Read Western Panjabi یُوحنّا 6 Bible Online

یُوحنّا 6 - Western Panjabi bible

یُوحنّا 6

¹ایہناں گلّاں دے بعدوں یِسُوع گلِیل دے سمُندروں یعنی تِبریاس دے سمُندروں پار گیا۔

²تے بڑی بِھیڑ اوہدے مگر ہو ٹُری۔ ایس لئی پئی اوہناں اوہ مُعجزے ویکھے جیہڑے اوس بِیماراں اُتّے کِیتے سن۔

³تَد یِسُوع پہاڑ اُتّے چڑھ کے اپنے شاگِرداں نال اوتھے بَیہہ گیا۔

⁴تے فسح جیہڑی یہُودِیاں دی عید اے نیڑے سی۔

⁵تَد یِسُوع اپنیاں اَکھّیاں چُک کے ویکھیا پئی بڑی بِھیڑ میرے کول پئی آؤندی اے۔ تے فِلپُّس نُوں آکھیا پئی اسی ایہناں دے کھان لئی روٹِیاں کِتّھوں مُل لئیے؟

⁶تے اوس ایہہ گلّ اوہنوں ازمان لئی آکھی سی کیوں جو اوہ آپ جان دا سی پئی مَیں کِیہ کراں گا۔

⁷فِلپُّس اوہنوں جواب دِتّا پئی دو سَو دینار دِیاں روٹِیاں ایہناں لئی پُوریاں نئیں ہون گِیاں پئی ہر اِک نُوں تھوڑی جیہی وی ہتّھ لگّے۔

⁸اوہدے شاگِرداں وِچوں اِک شمعُون پطرس دا بھرا اندریاس اوہنوں آکھن لگّا۔

⁹ایتھے اِک مُنڈا اے جِہدے کول جَواں دِیاں پنج روٹِیاں تے دو مچھّیاں نیں پر اینِیاں بندیاں واسطے ایہہ کِیہ نیں؟

¹⁰یِسُوع آکھیا پئی لوکاں نُوں بہا دیو۔ تے اوس تھاں بڑا گھاہ سی۔ سو گنتری وِچ پنج کُو ہزار بندے بَیہہ گئے۔

¹¹تے یِسُوع روٹِیاں لئیاں تے شُکر کر کے بَیٹھیاں ہویاں نُوں ونڈ دِتّیاں تے ایویں مچھّیاں وِچوں جِنّی جِنّی اوہ چاہندے سن۔

¹²تے جد اوہ رَجّ گئے اوہ اپنے شاگِرداں نُوں آکھن لگّا پئی بچیاں ہویاں ٹُکّراں نُوں اکٹّھے کرو پئی کُجھ خراب نا ہو جائے۔

¹³سو اوہناں اکٹّھے کر لَئے تے جَواں دِیاں پنجاں روٹِیاں دے ٹُکّراں نال جیہڑے کھان والیاں توں وَدّھ رہے سن۔ باراں ٹوکریاں بھریاں۔

¹⁴تَد اوہناں لوکاں ایہہ مُعجزہ جیہڑا اوس کِیتا ویکھ کے آکھیا۔ بِناں شک اوہ نبی جیہڑا دُنیا وِچ آؤن والا اے ایہو اے۔

¹⁵سو جد یِسُوع نُوں معلُوم ہویا پئی اوہ آ کے مَینُوں بدوبدی بادشاہ بنونا چاہندے نیں تَد آپ اکلّا پہاڑ نُوں مُڑ ٹُر گیا۔

¹⁶تے جدوں شام ہوئی اوہدے شاگِرد سمُندر ولّ اُتر گئے۔

¹⁷تے بیڑی وِچ چڑھ کے سمُندر دے پرلے پاسے کَفرنحُوم نُوں ٹُرپَئے۔ تے ہُن ہنیرا ہو پیا سی تے یِسُوع اوہناں کول اجے نئیں سی آیا۔

¹⁸تے بڑی ہنیری دے سببّوں سمُندر ٹھاٹھاں مارن لگّا۔

¹⁹تے جد اوہ دو تِنّ کوہ ٹھِلّے ای سن تَد اوہناں یِسُوع نُوں سمُندر اُتّے ٹُر دیاں تے بیڑی دے نیڑے آؤندیاں ویکھیا تے ڈر گئے۔

²⁰پر اوہ اوہناں نُوں آکھن لگّا مَیں ای آں ڈرو نا۔

²¹تَد اوہ اوہنوں بیڑی تے چڑھان نُوں راضی ہوئے۔ تے بڑی چھیتی نال بیڑی اوس تھاں جِتّھے جانا سی اَپڑ گئی۔

²²دُوجے دِن جد اوس بِھیڑ نے جیہڑی سمُندر دے اوس پار کھلوتی سی ویکھیا پئی ایس جگہ اِک چھوٹی جیہی بیڑی دے بِناں ہور کوئی بیڑی نئیں اے۔ تے ایہہ وی پئی یِسُوع اپنے شاگِرداں نال بیڑی اُتّے نئیں گیا۔ پر اوہدے شاگِرد اکلّے ٹُر گئے سن۔

²³(پر ہور چھوٹیاں بیڑیاں تِبریاسوں اوس تھاں دے نیڑے آئِیاں جِتّھے خُداوند دے شُکر کرن بعد اوہناں روٹِیاں کھادِیاں سن۔)

²⁴سو جد لوکاں ویکھیا پئی ایتھے نا یِسُوع تے نا اوہدے شاگِرد نیں تَد اوہ وی بیڑیاں وِچ چڑھ کے یِسُوع نُوں لَبّھن لئی کَفرنحُوم نُوں آئے۔

²⁵تے اوہناں اوہنوں سمُندروں پار لَبّھ کے آکھیا اَے ربّی تُوں ایتھے کدوں آیا؟

²⁶یِسُوع اوہناں نُوں آکھیا۔ مَیں تُہانوں سَچ سَچ آکھنا آں تُسی مَینُوں ایس واسطے نئیں لبّھدے پئی تُساں کراماتاں ویکھیاں۔ پر ایس واسطے پئی اوہناں روٹِیاں وِچوں کھا کے تُسی رَجّ گئے۔

²⁷فنا ہون والے کھانے لئی محنت نا کرو پر اوس کھانے لئی جیہڑا سدا دی زِندگی تِیکر رہن والا اے جیہڑا اِبنِ آدم تُہانوں دیوے گا کیوں جو خُدا جیہڑا باپ اے اوس اوہدے اُتّے مُہر کر دِتّی اے۔

²⁸تَد اوہناں اوہنوں آکھیا اسی کِیہ کریئے پئی خُدا دے کمّ ساتھوں ہون؟

²⁹یِسُوع اوہناں نُوں جواب دِتّا خُدا دا کمّ ایہہ اے پئی تُسی اوہدے اُتّے جِہنُوں اوس گھلّیا اے اِیمان لیاؤ۔

³⁰تَد اوہناں اوہنوں آکھیا فیر تُوں کیہڑی کرامات کرنا ایں؟ پئی اسی دیکھئے تے تینُوں مَنّئے تُوں کِیہ کرنا ایں؟

³¹ساڈے وڈّیاں بیابان وِچ مَن کھادا جیویں آکھیا ہویا اے پئی اوس اوہناں نُوں اسمانوں روٹی کھان نُوں دِتّی۔

³²تَد یِسُوع اوہناں نُوں آکھیا۔ مَیں تُہانوں سَچ سَچ آکھنا آں پئی مُوسیٰ تُہانوں اسمانوں روٹی نئیں دِتّی پر میرا باپ تُہانوں اسمانوں سَچّی روٹی دیندا اے۔

³³کیوں جو خُدا دی روٹی اوہ اے جیہڑی اسمانوں لہندی اے تے دُنیا نُوں زِندگی دیندی اے۔

³⁴تَد اوہناں اوہنوں آکھیا ایہہ روٹی سانُوں سدا دَیا کر۔

³⁵یِسُوع اوہناں نُوں آکھیا زِندگی دی روٹی مَیں آں جیہڑا میرے کول آؤندا اے بُھکھا نا ہوئے گا۔ تے جیہڑا میرے اُتّے اِیمان لیاؤندا اے کدی وی تریہایا نا ہوئے گا۔

³⁶پر مَیں تُہانوں آکھ دِتّا اے پئی تُساں مَینُوں ویکھیا اے۔ تَد وی اِیمان نئیں لیاؤندے۔

³⁷سبھ کُجھ جو باپ مَینُوں دیندا اے میرے ولّ آوے گا تے جیہڑا میرے کول آؤندا اے اوہنوں مَیں کَدے وی باہر نا کڈھاں گا۔

³⁸کیوں جو مَیں اسمانوں اپنی مرضی پُوری کرن نُوں نئیں لتّھا آں۔ پر اوہدی مرضی جِس مَینُوں گھلّیا اے۔

³⁹تے جِس مَینُوں گھلّیا اے اوہدی ایہہ مرضی اے پئی جو کُجھ اوس مَینُوں دِتّا اے اوہدے وِچوں مَیں کُجھ نا گواواں پر اخِیری دِن فیر زِندہ کراں۔

⁴⁰کیوں جو میرے باپ دی ایہہ مرضی اے پئی جیہڑا پُتر نُوں ویکھدا اے تے اوہدے اُتّے اِیمان لیاؤندا اے سدا دی زِندگی اوہنوں مِلے۔ تے اخِیری دِن مَیں اوہنوں فیر زِندہ کراں گا۔

⁴¹تَد ایس لئی پئی اوس آکھیا۔ ”اوہ روٹی جیہڑی اسمانوں لتّھی مَیں آں۔“ یہُودی اوہدی بابت کُڑکُڑان لگّے۔

⁴²تے آکھن لگّے ایہہ یِسُوع یُوسف دا پُتر نئیں اے جِہدے ماں پئیو نُوں اسی جاننے آں؟ اوہ ہُن کِیویں آکھدا اے پئی مَیں اسمانوں لتّھا آں؟

⁴³یِسُوع اوہناں نُوں آکھیا آپو وِچ نا کُڑکُڑاؤ۔

⁴⁴میرے کول کوئی نئیں آسکدا جے باپ جِس مَینُوں گھلّیا اے اوہنوں نا کھِچّے۔ تے اخِیری دِن مَیں اوہنوں فیر زِندہ کراں گا۔

⁴⁵نبیاں دِیاں کِتاباں وِچ ایہہ لِکھیا ہویا اے پئی اوہ سبھ خُدا دے سِکھائے ہوئے ہون گے ہر اِک جِس باپ کولوں سُنیا تے سِکھیا میرے کول آؤندا اے۔

⁴⁶ایہہ نا سمجھو پئی کِسے باپ نُوں ویکھیا اے۔ بِناں اوہدے جیہڑا خُدا ولّوں اے اوس باپ نُوں ویکھیا اے۔

⁴⁷مَیں تُہانوں سَچ سَچ آکھنا آں پئی جیہڑا میرے اُتّے اِیمان لیاؤندا اے سدا دی زِندگی اوہدی اے۔

⁴⁸زِندگی دی روٹی مَیں آں۔

⁴⁹تُہاڈے وڈّیاں بیابان وِچ مَن کھادا تے مر گئے۔

⁵⁰اوہ روٹی جیہڑی اسمانوں لہندی اے ایہہ اے پئی بندہ اوہدے وِچوں کھائے تے نا مرے۔

⁵¹زِندگی دی روٹی مَیں آں جیہڑی اسمانوں لتّھی اے جے کوئی ایس روٹی وِچوں کھائے سدا تِیکر جئے گا۔ سگوں جیہڑی روٹی مَیں دُنیا دی زِندگی لئی دیاں گا اوہ میرا گوشت اے۔

⁵²ایس واسطے یہُودی آپو وِچ جھگڑن لگّے پئی ایہہ اپنا گوشت کِیویں سانُوں کھان نُوں دے سکدا اے؟

⁵³تَد یِسُوع اوہناں نُوں آکھیا مَیں تُہانوں سَچ سَچ آکھنا آں۔ جے تُسی اِبنِ آدم دا گوشت نا کھاؤ تے اوہدا لہو نا پِیو تُہاڈے اپنے وِچ زِندگی اے نئیں۔

⁵⁴اوہ جیہڑا میرا گوشت کھاندا تے میرا لہو پَیندا اے سدا دی زِندگی اوہدی اے۔ تے اخِیری دِن مَیں اوہنوں زِندہ کراں گا

⁵⁵ایس لئی پئی میرا گوشت اصل کھان والی شے تے میرا لہو اصل پِین والی شے اے۔

⁵⁶اوہ جیہڑا میرا گوشت کھاندا تے میرا لہو پَیندا اے میرے وِچ رہندا اے تے مَیں اوہدے وِچ۔

⁵⁷جیویں باپ جیہڑا جِیوندا اے مَینُوں گھلّیا تے مَیں باپ دے سبّب جِیوناں آں۔ اوہ وی جیہڑا مَینُوں کھاندا اے میرے سبّب جیوے گا۔

⁵⁸روٹی جیہڑی اسمانوں لتّھی ایہہ اے۔ اجیہی نئیں جیہڑی وڈّیاں کھادِی تے مر گئے۔ جیہڑا ایس روٹی نُوں کھائے سدا جیوے گا۔

⁵⁹اوس ایہہ گلّاں کَفرنحُوم دے عبادت خانے وِچ سِکھاندیاں ہویاں آکھیاں۔

⁶⁰تَد اوہدے شاگِرداں وِچوں بہتیریاں سُن کے آکھیا ایہہ گلّ سخت اے اوہنوں کون سُن سکدا اے؟

⁶¹پر یِسُوع اپنے آپ جان کے پئی میرے شاگِرد ایس گلّ اُتّے کُڑکُڑاؤندے نیں۔ اوہناں نُوں آکھیا ایہدے توں تُہانوں ٹھوکر لگدی اے۔

⁶²جے تُسی اِبنِ آدم نُوں اوس تھاں جِتّھے پہلاں سی چڑھدیاں ویکھو تَد کِیہ ہوئے گا؟

⁶³جوالن والی تے رُوح اے جِسم توں کُجھ فائدہ نئیں۔ جیہڑیاں گلّاں مَیں تُہانوں آکھیاں نیں۔ اوہ رُوح نیں تے زِندگی وی نیں۔

⁶⁴پر تُہاڈے وِچ کئی نیں جیہڑے اِیمان نئیں لیاؤندے۔ کیوں جو یِسُوع مُڈھوں جان دا سی پئی کیہڑے نیں جیہڑے اِیمان نئیں لیاؤندے۔ تے کون اے جیہڑا مَینُوں پھڑواوے گا۔

⁶⁵تے اوس آکھیا مَیں ایس ای واسطے تُہانوں ایہہ گلّ آکھی اے پئی کوئی میرے کول نئیں آسکدا۔ جے باپ توں اوہنوں بخشیا نا گیا ہوئے۔

⁶⁶ایس گلّ توں بتھیرے اوہدے شاگِرداں وِچوں پِچھّاں مُڑ گئے تے فیر اوہدے نال نا چلّے۔

⁶⁷تَد یِسُوع باراں نُوں آکھیا تُسی وی ٹُر جانا چاہندے ہو؟

⁶⁸شمعُون پطرس اوہنوں جواب دِتّا اَے خُداوند اسی کیہدے کول جائیے؟ سدا دی زِندگی دِیاں گلّاں تے تیرے کول نیں۔

⁶⁹اسی اِیمان لیائے تے جان گئے آں پئی خُدا دا قُدُّوس تُوں ای ایں۔

⁷⁰یِسُوع اوہناں نُوں جواب دِتّا مَیں تُہانوں باراں نُوں نئیں سی چُنیا؟ تے تُہاڈے وِچوں اِک جَنا شیطان اے۔

⁷¹اوس شمعُون اِسکریُوتی دے پُتر یہُوداہ دی گلّ کِیتی۔ ایس لئی پئی اوسے اوہنوں پھڑوانا سی۔ تے باراں وِچوں اِک سی۔