Read Western Panjabi یُوحنّا 3 Bible Online

یُوحنّا 3 - Western Panjabi bible

یُوحنّا 3

¹تے فرِیسیاں وِچوں اِک بندہ نِیکُدِیمُس کر کے یہُودِیاں دا اِک سردار سی۔

²اوہ رات دے ویلے اوہدے کول آیا تے اوہنوں آکھیا اَے ربّی اسی جاننے آں پئی تُوں خُدا ولّوں اُستاد ہو کے آیا ایں کیوں جو ایہہ کراماتاں جیہڑیاں تُوں کرنا ایں کوئی نئیں کر سکدا جے خُدا اوہدے نال نا ہوئے۔

³یِسُوع اوہنوں جواب دِتّا مَیں تینُوں سَچ سَچ آکھنا آں کوئی بندہ جے نَوِیں سِریوں نا جمّے اوہ خُدا دی بادشاہی نُوں ویکھ نئیں سکدا۔

⁴نِیکُدِیمُس اوہنوں آکھیا بندہ جد بُڈّھا ہوگیا تے اوہ کِیویں جَم سکدا اے؟ کوئی اپنی ماں دے ڈِھڈ وِچ دُوجی وار جا سکدا اے تے جَم سکدا اے؟

⁵یِسُوع جواب دِتّا مَیں تینُوں سَچ سَچ آکھنا آں جے کوئی پانی تے رُوح تُھوں نا جمّے اوہ خُدا دی بادشاہی وِچ وڑ نئیں سکدا۔

⁶جیہڑا جِسم توں جمّیا اوہ جِسم اے تے جیہڑا رُوح توں جمّیا اوہ رُوح اے۔

⁷اچنبے وِچ نا پَوو پئی مَیں تینُوں آکھیا پئی تُہانوں نَوِیں سِریوں جمّنا ضرُور اے۔

⁸وَا جِدھر نُوں چاہندی اے وَگدی اے تے تُوں اوہدی اواز سُننا ایں پر نئیں جان دا پئی اوہ کِتّھوں آؤندی تے کِدھر نُوں جاندی اے۔ جیہڑا کوئی رُوح توں جمّیا ایہو جیہائی اے۔

⁹نِیکُدِیمُس اوہنوں آکھیا۔ ایہہ گلّاں کِیویں ہو سکدِیاں نیں؟

¹⁰یِسُوع اوہنوں جواب دِتّا تُوں اِسرائیلیاں دا اُستاد ہو کے ایہہ گلّاں نئیں جان دا؟

¹¹مَیں تینُوں سَچ سَچ آکھنا آں پئی جو کُجھ اسی جاننے آں سو بولنے آں تے جِہنُوں اساں ویکھیا اے اوہدی گواہی دینے آں تُسی ساڈی گواہی قبول نئیں کر دے اوہ۔

¹²جدوں مَیں تُہانوں زمین دِیاں گلّاں دسیاں نیں تے تُسی نئیں مَن دے تدوں تُسی کِیویں مَنّو گے جے مَیں اسمان دِیاں گلّاں تُہانوں دساں؟

¹³تے اسمان اُتّے کوئی نئیں چڑھیا اوہدے سِوا جیہڑا اسمانوں لتّھا اے۔ یعنی اِبنِ آدم جیہڑا اسمان دے وِچ اے۔

¹⁴تے جیویں مُوسیٰ نیں سَپّ نُوں بیابان وِچ اُچّا کِیتا اوسے طرح ضرُور اے پئی اِبنِ آدم وی اُچّا کِیتا جائے۔

¹⁵تاں جو جیہڑا کوئی اِیمان لیاوے اوہنوں اوہدے وِچ سدا دی زِندگی مِلے۔

¹⁶کیوں جو خُدا دُنیا نُوں اجیہا پیار کِیتا پئی اوس اپنا اِکلَوتا پُتر بخشیا تاں جو جیہڑا اوہدے اُتّے اِیمان لیاوے اوہ ہلاک نا ہوئے سگوں اوہنوں سدا دی زِندگی مِلے۔

¹⁷کیوں جو خُدا اپنے پُتر نُوں دُنیا وِچ ایس لئی نئیں گھلّیا پئی دُنیا دی عدالت کرے سگوں ایس لئی پئی دُنیا اوہدے سببّوں بچ جائے۔

¹⁸جیہڑا اوہدے اُتّے اِیمان لیاؤندا اے۔ عدالت وِچ نئیں آؤندا جیہڑا اِیمان نئیں لیاؤندا عدالت وِچ ہُنے آگیا اے کیوں جو خُدا دے اِکلَوتے پُتر دے ناں اُتّے اوہ اِیمان نئیں لِیائیا اے۔

¹⁹تے عدالت ایہی اے۔ پئی چانن دُنیا وِچ آیا اے تے بندیاں ہنیرے نُوں چانن نالوں وَدّھ پیار کِیتا ایس کر کے پئی اوہناں دے کمّ بَھیڑے سن۔

²⁰کیوں جو جیہڑا کوئی بُریائی کر دا اے۔ چانن نال وَیر رکھدا اے تے چانن کول نئیں آؤندا۔ کِتے ایویں نا ہوئے پئی اوہدیاں کمّاں دی ملامت کِیتی جائے۔

²¹پر اوہ جیہڑا حق کر دا اے چانن دے کول ایس لئی آؤندا اے پئی اوہدے کمّ ظاہر ہون پئی خُدا وِچ کِیتے گئے نیں۔

²²ایدوں پِچّھے یِسُوع تے اوہدے شاگِرد یہُودیہ دے دیس وِچ آئے تے اوہ اوہناں دے نال اوتھے رہیا تے بپتِسمہ دیندا سی۔

²³تے یُوحنّا وی شالِیم دے نیڑے عینون وِچ بپتِسمہ دیندا سی ایس لئی پئی اوس تھاں بُہت پانی سی۔ تے لوک آوندے تے بپتِسمہ لَیندے سن۔

²⁴کیوں جو یُوحنّا اجے تِیکر قیدخانے وِچ نئیں سی پایا گیا۔

²⁵تَد یُوحنّا دے شاگِرداں دی کِسے یہُودی نال نہاؤن دھون اُتّے بحث ہوئی۔

²⁶تے اوہ یُوحنّا کول آئے تے اوہنوں آکھن لگّے اَے اُستاد اوہ جیہڑا یَردنوں پار تیرے نال سی جِہدی تُوں گواہی دِتّی اے ویکھ اوہ بپتِسمہ دیندا اے۔ تے سارے اوہدے کول آوندے نیں۔

²⁷یُوحنّا آکھیا بندہ کُجھ نئیں کر سکدا جِنّاں چِر اوہنوں اسمانوں دِتّا نا جاوے۔

²⁸تُسی آپ ای میری گواہی دیندے ہو پئی مَیں آکھیا سی پئی مَیں مسِیح نئیں آں پر اوہدے اگّے گھلّیا ہویا آں۔

²⁹جِہدے کول وَوہٹی اے اوہو لاڑا ہوندا اے پر لاڑے دا یار جیہڑا کھلو کے اوہدی گلّ سُندا اے لاڑے دی اواز نال بڑا خُوش ہوندا اے۔ سو میری ایہہ خُوشی پُوری ہوئی اے۔

³⁰ضرُور اے پئی اوہ وَدھے تے مَیں گھٹاں۔

³¹اوہ جیہڑا اُتّوں آؤندا اے ساریاں توں اُتّے اے اوہ جیہڑا زمِینوں اے زمین ای دا اے تے زمین دی گلّ کر دا اے۔ اوہ جیہڑا اسمانوں آؤندا اے ساریاں توں اُتّے اے۔

³²تاں جو کُجھ اوس ویکھیا تے سُنیا اوہدی گواہی دیندا اے۔ تے اوہدی گواہی کوئی نئیں مَندا۔

³³جِس اوہدی گواہی مَنّی اے اوہنے اوس گلّ اُتّے مُہر کِیتی اے۔ پئی خُدا سَچّا اے۔

³⁴کیوں جو جِہنُوں خُدا گھلّیا اوہ خُدا دِیاں گلّاں کر دا اے۔ ایس لئی پئی اوہ رُوح مِن کے نئیں دیندا۔

³⁵باپ پُتر نُوں پیار کر دا اے تے اوس سارِیاں شیواں اوہدے ہتّھ وِچ کر دِتّیاں نیں۔

³⁶جیہڑا پُتر اُتّے اِیمان لیاؤندا اے سدا دی زِندگی اوہدی اے۔ پر جیہڑا پُتر نُوں نئیں مَندا اوہ تے زِندگی نئیں ویکھے گا سگوں خُدا دا قَہر اوہدے اُتّے رہندا اے۔