Read Western Panjabi یُوحنّا 9 Bible Online

یُوحنّا 9 - Western Panjabi bible

یُوحنّا 9

¹تے اوس لنگھدیاں ہویاں اِک جماندرُو اَنھے نُوں ویکھیا۔

²تے اوہدے شاگِرداں اوہنوں پُچھیا پئی اَے ربّی کِس گُناہ کِیتا۔ ایس یا ایہدے ماپیاں پئی ایہہ اَنھا جمّیا؟

³یِسُوع جواب دِتّا۔ گُناہ نا تے ایس کِیتا نا ایہدے ماپیاں نیں پر ایس لئی پئی خُدا دے کمّ اوہدے وِچ ظاہر ہون۔

⁴جد تِیکر دِن اے سانُوں اوہدے کمّ کرنے پَیندے نیں جِس مَینُوں گھلّیا اے۔ رات آؤندی اے جد کوئی کمّ نئیں کر سکدا

⁵جد تِیکر مَیں دُنیا وِچ آں مَیں دُنیا دا چانن آں۔

⁶ایہہ آکھ کے اوس زمین اُتّے تُھکیا تے تُھک نال مِٹّی گُتّھی تے اوہدیاں اَکھّیاں اُتّے اوہ مِٹّی لمِب دِتّی۔

⁷تے اوہنوں آکھیا جا شِیلوخ دے حوض وِچ (جِہدا مطلب گھلّیا ہویا اے) نہا۔ تَد اوہ جا کے نہاتا تے سُجاکھا ہو کے آیا۔

⁸تَد گوانڈِھیاں تے اوہناں وی جِنہاں اوہنوں بھیکھ منگدیاں ویکھیا سی آکھیا ایہہ اوہو نئیں اے جیہڑا بَیہہ کے منگدا ہوندا سی؟

⁹ہورناں آکھیا پئی ایہہ اوہی اے۔ ہورناں آکھیا نئیں پر اوہدے وانگر اے۔ پر اوس آکھیا۔ مَیں اوہی آں۔

¹⁰تَد لوکاں اوہنوں آکھیا۔ فیر تیریاں اَکھّیاں کِیویں کُھل گِئیاں؟

¹¹اوس جواب دِتّا اِک بندے جِہنُوں یِسُوع آکھدے نیں اوس مِٹّی گُنّھ کے میرِیاں اَکھّیاں اُتّے لیپ کِیتا تے مَینُوں آکھیا جا شِیلوخ دے حوض وِچ نہا۔ مَیں گیا تے نہاتا تے ویکھن لگّا۔

¹²تَد اوہناں اوہنوں پُچھیا اوہ کِتّھے اے؟ اوس آکھیا مَیں نئیں جان دا۔

¹³اوہ اوہنوں جیہڑا پہلاں اَنھا سی فرِیسیاں کول لیائے۔

¹⁴تے جِس دِن یِسُوع مِٹّی گُنّھ کے اوہدیاں اَکھّیاں کھولِیاں سبت دا دِن سی۔

¹⁵ایس لئی فیر فرِیسیاں وی اوہنوں پُچھیا پئی تُوں کِیویں ویکھن لگ پیا؟ اوس اوہناں نُوں آکھیا۔ اوس میرِیاں اَکھّیاں اُتّے مِٹّی لائی تے مَیں نہاتا تے سُجاکھا آں۔

¹⁶تَد فرِیسیاں وِچوں کئیاں آکھیا پئی ایہہ بندہ ربّ ولّوں نئیں اے کیوں جو اوہ سبت نُوں نئیں مَندا۔ پر ہورناں آکھیا گُناہگار بندہ کِیویں ایہو جِہیاں کراماتاں وکھا سکدا اے؟ تے اوہناں وِچ پُھٹ پئی۔

¹⁷تَد اوہناں اوس اَنھے نُوں آکھیا تُوں اوہدے حق وِچ کِیہ آکھنا ایں اوس تیریاں اکھّاں جو کھولِیاں؟ اوس آکھیا اوہ نبی اے۔

¹⁸پر یہُودِیاں اوہدی بابت سَچ نا مَنّیا پئی اوہ اَنھا سی تے فیر ویکھن لگّا جِنّاں چِر اوس سُجاکھے ہوئے دے ماپیاں نُوں سَدّ کے۔

¹⁹اوہناں کولوں ایہہ پُچھ نا لیا پئی ایہو تُہاڈا پُتر اے جیہڑا تُسی آکھدے ہو پئی اَنھا جمّیا سی؟ فیر ہُن کِیویں ویکھدا اے؟

²⁰اوہدے ماپیاں اوہناں نُوں جواب دِتّا اسی جاننے آں پئی ایہہ ساڈا پُتر اے تے اَنھا جمّیا سی۔

²¹پر ایہہ سانُوں پتا نئیں پئی ہُن کِس طرح ویکھدا اے تے نا سانُوں خبر اے پئی ہُن کِس اوہدیاں اَکھّیاں کھول دِتّیاں نیں۔ اوہنوں پُچھو اوہ جوان اے اپنا حال اوہ آپے دسے گا۔

²²ایہہ گلّاں اوہدے ماپیاں ایس واسطے آکھیاں کیوں جو اوہ یہُودِیاں کولوں ڈر دے سن۔ ایس لئی پئی یہُودِیاں آپو وِچ ایکا کِیتا ہویا سی پئی جیہڑا کوئی اوہنوں مسِیح آکھے عبادتخانیوں کڈھیا جائے۔

²³تَدے اوہدے ماپیاں آکھیا سی اوہ جوان اے۔ اوہنوں پُچھو۔

²⁴تَد دُوجی واری اوہناں اوس بندے نُوں جیہڑا اَنھا سی سَدّ کے آکھیا۔ ربّ دی وڈیائی کر۔ اسی جاننے آں پئی ایہہ گُناہگار بندہ اے۔

²⁵اوس جواب دِتّا مَیں نئیں جان دا پئی اوہ گُناہگار اے کہ نئیں۔ پر اِک گلّ مَیں جاننا آں پئی مَیں اَنھا ساں تے ہُن سُجاکھا آں۔

²⁶تَد اوہناں اوہنوں آکھیا اوس تینُوں کِیہ کِیتا؟ اوس تیریاں اَکھّیاں کِس طرح کھولِیاں؟

²⁷اوس اوہناں نُوں جواب دِتّا مَیں ہُنے تُہانوں دسیا اے تے تُساں سُنیا نئیں مُڑ تُسی کاہدے لئی سُننا چاہندے اوہ۔ تُسی وی اوہدے شاگِرد تے بننا نئیں چاہندے؟

²⁸تَد اوہناں اوہنوں پھٹکاریا تے آکھیا۔ تُوں ای اوہدا شاگِرد ایں پر اسی تے مُوسیٰ دے شاگِرد آں۔

²⁹سانُوں معلُوم اے پئی خُدا مُوسیٰ نال کلام کِیتا ہے پر ایہنوں اسی نئیں جان دے پئی ایہہ کِتّھوں دا اے۔

³⁰اوس بندے اوہناں نُوں جواب دِتّا ایہہ تے اچرج گلّ اے پئی تُسی نئیں جان دے پئی اوہ کِتّھوں دا اے تے اوس میرِیاں اَکھّیاں کھول دِتّیاں۔

³¹اسی جاننے آں پئی خُدا گُناہگار دی نئیں سُندا پر جے کوئی خُدا دا بَھگت ہوئے تے اوہدی مرضی اُتّے چلّے۔ اوہ اوہدی سُندا اے۔

³²دُنیا دے شُروع توں نئیں سُنیا گیا پئی کِسے جماندرُو اَنھے دِیاں اَکھّیاں کھولِیاں ہون۔

³³جے اوہ بندہ خُدا ولّوں نا ہوندا تے کُجھ نا کر سکدا۔

³⁴اوہناں اوہنوں جواب وِچ آکھیا تُوں تے گُناہاں وِچ جمّیا سائیں تے سانُوں سکھانا ایں؟ تے اوہنوں باہر کڈھ دِتّا۔

³⁵یِسُوع سُنیا پئی اوہناں اوہنوں کڈھ دِتّا۔ تے اوہنوں لَبّھ کے آکھیا تُوں خُدا دے پُتر اُتّے اِیمان لیاؤنا ایں؟

³⁶اوس آکھیا اَے خُداوند اوہ کیہڑا اے پئی مَیں اوہدے اُتّے اِیمان لیاواں؟

³⁷یِسُوع اوہنوں آکھیا تُوں تے اوہنوں ویکھیا اے تے اوہ اوہو اے جیہڑا تیرے نال گلّاں کر دا اے۔

³⁸اوس آکھیا اَے خُداوند مَیں اِیمان لیاؤنا واں۔ تے اوس اوہنوں سجدہ کِیتا۔

³⁹تے یِسُوع آکھیا ایس دُنیا وِچ مَیں عدالت کرن آیا آں پئی اوہ جِنہاں نُوں نئیں دِسدا ویکھن تے جِنہاں نُوں دِسدا اے اَنھے ہو جان۔

⁴⁰اوہناں فرِیسیاں جیہڑے اوہدے نال سن ایہہ سُن کے اوہنوں آکھیا اسی وی اَنھے آں؟

⁴¹یِسُوع اوہناں نُوں آکھیا جے تُسی اَنھے ہوندے تے تُہاڈا گُناہ نا ہوندا۔ پر ہُن تُسی آکھدے ہو پئی سانُوں دِسدا اے۔ تُہاڈا گُناہ تُہاڈے ذِمّے رہندا اے۔