Read Western Panjabi یُوحنّا 2 Bible Online

یُوحنّا 2 - Western Panjabi bible

یُوحنّا 2

¹تے ترِیجے دِن قانایِ گلِیل وِچ اِک ویاہ ہویا۔ تے یِسُوع دی ماں اوتھے سی۔

²تے یِسُوع تے اوہدے شاگِرد وی ایس ویاہ وِچ سَدّے گئے سن۔

³تے جدوں انگور دی رَس مُک گئی۔ یِسُوع دی ماں اوہنوں آکھیا پئی اوہناں دے کول انگُوری رَس نئیں اے۔

⁴یِسُوع اوہنوں آکھیا۔ بی بی! میرا تیرا کِیہ لاگا اے؟ اجے میرا ویلا نئیں آیا۔

⁵اوہدی ماں نَوکراں نُوں آکھیا جو کُجھ اوہ تُہانوں آکھے سو کرو۔

⁶تے اوس تھاں پتّھر دے چھ مَٹ یہُودِیاں دے نہاؤن دھون دی رسم دے سببّوں دھرے ہوئے سن پئی ہر اِک وِچ دو یا تِنّ تِنّ مَن پَیندے سن۔

⁷یِسُوع اوہناں نُوں آکھیا مٹکیاں نُوں پانی نال بھر دیو۔ سو اوہناں نیں اوہناں مٹکیاں نُوں کنڈھیاں تِیکر بھر دِتّا۔

⁸تے اوس اوہناں نُوں آکھیا ہُن کڈھ کے مجلس دے سردار کول لے جاؤ۔ تے اوہ لے گئے۔

⁹تے جد مجلس دے سردار اوس پانی نُوں چَکھّیا جیہڑا انگور دا رَس بن گیا سی تے نئیں جان دا سی پئی ایہہ کِتّھوں آئی اے (پر نوکر جِنہاں پانی کڈھیا سی جان دے سن) تَد مجلس دے سردار نیں لاڑے نُوں سَدّ کے اوہنوں آکھیا۔

¹⁰پئی ہر اِک بندہ انگور دے چنگے رَس نُوں پہلاں اگّے رکھدا اے۔ تے ماڑی نُوں اودُوں جد لوک نشے وِچ آ جاندے نیں۔ پر تُوں تے چَنگا رَس ہُن تِیکر رکھ چھڈیا اے۔

¹¹ایہہ پہلی کرامات یِسُوع نیں گلِیل دے قانا وِچ کِیتی تے اپنا جلال ظاہر کِیتا تے اوہدیاں شاگِرداں اوہدے اُتّے اِیمان لیاندا۔

¹²ایدوں پِچّھوں اوہ تے اوہدی ماں تے بھرا تے اوہدے شاگِرد کَفرنحُوم نُوں گئے۔ تے اوتھے کُجھ دِن رہے۔

¹³تے یہُودِیاں دی عید فسح نیڑے سی تے یِسُوع یرُوشلِیم نُوں گیا۔

¹⁴تے ہیکل وِچ بَلد تے بھیڈاں تے کبُوتر ویچن والیاں تے صرّافاں نُوں بَیٹھیاں ہویاں ویکھیا۔

¹⁵تَد اوس رَسّیاں دا کولڑا وَٹ کے ساریاں نُوں ہیکل وِچوں کڈھ دِتّا۔ نالے بھیڈاں تے ڈنگراں نُوں۔ تے صرّافاں دے ٹِکے کھِلار دِتّے تے تختے اُلٹا سُٹّے

¹⁶تے کبُوتر ویچن والیاں نُوں آکھیا ایہناں شیواں نُوں ایتھوں چُک لَئو میرے باپ دے گھر نُوں بِپار دا گھر نا بناؤ۔

¹⁷اوہدے شاگِرداں نُوں یاد آگیا پئی لِکھیا ہویا اے۔ تیرے گھر دی غیرت مَینُوں کھا جائے گی۔

¹⁸تَد یہُودِیاں اوہنوں جواب دِتّا۔ تُوں سانُوں کِیہ نِشان وِکھانا ایں۔ پئی ایہہ کمّ کرنا ایں؟

¹⁹یِسُوع اوہناں نُوں جواب دِتّا۔ ایس ہیکل نُوں ڈھا دیو تے مَیں اوہنوں تِنّاں دِناں وِچ کھلا کراں گا۔

²⁰تَد یہُودِیاں آکھیا۔ چھتالیاں ورھیاں وِچ ایہہ ہیکل بنی سی تے تُوں اوہنوں تِنّاں دِناں وِچ کھلا کریں گا؟

²¹پر اوس اپنے بدن دی ہیکل دی بابت آکھیا سی۔

²²سو جد اوہ مُردیاں وِچوں جی اُٹھیا تَد اوہدیاں شاگِرداں نُوں یاد آیا پئی اوس ایہی آکھیا سی۔ تے پاک کتاب دا تے اوس گلّ دا جیہڑی یِسُوع آکھی سی یقِین کِیتا۔

²³تے فسح دے ویلے عید وِچ جد اوہ یرُوشلِیم وِچ سی بتھیریاں اوہناں کراماتاں نُوں ویکھ کے جیہڑیاں اوس وکھالِیاں سن اوہدے ناں اُتّے اِیمان لیاندا۔

²⁴پر یِسُوع اپنے آپ دا اوہناں اُتّے وساہ نئیں سی کر دا کیوں جو اوہ ساریاں نُوں جان دا سی۔

²⁵تے اوہنوں لوڑ نئیں سی پئی کوئی اِنسان دی گواہی دیوے ایس لئی پئی اوہ آپ جان دا سی پئی اِنسان دے دِل وِچ کِیہ اے۔