Read Western Panjabi یُوحنّا 7 Bible Online

یُوحنّا 7 - Western Panjabi bible

یُوحنّا 7

¹تے ایدوں بعد یِسُوع گلِیل وِچ پِھردا رہیا کیوں جو یہُودیہ دیس وِچ اوس پِھرنا پسند نا کِیتا ایس کر کے پئی یہُودی اوہدے مارن لئی داء لبّھدے سن۔

²تے یہُودِیاں دی عِیدِ خیام نیڑے سی۔

³سو اوہدے بھراواں اوہنوں آکھیا ایتھوں نِکل کے یہُودیہ نُوں جا۔ پئی تیرے شاگِرد وی اوہناں کمّاں نُوں ویکھن جیہڑے تُوں کرنا ایں۔

⁴کیوں جو کوئی اوہلے وِچ کُجھ نئیں کر دا اے تے چاہندا اے پئی مَیں آپ مشہُور ہوواں۔ جے تُوں ایہہ کمّ کرناں ایں تے اپنے آپ نُوں دُنیا اُتّے ظاہر کر۔

⁵کیوں جو اوہدیاں بھراواں اوہدے اُتّے اِیمان نئیں سی لیاندا۔

⁶سو یِسُوع اوہناں نُوں آکھیا میرا ویلا اجے نئیں آیا پر تُہاڈا ویلا ہمیش تیار رہندا اے۔

⁷دُنیا تُہاڈے نال وَیر نئیں رکھ سکدی۔ پر میرے نال ایس لئی رکھدی اے کیوں جو مَیں اوہدے حق وِچ گواہی دینا آں پئی اوہدے کمّ بُرے نیں۔

⁸تُسی عید نُوں جاؤ مَیں ایس عید نُوں اجے نئیں جاندا۔ کیوں جو میرا ویلا اجے پُورا نئیں ہویا اے۔

⁹اوہناں نُوں ایہہ گلّاں آکھ کے اوہ گلِیل وِچ ای رہیا۔

¹⁰پر جدوں اوہدے بھرا عید نُوں ٹُر گئے اوہ وی گیا۔ کُھلّم کُھلا نئیں پر چُھپ کے۔

¹¹سو یہُودی عید وِچ اوہنوں لَبّھن لگّے۔ تے آکھیا اوہ کِتّھے اے؟

¹²تے اوہدی بابت بُہت لوکاں وِچ اوہدے مارِیاں بڑی بُڑبُڑ ہوئی۔ کئی آکھدے سن اوہ چَنگا بندہ اے۔ تے کئی آکھدے سن نئیں سگوں اوہ لوکاں نُوں بے راہ کر دا اے۔

¹³تَد وی یہُودِیاں دے ڈر دے مارِیاں اوہدی بابت کُھلّم کُھلا کوئی کُجھ نا بولیا۔

¹⁴پر جد اَدھی کُو عید رہندی سی یِسُوع ہیکل وِچ جا کے سکھالن لگّا۔

¹⁵ایس واسطے یہُودِیاں تعجُّب کر کے آکھیا پئی ایس بندے نُوں بِناں سِکھیاں نوِشتیاں دا عِلم کِتّھوں آیا؟

¹⁶تَد یِسُوع اوہناں نُوں جواب دِتّا۔ میری تعلِیم میری نئیں پر میرے گھلّن والے دی اے۔

¹⁷جے کوئی اوہدی مرضی تے چلنا چاہندا اے اوہ ایس تعلِیم نُوں جانے گا پئی خُدا ولّوں اے یا مَیں اپنے ولّوں بولنا آں۔

¹⁸جیہڑا اپنے ولّوں بولدا اے۔ اپنی وڈیائی چاہندا اے پر اوہ جیہڑا اپنے گھلّن والے دی وڈیائی چاہندا اے اوہی سَچّا اے تے اوہدے وِچ کھوٹ نئیں اے۔

¹⁹کِیہ مُوسیٰ تُہانوں شریعت نئیں دِتّی؟ تَد وی تُہاڈے وِچوں کوئی شریعت اُتّے نئیں ٹُردا۔ تُسی کاہِنُوں میرے مار سُٹّن دے مگر پئے ہوئے ہو؟

²⁰لوکاں جواب دِتّا تینُوں بد رُوح چمبڑی ہوئی اے کون تیرے مار سُٹّن دے مگر پیا ہویا اے؟

²¹یِسُوع اوہناں نُوں جواب دِتّا مَیں اِک کمّ کِیتا تے تُسی سبھو اچنبے وِچ پئے ہوئے اوہ۔

²²ایس لئی مُوسیٰ تُہانوں سُنتی بہان دا حُکم دِتّا اے (بھانویں اوہ مُوسیٰ ولّوں نئیں پر وڈّیاں ولّوں اے سی) تے تُسی سبت دے دِن بندے نُوں سُنتی بہاندے ہو۔

²³جد سبت دے دِن بندہ سُنتی بہندا اے پئی کِتے مُوسیٰ دی شریعت ٹُٹ نا جائے۔ تُسی ایس لئی میرے اُتّے غُصّے ہوندے ہو پئی مَیں بندے نُوں سبت دے دِن پُورا چَنگا کِیتا؟

²⁴ویکھن لیکھے نیاں نا کرو پر سَچّا نیاں کرو۔

²⁵تَد بعضے یرُوشلِیمیاں آکھیا ایہہ اوہو نئیں اے جِہدے مار سُٹّن دے مگر پئے ہوئے نیں؟

²⁶پر ویکھو اوہ تے کھُلاّکھُلی بولدا اے تے اوہ اوہنوں کُجھ نئیں آکھدے۔ ایہہ ہو سکدا اے پئی سردار سَچ مُچ سمجھ گئے نیں۔ پئی ایہہ مسِیح اے؟

²⁷ایہنوں تے اسی جاننے آں پئی کِتّھوں دا اے۔ پر مسِیح جد آوے گا کِسے نُوں معلُوم نئیں پئی اوہ کِتّھوں دا اے۔

²⁸ایس واسطے یِسُوع ہیکل وِچ سکھالن ویلے زور نال آکھیا۔ تُسی نالے مَینُوں جان دے ہو تے نالے ایہہ وی جان دے ہو مَیں کِتّھوں دا ہاں۔ تے مَیں اپنے ولّوں نئیں آیا آں۔ پر میرا گھلّن والا جِہنُوں تُسی نئیں جان دے سَچّا اے۔

²⁹مَیں اوہنوں جاننا آں کیوں جو مَیں اوہدے ولّوں آں تے اوس مَینُوں گھلّیا۔

³⁰تَد اوہ چاہندے سن پئی اوہنوں پھڑ لین۔ پر ایس گلّے کِسے اوہنوں ہتّھ نا پایا۔ پئی اوہدا ویلا اجے نئیں سی آیا۔

³¹پر لوکاں وِچوں بتھیرے ایہہ آکھ کے اوہنوں مَن گئے پئی مسِیح جد آئے گا ایہناں نالوں وَدّھ مُعجزے کرے گا۔ جیہڑے ایس کِیتے نیں؟

³²فرِیسیاں سُنیا پئی لوک اوہدے مارِیاں اِنج بُڑبُڑ کر دے نیں۔ تَد فرِیسیاں تے سردار کاہِناں پیادیاں نُوں گھلّیا پئی اوہنوں پھڑ لین۔

³³تَد یِسُوع آکھیا ہور اجے تھوڑا چِر مَیں تُہاڈے نال آں تے جِس مَینُوں گھلّیا مَیں اوہدے کول جانا آں۔

³⁴تُسی مَینُوں ڈُھونڈو گے پر نئیں لَبّھو گے۔ تے جِتّھے مَیں آں تُسی نئیں آسکدے۔

³⁵تَد یہُودی آپو وِچ آکھن لگّے پئی اوہ کِتّھے جائے گا۔ پئی اسی اوہنوں نا لَبّھ سَکاں گے۔ اوہ اوہناں کول جائے گا جیہڑے یُونانِیاں وِچ کھِلّرے ہوئے نیں۔ تے یُونانِیاں نُوں سکھالے گا؟

³⁶ایہہ کِیہ گلّ اے جیہڑی اوس آکھی پئی تُسی مَینُوں ڈُھونڈو گے؟ پر مَینُوں لَبّھ نئیں سکو گے۔ تے جِتّھے مَیں آں تُسی نئیں آسکدے؟

³⁷چھیکڑلے دِن جیہڑا عید دا خاص دِن اے یِسُوع کھلو گیا تے اُچّی اُچّی آکھن لگّا جے کوئی تریہایا ہوئے تے میرے کول آئے تے پِیئے۔

³⁸اوہ جیہڑا میرے اُتّے اِیمان لیاؤندا اے جیہا کتابِ مُقدّس آکھدی اے اوہدے ڈِھڈ وِچوں جیون دے پانی دِیاں ندیاں وَگن گِیاں۔

³⁹پر اوہنے ایہہ رُوح دی بابت آکھیا سی جیہڑا اوہدے مَنّن والیاں نُوں مِلنا سی۔ ایس لئی پئی اجے تِیکر رُوح نئیں سی مِلیا۔ کیوں جو یِسُوع اجے اپنے جلال نُوں نا سی پہنچیا۔

⁴⁰تے لوکاں وِچوں بعضیاں جد ایہہ گلّاں سُنیاں۔ تَد آکھیا سَچ مُچ ایہو اوہ نبی اے۔

⁴¹ہورناں آکھیا پئی ایہہ مسِیح اے۔ پر کئیاں آکھیا مسِیح گلِیلوں آؤندا اے؟

⁴²پاک کتاب نئیں دسدی پئی مسِیح داؤد دی نسلوں تے بَیت لحم دے پِنڈ ولّوں آوے گا۔ جِتّھوں دا داؤد سی؟

⁴³سو لوکاں وِچ اوہدی بابت پُھٹ پَے گئی۔

⁴⁴تے اوہناں وِچوں کئی چاہندے سن پئی اوہنوں پھڑیئے پر کِسے اوہنوں ہتّھ نا پایا۔

⁴⁵تَد اوہ سپاہی سردار کاہِناں تے فرِیسیاں کول آئے تے اوہناں نیں اوہناں نُوں آکھیا۔ تُسی اوہنوں کیوں نئیں لیائے؟

⁴⁶پیادیاں جواب دِتّا پئی کوئی بندہ کَدے ایس طرح نئیں بولیا۔

⁴⁷تَد فرِیسیاں اوہناں نُوں آکھیا۔ تُسی وی بے راہ ہوگئے اوہ۔

⁴⁸سرداراں یا فرِیسیاں وِچوں کِسے اوہنوں مَنّیا اے؟

⁴⁹پر اوہ عام لوک جیہڑے شریعت نُوں نئیں جان دے لعنتی نیں۔

⁵⁰اوہناں وِچوں اِک نِیکُدِیمُس جیہڑا پہلاں وی اوہدے کول آیا سی اوہناں نُوں آکھن لگّا۔

⁵¹کِیہ ساڈی شریعت ایدوں پہلاں پئی کِسے دا عُذر نا سُنے تے معلُوم نا کرے۔ پئی ایہہ کِیہ کر دا اے فتویٰ دیندی اے؟

⁵²اوہناں اوہنوں آکھیا تُوں وی گلِیلوں ایں لَبّھ کے دس؟ تے ویکھ پئی گلِیلوں کوئی نبی نئیں اُٹھ دا۔

⁵³[تے ہر اِک آپو اپنے گھر نُوں ٹُرگیا۔