Read Western Panjabi یُوحنّا 12 Bible Online

یُوحنّا 12 - Western Panjabi bible

یُوحنّا 12

¹تَد یِسُوع عید فسح توں چھ دِن پہلاں بَیت عَنِیاہ وِچ آیا جِتّھے لعزر سی جِہنُوں یِسُوع مُردیاں وِچوں جوالیا سی۔

²تے اوتھے اوہناں اوہدی روٹی ورجی۔ تے مرتھا سیوا کر دی سی پر لعزر اوہناں وِچوں اِک سی جیہڑے اوہدے نال کھان بَیٹھے سن۔

³تَد مریم ادھ سیر خالص تے بڑا مہنگا وال چھڑ دا عِطر لے کے یِسُوع دے پیراں نُوں مَلیا تے اپنے والاں نال اوہدے پَیر پُونجھے۔ تے گھر عِطر دی خوشبو نال بھر گیا۔

⁴تَد اوہدے شاگِرداں وِچوں اِک جَنا یہُوداہ اِسکریُوتی جِس اوہنوں پھڑانا سی آکھن لگّا۔

⁵پئی ایہہ عِطر تَرے سَو دینار توں ویچ کے مَسکِیناں نُوں کیوں نا دِتّا گیا؟

⁶ایہہ گلّ اوس ایس کر کے نئیں سی آکھی پئی اوہنوں مَسکِیناں دا فِکر سی پر ایس لئی پئی اوہ چور سی تے بٹوا کول رکھ کے جو کُجھ اوہدے وِچ ہوندا سی اوہ لے لَیندا سی۔

⁷تَد یِسُوع آکھیا ایہہ میرے دفن دے دِن لئی ایہنوں رکھن دے۔

⁸مَسکِین تے ہر ویلے تُہاڈے کول نیں پر مَیں ہر ویلے تُہاڈے نال نئیں آں۔

⁹تَد یہُودِیاں وِچوں بُہتے لوک جان گئے پئی اوہ اوتھے اے تے اوہ آئے۔ نا نِرا یِسُوع دے واسطے پر ایس واسطے پئی لعزر نُوں وی ویکھن۔ جِہنُوں اوس مُردیاں وِچوں جوالیا سی۔

¹⁰پر سردار کاہِناں صلاح کِیتی پئی لعزر نُوں وی مار سُٹّیئے۔

¹¹کیوں جو اوہدے سبّب کر کے یہُودِیاں وِچوں بتھیرے ٹُر گئے تے یِسُوع اُتّے اِیمان لیاندا۔

¹²اگلے دِن بتھیرے لوکاں جیہڑے عید اُتّے آئے ہوئے سن۔ جد سُنیا پئی یِسُوع یرُوشلِیم نُوں آؤندا اے۔

¹³کھجُوراں دِیاں ٹہنِیاں لیّاں تے اگّوں والی اوہنوں مِلن لئی نِکلے تے زور نال آکھن لگّے ہوشعنا! دھنّ اوہ اے جیہڑا خُداوند دے ناں اُتّے آؤندا اے۔ اِسرائیل دا بادشاہ۔

¹⁴تے یِسُوع چھوٹا جِہیا کھوتا لَبّھ کے اوہدے اُتّے چڑھ بَیٹھا۔ جیویں لِکھیا ہویا اے۔

¹⁵اَے صِیُّون دی دِھی نا ڈر ویکھ تیرا بادشاہ کھوتے دے بچّے اُتّے چڑھیا ہویا آؤندا اے۔

¹⁶اوہدے شاگِرد پہلاں اوہناں گلّاں نُوں نا سمجھے۔ پر جد یِسُوع اپنے جلال نُوں پہنچ گیا سی۔ تَد اوہناں نُوں یاد آیا پئی ایہہ گلّاں اوہدی بابت لِکھیاں ہویاں سن۔ تے نالے ایہہ پئی اوہناں اوہدے نال ایہہ سلُوک کِیتا سی۔

¹⁷تَد اوہناں لوکاں جیہڑے اوس ویلے اوہدے نال سن جد اوس لعزر نُوں قبروں باہر سدّیا تے مُردیاں وِچوں جوالیا سی گواہی دِتّی۔

¹⁸تے لوک ایس کر کے اوہنوں اگّوں والی مِلن گئے پئی اوہناں سُنیا سی پئی اوس ایہہ مُعجزہ کِیتا سی۔

¹⁹تَد فریسی آپو وِچ آکھن لگّے ویکھو تے تُہاتھوں کُجھ نئیں بن دا ویکھو دُنیا اوہدے مگر ٹُر پئی اے۔

²⁰تے اوہناں وِچوں جیہڑے عید اُتّے بندگی کرن گئے کئی یُونانی سن۔

²¹تَد اوہ فِلپُّس کول آئے جیہڑا گلِیل دے بَیت صَیدا دا سی تے عرض کِیتی جناب اسی یِسُوع نُوں ویکھنا چاہنے آں۔

²²فِلپُّس آ کے اندریاس نُوں دسیا۔ اندریاس تے فِلپُّس نیں آ کے یِسُوع نُوں خبر دِتّی۔

²³یِسُوع نیں اوہناں نُوں جواب دِتّا ویلا آگیا اے پئی اِبنِ آدم دا جلال ہوئے۔

²⁴مَیں تُہانوں سَچ سَچ آکھنا آں پئی جِنّاں چِر کنک دا دانہ زمین وِچ پَے کے نا مرے اوہ اکلّا ای رہندا اے۔ پر جے مر جاوے تے بوہتا پَھل لیاؤندا اے۔

²⁵اوہ جیہڑا اپنی جان پیاری سمجھدا اے۔ اوہ اوہنوں گواؤندا اے۔ تے اوہ جیہڑا اپنی جان نال ایس دُنیا وِچ وَیر رکھدا اے سدا دی زِندگی تِیکر اوہنوں سانبھی رکھّے گا۔

²⁶جے کوئی میری سیوا کرے تے اوہ میرے مگر آئے۔ تے جِتّھے مَیں آں میری سیوا کرن والا وی اوتھے ہوئے گا۔ جے کوئی میری سیوا کرے تے باپ اوہدی عِزّت کرے گا۔

²⁷ہُن میرا جی گھبراؤندا اے تے مَیں کِیہ آکھاں؟ پئی اَے باپ مَینُوں ایس گھڑیوں بچا۔ پر مَیں ایسے سبّب ایس گھڑی تِیکر آیا۔

²⁸اَے باپ اپنے ناں نُوں جلال دے۔ تَد اسمانوں اواز آئی پئی مَیں جلال دِتّا اے تے فیر وی جلال دیاں گا۔

²⁹تَد اوہ لوک جیہڑے کول کھلوتے سُندے سن آکھن لگّے پئی بدّل گجّیا اے۔ ہورناں آکھیا فرِشتہ اوہدے نال بولیا اے۔

³⁰یِسُوع جواب دِتّا ایہہ اواز میرے واسطے نئیں پر تُہاڈے واسطے آئی اے۔

³¹ہُن ایس دُنیا دی عدالت ہوندی اے۔ ہُن ایس دُنیا دا سردار باہر کڈھیا جائے گا۔

³²تے مَیں جے زمین اُتّوں اُچّا کِیتا جاواں تے ساریاں نُوں اپنے ولّ کِھچّاں گا۔

³³ایہہ آکھ کے اوس اِشارے نال دسیا پئی اوس کیہڑی مَوت نال مرنا سی۔

³⁴ایس گلّ اُتّے لوکاں اوہنوں جواب دِتّا پئی اساں شریعت وِچوں سُنیا پئی مسِیح سدا تِیکر رہے گا۔ تے تُوں کِیویں آکھناں ایں پئی اِبنِ آدم دا اُچّا کِیتا جانا ضرُور اے؟ اوہ اِبنِ آدم کون اے؟

³⁵تَد یِسُوع اوہناں نُوں آکھیا۔ اجے تھوڑا چِر چانن تُہاڈے وِچ اے۔ جِنّاں چِر تُہاڈے وِچ چانن اے ٹُرو پِھرو اجیہا نا ہوئے پئی ہنیرا تُہانوں آگھیرے۔ تے ہنیرے وِچ ٹُرن والے نُوں پتا نئیں لگ دا پئی کِتّھے جاندا اے۔

³⁶جِنّاں چِر چانن تُہاڈے وِچ اے چانن نُوں مَنّو تاں جو تُسی چانن دے پُتر بن جاؤ۔ یِسُوع ایہہ گلّاں آکھیاں تے جا کے اوہناں کولوں چُھپ گیا۔

³⁷پر بھانویں اوس اینِیاں کراماتاں اوہناں دے سامھنے وکھائیاں سن تَد وی اوہ اوہدے اُتّے اِیمان نا لیائے۔

³⁸تاں جو یسعیاہ نبی دا کلام جیہڑا اوس آکھیا سی پُورا ہوئے پئی اَے خُداوند ساڈے سنیہے نُوں کِس مَنّیا۔ تے خُداوند دی بانہہ کِہدے اُتّے ظاہر ہوئی۔

³⁹اوہ ایس کر کے اِیمان نئیں لیا سکے کیوں جو یسعیاہ نیں فیر آکھیا۔

⁴⁰اوس اوہناں دِیاں اَکھّیاں اَنھیاں کِیتیاں نیں تے اوہناں دے دِل سخت کِیتے۔ کِتے ایویں نا ہوئے پئی اوہ اَکھّیاں نال ویکھن تے دِل نال سمجھن تے مُڑن تے مَیں اوہناں نُوں ولّ کراں۔

⁴¹یسعیاہ ایہہ گلّاں آکھیاں کیوں جو اوس اوہدا جلال دیکھیا تے اوس اوہدیاں گلّاں کِیتیاں۔

⁴²تَد وی سرداراں وِچوں بتھیریاں نیں اوہدے اُتّے اِیمان لیاندا پر فرِیسیاں دے ڈر دے مارِیاں اِقرار نا کِیتا۔ اجیہا نا ہوئے۔ پئی جماعتوں کڈھے جان۔

⁴³کیوں جو اوہ بندیاں دی وڈیائی نُوں خُدا دی وڈیائی نالوں وَدّھ پیار کر دے سن۔

⁴⁴یِسُوع اُچّی اُچّی آکھیا پئی اوہ جیہڑا میرے اُتّے اِیمان لیاؤندا اے میرے اُتّے نئیں پر میرے گھلّن والے اُتّے اِیمان لیاؤندا اے۔

⁴⁵تے اوہ جیہڑا مَینُوں ویکھدا اے میرے گھلّن والے نُوں ویکھدا اے۔

⁴⁶مَیں دُنیا وِچ چانن ہو کے آیا آں تاں جو جیہڑا کوئی میرے اُتّے اِیمان لیاؤندا اے۔ ہنیرے وِچ نا رہے۔

⁴⁷تے جے کوئی میرِیاں گلّاں سُنے تے نا مَنّے مَیں اوہدی عدالت نئیں کر دا کیوں جو مَیں دُنیا دی عدالت کرن واسطے نئیں آیا پر دُنیا نُوں بچان دے واسطے۔

⁴⁸اوہ جیہڑا مَینُوں رَدّ کر کے میرِیاں گلّاں نُوں نئیں قبولدا اوہدا اِک عدالت کرن والا تے اے۔ کلام جیہڑا مَیں آکھیا۔ اوہ ای اوڑک دے دِن اوہدی عدالت کرے گا۔

⁴⁹کیوں جو مَیں اپنے ولّوں نئیں بولیا پر باپ جِس مَینُوں گھلّیا اوس مَینُوں حُکم دِتّا اے پئی مَیں کِیہ آکھاں تے کِیہ بولاں۔

⁵⁰تے مَیں جاننا آں پئی اوہدا حُکم سدا دی زِندگی اے۔ سو جو کُجھ مَیں بولنا آں جیویں باپ نیں مَینُوں آکھیا اے اوسے طرح بولنا آں۔