریم کول اوہناں دے بھرا دی مُکانیں آئے ہوئے سن۔

²⁰جد مرتھا سُنیا پئی یِسُوع آیا اے اگّوں والی مِلن گئی۔ پر مریم گھر ای رہی۔

²¹تَد مرتھا یِسُوع نُوں آکھیا اَے خُداوند جے تُوں ایتھے ہوندوں تے میرا بھرا نا مر دا۔

²²تے ہُن وی مَیں جاننی آں پئی جو کُجھ تُوں خُدا کولوں منگیں خُدا تینُوں دیوے گا۔

²³یِسُوع اوہنوں آکھیا تیرا بھرا فیر جی اُٹھے گا۔

²⁴مرتھا اوہنوں آکھیا مَیں جاننی آں پئی اوڑک دے دِہاڑے قیامت نُوں اوہ جی اُٹھے گا۔

²⁵یِسُوع اوہنوں آکھیا قیامت تے زِندگی مَیں آں۔ جیہڑا میرے اُتّے اِیمان لیاؤندا اے بھانویں اوہ مر جائے تَد وی جِیئے گا۔

²⁶تے جیہڑا کوئی جِیوندا اے تے میرے اُتّے اِیمان لیاؤندا اے کدی وی نئیں مرے گا۔ تُوں ایہہ گلّ مننی ایں؟

²⁷اوہ اوہنوں آکھن لگّی آں خُداوند مَیں مَن لیا اے پئی تُوں مسِیح خُدا دا پُتر ایں جیہڑا دُنیا وِچ آؤن والا اے۔

²⁸تے ایہہ آکھ کے ٹُر گئی تے اپنی بھین مریم نُوں چُپ کِیتیاں سَدّ کے آکھن لگّی۔ اُستاد آگیا اے تے تینُوں سدّدا اے۔

²⁹جد اوس ایہہ گلّ سُنی تَد چھیتی اُٹھ کے اوہدے کول گئی۔

³⁰(تے یِسُوع اجے پِنڈ وِچ نئیں سی اَپڑیا۔ پر جِتّھے اوہنوں مرتھا مِلی سی اوسے تھاں سی)

³¹سو اوہ یہُودی جیہڑے اوہدے نال گھر وِچ سن تے اوہدے ولّ مُکانی آئے سن۔ جد مریم نُوں ویکھیا پئی اوہ چھیتی اُٹھ کے باہر گئی اے۔ ایہہ سمجھ کے اوہدے مگر ٹُر پئے پئی اوہ قبر اُتّے رون جاندی اے۔

³²سو مریم جد اوتھے آئی جِتّھے یِسُوع سی۔ اوہنوں ویکھ دیاں ای ایہہ آکھ کے اوہدی پَیرِیں ڈِگّ پئی تے آکھن لگّی خُداوند جے تُوں ایتھے ہوندوں تے میرا بھرا ناں مر دا۔

³³جد یِسُوع اوہنوں روندیاں تے اوہدے نال دے یہُودِیاں نُوں روندیاں ویکھیا تے اوہ رُوح وِچ رنج ہویا تے اپنے آپ وِچ گھابریا۔

³⁴تے آکھیا تُساں اوہنوں کِتّھے دھریا اے؟ اوہ اوہنوں آکھن لگّے اَے خُداوند چَل تے ویکھ۔

³⁵یِسُوع دے اتھرُو وَگ پئے۔

³⁶تَد یہُودِیاں آکھیا ویکھو اوہ اوہنوں کِنّاں پیار کر دا سی۔

³⁷پر اوہناں وِچوں کئیاں آکھیا۔ ایہہ بندے جِس اَنھے دِیاں اَکھّیاں کھول دِتّیاں اینا نا کر سکیا پئی ایہہ نا مر دا؟

³⁸تَد فیر یِسُوع اپنے آپ وِچ غم کر دا قبر اُتّے آیا۔ اوہ اِک غار سی تے اوہدے اگّے پتّھر رکھیا ہویا سی۔

³⁹یِسُوع آکھیا پتّھر نُوں ہٹا دیو۔ مرتھا اوس موئے ہوئے دی بھین اوہنوں آکھن لگّی۔ اَے خُداوند ہُن تے اوہدے وِچوں مُشک آؤندی اے۔ کیوں جو اَج اوہنوں چوتھا دِن ہوگیا اے۔

⁴⁰یِسُوع اوہنوں آکھیا مَیں تینُوں نئیں سی آکھیا جے تُوں اِیمان لِیاویں تے خُدا دا جلال ویکھیں گی؟

⁴¹سو اوہناں پتّھر نُوں ہٹایا تے یِسُوع اَکھّیاں اُتانہہ کر کے آکھیا۔ اَے باپ مَیں تیرا شُکر کرنا ہاں پئی تُوں میری سُنی۔

⁴²تے مَینُوں تے پتا سی پئی تُوں ہمیش میری سُندا ایں۔ پر لوکاں لئی جیہڑے میرے آلے دوالے کھلوتے ہوئے نیں مَیں ایہہ آکھیا تاں جو اِیمان لیاؤن پئی تُوں مَینُوں گھلّیا اے۔

⁴³تے ایہہ آکھ کے بڑے زور نال آکھیا اَے لعزر باہر آ۔

⁴⁴مُردہ پَٹّیِاں نال ہتّھ پَیر بَدّھے ہوئے نِکل آیا تے اوہدا مُنھ رُومال نال وھلیٹیا ہویا سی۔ یِسُوع اوہناں نُوں آکھیا۔ اوہنوں کھولو تے اوہنوں جان دیو۔

⁴⁵تَد بتھیرے یہُودی جیہڑے مریم دے نال آئے ہوئے سن۔ جو کُجھ اوس کِیتا سی ویکھ کے اوہدے اُتّے اِیمان لیا وے۔

⁴⁶پر کئی اوہناں وِچوں فرِیسیاں دے کول گئے تے جو کُجھ یِسُوع کِیتا سی اوہناں نُوں دسیا۔

⁴⁷تَد سردار کاہِناں تے فرِیسیاں اپنی جماعت اکٹّھی کر کے آکھیا۔ اسی کِیہ کرنے آں؟ ایہہ بندہ تے بڑے مُعجزے کر دا اے۔

⁴⁸اوہنوں اسی ایویں چھڈ دئیے تے سارے لوک اوہدے اُتّے اِیمان لیاؤن گے۔ تے رُومی آ کے ساڈا مُلک تے قوم کھولین گے۔

⁴⁹اوہناں وِچوں اِک کائفا کر کے اوس ورھے دے سردار کاہِن نیں اوہناں نُوں آکھیا تُسی کُجھ نئیں جان دے۔

⁵⁰تے نا خیال کر دے ہو پئی تُہاڈے لئی چَنگا اے پئی سارے لوکاں دے بدلے اِک بندہ مر جائے تے ساری قوم برباد نا ہوئے۔

⁵¹ایہہ اوس اپنے ولّوں نئیں سی آکھیا۔ پر اوس ورھے دا سردار کاہِن ہو کے اوس اگیتری خبر دِتّی پئی یِسُوع ایس قوم دے بدلے مرے گا۔

⁵²تے صرف اوس قوم دے بدلے نئیں۔ پر ایس گلّے وی پئی خُدا دے پُتراں نُوں جیہڑے کھِلّرے پُلّرے نیں اکٹّھیاں کر کے اِک بنا دے۔

⁵³سو اوس دِن توں اوہناں صلاح کِیتی پئی اوہنوں مار سُٹّن۔

⁵⁴تَد یِسُوع اوہدے مگروں یہُودِیاں وِچ کُھلا نا پِھریا سو اوہ اوتھوں ٹُر کے بیابان دے نیڑے دے مُلک وِچ اِفرائیم کر کے اِک شہر وِچ ٹُر گیا تے شاگِرداں نال اوتھے رہیا۔

⁵⁵تے یہُودِیاں دی عید فسح نیڑے سی تے بُہت لوک فسح دے پہلاں پِنڈاں توں یرُوشلِیم نُوں گئے تاں جو اپنے آپ نُوں پاک کر لین۔

⁵⁶تَد اوہ یِسُوع نُوں لبّھدے سن تے ہیکل وِچ کھلو کے آپو وِچ آکھن لگّے۔ پئی تُہاڈا کِیہ خیال اے اوہ عید وِچ نئیں آئے گا؟

⁵⁷تے سردار کاہِناں تے فرِیسیاں حُکم دِتّا سی پئی جے کِسے نُوں معلُوم ہوئے پئی اوہ کِتّھے اے تے خبر دیوے تاں جو اوہ اوہنوں پھڑ لین۔