Read Western Panjabi اعمال 12 Bible Online

اعمال 12 - Western Panjabi bible

اعمال 12

¹تے اوہناں دِناں وِچ ہیرودیس بادشاہ کلِیسیا دے کئی لوکاں نُوں دُکھ دین اُتّے لکّ بَدّھا۔

²تے یُوحنّا دے بھرا یعقُوب نُوں تلوار نال مار سُٹّیا۔

³تے جد ویکھیا پئی یہُودِیاں نُوں ایہہ گلّ چنگی لگدی اے۔ تَد ہور وی وادھا کِیتا پئی پطرس نُوں وی پھڑ لیا ایہہ بے خمیری روٹی دے دِناں وِچ ہویا۔

⁴سو اوہنوں قابُو کر کے قید وِچ پا دِتّا۔ تے چَوہاں چَوہاں سپاہیاں دے چَوہاں پَہریاں وِچ سونپیا۔ پئی اوہدی خبرداری کرن۔ تے ایہہ صلاح کِیتی پئی اوہنوں فسح دی عید دے پِچّھوں لوکاں دے سامھنے لیاوے۔

⁵سو قید وِچ پطرس دی خبرداری ہوندی رہی۔ پر کلِیسیا دِل لا کے اوہدے لئی خُدا کولوں دُعا منگدی سی۔

⁶تے جدوں ہیرودیس اوہنوں باہر لیاؤن نُوں تیار سی۔ اوسے رات پطرس دو سنگلاں وِچ بَدّھا ہویا دو سپاہیاں دے وِچکار سُتّا ہویا سی۔ تے پہرے والے قیدخانے دے بُوہے اگّے پَہرا پئے دیندے سن۔

⁷تے ویکھو خُدا دا اِک فرِشتہ آ کھلوتا۔ تے اوس کوٹھڑی وِچ نُور چمکیا تے اوس پطرس دی وَکھّی اُتّے مار کے جگایا۔ تے اوہنوں آکھیا چھیتی نال اُٹھ کھلو۔ تے اوہدیاں ہتھکڑیاں اوہدیاں ہتّھاں توں جھڑ پئیاں۔

⁸تے فرِشتے اوہنوں آکھیا لکّ بَنّھ تے اپنی جُتّی پا۔ اوس اوسے طرح کِیتا۔ فیر اوس اوہنوں آکھیا۔ اپنا کپڑا دوالے پا۔ تے میرے مگر آ۔

⁹تے نِکل کے اوہ پِچّھے پِچّھے ٹُر پیا تے نئیں سی جان دا پئی جو کُجھ فرِشتے ولّوں پیا ہوندا اے سو سَچ اے۔ پر سمجھیا پئی مَیں رویا پیا ویکھنا ہاں۔

¹⁰تَد اوہ پہلے تے دُوجے پہرے وِچوں دی نِکل گئے۔ تے لوہے دے پھاٹک تِیکر اَپڑے۔ جیہڑا شہر ولّ اے اوہ آپی اوہناں لئی کُھل گیا۔ تے اوہ نِکل کے اِک گلی وِچوں دی ٹُر پئے فرِشتہ اوس ویلے اوہدے توں وکھرا ہوگیا۔

¹¹تے پطرس نے سُرت وِچ آ کے آکھیا۔ ہُن مَیں ٹھیک جانیا پئی خُداوند نے اپنا فرِشتہ گھلّیا۔ تے ہیرودیس دے ہتھّوں مَینُوں بچایا۔ تے یہُودِیاں دی قوم دی ساری آس توڑ دِتّی۔

¹²تَد وچار کر کے اوہ یُوحنّا دی ماں مریم دے گھر آیا۔ جیہڑا مرقس اکھواؤندا اے۔ اوتھے بتھیرے لوک اکٹّھے ہو کے دُعا پئے منگدے سن۔

¹³تے جد اوہ بُوہے دی باری کھڑکاؤندا سی۔ تَد رُدی ناں دی ٹہلن سُنن آئی۔

¹⁴تے پطرس دی بولی پچھان کے خُوشی نال بُوہا نا کھولیا پر اندر دَوڑ کے خبر دِتّی پئی بُوہے اگّے پطرس کھلوتا اے۔

¹⁵اوہناں اوہنوں آکھیا۔ تُوں کملی ہوئی ایں۔ پر اوہ اپنی گلّ اُتّے پَکّی رہی۔ پئی ایسے طرح اے۔ تَد اوہناں آکھیا پئی اوہدا فرِشتہ ہوئے گا۔

¹⁶پر پطرس بُوہا کھڑکاؤندا رہیا۔ تَد اوہناں کھول کے ویکھیا تے حَیران ہوگئے۔

¹⁷پر اوس ہتّھ نال سینت کِیتی پئی چُپ کر رہن تے اوہناں نُوں دسیا پئی خُداوند مَینُوں کِس طرح قیدخانے توں باہر لیایا۔ تے اوس آکھیا یعقُوب نُوں تے بھراواں نُوں ایہناں گلّاں دی خبر کر دین تے اوہ باہر جا کے دُوجے تھاں ٹُر گیا۔

¹⁸تے جدوں نِکلیا سپاہیاں وِچ بڑا رَولا پَے گیا۔ پئی پطرس کِیہ ہویا

¹⁹تے جدوں ہیرودیس اوہنوں بھپا تے اوہ نا لَبھّا۔ تے پہرے والیاں توں پُچھ گچھ کر کے اوہناں نُوں قتل کرن دا حُکم دِتّا۔ تے آپ یہُودیہ ٹُرکے قَیصریہ وِچ جا رہیا۔

²⁰تے صُور تے صَیدا دے لوکاں نال ہیرودیس بُہت ناراض سی۔ تے اِک دِل ہو کے اوہ اوہدے کول آئے تے بلَستُس نال مَیل کر کے صُلح صفائی کرنی چاہی۔ کیوں جو اوہناں دے مُلک نُوں بادشاہ دے مُلک توں رسد دِیاں شیواں آؤندیاں سن۔

²¹تے ہیرودیس اِک تاریخ مِتھ کے بادشاہی کپڑے پا کے تخت اُتّے بَیٹھ گیا۔ تے اوہناں نال گلّ کرن لگّا۔

²²تے لوک بول اُٹھے پئی ایہہ تاں خُدا دی اواز اے نا بندے دی۔

²³تے اونویں خُداوند دے فرِشتے اوہنوں ماریا۔ ایس لئی پئی اوس خُدا دی وڈیائی نئیں کِیتی۔ تے اوہنوں کِیڑے پَے گئے تے مر گیا۔

²⁴پر خُدا دا کلام وَدھدا تے پَھلدا رہیا۔

²⁵تے برنباس تے ساؤُل اپنی خِدمت پُوری کر کے۔ تے یُوحنّا نُوں جیہڑا مرقس اکھواؤندا اے نال لے کے یرُوشلِیم توں ٹُر گئے۔