Read Western Panjabi یُوحنّا 5 Bible Online

یُوحنّا 5 - Western Panjabi bible

یُوحنّا 5

¹اوہدے بعدوں یہُودِیاں دی عید سی۔ تے یِسُوع یرُوشلِیم نُوں گیا۔

²تے یرُوشلِیم وِچ بھیڈاں والے دروازے دے کول اِک حوض اے جِہنُوں عِبرانی بولی وِچ بَیتِ حسدا آکھدے نیں جِہدے پنج برانڈے نیں۔

³اوہناں وِچ روگِیاں تے اَنھیاں تے لَنگیاں تے سُکّیاں ہویاں دی بِھیڑ [جیہڑی پانی دے ہِلن دی اوڈِیک وِچ] پئی رہندی سی۔

⁴[کیوں جو خُداوند دا فرِشتہ حوض اُتّے اُتر کے پانی ہلاؤندا ہوندا سی۔ پانی ہِلدیاں ای جیہڑا وی پہلاں اُتر دا سو اوہ شفا پاندا بھانویں اوہدی کوئی وی بیماری کیوں نا ہوندی۔]

⁵تے اوتھے اِک بندہ سی جیہڑا اٹھِتّیاں ورھیاں توں روگی سی۔

⁶یِسُوع اوہنوں پیا ہویا ویکھ کے تے ایہہ جان کے پئی اوہ چروکنا پیا ہویا اے۔ اوہنوں آکھیا تُوں ولّ ہونا چاہنا ایں؟

⁷اوس روگی اوہنوں جواب دِتّا اَے خُداوند میرا کوئی بندے نئیں پئی جدوں پانی ہلایا جائے تے مَینُوں حوض وِچ اُتار دے پر جِنّاں چِر مَیں جانا آں۔ دُوجا مَیتھوں پہلاں اُتر پَیندا اے۔

⁸یِسُوع اوہنوں آکھیا اُٹھ تے اپنی مَنجی چُک تے ٹُر پَو۔

⁹اوسے ای ویلے اوہ بندہ چَنگا ہوگیا تے اپنی مَنجی چُک کے ٹُر پیا۔ تے اوس دِن سبت سی۔

¹⁰ایس کر کے یہُودِیاں اوہنوں جیہڑا چَنگا ہویا سی آکھیا اَج سبت دا دِن اے تینُوں مَنجی چُکنی نئیں چاہیدی۔

¹¹اوس اوہناں نُوں جواب دِتّا پئی جِس مَینُوں چَنگا کِیتا اوسے مَینُوں آکھیا ”اپنی مَنجی چُک تے ٹُر پَو۔“

¹²تَد اوہناں اوہنوں پُچھیا اوہ کیہڑا بندہ اے جِس تینُوں آکھیا پئی اپنی مَنجی چُک تے ٹُرپَو؟

¹³پر اوہ جیہڑا ولّ ہویا سی۔ نئیں سی جان دا پئی اوہ کون اے۔ کیوں جو اوس تھاں بِھیڑ سی تے ایس واسطے یِسُوع لاہنبے ہوگیا سی۔

¹⁴اوہدے بعدوں یِسُوع اوہنوں ہیکل وِچ ویکھ کے اوہنوں آکھیا ویکھ تُوں چَنگا ہوگیا ایں مُڑ گُناہ نا کریں۔ متے تیرے اُتّے ایدوں وی بُہتی خرابی آ پَوے۔

¹⁵اوہ بندہ ٹُر گیا تے یہُودِیاں نُوں خبر دِتّی پئی جِس مَینُوں چَنگا کِیتا سی اوہ یِسُوع اے۔

¹⁶تے ایس گلّے یہُودی یِسُوع دے مگر پئے۔ کیوں جو اوہ اجیہے کمّ سبت نُوں کر دا سی۔

¹⁷پر یِسُوع جواب دِتّا پئی میرا باپ ہُن تِیکر کمّ کر دا اے تے مَیں وی کمّ کرنا آں۔

¹⁸ایس لئی یہُودی ہور وی وَدّھ کے اوہدے مارن دا داء لبّھدے سن۔ کیوں جو اوس نا نِرا سبت نُوں توڑ دِتّا پر ایہہ وی پئی خُدا نُوں خاص اپنا باپ آکھ کے اپنے آپ نُوں خُدا دے برابر کِیتا۔

¹⁹ایس واسطے یِسُوع اوہناں نُوں جواب دِتّا مَیں تُہانوں سَچ سَچ آکھنا آں پئی پُتر آپ توں کُجھ نئیں کر سکدا پر جو کُجھ اوہ باپ نُوں کر دیاں ویکھدا اے۔ کیوں جو جیہڑے کمّ اوہ کر دا اے پُتر وی اوسے طرح کر دا اے۔

²⁰کیوں جو باپ پُتر نُوں پیار کر دا اے تے سارے کمّ جیہڑے اوہ آپ کر دا اے اوہنوں وکھاؤندا اے۔ تے اوہ اوہناں نالوں وڈّے کمّ اوہنوں وکھا لے گا پئی تسِیں اچنبے وِچ نا پَوو۔

²¹کیوں جو جیویں باپ مُردیاں نُوں اُٹھاندا تے جوالدا اے اونویں پُتر وی جِنہاں نُوں چاہندا اے جوالدا اے۔

²²کیوں جو باپ کِسے دی عدالت نئیں کر دا۔ پر اوس ساری عدالت پُتر دے سپُرد کِیتی اے۔

²³تاں جو سبھ لوک پُتر دی عِزّت کرن جیویں باپ دی عِزّت کر دے نیں۔ جیہڑا پُتر دی عِزّت نئیں کر دا اوہ باپ دی وی جِس اوہنوں گھلّیا عِزّت نئیں کر دا۔

²⁴مَیں تُہانوں سَچ سَچ آکھنا آں پئی اوہ جیہڑا میرا کلام سُندا اے تے اوہدے اُتّے جِس مَینُوں گھلّیا اے اِیمان لیاؤندا اے سدا دی زِندگی اوہدی اے۔ تے اوہ عدالت وِچ نئیں آؤندا سگوں مَوت توں لنگھ کے اوہ زِندگی وِچ جا اَپڑیا اے۔

²⁵مَیں تُہانوں سَچ سَچ آکھنا آں پئی اوہ گھڑی آؤندی اے تے ہُن ای اے جدوں مُردے خُدا دے پُتر دی اواز سُنن گے تے جیہڑے سُنن گے جِیو پَین گے۔

²⁶کیوں جو جیویں باپ اپنے وِچ زِندگی رکھدا اے اوسے طرح اوس پُتر نُوں وی دِتّا پئی اپنے وِچ زِندگی رکھّے۔

²⁷تے اوہنوں اختیار دِتّا پئی عدالت کرے ایس لئی پئی اوہ اِبنِ آدم اے۔

²⁸ایس گلّوں حَیران نا اوہ۔ کیوں جو اوہ گھڑی آؤندی اے جدوں سارے جیہڑے قبراں وِچ نیں اوہدی اواز سُنن گے۔

²⁹تے باہر نِکل آؤن گے۔ جِنہاں نیکی کِیتی زِندگی دی قیامت لئی۔ تے جِنہاں بَھیڑے کمّ کِیتے عدالت دی قیامت دے لئی۔

³⁰مَیں اپنے آپ کُجھ نئیں کر سکدا۔ جیویں مَیں سُننا آں اوسے طرح عدالت کرنا آں تے میری عدالت سَچّی اے۔ کیوں جو مَیں اپنی مرضی نُوں نئیں لَبّھدا پر اوہدی مرضی نُوں جِس مَینُوں گھلّیا اے۔

³¹جے مَیں اپنے حق وِچ گواہی دیاں تے میری گواہی سَچّی نئیں۔

³²اِک ہور اے جیہڑا میرے حق وِچ گواہی دیندا اے تے مَیں جاننا آں پئی جیہڑی گواہی اوہ میرے حق وِچ دیندا اے سو سَچّی اے۔

³³تُساں یُوحنّا ولّ سنیہا گھلّیا تے اوس سچیائی اُتّے گواہی دِتّی اے۔

³⁴مَیں تے بندیاں ولّوں گواہی نئیں لَیندا پر مَیں ایہہ گلّاں آکھنا آں تاں جو تُسی بچ جاؤ۔

³⁵اوہ اِک بلدا ہویا تے چمکدا ہویا دِیوا سی۔ تے تُسی گھڑی تِیکر اوہدے چانن وِچ خُوش رہنا چاہندے سو۔

³⁶پر میرے کول جیہڑی گواہی اے اوہ یُوحنّا دی گواہی توں وڈّی اے کیوں جو جیہڑے کمّ باپ میرے سپُرد کِیتے پئی مَیں اوہناں نُوں پُوریاں کراں یعنی ایہو کمّ جیہڑے مَیں کرنا آں اوہ میرے حق وِچ گواہی دیندے نیں پئی باپ مَینُوں گھلّیا اے۔

³⁷تے باپ جِس مَینُوں گلیّا اوس ای میرے حق وِچ گواہی دِتّی اے۔ تُساں تے نا کَدے اوہدی اواز سُنی اے تے نا اوہدی شکل ویکھی اے۔

³⁸تے اوہدا کلام تُہاڈے وِچ نئیں رہندا کیوں جو جِہنُوں اوس گھلّیا تُسی اوہنوں نئیں مَن دے۔

³⁹تُسی نوِشتیاں نُوں پھولدے رہندے ہو۔ کیوں جو تُسی سمجھدے ہو پئی اوہناں وِچ تُہاڈے لئی سدا دی زِندگی اے۔ تے ایہہ اوہی نیں جیہڑے میرے حق وِچ گواہی دیندے نیں۔

⁴⁰تے تُسی میرے کول زِندگی لین نُوں آؤنا نئیں چاہندے ہو۔

⁴¹مَیں بندیاں کولوں وڈیائی نئیں چاہندا۔

⁴²پر مَیں تُہانوں جاننا آں پئی تُسی خُدا دی مُحبّت اپنے وِچ نئیں رکھدے۔

⁴³مَیں اپنے باپ دے ناں اُتّے آیا آں تے تُسی مَینُوں قبول نئیں کر دے۔ جے ہور کوئی اپنے ای ناں اُتّے آوے اوہنوں تُسی قبول کر لوؤ گے۔

⁴⁴تُسی کِیویں اِیمان لیا سکدے ہو جیہڑے اِک دُوجے توں وڈیائی لَیندے ہو تے اوس وڈیائی نُوں جیہڑی اکلّے خُدا ولّوں آؤندی اے نئیں لبّھدے۔

⁴⁵ایہہ نا سمجھو پئی مَیں باپ اگّے تُہاڈے اُتّے الزام لاواں گا۔ اِک اے تُہاڈے اُتّے الزام لان والا یعنی مُوسیٰ جِہدے اُتّے تُساں بھروسا رکھیا ہویا اے۔

⁴⁶کیوں جو جے تُسی مُوسیٰ نُوں مَن دے تے مَینُوں وی مَن دے ایس لئی پئی اوسے میرے حق وِچ لِکھیا۔

⁴⁷پر جد تُسی اوہدیاں نوِشتیاں نُوں نئیں مَن دے تے میرِیاں گلّاں کِیویں مَنّو گے؟