Read Western Panjabi یُوحنّا 19 Bible Online

یُوحنّا 19 - Western Panjabi bible

یُوحنّا 19

¹سو اوس ویلے پِیلاطُس یِسُوع نُوں لے کے کولڑے مروائے۔

²تے سپاہیاں نیں کنڈیاں دا تاج بنا کے اوہدے سِر اُتّے رکھیا تے نالے اوہنوں قِرمزی چوغہ پایا۔

³تے اوہدے کول آ کے آکھن لگّے اَے یہُودِیاں دے بادشاہ سلام۔ تے اوہنوں دَھپّے مارے۔

⁴تَد پِیلاطُس فیر باہر جا کے اوہناں نُوں آکھیا ویکھو مَیں اوہنوں تُہاڈے کول لیاؤنا واں تاں جو تُہانوں معلُوم ہوئے پئی مَیں اوہدے وِچ کوئی جُرم نئیں ویکھدا۔

⁵تَد یِسُوع کنڈیاں دا تاج تے قِرمزی چوغہ پایاں ہویاں باہر آیا۔ تے پِیلاطُس اوہناں نُوں آکھیا ویکھو ایس بندے نُوں۔

⁶سو جد سردار کاہِناں تے پیادیاں اوہنوں ویکھیا اوہناں اُچّی اُچّی آکھیا۔ صلِیب دے صلِیب۔ پِیلاطُس اوہناں نُوں آکھیا تُسی آپے لوؤ تے اوہنوں صلِیب دیو۔ کیوں جو مَیں اوہدے وِچ کوئی جُرم نئیں ویکھدا۔

⁷یہُودِیاں اوہنوں جواب دِتّا پئی اسی شریعت والے آں تے شریعت دے سببّوں اوہ قتل کرن دے لائق اے ایس لئی پئی ایس اپنے آپ نُوں خُدا دا پُتر بنایا۔

⁸سو جد پِیلاطُس ایہہ گلّ سُنی تے ہور وی ڈر گیا۔

⁹تے کچہری دے اندر فیر گیا تے یِسُوع نُوں آکھیا پئی تُوں کِتّھوں دا ایں؟ پر یِسُوع اوہنوں جواب نا دِتّا۔

¹⁰پِیلاطُس اوہنوں آکھیا میرے نال تُوں نئیں بولدا؟ تُوں نئیں جان دا۔ پئی میرے وَس وِچ اے تینُوں چھڈنا تے میرے وَس وِچ اے تینُوں صلِیب دینا؟

¹¹یِسُوع اوہنوں جواب دِتّا پئی تیرا میرے اُتّے کُجھ وی وَس نا ہوندا جے تینُوں اُتّوں دِتّا نا جاندا۔ ایس لئی جِس مَینُوں تیرے حوالے کِیتا اوہدا وَدّھ گُناہ اے۔

¹²ایس گلّے پِیلاطُس اوہنوں چھڈن دا موقع لَبّھیا۔ پر یہُودِیاں اُچّی اُچّی آکھیا پئی جے تُوں اوہنوں چھڈ دیں گا تے تُوں قَیصر دا دوست نئیں ایں۔ ہر اِک جیہڑا اپنے آپ نُوں بادشاہ بناندا اے قَیصر دے خلاف آکھدا اے۔

¹³تَد پِیلاطُس ایہہ گلّاں سُن کے یِسُوع نُوں باہر لے آیا تے اِک تھاں جِہدا ناں چبُوترہ تے عِبرانی بولی وِچ گبّتا سی اے تخت اُتّے بَیہہ گیا۔

¹⁴تے فسح دی تیاری سی تے چھیویں کُو گھڑی سی تے اوہ یہُودِیاں نُوں آکھن لگّا ویکھو اپنا بادشاہ۔

¹⁵پر اوہ اُچّی اُچّی آکھن لگّے پئی لے جا لے جا اوہنوں صلِیب دے۔ پِیلاطُس اوہناں نُوں آکھیا مَیں تُہاڈے بادشاہ نُوں صلِیب دیاں؟ سردار کاہِناں جواب دِتّا قَیصر باہجوں ساڈا کوئی بادشاہ نئیں اے۔

¹⁶تَد اوس اوہنوں صلِیب دین نُوں اوہناں دے حوالے کِیتا۔

¹⁷تَد اوہ یِسُوع نُوں لے گئے۔ تے اوہ اپنی صلِیب چُک کے شہروں باہر اوس تھاں نُوں جِہنُوں کھوپڑی دی جگہ تے عِبرانی بولی وِچ گُلگُتا آکھدے نیں گیا۔

¹⁸اوتھے اوہناں اوہنوں صلِیب دِتّا تے اوہدے نال ہور دو نُوں اِک نُوں اِک پاسے تے اِک نُوں دُوجے پاسے تے یِسُوع نُوں وِچکار۔

¹⁹تے پِیلاطُس نیں اِک پٹّی وی لِکھ کے صلِیب اُتّے لَوا دِتّی۔ تے لِکھیا ہویا ایہہ سی یِسُوع ناصری یہُودِیاں دا بادشاہ۔

²⁰تے ایس پٹّی نُوں بُہت یہُودِیاں نیں پڑھیا کیوں جو اوہ تھاں جِتّھے یِسُوع صلِیب دِتّا گیا سی شہر دے نیڑے سی۔ تے اوہ عِبرانی تے لاطینی تے یُونانی بولی وِچ لِکھیا ہویا سی۔

²¹تَد یہُودِیاں دے سردار کاہِناں پِیلاطُس نُوں آکھیا یہُودِیاں دا بادشاہ نا لِکھ پر ایہہ پئی اوس آپی آکھیا پئی مَیں یہُودِیاں دا بادشاہ آں۔

²²پِیلاطُس جواب دِتّا پئی جو مَیں لِکھیا سو لِکھ چھڈیا۔

²³تَد سپاہیاں جد یِسُوع نُوں صلِیب دے دِتّا اوہدے کپڑے لے کے چار حِصّے کِیتے اِک اِک واسطے اِک اِک حِصّہ۔ تے اوہدا کُڑتا وی لیا۔ تے اوہ کُڑتا اَن سِتیا سارا اُنیا ہویا سی۔

²⁴تَد اوہناں اِک دُوجے نُوں آکھیا اوہنوں پاڑیئے نا پر اوہدے اُتّے گُنے پائیے پئی کِہدا ہوئے تاں جو اوہ نوِشتہ پُورا ہوئے جیہڑا آکھیا گیا سی۔ پئی اوہناں میرے کپڑے ونڈ لَئے تے میری پوشاک اُتّے قُرعہ پائے۔ سو ایہہ گلّاں سپاہیاں کِیتیاں۔

²⁵پر یِسُوع دی صلِیب کول اوہدی ماں تے اوہدی ماسی کلوپاس دی بیوی مریم تے مریم مگدلِینی کھلوتیاں ہویاں سن۔

²⁶سو یِسُوع اپنی ماں نُوں تے نالے اوس شاگِرد نُوں جِہنُوں پیار کر دا سی کول کھلوتا ہویا ویکھ کے اپنی ماں نُوں آکھیا بی بی ایہہ تیرا پُتر اے۔

²⁷فیر شاگِرد نُوں آکھیا پئی ویکھ ایہہ تیری ماں۔ تے اوسے گھڑی اوہ شاگِرد اوہنوں اپنے گھر لے گیا۔

²⁸اوہدے پِچّھوں یِسُوع ایہہ جان کے پئی ہُن سبھ کُجھ پُورا ہوگیا اے تاں جو نوِشتہ وی پُورا ہوئے۔ آکھیا مَیں تریہایا آں۔

²⁹اوتھے اِک سر کے دا بھریا ہویا بھانڈا رکھیا ہویا سی۔ سو اوہناں سپنج نُوں سر کے نال بھیوں کے تے زُوفے دی لکڑی اُتّے رکھ کے اوہدے مُنھ نال لایا۔

³⁰جد یِسُوع سِرکہ چَکھّیا تے آکھیا پُورا ہویا۔ تے سِر جُھکا کے جان دے دِتّی۔

³¹تَد ایس لئی پئی تیاری دا دِن سی۔ یہُودِیاں پِیلاطُس اگّے عرض کِیتی پئی اوہناں دِیاں لتّاں بھنِّیاں جان تے اوہ لا اے جان تاں جو سبت دے دِن صلِیب اُتّے لوتھاں نا رہن کیوں جو اوہ سبت دا دِن وَڈا دِن سی۔

³²تَد سپاہیاں آ کے پہلے دِیاں لتّاں بھنِّیاں تے دُوجے دِیاں وی جیہڑا اوہدے نال صلِیب دِتّا گیا سی

³³پر یِسُوع دے کول آ کے جد ویکھیا پئی اوہ مر گیا اے۔ تے اوہدیاں لتّاں نا بھنِّیاں۔

³⁴تَد وی سپاہیاں وِچوں اِک نیں برچھی نال اوہدی وَکھّی وِہنّی تے اونویں ای لہو تے پانی نِکلیا۔

³⁵تے جِس ویکھیا ایہہ گواہی دِتّی اے۔ تے اوہدی گواہی سَچّی اے۔ تے اوہ جان دا اے پئی مَیں سَچ آکھنا آں۔ تاں جو تُسی وی اِیمان لیاؤ۔

³⁶ایہہ ایس کر کے ہویا تاں جو نوِشتہ پُورا ہوئے پئی اوہدی کوئی ہڈّی بھنّی نا جاوے گی۔

³⁷تے دُوجا نوِشتہ وی آکھدا اے پئی اوہ اوہدے ولّ ویکھن گے جِہنُوں اوہناں وِنّھیا اے۔

³⁸ایدوں پِچّھوں ارِمَتِیاہ دے رہن والے یُوسف نیں جیہڑا یِسُوع دا شاگِرد سی۔ (پر یہُودِیاں دے ڈر دے مارِیاں گُجھّے گُجھّے) پِیلاطُس اگّے عرض کِیتی پئی مَیں یِسُوع دی لوتھ لے جاواں۔ تے پِیلاطُس اجازت دِتّی سو اوہ آ کے اوہدی لوتھ لے گیا۔

³⁹تے نِیکُدِیمُس وی جیہڑا پہلاں یِسُوع کول آیا سی پنجاہ کُو سیر مُر تے عود رَلے ہوئے نال لے کے آیا۔

⁴⁰سو اوہناں یِسُوع دی لوتھ لے کے سُوتی کپڑے وِچ مصالے پا کے یہُودِیاں دے دَبّن دے دستُور دے دے سببّوں وھلیٹی۔

⁴¹تے اوس تھاں جِتّھے اوہ صلِیب دِتّا گیا اِک باغ سی۔ تے اوس باغ وِچ اِک نَوِیں قبر سی جِہدے وِچ کَدے کوئی نئیں سی رکھیا گیا۔

⁴²اوتھے ای یہُودِیاں دی تیاری دے سبّب کر کے یِسُوع نُوں رکھیا کیوں جو قبر کول جو سی۔