Read Western Panjabi اعمال 18 Bible Online

اعمال 18 - Western Panjabi bible

اعمال 18

¹ایدوں پِچّھوں پَولُس اتھینے توں ٹُر کے کُرِنتِھس وِچ آیا۔

²تے اوتھے اَکوِلہ کر کے اِک یہُودی اوہنوں مِلیا۔ جِہدا جنم پُنطُس دا سی۔ تے تھوڑا چِر ہویا پئی اوہ اپنی بیوی پرسِکّلہ دے نال اِطالِیہ توں آیا سی کیوں جو کلَودِیُس نے حُکم دِتّا سی پئی سارے یہُودی رُومہ توں ٹُر جان۔ سو اوہ اوہناں دے کول گیا۔

³تے ایس لئی پئی اوہناں دا وِپار اِکّو سی۔ اوہناں دے نال رہیا۔ تے اوہ رَل کے کمّ کرن لگّے۔ کیوں جو اوہ وِپار ولّوں تنبُو سیون والے سن۔

⁴تے اوہ ہر سبت نُوں عبادت خانے وِچ جا کے بحث کر دا تے یہُودِیاں تے یُونانِیاں نُوں مناندا سی۔

⁵تے جد سِیلاس تے تِیمُتِھیُس مَکِدُنیہ توں آگئے تَد پَولُس کلام سُنان دے جوش نال مجبُور ہو کے یہُودِیاں اگّے گواہی پیا دیندا سی۔ پئی یِسُوع ای مسِیح اے۔

⁶تے جد اوہ مخالفت کرن تے کُفر بکن لگّے۔ تے اوس اپنے کپڑے پھاڑ کے اوہناں نُوں آکھیا۔ تُہاڈا خُون تُہاڈے سِر اُتّے ہوئے میرے ذِمّے نئیں رہیا۔ ایدوں اگّے غیر قوماں ولّ جاواں گا۔

⁷سو اوہ اوتھوں ٹُرگیا۔ تے طِطُس یُوستُس کر کے خُدا دے اِک بَھگت دے گھر گیا۔ جیہڑا عبادت خانے دا گواہنڈ سی۔

⁸تے عبادت خانے دا سردار کرِسپُس کر کے اپنے سارے گھرانے سَنے خُداوند اُتّے اِیمان لیایا تے بتھیرے کُرِنتھی سُن کے اِیمان لیائے۔ تے بپتِسمہ لیا۔

⁹تَد خُداوند رات دے ویلے رویا وِچ پَولُس نُوں آکھیا پئی نا ڈر سگوں آ کھدا جا تے چُپ نا ہو۔

¹⁰کیوں جو مَیں تیرے نال ہاں۔ تے کوئی تیرے اُتّے حملہ کر کے تیرا نُقصان نا کر سکے گا۔ کیوں جو ایس شہر وِچ میرے بتھیرے لوک نیں۔

¹¹سو اوہ ڈیڑھ وَرھا اوتھے رہیا۔ تے اوہناں وِچ خُدا دا کلام سِکھالدا رہیا۔

¹²تے جد گلیّو اَخیہ دا صُوبے دار سی۔ یہُودی اِک صلاح کر کے پَولُس اُتّے چڑھ آئے۔ تے اوہنوں کچہری وِچ لے گئے۔

¹³تے آکھن لگّے ایہہ جَنا لوکاں نُوں مناندا اے پئی شریعت دے خلاف خُدا دی عبادت کرن۔

¹⁴تے جد پَولُس اپنا مُنھ کھولن لگّا۔ گلیّو نے یہُودِیاں نُوں آکھیا اَے یہُودیو جے ایہہ ظُلم یا کوئی سخت شرارت ہوندی۔ تے عقل آکھدی اے پئی مَیں تُہاڈی سَہجے نال سُن لَیندا۔

¹⁵پر جے نِرے لفظاں تے نانواں تے تُہاڈی شریعت دِیاں گلّاں نیں۔ تے تُسی جانو۔ میری نئیں صلاح پئی ایہناں گلّاں دا مُنصف ہوواں۔

¹⁶تے اوس اوہناں نُوں کچہری وِچوں کڈھ دِتّا۔

¹⁷تے ساریاں نیں عبادت خانے دے سردار سوستِھینس نُوں پھڑ کے کچہری دے سامھنے ماریا پر گلیّو نے ایہناں گلّاں دی کُجھ پرواہ نا کِیتی۔

¹⁸تے پَولُس اجے ہور بتھیرے دِن اوتھے رہ کے بھراواں توں وِداع ہویا۔ تے اوس کِنخریہ دے وِچ سِر مُنایا سی کیوں جو اوس مَنّت مَنّی سی۔ تے جہاز اُتّے چڑھ کے سُوریہ نُوں ٹُر پیا۔ تے پرسِکّلہ تے اَکوِلہ اوہدے نال سن۔

¹⁹تے اِفِسُس وِچ اَپڑ کے اوس اوہناں نُوں اوتھے چھڈیا تے آپی عبادت خانے وِچ جا کے یہُودِیاں نال بحث کرن لگّا۔

²⁰تے جد اوہناں اوہدی مِنّت کِیتی پئی ہور تھوڑا چِر رہے اوس نا مَنّیاں۔

²¹سگوں ایہہ آکھ کے۔ پئی جے خُدا چاہے تُہاڈے کول مُڑ آواں گا۔ تے اوہ اوہناں توں وِداع ہویا۔ تے جہاز اُتّے چڑھ کے اِفِسُس توں ٹُر پیا۔

²²تے اوہ قَیصریہ وِچ اُتر کے یرُوشلِیم نُوں گیا۔ تے کلِیسیا نُوں سلام کر کے انطاکیہ نُوں گیا۔

²³تے کُجھ چِر اوتھے رہ کے ٹُر پیا۔ تے گلِتیہ تے فرُوگیہ دے دیس وِچ دی لنگھدیاں ہویاں ساریاں شاگِرداں نُوں تگڑا کر دا گیا۔

²⁴تے اِک یہُودی اُپلّوس کر کے جِہدا جنم اِسکندریہ دا سی۔ اِک عالِم بندہ اِفِسُس وِچ آیا۔ تے اوہ پاک کتاب وِچ بڑا سُگھڑ سی۔

²⁵ایہہ بندہ خُدا دی راہ سِکھیا ہویا سی۔ تے بڑے جوش نال گلّاں کر دا سی۔ تے یِسُوع دی بابت ٹھیک ٹھیک سِکھالدا سی۔ پر نِرا یُوحنّا دا بپتِسمہ جان دا سی۔

²⁶تے عبادت خانے وِچ اوہ دلیری نال بولن لگّا۔ جدوں پرسِکّلہ تے اَکوِلہ نے اوہدی سُنی اوہناں اپنے کول لیا کے خُدا دا راہ ہور وی ٹھیک طرح نال اوہنوں دسیا۔

²⁷تے جد اوہ اَخیہ نُوں لنگھناں چاہندا سی۔ بھراواں اوہدی ہِمّت وَدّھا کے شاگِرداں نُوں لِکھ گھلّیا۔ پئی اوہنوں چنگی طرح مِلن۔ تے اوس اَپڑ کے اوہناں لوکاں دی بڑی مدد کِیتی جِنہاں فضل نال اِیمان لیاندا سی۔

²⁸کیوں جو اوس یہُودِیاں نُوں ساریاں دے سامھنے بڑے زور نال قائل کر دِتّا۔ تے پاک کتاب دی راہِیں صاف ثابت کِیتا۔ پئی یِسُوع ای مسِیح اے۔