Read Western Panjabi یُوحنّا 13 Bible Online

یُوحنّا 13 - Western Panjabi bible

یُوحنّا 13

¹عِیدِ فسح توں پہلاں جد یِسُوع ایہہ جان لیا پئی میری گھڑی آ پجی اے پئی دُنیا توں باپ کول جاواں اوہ اوہناں اپنیاں لوکاں نُوں جیہڑے دُنیا وِچ سن جیویں پیار کر دا سی اخِیر تِیکر پیار کر دا رہیا۔

²تے جد ابلیس شمعُون دے پُتر یہُوداہ اِسکریُوتی دے دِل وِچ ایہہ پایا سی پئی اوہ اوہنوں پھڑا دیوے۔

³تے رات دی روٹی کھاندیاں ہویاں یِسُوع ایہہ جان کے پئی باپ نیں سبھ کُجھ میرے ہتّھ وِچ دِتّا تے مَیں خُدا ولّوں آیا تے خُدا کول جاناں آں۔

⁴کھانے توں اُٹھیا تے اپنے کپڑے لاہے تَد رُومال لے کے لکّ نال بنھیا۔

⁵تے فیر بھانڈے وِچ پانی پا کے شاگِرداں دے پَیر دھون لگّا۔ تے اوس رُومال نال جیہڑا لکّ دوالے بَدّھا ہویا سی پُونجھن لگّا۔

⁶سو اوہ شمعُون پطرس تِیکر آیا۔ اوہ اوہنوں آکھن لگّا اَے خُداوند تُوں میرے پَیر دھونا ایں؟

⁷یِسُوع اوہنوں جواب دِتّا۔ جو کُجھ مَیں کرنا آں اجے تُوں نئیں جان دا پر میرے مگروں تُوں سمجھیں گا

⁸پطرس اوہنوں آکھیا تُوں میرے پَیر کَدے نا دھوئیں گا۔ یِسُوع اوہنوں جواب دِتّا جے مَیں تینُوں نا دھوواں تاں میرے نال تیرا کوئی حِصّہ نئیں اے۔

⁹شمعُون پطرس اوہنوں آکھیا اَے خُداوند تَد نِرے میرے پَیر ای نئیں پر ہتّھ تے سِر وی دھو دے۔

¹⁰یِسُوع اوہنوں آکھیا اوہ جِس نہا لیا اے اوہنوں بِناں پَیر دھون دے ہور کُجھ لوڑ نئیں۔ پر بالکل پاک اے۔ تے تُسی صاف ہو پر سارے نئیں۔

¹¹کیوں جو اوہ اپنے پھڑاں والے نُوں جان دا سی۔ تَدے اوس آکھیا پئی تُسی سارے پاک نئیں ہو۔

¹²سو جد اوس اوہناں دے پَیر دھو لَئے تے اپنے کپڑے پا لَئے تَد فیر بَیہہ کے اوہناں نُوں آکھن لگّا۔ تُسی سمجھدے ہو پئی مَیں تُہاڈے نال کِیہ کِیتا اے؟

¹³تُسی مَینُوں اُستاد تے خُداوند آکھدے ہو۔ چَنگا آکھدے ہو۔ کیوں جو مَیں آں وی۔

¹⁴سو جد مَیں خُداوند تے اُستاد ہو کے تُہاڈے پَیر دھوتے نیں۔ تے تُہانوں وی چاہیدا اے پئی اِک دُوجے دے پَیر دھوؤ۔

¹⁵کیوں جو مَیں تُہانوں نمونہ دِتّا اے پئی جیویں مَیں تُہاڈے نال کِیتا تُسی وی کریا کرو۔

¹⁶مَیں تُہانوں سَچ سَچ آکھنا آں پئی نوکر اپنے مالک نالوں وَڈا نئیں اے تے نا گھلّیا ہویا اپنے گھلّن والے نالوں۔

¹⁷جے تسِیں ایہہ گلّاں جان دے ہو تے اوہناں اُتّے چلدے ہو تاں مُبارک اوہ۔

¹⁸مَیں تُہاڈی سبھناں دی گلّ نئیں کر دا جِنہاں نُوں مَیں چُنیا اے۔ اوہناں نُوں مَیں جاننا آں۔ پر ایہہ ایس لئی اے پئی پہلوں توں لِکھیا پُورا ہوئے پئی جیہڑا میری روٹی کھاندا اے اوس مَینُوں لَت ماری۔

¹⁹ہُن اوس گلّ دے ہون توں پہلاں مَیں تُہانوں خبر دینا آں تاں جو جد ہوئے۔ تُسی مَنّوں پئی مَیں اوہ ای آں۔

²⁰مَیں تُہانوں سَچ سَچ آکھنا آں جے کوئی میرے گھلّے ہوئے نُوں قبول کرے مَینُوں قبول کر دا اے تے اوہ جیہڑا مَینُوں قبول کر دا اے میرے گھلّن والے نُوں قبول کر دا اے۔

²¹ایہہ آکھدیاں ای یِسُوع دا جی گھبرایا تے ایہہ گواہی دِتّی۔ مَیں تُہانوں سَچ سَچ آکھنا آں پئی تُہاڈے وِچوں اِک مَینُوں پھڑوائے گا۔

²²شاگِرد ایس شُبے وِچ ہو کے پئی اوہ کدی گلّ کر دا اے اِک دُوجے ولّ ویکھن لگّے۔

²³اوہدے شاگِرداں وِچوں اِک جِہنُوں یِسُوع پیار کر دا سی۔ کھانا کھاندیاں یِسُوع دی ہِک ولّ سِر جُھکایا ہویا سی۔

²⁴ایس لئی شمعُون پطرس اوہنوں سینت ماری پئی سانُوں دس اوہ کِہدی گلّ کر دا اے۔

²⁵اوس یِسُوع دی ہِک دا اُنجے ڈھاسنا لاکے اوہنوں آکھیا اَے خُداوند اوہ کون اے؟

²⁶سو یِسُوع جواب دِتّا اوہ اوہی اے جِہنُوں مَیں بُرکی بھیوں کے دیاں گا۔ تَد بُرکی نُوں بھیوں کے اوس شمعُون اِسکریُوتی دے پُتر یہُوداہ نُوں دِتّی۔

²⁷تے بُرکی لین دے پِچّھوں اوسے ویلے شیطان اوہدے اندر وڑ گیا۔ تَد یِسُوع اوہنوں آکھیا جو کُجھ تُوں کرنا اے سو چھیتی کر۔

²⁸پر کھانے اُتّے بیہن والیاں وِچوں کوئی نئیں سی جان دا پئی اوس ایہہ کاہدے لئی اوہنوں آکھیا۔

²⁹کئیاں سمجھیا پئی ایس کر کے پئی یہُوداہ کول بٹوا اے یِسُوع اوہنوں آکھیا ہوئے گا پئی جو کُجھ سانُوں عید لئی چاہیدا اے سو مُل لَئے۔ یاں ایہہ پئی غرِیباں نُوں کُجھ دیوے۔

³⁰سو اوہ بُرکی لے کے جھٹ باہر نِکل گیا۔ تے اوہ رات دا ویلا سی۔

³¹جد اوہ باہر نِکل گیا تَد یِسُوع آکھن لگّا پئی ہُن اِبنِ آدم نُوں جلال مِلیا اے تے خُدا نُوں اوہدے وِچ جلال مِلیا اے۔

³²تے خُدا اوہنوں وی اپنے وِچ جلال دیوے گا۔ تے چھیتی اوہنوں جلال دیوے گا۔

³³اَے بچّیو اجے تھوڑا چِر مَیں تُہاڈے نال آں۔ تُسی مَینُوں لَبّھو گے تے جیویں مَیں یہُودِیاں نُوں آکھیا سی پئی جِتّھے مَیں جاناں آں تُسی نئیں آسکدے ہُن تُہانوں وی آکھنا آں۔

³⁴مَیں تُہانوں اِک نواں حُکم دینا آں پئی تُسی اِک دُوجے نُوں پیار کرو۔ جیویں مَیں تُہانوں پیار کِیتا۔

³⁵ایس گلّوں سارے جانن گے پئی تُسی میرے شاگِرد ہو جے آپو وِچ پیار رکھو۔

³⁶شمعُون پطرس اوہنوں آکھیا اَے خُداوند تُوں کِتّھے جاناں ایں؟ یِسُوع جواب دِتّا پئی جِتّھے مَیں جاناں آں تُوں ہُن میرے مگر نئیں آسکدا پر پِچّھوں تُوں میرے مگر آویں گا۔

³⁷پطرس اوہنوں آکھیا اے خُداوند مَیں ہُنے تیرے مگر کیوں نئیں آسکدا؟ مَیں تے تیرے بدلے اپنی جان دیاں گا۔

³⁸یِسُوع جواب دِتّا تُوں اپنی جان میرے بدلے دیں گا؟ مَیں تینُوں سَچ سَچ آکھنا آں پئی کُکّڑ بانگ نا دے گا جد تِیکر تُوں تَرے واری میرا اِنکار نا کریں۔