Read Western Panjabi یُوحنّا 8 Bible Online

یُوحنّا 8 - Western Panjabi bible

یُوحنّا 8

²تے سویرے فیر ہیکل نُوں گیا۔ تے سارے لوک اوہدے کول آئے۔ تے اوہ بَیہہ کے اوہناں نُوں سکھالن لگّا۔

³تَد فقِیہ تے فریسی اِک زنانی نُوں لیائے جیہڑی زنا کر دیاں پَھڑی گئی سی تے اوہنوں وِچکار کھلار کے۔

⁴اوہنوں آکھیا اَے اُستاد ایہہ زنانی زنا کر دیاں ٹھیک ویلے سر پَھڑی گئی اے۔

⁵ہُن شریعت وِچ مُوسیٰ نیں سانُوں حُکم دِتّا پئی ایہو جیہاں نُوں پتّھراں نال مار سُٹّو۔ سو تُوں ایہدی بابت کِیہ آکھنا ایں؟

⁶پر اوہناں اوہنوں ازمان لئی ایہہ گلّ کِیتی سی پئی اوہدے اُتّے نالش کرن دا موقع مِلے۔ پر یِسُوع ہیٹھاں نِیؤں کے اُنگل نال زمین اُتّے لِکھن لگّا۔

⁷جد اوہ اوہنوں پُچھدے ای جاندے سن اوس اُتانہہ ہو کے اوہناں نُوں آکھیا۔ جیہڑا تُہاڈے وِچوں بے گُناہ ہوئے اوہو پہلاں پتّھر اوہدے اُتّے مارے۔

⁸تے فیر ہیٹھاں نِیؤں کے زمین اُتّے لِکھن لگّا

⁹اوہ ایہہ سُن کے وڈّیاں توں لے کے نِکّیاں تِیکر اِک اِک کر کے ٹُر گئے۔ تے یِسُوع اکلّا رہ گیا تے زنانی اوتھے ای وِچکار رہ گئی۔

¹⁰جد یِسُوع اُتانہہ ہو کے زنانی دے بِناں کِسے نُوں نا ویکھیا۔ تے اوہنوں آکھیا۔ اَے عورت اوہ لوک کِتّھے نیں؟ کِسے نیں تیرے اُتّے فتویٰ نئیں دِتّا؟

¹¹تے اوس آکھیا اَے خُداوند کِسے وی نئیں۔ تَد یِسُوع اوہنوں آکھیا مَیں وی تیرے اُتّے فتویٰ نئیں دیندا۔ ٹُر جا تے ایدوں اگّے مُڑ کدی گُناہ نا کریں۔]

¹²تَد یِسُوع فیر اوہناں نُوں آکھیا۔ دُنیا دا چانن مَیں آں۔ اوہ جیہڑا میرے مگر آؤندا اے ہنیرے وِچ نئیں ٹُرے گا سگوں اوہنوں زِندگی دا چانن مِلے گا۔

¹³تَد فرِیسیاں آکھیا اپنے حق وِچ تُوں آپ گواہی دینا ایں۔ تیری گواہی سَچّی نئیں۔

¹⁴یِسُوع اوہناں نُوں آکھیا۔ بھانویں مَیں آپ اپنے حق وِچ گواہی دینا آں تے وی میری گواہی سَچّی اے کیوں جو مَیں جاننا آں پئی کِدھروں آیا تے کِدھر نُوں جانا آں۔ پر تُسی نئیں جان دے پئی کِدھروں آیا آں تے کِدھر نُوں جاناں آں۔

¹⁵تُسی جِسم دے مطابق فیصلہ کر دے اوہ۔ مَیں کِسے دا فیصلہ نئیں کر دا۔

¹⁶تے جے مَیں فیصلہ کرنا آں تے میرا فیصلہ سَچّا اے کیوں جو مَیں اکلّا نئیں آں پر مَیں تے باپ جِس مَینُوں گھلّیا۔

¹⁷تُہاڈی شریعت وِچ لِکھیا اے پئی دو بندیاں دی گواہی سَچّی ہوندی اے۔

¹⁸مَیں آں جیہڑا اپنے حق وِچ گواہی دینا آں تے باپ جِس مَینُوں گھلّیا اے میرے حق وِچ گواہی دیندا اے۔

¹⁹تَد اوہناں اوہنوں آکھیا کِتّھے اے تیرا باپ؟ یِسُوع جواب دِتّا نا تُسی مَینُوں جان دے ہو تے نا میرے باپ نُوں جے تُسی مَینُوں جان دے تے میرے باپ نُوں وی جان دے۔

²⁰اوس ہیکل دے وِچ تعلِیم دیندیاں ہویاں ایہہ گلّاں خزانے وِچ آکھیاں۔ تے کِسے اوہنوں نا پھڑیا کیوں جو اوہدا ویلا اجے نئیں سی آیا۔

²¹تَد اوس فیر اوہناں نُوں آکھیا مَیں جاناں آں۔ تے تُسی مَینُوں لَبّھو گے تے اپنے گُناہ وِچ مرو گے۔ جِتّھے مَیں جانا آں تُسی نئیں آسکدے۔

²²تَد یہُودِیاں آکھیا اوہ اپنے آپ نُوں مار سُٹّے گا جیہڑا آکھدا اے پئی جِتّھے مَیں جاناں آں تُسی نئیں آسکدے؟

²³تے اوس اوہناں نُوں آکھیا تُسی ہیٹھوں ہو مَیں اُتّوں آں۔ تُسی ایس دُنیا توں ہو مَیں ایس دُنیا توں نئیں۔

²⁴ایس کر کے مَیں تُہانوں آکھیا پئی تُسی اپنے گُناہاں وِچ مرو گے کیوں جو جے تُسی نئیں مَنّو گے پئی مَیں اوہو آں تے تُسی اپنے گُناہاں وِچ مرو گے۔

²⁵تَد اوہناں اوہنوں آکھیا تُوں ایں کون؟ یِسُوع اوہناں نُوں آکھیا۔ اوہ جیہڑا مَیں تُہانوں مُڈھوں دسدا آیا۔

²⁶مَینُوں تُہاڈی بابت بُہت کُجھ بولنا تے فیصلہ کرنا اے۔ پر میرا گھلّن والا سَچّا اے۔ تے جیہڑیاں گلّاں مَیں اوہدے کولوں سُنیاں نیں سو ای مَیں دُنیا وِچ بولنا آں۔

²⁷اوہناں نُوں پَتا نا لگّا پئی اوہ ساڈے نال باپ دی گلّ کر دا اے۔

²⁸ایس لئی یِسُوع آکھیا جد تُسی اِبنِ آدم نُوں اُچیاں کرو گے تَد تُہانوں پتا لگّے گا پئی مَیں اوہ آں تے ایہہ پئی مَیں اپنے ولّوں کُجھ نئیں کر دا آں۔ پر جیویں باپ مَینُوں سکھالیا مَیں ایہہ گلّاں کر دا آں۔

²⁹تے میرا گھلّن والا میرے نال اے اوس مَینُوں اکلّا نئیں چھڈیا کیوں جو مَیں ہمیش اوہ ای کمّ کرنا آں جیہڑے اوہنوں چنگے لگدے نیں۔

³⁰جد اوہ ایہہ گلّاں پیا آکھدا سی بتھیرے اوہدے اُتّے اِیمان لیائے۔

³¹تَد یِسُوع اوہناں یہُودِیاں نُوں جیہڑے اوہدے اُتّے اِیمان لیائے سن آکھیا۔ جے تُسی میرے کلام وِچ رہو گے تَد تُسی سَچ مُچ میرے شاگِرد بنو گے۔

³²تے تُسی سچیائی نُوں جانو گے تے سچیائی تُہانوں اَزاد کرے گی۔

³³اوہناں اوہنوں آکھیا اسی ابرہام دی نسل آں تے کَدے کِسے دے غلام نئیں ساں ہوئے۔ تُوں کِیویں آکھنا ایں پئی تُسی اَزاد ہوؤ گے؟

³⁴یِسُوع جواب دِتّا۔ مَیں تُہانوں سَچ سَچ آکھنا آں جیہڑا کوئی گُناہ کر دا اے گُناہ دا غلام اے

³⁵تے غلام ہمیش گھر وِچ نئیں رہندا پر پُتر سدا رہندا اے۔

³⁶تے جے پُتر تُہانوں اَزاد کرے گا تے تُسی ٹھیک اَزاد ہوؤگے۔

³⁷مَیں جاننا آں پئی تُسی ابرہام دی نسل اوہ۔ تَد وی تُسی میرے مارن دا راہ لبّھدے اوہ۔ کیوں جو میرے کلام نُوں تُہاڈے وِچ تھاں نئیں مِلدا۔

³⁸جو کُجھ مَیں اپنے باپ کول ویکھیا اے اوہو مَیں بولنا آں۔ تے تُسی اوہو کر دے ہو جیہڑا تُساں اپنے پئیو کولوں سُنیا اے۔

³⁹اوہناں اوہنوں آکھیا ساڈا پئیو ابرہام اے۔ یِسُوع اوہناں نُوں آکھیا جے تُسی ابرہام دی اولاد ہوندے تے ابرہام جیہے کمّ کر دے۔

⁴⁰پر ہُن میرے جیہے بندے نُوں مارنا چاہندے اوہ جِس تُہانوں ایہہ سَچّی گلّ دسی اے۔ جیہڑی مَیں خُدا کولوں سُنی۔ ابرہام اجیہا نئیں کِیتا۔

⁴¹تُسی اپنے پئیو دے کمّ کر دے اوہ۔ اوہناں اوہنوں آکھیا اسی حرامدے نئیں جمّے۔ ساڈا اِک باپ اے یعنی خُدا۔

⁴²یِسُوع اوہناں نُوں آکھیا جے خُدا تُہاڈا باپ ہوندا تے تُسی مَینُوں پیار کر دے۔ کیوں جو مَیں خُدا توں نِکلیا تے آیا آں۔ تے مَیں آپ توں نئیں آیا آں پر اوس مَینُوں گھلّیا۔

⁴³تُسی میرِیاں گلّاں کیوں نئیں سمجھدے؟ ایس لئی پئی تُسی میرے کلام نُوں نئیں سُن سکدے۔

⁴⁴تُسی اپنے پئیو ابلیس توں ہو تے اپنے پئیو دِیاں خواہشاں نُوں پُورا کرنا چاہندے اوہ۔ اوہ مُڈھوں ای خُونی سی تے سچیائی اُتّے کھلوتا نا رہیا کیوں جو اوہدے وِچ سچیائی اے نئیں۔ جدوں اوہ جُھوٹھ بولدا اے اوہ اپنے ای ولّوں بولدا اے کیوں جو اوہ جُھوٹھا اے تے جُھوٹھ دا پئیو اے۔

⁴⁵پر تُسی مَینُوں ایس گلّے نئیں مَن دے کیوں جو مَیں سَچ آکھنا آں۔

⁴⁶تُہاڈے وِچوں کون اے جیہڑا میرے اُتّے گُناہ ثابت کر دا اے جے مَیں سَچ آکھنا آں تُسی مَینُوں کیوں نئیں مَن دے؟

⁴⁷اوہ جیہڑا خُدا توں اے خُدا دِیاں گلّاں سُندا اے تُسی ایس کر کے نئیں سُندے کیوں جو خُدا توں نئیں ہو۔

⁴⁸یہُودِیاں نیں جواب دِتّا اساں ٹھیک نئیں آکھیا پئی تُوں سامری ایں تے تینُوں بد رُوح چمبڑی ہوئی اے؟

⁴⁹یِسُوع جواب دِتّا۔ میرے وِچ بد رُوح نئیں پر مَیں اپنے باپ دی عِزّت کرنا آں تے تُسی میری بے عِزّتی کر دے ہو۔

⁵⁰پر مَیں اپنا جلال نئیں لَبّھدا۔ اِک اے جیہڑا لَبّھدا تے فیصلہ کر دا اے۔

⁵¹مَیں تُہانوں سَچ سَچ آکھنا آں۔ جے کوئی میرِیاں گلّاں نُوں مَنّے اوہ مَوت نُوں کدی وی نئیں ویکھے گا۔

⁵²تَد یہُودِیاں اوہنوں آکھیا ہُن اساں جان لیا اے پئی تیرے وِچ بد رُوح اے۔ ابرہام نیں بنی تے مر گئے پر تُوں آکھنا ایں پئی جیہڑا میرِیاں گلّاں نُوں مَنّے اوہ کدی وی مَوت دا سواد نا لَئے گا۔

⁵³تُوں ساڈے پئیو ابرہام نالوں وَڈا ایں؟ اوہ تے مر گیا اے تے نبی وی مر گئے تُوں اپنے آپ نُوں کِیہ بنانا ایں؟

⁵⁴یِسُوع جواب دِتّا جے مَیں اپنے آپ نُوں وڈیاواں تے میری وڈیائی کُجھ نئیں اے۔ پر میری وڈیائی میرا باپ کر دا اے جِہنُوں تُسی آکھدے ہو پئی اوہ ساڈا خُدا اے۔

⁵⁵تے تُساں اوہنوں نئیں پِچھانیا اے پر مَیں اوہنوں جاننا آں۔ تے جے مَیں آکھاں پئی مَیں اوہنوں نئیں جان دا تے تُہاڈے وانگُوں جُھوٹھا ہوواں گا۔ پر مَیں اوہنوں جاننا آں تے اوہدے کلام نُوں مَنّنا آں۔

⁵⁶تُہاڈا پئیو ابرہام بڑا ای خُوش سی پئی میرا دِن ویکھے تے اوس ویکھیا تے خُوش ہویا۔

⁵⁷تَد یہُودِیاں اوہنوں آکھیا تُوں اجے تِیکر پنجاہاں ورھیاں دا نئیں ہویا تُوں ابرہام نُوں ڈِٹّھا اے؟

⁵⁸یِسُوع اوہناں نُوں آکھیا مَیں تُہانوں سَچ سَچ آکھنا آں۔ ایدوں پہلاں پئی ابرہام سی مَیں آں۔

⁵⁹تَد اوہناں اوہنوں مارن لئی پتّھر چُکے۔ پر یِسُوع لُک گیا تے ہیکلوں باہر نِکل گیا۔